လ︀ုက︀ႃ 13

တ︀ီꩬ︀ၢင︀်ဝွေက︀ျႃး။ တ︀ီလ︀ူႇတ︀ႆ︀ၢႈက︀ျႃး။

1မ︀ိူဝ်ႈဢ︀မ︀ႂ်း က︀ူꩫ︀်းက︀မ︀်ႈၸ︀ွင︀်း ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ လ︀ွင︀်ႈက︀ူꩫ︀်းက︀ႃလ︀ိလ︀ႄးက︀မ︀်ႈၸ︀ွင︀်း ဢ︀ꩫ︀်ႈꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ တ︀ၢင︀်ၵ︀ႅက︀်ꩫ︀ႆ︀ႇၵ︀ဝ်မ︀ႆ︀ႛ ၵ︀ုꩫ︀်ပ︀ိလ︀ၢတ︀်ဢ︀ဝ်ႈတ︀ႆ︀ၢႈမ︀ႃးꩫ︀ႆ︀ႇၵ︀ႆ︀ႈဢ︀ူ။ 2မ︀ꩫ︀်းꩡ︀ဝ်ႛယ︀ႃႇ “ၵ︀ဝ်ꩫ︀ႆ︀ႛတ︀ႆ︀ၢႈက︀ႃꩫ︀ႆ︀ႇ ၵ︀ꩫ︀်တ︀ႂ်းၵ︀ဝ်ယ︀ႃႇ က︀ူꩫ︀်းက︀ႃလ︀ိလ︀ႄးတ︀ၢင︀်က︀ူဝ်ႇꩫ︀ႆ︀ႇၵ︀ဝ်မ︀ႆ︀ႛ ဢ︀ပ︀ႅတ︀်ႉယ︀င︀်းꩬ︀ႃꩬ︀ီက︀ျႃး။ 3ꩵ︀ႈꩡ︀ႂ်ႈပ︀ိူင︀်ႈလ︀ူင︀်။ က︀ဝ်ႈဝႃႈက︀ွတ︀်။ ꩬ︀ူက︀ေႃႇ ပ︀ူဝ်းမ︀ဝ်ꩬ︀ၢင︀်ဝွေက︀ီး ꩫ︀င︀်ၵ︀ဝ်ꩫ︀က︀ꩫ︀်ႈ တ︀ီꩫ︀ႆ︀ႛလ︀ူႇꩬ︀ုမ︀်းꩫ︀မ︀်။ 4က︀ူꩫ︀်းꩬ︀ိပ︀်ပ︀ႅတ︀်က︀ူဝ်ႇဢ︀ꩫ︀်ႈ ꩡ︀ၢင︀်မ︀ုင︀်ႈမ︀ိူင︀်းꩬ︀ိလ︀ွမ︀် လ︀ူမ︀်ႇꩬ︀ီတ︀ီင︀်ႈတ︀ႆ︀ၢႈꩫ︀ႆ︀ႇၵ︀ဝ်က︀ေႃႇ ၵ︀ꩫ︀်တ︀ႂ်းက︀ူꩫ︀်းဝီင︀်းယ︀ေရ︀ုꩬ︀လ︀ိမ︀် တ︀ၢင︀်က︀ူဝ်ႇꩫ︀ႆ︀ႇၵ︀ဝ်မ︀ႆ︀ႛ ဢ︀ပ︀ႅတ︀်ႉယ︀င︀်းꩬ︀ႃꩬ︀ီက︀ျႃး။ 5ꩵ︀ႈꩡ︀ႂ်ႈပ︀ိူင︀်ႈလ︀ူင︀်။ က︀ဝ်ႈဝႃႈက︀ွတ︀်။ ꩬ︀ူမ︀ဝ်ꩬ︀ၢင︀်ဝွေက︀ီး ꩬ︀ူက︀ေႃႇ ꩫ︀င︀်ၵ︀ဝ်ꩫ︀က︀ꩫ︀်ႈ တ︀ီꩫ︀ႆ︀ႛလ︀ူႇတ︀ႆ︀ၢႈꩫ︀မ︀်” ꩫ︀ဝꩫ︀်ႇ။

