Matiyu 16
16
Falisilu ni Sadusilu vɛɛ ko Isa yi kawananko tɔɔmase dɔ kɛ
Malɛkɛ 8.11-13; Luka 12.54-56
1 #
Matiyu 12.38; Luka 11.16. Falisi ni Sadusi dɔlu ka na Isa ma a lɔsumanko lɔ, ko a yi kawananko tɔɔmase dɔ kɛ ai ɲakɔlɔ min bɔnin Ala fɛ. 2Isa do vɛɛ ai yɛ: «Ài vɛ sangbolo ɲa wulɛnnin yena teleben waate, ài y'a fɔla ko: ‹Bana makatɔle kobɛn sinin›. 3Sɔɔmadala, ài vɛ sangbolo ɲala finnin yena, ài y'a fɔla ko: ‹Sanji natɔle bi, kamasɔlɔn san finnin›. Ài senin sangbolo lasaala teme k'a kɔlɔ lɔn. A yi di vɛ ài tɛ se waate min tɔɔmaselu lasaala k'ai kɔlɔ lɔn fana? 4#Matiyu 12.39; Luka 11.29.Bi mɔɔlu yi limaniyabali le le ani kɔnɔlɔgbeyamɔɔ. Ai yi kawananko tɔɔmase dɔ ɲininna, kɛɛ tɔɔmase foi tɛnala jiyala ai la mafɔ Nabi Yunusa ta.»
Wo fɔ a bolo, a k'ai to je ka taa.
Falisilu ni Sadusilu ya bululafununsɛɛ
Malɛkɛ 8.14-21
5Isa kɔbiladennu ka kɔɔ tɛɛ mingɛ, ai hangili ka bila ko ai vɛ ɲina bulu kɔ. 6#Luka 12.1.Wo ma, Isa vɛɛ ai yɛ: «Ài y'ài jando ài jɛlɛ lɔ ka bɛn Falisilu ni Sadusilu ya bululafununsɛɛ ma.»
7A kɔbiladennu do vɛɛ i ɲɔɔ yɛ: «A yi wo fɔla kamasɔlɔn mɔ ma na bulu le.»
8Isa k'ai miliya lɔn mingɛ, a vɛɛ ai yɛ: «Àilu minu ya limaniya dɔɔyanin, mindɛ lɔ ài y'a fɔla i ɲɔɔ yɛ ko bulu tɛ ài bolo? 9#Matiyu 14.17-21.Ài m'a ɲaye ba bene? Ǹ na bulukala loolu tala mingɛ ka kɛ́ mɔɔ waa loolu (5 000) balo, ani ài na gbɔlɔ jate min lafala bulu kulunkulun tɔ la, ài hangili ma to wo lɔ? 10#Matiyu 15.34-38.Niwotɛ, ǹ na bulukala wolowulan tala mingɛ, ka kɛ́ mɔɔ waa naani (4 000) balo, ani ài na gbɔlɔ jate min lafala bulu kulunkulun tɔ la, ài hangili ma to wo lɔ? 11A kɛnin di vɛ ài m'a ɲaye ba ko ǹ kan tɛɛ tɛ bulu ma? Kɛɛ fɔ ài y'ài jando ài jɛlɛ lɔ ka bɛn Falisilu ni Sadusilu ya bululafununsɛɛ ma.»
12Wo kɛ, Isa kɔbiladennu k'a ɲaye ko a tɛɛ m'a fɔ ai yɛ ko ai y'ai jando ai jɛlɛ lɔ ka bɛn bululafununsɛɛ ma, mafɔ Falisilu ni Sadusilu ya kalan.
Jene gbu yi Isa le?
Malɛkɛ 8.27-30; Luka 9.18-21
13Isa ni a kɔbiladennu senin Sezale Filipi koovi lɔ, a k'ai maɲininga, a vɛɛ: «Mɔɔlu yi Mɔɔnivin Tanin jatela jene le?»
14 #
Matiyu 14.1, 2; Malɛkɛ 6.14, 15; Luka 9.7, 8. Ai k'a javi, ai vɛɛ: «A dɔlu y'a fɔla ko Makolikɛba Yaya le. A dɔlu fana y'a fɔla ko Nabi Iliya le. A dɔgbɛlɛlu y'a fɔla ko Nabi Jelemi le, niwotɛ kela kɔlɔkɔlɔ dɔgbɛlɛ.»
