Kɛkolu 20
20
Pɔli ka taa Maseduwani ni koovi dɔlu lɔ teme
1Wɔyɔkan majiinin, Pɔli ka Isa kɔbiladennu kili ladɛn nɔ. A wɔlinin ai sɛmɛdonna, ani k'ai lasalana, a ka Maseduwani siya mina. 2A do ka fan wolu lɔtimin ka je limaniyamɔɔlu sɛmɛdon lailikan siyama le, ka ban ka se Gɛlɛki jamana lɔ 3ka kalo sawa kɛ je. A tɛɛ taa boloma mingɛ Siliya koovi lɔ kulun kɔnɔ, a k'a mɛn ko Jahudiya dɔlu vɛ janva lasii a ma. Wo le k'a kɛ, a k'a latɛɛ ko a yi seikɔ Maseduwani siya fɛ. 4Sopatɛ min ka bɔ Beleya, Pilusi denkɛ koni, wo ka taa a malɔ, ani Alisitakusi ni Sekundusi ka bɔ Tɛsalonika, Gayusi ka bɔ Dɛlɛbɛ, Timote, ani Tisiki ni Tolofimu, minu mɔɔ fila ka bɔ Esiya. 5Kɛ́ wolu ka taa mɔ ɲa ka mɔ makɔnɔ Tolohasi so kɔnɔ. 6Bulufununbali Selilon bannin, mɔ ka bɔ Filipi so kɔnɔ kulun kɔnɔ. Mɔ ka tele loolu kɛ kɔɔji kɔkan ka na ai fɛlɔ Tolohasi, ka lɔɔtɛ kelen kɛ je.
Pɔli ka fuleni dɔ lawuli teme
7Sivililon wula la, mɔ ka mɔ ladɛn bulu lɔtalako lɔ waate min nɔ, Pɔli ka to kumala mɔɔlu fɛ haan fɔɔ su tala, kamasɔlɔn a jii tɛɛ a taako ma wo dusagbɛlon. 8Fitina siyama tɛɛ sangaso sanmabon na, mɔ ladɛnnin tɛɛ tɛɛminja. 9Kavelen dɔ siinin tɛɛ je funɛtɛlɛ la, min tɔɔ tɛɛ Yutikusi. Pɔli ka mɛn kumala haan fɔɔ sunɔɔ ka kavelen wo mina. A ka to sunɔɔ lɔ ka ɲina a jɛlɛ kɔ, a ka bɔ sangaso siingan sawana la ka ben duu ma. Ai k'a ta k'a talan a tɛɛ vɛ sa. 10Kɛɛ Pɔli jiinin a ma, a k'i bilin kavelen kunna, k'a bolo mɔlɔmɔlɔ a ma, a vɛɛ: «Ài kà hamin, a a nii la.» 11Wo fɔ, Pɔli ka jɛlɛ sangasobon na kɔtunun. Ale ni limaniyamɔɔlu ka bulu lɔtala i ɲɔɔ wotɛ, ka dɔnni kɛ. A ka to kumala ai fɛ haan fɔɔ kɛnɛ ka bɔ, a do ka taa. 12Wo kɔ, ai ka taa kavelen ɲɛnɛma le aa luu ma. Ai bɛ josola ka jii wo lɔ kosɛvɛ.
Pɔli ka taa Mitilɛni teme
13Mɔ ka don kulunba kɔnɔ ka taa Pɔli ɲa Asɔsi so kɔnɔ, kamasɔlɔn Pɔli vɛɛ ko a taatɔ a sen ne ma je, ko mɔ v'i ɲɔɔ yena je, a kɛtɔ donna kulun kɔnɔ. 14A ka se mɔ ma Asɔsi so kɔnɔ mingɛ, mɔ k'a ta kulunba kɔnɔ ka taa Mitilɛni. 15Wo dusagbɛlon, mɔ ka se Kiyɔsi kɔɔtɛmaduu dafɛ. Wo kɛnɛbɔ filana, mɔ ka se Samɔsi kɔɔtɛmaduu ma. Wo kɛnɛbɔlon sawana, mɔ ka se Milɛtusi so kɔnɔ. 16Pɔli tɛɛ v'a latɛɛ ko a kɛtɔ Ɛfɛsi so malala kulun kɔnɔ, fɔsa a ma kana tamala Esiya koovi lɔ. Kamasɔlɔn a kɔlɔtɔnin ba le tɛɛ ka se Jelusalɛmu jani Tele Biloolunanlon selilon yi se, ni wo tɛɛ se kɛla.