ပ︀ုင︀်ၵ︀ိူင︀်ႈၵ︀ၢမ︀်းတ︀ူꩫ︀်ႛမ︀က︀်ဝႃႈ ဢ︀ꩫ︀်ႈမ︀က︀်မ︀ဝ်ပ︀ီꩫ︀်ႈ

6င︀ႆ︀းꩬ︀ီ ꩡ︀ဝ်ႛယ︀ေꩬ︀ု ၵ︀ဝ်မ︀ႆ︀ႛဢ︀ဝ်ႈပ︀ုင︀်ၵ︀ိူင︀်ႈၵ︀ၢမ︀်းဝႃႈꩫ︀ႆ︀ႇ “က︀ူꩫ︀်းက︀ူဝ်ႇလ︀ိူင︀်ႈ ꩬ︀ူꩫ︀်မ︀က︀်ꩡ︀ပ︀ႅတ︀်ႉမ︀ꩫ︀်းမ︀ႆ︀ႛ တ︀ူꩫ︀်ႛမ︀က︀်ဝႃႈတ︀ူꩫ︀်ႛလ︀ိူင︀်ႈ ပ︀ုက︀်ဝႆ︀ႇဢ︀ူ။ တ︀ူꩫ︀်ႛမ︀က︀်ဝႃႈမ︀ႆ︀ႛ မ︀ꩫ︀်းၵ︀ႃမ︀က︀်က︀ီး မ︀က︀်လ︀ုက︀်ႉလ︀ိူင︀်ႈꩫ︀ႆ︀ၢႈက︀ေႃႇꩵ︀ႈꩭꩫ︀်။ 7ꩫ︀ႆ︀ႇမ︀ႆ︀ႛမ︀ꩫ︀်း ၸ︀ူႛမ︀ိုင︀်ႇꩬ︀ူꩫ︀်မ︀ꩫ︀်းမ︀ႆ︀ႛဝႃႈꩫ︀ႆ︀ႇ “တ︀ူꩫ︀်ႛꩫ︀ႆ︀ႇမ︀ႆ︀ႛ က︀ဝ်ႈꩬ︀ၢမ︀်ပ︀ီႈမ︀ႃးလ︀ႅမ︀်းꩫ︀က︀ေႃႇ မ︀က︀်လ︀ုက︀်ႉလ︀ိူင︀်ႈꩫ︀ႆ︀ၢႈက︀ေႃႇꩵ︀ႈꩭꩫ︀်။ ပ︀မ︀်ႛၵ︀ွတ︀်တ︀ႃႉ။ ꩭၢင︀်းꩭႂ်ႛꩫ︀ိꩫ︀်ႈꩬ︀ုမ︀်းꩫ︀ႆ︀ၢႈꩫ︀မ︀်” ꩫ︀ဝꩫ︀်ႇ။ 8ၸ︀ူႛမ︀ိုင︀်ႇꩬ︀ူꩫ︀်ယ︀ႃႇ “ပ︀ီႈလ︀ိူင︀်ႈယ︀ႃႇ ꩭႂ်ႛဢ︀ူဢ︀ိက︀်က︀ွတ︀်။ င︀ဝ်ႛတ︀ူꩫ︀်ႛမ︀ႆ︀ႛ ꩭွင︀်ႈၵ︀ုတ︀်ပ︀ꩫ︀်ꩬ︀ီ ၸ︀ုꩫ︀်ꩬ︀ႂ်လ︀ႅမ︀်းက︀ွတ︀်။ 9မ︀ုက︀်ႉပ︀ီႈꩫ︀ႃႛ မ︀က︀်ပ︀ီꩫ︀်ႈꩵ︀ထၢင︀်ႇ။ မ︀ဝ်ပ︀ီꩫ︀်ႈက︀ီးꩬ︀ိုင︀် ꩭမ︀်ႛၵ︀ွတ︀်တ︀ႃႉ” ꩫ︀ဝꩫ︀်ႇ။

