Kɛkolu 22

1A vɛɛ: «M̀ badenmalu ni ǹ fanu, ài y'ài tolomalɔ ǹ na butu, ǹ'i ǹ kumanɔbɔ ài yɛ.» 2Ai do k'a kumakan mɛn mingɛ Hebulukan nɔ, ai ka jeden tue.

Wo lɔ, Pɔli vɛɛ: 3#Kɛkolu 5.34-39.«Jahudiya le ǹ ne, min sɔlɔnnin Talese so kɔnɔ, Silisiya koovi lɔ, kɛɛ m̀ buɲanin Jelusalɛmu jan ne. Ǹ tɛɛ kalanmɔɔ Gamaliyɛli le bolo. Ale le na ǹ kalanna kobɛn mɔ bemanu ya seliya la. Ǹe do tɛsilinin tɛɛ Ala ya ko la kosɛvɛ, iwo àilu gbu tɛsilinin a la teme bi. 4#Kɛkolu 8.3; 26.9-11.Wo lɔ, ǹ tɛɛ Isa ya siya lataamabalu jangatala bubale haan fɔɔ k'a dɔlu faa. Ǹ tɛɛ kɛ́ ni mosolu minala k'ai bila kaso la. 5Salakalase kuntiiba ni kititɛɛjama kɛmɔbalu bɛ yi ǹ sele le wo lɔ. Ǹ ka sɛvɛ dɔlu sɔlɔn ai la, fɔsa ǹ'i taa wolu le ai badenmalu fɛ Damase so kɔnɔ. Wo boloɲa ma, ǹ ka Damase siya mina, fɔsa ǹ'i mɔɔ wolu mina ka na ai silinin ne Jelusalɛmu ai latɔnko lɔ.»

6«M̀ masulunyatɔla Damase so la telelatelen waate lɔ, nɔɔlɔ ba ka bɔ sanma telemanin ka m̀ makɛ kala. 7Ǹ ka m̀ ben duu ma ka kumakan dɔ mɛn, wo vɛɛ: ‹Sawuli, Sawuli, mindɛ lɔ i yi ǹ jangatala?› 8Ǹe do ka ɲiningali kɛ, ǹ ko: ‹Ǹ Tii, jene i le le?› A do vɛɛ ǹ yɛ: ‹Isa Nazalɛtika le ǹ ne, i yi min jangatala.› 9Ǹ taamaɲɔɔlu ka kɛnɛya wo ye, kɛɛ mɔɔ min tɛɛ kumala ǹ fɛ, ai ma wo tii kan mɛn. 10Wo lɔ, ǹ k'a fɔ: ‹Ǹ Tii, ǹ'i mindɛ kɛ?› Ado ǹ Tii ka ǹ javi, a vɛɛ: ‹I wuli, i yi taa Damase. Ko min bɛ latɛɛnin i ma, wo bɛ fɔtɔ i yɛ je.› 11Komi ǹ ɲa tɛɛ vɛ gbɛ nɔɔlɔ ba bolo, wo le k'a kɛ, ǹ taamaɲɔɔlu ka m̀ bolo mina ka taa ǹ ne Damase.

12«Wo k'a talan, Alaɲasiyanɲɛmɔɔ dɔ tɛɛ Damase, min tɔɔ tɛɛ ko Ananiya. A tɛɛ Nabi Musa ya seliya latelenna, ado je Jahudiyalu bɛ tɛɛ a buɲala. 13A ka na k'i lɔ ǹ dafɛ k'a fɔ ǹ yɛ, a vɛɛ: ‹M̀ badenma Sawuli, i ɲa la yi ka.› Wo fɔ, ǹ ɲa la ka ka telemanin, ǹ k'a ye. 14A do vɛɛ ǹ yɛ: ‹Mɔ bemanu Tii Ala na i tala, fɔsa i y'a sawo lɔn, ka aa Mɔɔ Telennin ye, ani k'a dalakan mɛn. 15I kɛtɔ kɛla aa sele le mɔɔ bɛ yɛ ka bɛn i na min yena, ani i na min mɛnna. 16I yi mindɛ makɔnɔna butu? I wuli, i yi madaili kɛ mɔ Tii Isa tɔɔ lɔ, ka ban ka makoli sɔlɔn, fɔsa iya julumbulu yi bɔ i ma.›

