Luka 21

Kɛsamoso ya niilifen

Malɛkɛ 12.41-44

1Isa k'a ɲa lawuli ka nafolotiilu ye, ai vɛ wɔli bilala niilifenkesu lɔ. 2A do ka kɛsamoso fandanni dɔ ye, min ka wɔligbana mɛsɛnni fila bila kesu wo lɔ.

3Isa do vɛɛ: «Ǹ'i tuɲa fɔ ài yɛ, kɛsamoso fandanni wo vɛ wɔli min bɔ, wo walanin vɛ ai bɛ ta le. 4Kamasɔlɔn ai bɛ na a dɔni ne bɔla aiya nafolobalu la k'a di. Kɛɛ moso min ni aa bolokolonya bɛ, wɔlini min tɛɛ a bolo a baloko lɔ, a na wo bɛ le dila.»

Lɔhɔlɔmabonba teko

Matiyu 24.1-2; Malɛkɛ 13.1-2

5Wo kɔ, mɔɔ dɔlu tɛɛ kumala ka bɛn lɔhɔlɔmabonba ma, ko a masilinin kobɛn niilifennu ni kawakulun keinkeinnu le la. Isa do vɛɛ ai yɛ: 6«Ài ɲa yi fen minu la yi ne, lon dɔ wolu bɛ tetɔle tɛtɛ, hali kawakulun fila gbu tɛnala tola i ɲɔɔ kɔkan.»

Dunuɲa laban tɔɔmaselu

Matiyu 24.3-14; Malɛkɛ 13.3-13

7Ai k'a maɲininga, ai vɛɛ: «Kalanmɔɔ, ko wolu kɛtɔ waate mindɛ? Tɔɔmase mindɛ kɛtɔ a jiyala ko waate wo vɛ se?»

8A vɛɛ ai yɛ: «Ài y'ài jando ài jɛlɛ lɔ fɔsa mɔɔ kana ài lafili. Kamasɔlɔn mɔɔ siyama kɛtɔ nala ǹ tɔɔ lɔ k'a fɔ ko: ‹Ǹe le Masa Tɔɔmasenin ne!› ani ko: ‹Dunuɲa laban waate ma vɛ sulunya!› Ài kà bila wo suu suu kɔ. 9Ài vɛ kɛlɛ ni mulutuko mangannu mɛnna, ài kà siyan. Kamasɔlɔn wolu ka kan ka kɛ kunfɔlɔ le, kɛɛ dunuɲa laban tɛnala kɛla wo le telemanin.»

10A vɛɛ ai yɛ kɔtunun: «Sibolomalu wulitɔ i ɲɔɔ kanma, ani jamanalu fana wulitɔ i ɲɔɔ kanma. 11Duukolojaajaa babalu lɔwalatɔ, ani kɔɔn fitina ni jangalo yonnu kɛtɔ dingila siyama lɔ, ani ko masiyanninu ni tɔɔmase makawanilu kɛtɔ sangbolo lɔ.

12«Kɛɛ jani ko wo bɛ yi kɛ, mɔɔlu kɛtɔ ài minala k'ài jangata, ani k'ài don Aladalibon ɲamɔɔlu bolo, ani k'ài bila kaso la. Ài do lalɔtɔ jamanatiilu ni masakɛlu ɲakɔlɔ ka bɛn ǹa ko ma. 13Wo le kɛtɔ sabu le ài kɛtɔ ǹa ko seleya dila ai ma. 14#Luka 12.11, 12.Jani wo lon yi se, ài y'ài hangili latɛɛ ko ài tɛnala haminna ài kumanɔbɔko le. 15Kamasɔlɔn ǹe gbu le kɛtɔ ài lalɔnnila hangilimaya kumalu la, haan fɔɔ ài kɛlɛɲɔɔ suu suu tɛnala sena ài la, niwotɛ k'ài kumakannu sɔsɔ. 16Hali ài sɔlɔnbalu gbu, ni ài badenmalu, ni ài balamɔɔlu, ani ài tɔvalu, wolu le kɛtɔ ài donna mɔɔlu bolo fɔsa ai y'ài dɔlu faa. 17Ài gbeyatɔ mɔɔ bɛ yɛ ka bɛn ǹa ko ma. 18Kɛɛ wo bɛ n'a kɛ, hali ài kunsi kaali kelen gbu tɛnala tununna. 19Wo le y'a ma, ài y'ài lɔgbeleya, fɔsa ài nii la yi kisi.