ၸ︀ူႛယ︀ိင︀်းဢ︀ꩫ︀်ႈၸ︀ီၵ︀ဝ်ႛꩬ︀ီက︀ွင︀်က︀လ︀ူဝ်ႚ

10ဝꩫ︀်းက︀မ︀်ႈꩬ︀ိꩫ︀်ဝꩫ︀်းလ︀ိူင︀်ႈမ︀ႆ︀ႛ ꩡ︀ဝ်ႛယ︀ေꩬ︀ု ꩭူဝ်းတ︀ြႃးဢ︀ူဢ︀ူ။ 11ꩡ︀ွင︀်းꩬ︀ွꩫ︀်တ︀ြႃးမ︀ႆ︀ႛ ၸ︀ူႛယ︀ိင︀်းက︀ူဝ်ႇလ︀ိူင︀်ႈ ဢ︀ꩫ︀်ႈၸ︀ီၵ︀ဝ်ႛꩬ︀ီ ꩬ︀ိပ︀်ပ︀ႅတ︀်ပ︀ီႈတ︀ၢင︀်ႈꩰ က︀ွင︀်က︀လ︀ူဝ်ႚဢ︀ူꩫ︀ႆ︀ႇ က︀ူဝ်ႇလ︀ိူင︀်ႈယ︀င︀်းဢ︀ူ။ ꩥ︀ၢင︀်ႛမ︀ꩫ︀်းယ︀ႃႇꩭလ︀ိုဝ်က︀ေႃႇ ယ︀ီတ︀်ꩵ︀ႈꩫ︀ႆ︀ႛ။ 12ꩡ︀ဝ်ႛယ︀ေꩬ︀ုယ︀ႃႇ ၸ︀ူႛယ︀ိင︀်းဢ︀မ︀ႂ်းမ︀ႆ︀ႛꩭꩫ︀်က︀ီး မ︀ꩫ︀်းမ︀ႆ︀ႛꩭွင︀်ႇꩬ︀ီ “မ︀ႂ်း လ︀ုက︀်ႉယ︀ေႃးက︀ႃမ︀ႂ်းမ︀ႆ︀ႛ လ︀ွတ︀်ႉယ︀ဝ်ႇ” ꩫ︀ယ︀ဝ်ႇက︀ီး 13က︀ꩫ︀်ႛꩫ︀ိူဝ်မ︀ꩫ︀်းမ︀ႆ︀ႛ မ︀ိုဝ်းတ︀ၢင︀်ꩭႂ်ႛဢ︀ူ။ ꩫ︀ႆ︀ႇမ︀ႆ︀ႛ ၸ︀ူႛယ︀ိင︀်းဢ︀မ︀ႂ်း က︀ꩡ︀ူးꩥ︀ၢင︀်ႛယ︀ီတ︀်ꩫ︀ꩫ︀်ႈꩰꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛဢ︀ူ။ 14လ︀ႆ︀ၢးပ︀ိူဝ်ႈꩡ︀ဝ်ႛယ︀ေꩬ︀ု ဝꩫ︀်းက︀မ︀်ႈꩬ︀ိꩫ︀်မ︀ႆ︀ႛ ဢ︀ꩫ︀်ႈၵ︀ႆ︀ႛဢ︀ꩫ︀်ႈꩡ︀ီပ︀်ဢ︀ဝ်ႈꩫ︀ီႈꩭႂ်ႛꩫ︀ႆ︀ႇꩬ︀ီ ၸ︀ူႛင︀မ︀်းꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇ တ︀ေႃးꩬ︀ႃးင︀ႆ︀း က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ “ဝꩫ︀်းꩭီတ︀်ဢ︀မ︀ူး ꩭူက︀်ဝꩫ︀်းတ︀ၢင︀်ႈꩰယ︀င︀်းꩫ︀ႆ︀ႇမ︀ႆ︀ႛ ဢ︀ꩫ︀်ႈၵ︀ႆ︀ႛဢ︀ꩫ︀်ႈꩡ︀ီပ︀်ꩬ︀ူ မ︀ႃးယ︀ႃႈက︀ꩫ︀်ႈလ︀ႃး။ ဝꩫ︀်းက︀မ︀်ႈꩬ︀ိꩫ︀်မ︀ႆ︀ႛယ︀ႃႇ ပ︀ီမ︀ႃးယ︀ႃႈ” ꩫ︀ဝꩫ︀်ႇ။ 15ꩡ︀ဝ်ႛယ︀ေꩬ︀ုယ︀ႃႇ “ၸ︀ူႛက︀ႅမ︀်ႛꩫ︀ႃႛၵ︀ဝ်ꩴ︀း ꩬ︀ူတ︀င︀်းမ︀ိူင︀်း ဝꩫ︀်းက︀မ︀်ႈꩬ︀ိꩫ︀်မ︀ႆ︀ႛ ꩭီတ︀်ဢ︀မ︀ူးဢ︀ူꩬ︀ႃး။ ဝꩫ︀်းက︀မ︀်ႈꩬ︀ိꩫ︀်မ︀ႆ︀ႛ င︀ူဝ်းၵ︀ႆ︀ၢးꩬ︀ူမ︀ႆ︀ႛ ꩬ︀ႆ︀ၢက︀ေႛꩬ︀ီ ဢ︀ဝ်ႈက︀ႃက︀ိꩫ︀်ႈꩫ︀မ︀်ႇမ︀ဝ်ꩡ︀ႂ်ႈ။ 16ၸ︀ူႛလ︀ုက︀်ႉꩬ︀ၢဝ်ဢ︀ႃပ︀ြႃꩭၢမ︀်ꩫ︀ႆ︀ႇမ︀ႆ︀ႛ ꩬ︀ိပ︀်ပ︀ႅတ︀်ပ︀ီႈတ︀ၢင︀်ႈꩰ ၵ︀ုꩫ︀်ꩬ︀ူင︀်ၸ︀ုက︀်လ︀ႅင︀်ဝႆ︀ႇꩫ︀ႆ︀ႇ ဝꩫ︀်းက︀မ︀်ႈꩬ︀ိꩫ︀်မ︀ႆ︀ႛ မ︀ဝ်ထုက︀်ꩫ︀ီႈက︀ေႛꩭႂ်ႛက︀ျႃး” ꩫ︀ဝꩫ︀်ႇ။ 17လ︀ႆ︀ၢးပ︀ိူဝ်ႈၵ︀ၢမ︀်းမ︀ꩫ︀်းꩡ︀ဝ်ႛꩬ︀ီ လ︀ꩫ︀်ꩬ︀ူမ︀ꩫ︀်းꩡ︀ဝ်ႛၵ︀ဝ် ဢ︀ႆ︀ၢႈက︀ႃက︀ꩫ︀်ႈဢ︀ူ။ ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်ယ︀ႃႇ လ︀ႆ︀ၢးပ︀ိူဝ်ႈဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်း ဢ︀ꩫ︀်ႈမ︀ꩫ︀်းꩡ︀ဝ်ႛꩭီတ︀်ꩫ︀ႆ︀ႇၵ︀ဝ်ꩬ︀ီ ꩭုမ︀်ꩡ︀ူမ︀်းက︀ꩫ︀်ႈဢ︀ူ။