17«Ǹ seikɔnin Jelusalɛmu, ǹ ka to Ala dalila lɔhɔlɔmabonba la, Ala ka ko dɔ lajɛlɛ ǹ ɲa ma. 18Ǹ ka ǹ Tii ye, a v'a fɔla ǹ yɛ: ‹I lateleja ka bɔ Jelusalɛmu ɲagba le, kamasɔlɔn jan mɔɔlu tɛnala ai bolo siila iya seleyakan kɔlɔ ka bɛn m̀ ma.› 19Wo lɔ, ǹ ko: ‹Ǹ Tii, ailu gbu k'a lɔn ko ǹ tɛɛ taala Aladalibonnu la k'i malimaniyamɔɔlu mina, ani k'ai gbasi. 20#Kɛkolu 7.58.Ai do tɛɛ iya sele Etiyɛn faala waate min nɔ, ǹe gbu lɔnin tɛɛ je. Ǹ ka diɲa wo bɛ ma, haan fɔɔ k'a faabalu ya faanibalu lamala ai yɛ.› 21A do vɛɛ ǹ yɛ: ‹Taa vɛ! Ǹ kɛtɔ i lataala dingila majaan nɔ siboloma gbɛlɛ mɔɔlu fɛlɔ.› »

22Jama ka to ai tolomalɔla Pɔli la haan fɔɔ a ka siboloma gbɛlɛ mɔɔlu ya ko fɔ. Wo fɔ a bolo, ai bɛ vɛ gbanɔla, ai vɛɛ: «Kɛ́ min yi bɔ dunuɲa! A man kan ka to a nii la!» 23Ai ka to gbanɔla k'aiya faanibalu bɔ ka wolu lafilifili, ani ka gbangban lawuli sanma. 24Wo lɔ, sɔdasi kuntiiba ka jamali di ko ai yi taa Pɔli le aiya bonba la. A do k'ai lɔ a gbasila gbusan na k'a maɲininga, fɔsa a yi jama gbanɔkan kun fɔ ai yɛ. 25Ai do ka Pɔli lɔsama a gbasiko lɔ mingɛ, a k'a fɔ sɔdasi kuntii yɛ, min lɔnin tɛɛ je, a vɛɛ: «Ka Lɔmu duulen gbasi gbusan na k'a talan aa kiti ma tɛɛ ba bene, wo ladaanyine?»

26Wo mɛn sɔdasi kuntii bolo, a ka taa aa kuntiiba fɛlɔ k'a fɔ a yɛ, a vɛɛ: «I kɛtɔ mindɛ kɛla kɛ́ min na yi ne? Lɔmu duulen ne a le!»

27Wo fɔ, sɔdasi kuntiiba ka taa Pɔli maɲininga, a vɛɛ: «Lɔmu duulen ne i le le?»

Pɔli vɛɛ: «Aan.»

28Wo lɔ, sɔdasi kuntiiba vɛɛ a yɛ: «Ǹ na wɔli ba le salala Lɔmu duulenya sɔlɔnko lɔ.»

Pɔli do vɛɛ: «Ǹe do sɔlɔnyine a lɔ!»

29Wo lɔ, mɔɔ minu nanin tɛɛ a gbasiya lɔ ani k'a maɲininga, wolu k'ai mataa a la telemanin. Ado sɔdasi kuntiiba ka kɛ Pɔli ya Lɔmu duulenya ko kalama mingɛ, a ka siyan, kamasɔlɔn a tɛɛ vɛ ban a silila jɔlɔkɔ le.

Pɔli ka kuma Jahudiya kɛmɔba jama yɛ teme

30Wo kɛnɛbɔ lon, sɔdasi kuntiiba tɛɛ a fɛ ka dailu gbugbu lɔn Jahudiyalu tɛɛ Pɔli jalakila min nɔ. Wo lɔ, a ka jɔlɔkɔ bɔ Pɔli la, ka salakalase kuntiibalu ni kititɛɛjama bɛ kili ladɛnya lɔ, ka ban ka Pɔli lalɔ ai ɲakɔlɔ.

Currently Selected:

Kɛkolu 22: MBT2023

Highlight

Copy