Jelusalɛmu halaki waate

Matiyu 24.15-21; Malɛkɛ 13.14-19

20«Ài vɛ Jelusalɛmu lamininnin yena kɛlɛkɛjamalu le waate min nɔ, ài y'a lɔn ko so halaki waate ma vɛ sulunya. 21Wo vɛ kɛla, mɔɔ minu yi Jude koovi lɔ, wolu yi bɔli ka taa tinima dingilalu lɔ. Mɔɔ minu do vɛ kɛla Jelusalɛmu so kɔnɔ, wolu yi bɔ je. Ado mɔɔ minu vɛ kɛla sɛnɛ lɔ, wolu kà don so kɔnɔ butu, 22kamasɔlɔn Ala ya jangata lonnu le wolu le, fɔsa kuma minu bɛ sɛvɛnin kitabu kɔnɔ, wolu ma yi fa teme. 23Wo lonnu vɛ sena, gbalo kɛtɔ kɔnɔma ni dematiikulalu yɛ, kamasɔlɔn tɔlɔya ba kɛtɔle duu min nɔ, ani Ala ya jangata jiitɔ mɔɔ minu kɔkan. 24Ai dɔlu faatɔ siyamifan ne, ani a dɔlu fana minatɔ jɔnya boloma ka taa ai le jamana bɛ lɔ. Wo vɛ kɛla, Jelusalɛmu lɔ kɛtɔ tiɲala siboloma gbɛlɛ Alalɔnbalilu bolo haan fɔɔ aiya waate vɛ dafala.

Mɔɔnivin Tanin nalon

Matiyu 24.29-31; Malɛkɛ 13.24-27

25 # Ko Lankɛnɛmayanin 6.12, 13. «Tɔɔmase dɔlu kɛtɔ tele ni kalo ni lolonilu lɔ, ani sibolomalu bɛ kɔnɔlɔ kɛtɔ filila k'ai hamin duukolo kɔkan, ka bɛn kɔɔji ya jaman ni a woyokan kojuuya ma. 26Mɔɔlu kilontɔ ka bɛn siyan ma, ai vɛ ai milila masuwako ma min natɔ kɛla dunuɲa fan bɛ lɔ, kamasɔlɔn sangbololɔ fangatiilu lamaamaatɔ. 27#Ko Lankɛnɛmayanin 1.7.Wo waate lɔ, ai kɛtɔ Mɔɔnivin Tanin natɔla yena sanbiliya lɔ, seetiiya ni magbiliyali ba boloma. 28Ni ài ka ko minu daminatɔ ye waate min nɔ, ài y'ài lɔ k'ài kun lawuli, kamasɔlɔn àiya kunmaka waate ma vɛ sulunya.»

Toloju misali

Matiyu 24.32-35; Malɛkɛ 13.28-31

29Wo kɔ, Isa ka misali dɔ di ai ma, a vɛɛ: «Ài y'ài mili toloju ma, niwotɛ kɔlɔman gbɛlɛlu. 30Ài v'a filabulu kulalu yena waate min, ài y'a lɔn ko telema ma vɛ sulunya. 31Wo boloɲa kelen ma, ni ài ka ko wolu ye kɛla, ài y'a lɔn ko Ala ya masaya waate ma vɛ sulunya. 32Ǹ'i tuɲa fɔ ài yɛ, bi mɔɔlu bɛ tɛnala banna sala, fɔ ko wolu bɛ vɛ kɛla ka dafa. 33Sangbolo ni duukolo tununtɔle, kɛɛ ǹ kumakannu tɛnala tununna tuun!»

Ài yi to ài ɲana

34«Ài y'ài jando ài jɛlɛ lɔ fɔsa ài joso lɔ kana gbalin noomaya le, ani gbɛtɔya, ani dunuɲalɔtɛɛkolu hamin. Niwotɛ, wo lon kɛtɔ balala ài lɔ, 35iwo sɔɔ yi soo minala teme, kamasɔlɔn wo ko kɛtɔ dunuɲamɔɔ bɛ le masɔlɔnna. 36Wo lɔ saa, ài yi to ài ɲana ka to Ala dalila waate bɛ, fɔsa ài yi fanga sɔlɔn ko natɔ wolu ma, ani ài yi se ài lɔla Mɔɔnivin Tanin ɲakɔlɔ teme.»

37 # Luka 19.47. Tele o tele, Isa tɛɛ mɔɔlu kalanna lɔhɔlɔmabonba luu kɔnɔ, kɛɛ su lɔ, a tɛɛ taala ka si tini dɔ kɔkan, ai y'a fɔla min ma ko Zeituna tini. 38Sɔɔmadanina, mɔɔlu bɛ tɛɛ ai ladɛnna lɔhɔlɔmabonba luu kɔnɔ k'ai tolomalɔ a la.

Currently Selected:

Luka 21: MBT2023

Highlight

Copy