ပ︀ုင︀်ၵ︀ိူင︀်ႈၵ︀ၢမ︀်းꩭွေၸ︀က︀်က︀တ︀်ꩫ︀ၵ︀ႃ ယ︀ႃႛꩫ︀ၢင︀်းၵ︀ၢဝ်

(မ︀တ︀်တ︀ႄး 13.31,32; မ︀ႃက︀ု 4.30-32)

18ꩡ︀ဝ်ႛယ︀ေꩬ︀ုဝႃႈꩫ︀ႆ︀ႇ “မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ꩬ︀င︀်မ︀ႆ︀ႛꩫ︀ႆ︀ မ︀ိူꩫ︀်ꩫ︀ႆ︀ႇ၊ ဢ︀ဝ်ႈက︀ꩬ︀င︀်ꩫ︀ႆ︀ဝႃႈတ︀ႅက︀်ႉပ︀ုင︀်ꩫ︀ႆ︀ႇꩫ︀က︀ီး 19ꩫ︀င︀်က︀ူꩫ︀်းက︀ူဝ်ႇလ︀ိူင︀်ႈ ꩬ︀ူꩫ︀်မ︀ꩫ︀်းမ︀ႆ︀ႛ ဝၢꩫ︀်ꩭွေၸ︀က︀်က︀တ︀်ꩫ︀က︀ꩫ︀်ႈꩫ︀မ︀်။ ꩭွေၸ︀က︀်က︀တ︀်ယ︀ႃႇ ဢ︀ꩫ︀်ႈဢ︀ွꩫ︀်တ︀က︀ိꩫ︀ႆ︀ၢႈꩫ︀က︀ေႃႇ တ︀ႅက︀်မ︀ႃးက︀ီး ꩫ︀င︀်တ︀ူꩫ︀်ႛမ︀ႆ︀ႇꩫ︀က︀ꩫ︀်ႈယ︀ႂ်မ︀ႃးꩬ︀ီ ꩫ︀ူက︀်ႉꩫ︀ႆ︀ႇၵ︀ဝ် ၵ︀ႃႈမ︀ႆ︀ႛꩭီတ︀်ꩭင︀်းက︀ꩫ︀်ႈꩫ︀က︀ꩫ︀်ႈꩫ︀မ︀်” ꩫ︀ဝꩫ︀်ႇ။

(မ︀တ︀်တ︀ႄး 13.33)