15A k'ai maɲininga, a vɛɛ: «Àilu do? Ài yi ǹ jatela jene le?»
16 #
Yohana 6.68, 69. Simɔn Piyɛli k'a javi, a vɛɛ: «Ile le Masa Tɔɔmasenin ne, ani Ɲɛnɛmayatii Ala Denkɛ.»
17Isa do vɛɛ a yɛ: «Yunusa denkɛ Simɔn, i yi duwawuden ne le, kamasɔlɔn i na min fɔla, mɔɔ ma wo lankɛnɛmaya i yɛ, mafɔ ǹ Fa min yi haijɛnɛ. 18Ǹ'a fɔla i yɛ fana, ile le Piyɛli le, min kɔlɔ yi ko falakolo. Ǹ kɛtɔ ǹa limaniyajama lɔla falakolo wo le kɔkan. Hali saya tɛnala see sɔlɔnna jama wo ma. 19#Matiyu 18.18; Yohana 20.23.Ǹ kɛtɔ koɲiilu dila i ma ka da laka mɔɔlu yɛ, fɔsa ai yi don haijɛnɛ masaya lɔ. Ni i ka ko ko si lasili duukolo kɔkan, wo lasilitɔle haijɛnɛ. Ni do i ka ko ko si lafɔlin duukolo kɔkan, wo fana lafɔlintɔle haijɛnɛ.»
20Wo fɔ Isa bolo, a k'a kɔbiladennu jamali, k'a magbeleya ko ai kà a fɔ mɔɔ suu suu yɛ ko ale le Masa Tɔɔmasenin ne.
Isa ka aa saya ni a wuliko fɔ teme
Malɛkɛ 8.31–9.1; Luka 9.22-27
21Ka ta waate wo ma, Isa tɛɛ a fɔla a kɔbiladennu yɛ k'a lagbɛ, ko a ka kan ka taa Jelusalɛmu ka tɔlɔya siyama masɔlɔn kɛmɔbalu ni salakalase kuntiibalu ani seliya kalanmɔɔlu bolo. Ko a faatɔle, kɛɛ tele fila a sawana, a wulitɔle.
22Wo lɔ, Piyɛli k'i dɔni mataa Isa le k'a makuma damina. A do vɛɛ a yɛ: «Ǹ Kuntii, Ala y'i tanga wo ma. Wo tɛ kɛ tuun!»
23Kɛɛ Isa k'i kɔdon k'a fɔ Piyɛli yɛ, a vɛɛ: «Ile Soitana, bɔ ǹ kɔ! Ile ǹ sentuu sabu le le, kamasɔlɔn i t'i milila Ala sawonankolu ma, mafɔ adamadennu sawonankolu.»
24 #
Matiyu 10.38; Luka 14.27. Wo kɔ, Isa k'a fɔ a kɔbiladennu yɛ, a vɛɛ: «Ni mɔɔ min y'a fɛ ka bila ǹ kɔ, fɔ wo tii i ban a jɛlɛ lɔ, ka a gbaankɔlɔman ta ka bila ǹ kɔ. 25#Matiyu 10.39; Luka 17.33; Yohana 12.25.Kamasɔlɔn ni mɔɔ mɔɔ si y'a fɛ ka a nii lakisi, wo tii bɔnɔtɔ a la. Ni do mɔɔ min ka bɔnɔ a nii la ka bɛn ǹe ma, wo tii kɛtɔ niimaya sɔlɔnna. 26Ni mɔɔ ka dunuɲa bɛ sɔlɔn ka bɔnɔ a nii la, nafa mindɛ le yi wo la? Mɔɔ yi se mindɛ dila k'i nii kunmaka? 27#Matiyu 25.31; Lɔmukalu 2.6.Kamasɔlɔn Mɔɔnivin Tanin kɛtɔ nala aa mɛlɛkalu fɛ, a Fa aa magbiliyali lɔ. Wo vɛ kɛla, a kɛtɔ mɔɔ kelenkelenna bɛ salala ka bɛn ai kɛkolu ma. 28Ǹ'i tuɲa fɔ ài yɛ, a dɔlu y'ài tɛma jan minu tɛnala saya masɔlɔnna, fɔ ai vɛ Mɔɔnivin Tanin natɔla yena aa masaya lɔ.»
Currently Selected:
Matiyu 16: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