Pɔli ka Ɛfɛsi limaniyajama ɲamɔɔlu lali teme
17Wo kɔ, Pɔli ka to Milɛtusi so kɔnɔ ka samakan lataa limaniyajama ɲamɔɔlu ma Ɛfɛsi ko ai yi na a fɛlɔ. 18Ai nanin, a k'a fɔ ai yɛ, a vɛɛ: «Ài k'a lɔn ǹ tɛɛ taamana boloɲa min ma ài wotɛ, ka damina ǹ nalon kunfɔlɔ ma Esiya. 19Ǹ na baale kɛla mɔ Tii yɛ fanmajii ba ni tɔlɔya ni kasi le lɔ, ka bɛn Jahudiyalu ya janvakolu ma. 20Ài k'a lɔn ǹ tɛɛ ài kalanna bala lɔ ani àiya bonnu la waate min nɔ, m̀ ma ko ko si doon ài ma min yi kɛ ài nafako le. 21Ǹ tɛɛ Jahudiyalu ni siboloma bɛ lalila ko ai y'ai jɛlɛ lasei Ala ma, ka limaniya mɔ Tii Isa ma. 22Wo lɔ saa, komi Nii Sɛnɛyanin vɛ ǹ lɔ ko ǹ'i taa Jelusalɛmu, fɔ ǹ'i se je, k'a talan m̀ m'a lɔn ko suu mindɛ le kɛtɔ m̀ masɔlɔnna je. 23Kɛɛ ǹ ka min lɔn, wo le ne: Nii Sɛnɛyanin yi ǹ lalɔnnila ko kaso ni gbalokolu yi m̀ makɔnɔna so bɛ la. 24#2 Timote 4.7.Wo bɛ n'a kɛ, ǹ tɛ ǹ nunakili kulugbeleyala, a tɛ ǹ ɲana ko le. Kɛɛ min hamin yi ǹ na, wo le ǹ'i ǹa baale dafa, mɔ Tii Isa na min kalifala ǹ na. Wo le ka Samakan Kein lase ka bɛn Ala ya nɛɛma ma.
25«M̀'ɛ taama àilu minu tɛma Ala ya masaya lasenko lɔ, m̀'ɛ a lɔn butu ko ài suu suu tɛnala ǹ yena kɔtunun. 26Wo lɔ saa, ǹ'a fɔla ài yɛ bi k'a magbeleya, ǹ ko, ni mɔɔ dɔ vɛ halakila ài tɛma, ǹ kunko tɛ wo le. 27Kamasɔlɔn m̀'ɛ Ala ya kolatɛɛnin bɛ fɔ ài yɛ, m̀ ma a suu suu doon ài ma. 28Ài y'ài jando ài jɛlɛ lɔ, k'ài jando Ala ya limaniyajama lɔ, Nii Sɛnɛyanin na min kalifala ài la. Ài yi kɛ iwo saakunnasiibalu limaniyajama kunna, Ala na min kɛla a ta le a jɛlɛkanu Denkɛ jeli fɛ. 29Ǹ k'a lɔn m̀'ɛ taala waate min nɔ, mɔɔ yonnu dontɔ ài tɛma iwo soofalilu, minu tɛnala saa kulu tola je. 30Tuɲa le, a dɔlu kɛtɔ ai wulila àilu gbu tɛma ka tuɲa jɛlɛma, fɔsa ai yi Isa kɔbiladennu masama ka wolu bila ai kɔ. 31Wo le y'a ma, ài yi to ài ɲana, k'ài hangili to a lɔ ko san sawa kɔlɔ, su ni tele, m̀ ma ǹ nɔningɛ ài kelenkelenna bɛ lalila, ǹ ɲaji vɛ ǹ ɲa kɔlɔ.
32«Tandainɔ yi ne, ǹ'ài kalifala Ala le la ani aa nɛɛma kuma, wo min yi se k'ài lasawati ani ka balayi di ài ma, min ladalonin aa mɔɔ lasɛnɛyaninnu yɛ. 33M̀ ma ǹ nata la mɔɔ suu suu ya wɔligbɛ kan, niwotɛ sanu, niwotɛ faanilu. 34Àilu gbu k'a lɔn ǹ na baale kɛla m̀ bolo la ǹe ni ǹ taamaɲɔɔlu makolu laɲiako lɔ. 35Ǹ n'a jiyala ài la ko minu bɛ lɔ, mɔ ka kan ka baale gbɛlɛn kɛ teme fandannilu madɛmɛnko lɔ, ani ka mɔ hangili to mɔ Tii Isa gbu kumakan nɔ, ko: ‹Koɲumakɛba ya duwawu walayine ka timin koɲuma yi kɛla mɔɔ min yɛ.› »
36Pɔli wɔlinin wo fɔla, a k'a kumɛlɛni bila duu ma ka Ala dali ai fɛ. 37Ai bɛ do ka kasi bubale, ai vɛ ai filila Pɔli lɔ k'a sumu a tama lɔ. 38Pɔli ka kuma min fɔ ko ai tɛnala a yena butu, wo k'ai joso tiɲa bɛlɛbɛlɛ kɛ. Wo kɔ, ai ka taa a lɔsiya kulunba dala.
Currently Selected:
Kɛkolu 20: MBT2023
Highlight
Share
Copy

Want to have your highlights saved across all your devices? Sign up or sign in
Manya Bible Translation, © SIM International, 2023