20ꩭႃလ︀ိူင︀်ႈ မ︀ꩫ︀်းꩡ︀ဝ်ႛဝႃႈꩫ︀ႆ︀ႇ “မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩫ︀င︀်ꩭိုဝ်မ︀ႆ︀ႛꩫ︀ႆ︀ တ︀ီတ︀ႅက︀်ႉꩭၢင︀်ႈဢ︀ိက︀်ꩫ︀ႆ︀ႇꩫ︀က︀ီး 21ꩫ︀င︀်ယ︀ႃႛꩫ︀ၢင︀်းၵ︀ၢဝ်ꩫ︀က︀ꩫ︀်ႈက︀ေႃႇ ꩡ︀ႂ်ႈဢ︀ူ။ ၸ︀ူႛယ︀ိင︀်းက︀ူဝ်ႇလ︀ိူင︀်ႈ ယ︀ႃႛꩫ︀ၢင︀်းၵ︀ၢဝ်ꩡ︀ွꩫ︀်လ︀ိူင︀်ႈဢ︀ဝ်ႈꩬ︀ီ ၵ︀ဝ်ႛမ︀ိူဝ်ႈၵ︀ꩫ︀်တ︀ၢင︀်ႈလ︀ိူင︀်ႈမ︀ႆ︀ႛ ၵ︀ူꩫ︀်းၵ︀ွတ︀်က︀ီး ၵ︀ဝ်ႛမ︀ိူဝ်ႈတ︀င︀်းမ︀ိူင︀်းမ︀ႆ︀ႛ ဢ︀ဝ်ႈၸ︀ူဝ်းပ︀ွင︀်းမ︀ႃးဢ︀ူ” ꩫ︀ဝꩫ︀်ႇ။

တ︀ၢင︀်းပ︀တ︀ူႈဢ︀ꩫ︀်ႈꩭိပ︀်

(မ︀တ︀်တ︀ႄး 7.13,14,21-23)

22ꩡ︀ဝ်ႛယ︀ေꩬ︀ု က︀ႃꩡ︀ႃႉက︀ႃဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇ ဝီင︀်းလ︀ိူင︀်ႈယ︀ဝ်ႇဝီင︀်းလ︀ိူင︀်ႈ၊ မ︀ၢꩫ︀်ႛလ︀ိူင︀်ႈယ︀ဝ်ႇမ︀ၢꩫ︀်ႛလ︀ိူင︀်ႈမ︀ႆ︀ႛ ꩭူဝ်းတ︀ြႃးꩬ︀ီၸ︀ႃက︀ႃဢ︀ူ။ 23က︀ူꩫ︀်းက︀ူဝ်ႇလ︀ိူင︀်ႈယ︀ႃႇ “ꩡ︀ဝ်ႛꩴ︀း က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩫ︀ႆ︀ႛၵ︀ေꩬ︀ေꩫ︀ႆ︀ႇၵ︀ဝ် မ︀ဝ်ꩫ︀မ︀်တ︀ီၵ︀ႃႛက︀ျႃး” ꩫ︀ဝꩫ︀်ႇ။ ꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုယ︀ႃႇ 24“ꩬ︀ူတ︀ၢင︀်းပ︀တ︀ူႈဢ︀ꩫ︀်ႈꩭိပ︀်မ︀ႆ︀ႛ ꩭႂ်ႛပ︀ူဝ်းꩫ︀ႆ︀ႛၵ︀ဝ်ႛꩫ︀ႆ︀ႇ ꩬ︀ေႈꩡ︀ႃႉက︀ꩫ︀်ႈတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူꩫ︀်းꩫ︀မ︀်ꩰလ︀ၢႆ︀လ︀ၢႆ︀ယ︀ႃႇ တ︀ၢင︀်းပ︀တ︀ူႈဢ︀မ︀ႂ်းမ︀ႆ︀ႛ ꩭႂ်ႛပ︀ူဝ်းꩫ︀ႆ︀ႛၵ︀ဝ်ႛꩫ︀ႆ︀ႇ ꩬ︀ေႈꩡ︀ႃႉက︀ꩫ︀်ႈꩫ︀က︀ေႃႇ ꩵ︀ႈꩫ︀ႆ︀ႛၵ︀ဝ်ႛ။ 25ꩡ︀ဝ်ႛꩭိူꩫ︀်းတ︀ၢင︀်းပ︀တ︀ူႈꩭၢပ︀်ယ︀ဝ်ႇက︀ႃꩫ︀ႆ︀ႇꩬ︀ိုင︀် ꩬ︀ူလ︀ုက︀်ႉက︀ꩫ︀်ႛꩫ︀ွက︀်ႉမ︀ႆ︀ႛ တ︀ွႆ︀တ︀ၢင︀်းပ︀တ︀ူႈင︀ႆ︀း “ꩡ︀ဝ်ႛꩴ︀း တ︀ူႈမ︀ႆ︀ႛ တ︀ၢင︀်းပ︀တ︀ူႈပ︀ုတ︀်ꩭႂ်ႛတ︀ီၵ︀ႃႛမ︀လ︀ႃး” ꩫ︀ꩬ︀ီဝႃႈꩫ︀က︀ေႃႇ “ꩬ︀ူ က︀ူꩫ︀်းပ︀ႃႛလ︀ႂ်ႈꩫ︀ႆ︀။ က︀ဝ်ႈꩵ︀ႈတ︀ွင︀်း” ꩫ︀ꩬ︀ီတ︀ီဝႃႈꩫ︀မ︀်။ 26မ︀ိူဝ်ႈဢ︀မ︀ႂ်းꩬ︀ူယ︀ႃႇ “တ︀ူႈၵ︀ႃႛယ︀ႃႇ ဢ︀ꩫ︀်ႈတ︀င︀်းꩡ︀ဝ်ႛ ꩭူမ︀်ႈက︀ိꩫ︀်ႈမ︀ႃးꩫ︀ႆ︀ႇၵ︀ဝ်တ︀ီၵ︀ႃႛꩫ︀မ︀်။ မ︀ၢꩫ︀်ႛဝီင︀်းတ︀ူႈမ︀ႆ︀ႛ ꩡ︀ဝ်ႛ ꩭူဝ်းတ︀ြႃးမ︀ႃးတ︀ီၵ︀ႃႛဢ︀ူ” ꩫ︀ꩬ︀ီတ︀ီဝႃႈꩫ︀မ︀်။ 27ꩫ︀ႆ︀ႇꩫ︀က︀ေႃႇ မ︀ꩫ︀်းယ︀ႃႇ “ꩬ︀ူ လ︀ုက︀်ႉဢ︀မ︀ႆ︀ႚမ︀ႃးꩫ︀ꩫ︀ႆ︀ႇ က︀ဝ်ႈꩵ︀ႈတ︀ွင︀်း။ လ︀ုက︀်ႉမ︀ႆ︀ႛ ဢ︀ွက︀်က︀ႃတ︀ႃႉ။ ꩬ︀ူယ︀ႃႇ က︀ူꩫ︀်းဢ︀ꩫ︀်ႈမ︀ဝ်ꩫ︀ီႈꩫ︀မ︀်” ꩫ︀ꩬ︀ီတ︀ီဝႃႈꩫ︀မ︀်။ 28ꩬ︀ူယ︀ႃႇ မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ႃပ︀ြႃꩭၢမ︀်၊ ဢ︀ေꩬ︀က︀်၊ ယ︀ႃက︀ုင︀ႆ︀း ပ︀ရ︀ေႃးၸ︀ႅတ︀်ႉတ︀င︀်းမ︀ိူင︀်း ထိုင︀်က︀ꩫ︀်ႈꩫ︀ႆ︀ႇမ︀ႆ︀ႛꩭꩫ︀်ꩬ︀ီ ꩬ︀ူၸ︀ူႛꩡ︀ဝ်ႛယ︀ႃႇ မ︀ိူင︀်းဢ︀မ︀ႂ်းမ︀ႆ︀ႛ တ︀ီမ︀ဝ်ꩫ︀ႆ︀ႛၵ︀ဝ်ႛꩫ︀မ︀်။ မ︀ိူဝ်ႈဢ︀မ︀ႂ်း ꩬ︀ူꩭႆ︀ႛဢ︀ူဝ်ႈꩰꩬ︀ီ တ︀ီꩫ︀ႆ︀ႛက︀တ︀်ၵ︀ိဝ်ႛက︀တ︀်က︀ၢင︀်းက︀ꩫ︀်ႈꩫ︀မ︀်။ 29က︀ူꩫ︀်းꩫ︀ႆ︀ႇၵ︀ဝ် လ︀ုက︀်ႉဝꩫ︀်းဢ︀ွက︀်၊ ဝꩫ︀်းတ︀ူက︀်၊ ꩫ︀ႃႛꩭွင︀်၊ ပ︀ႆ︀ၢႈꩡ︀ၢꩫ︀်းတ︀င︀်းꩬ︀ီꩫ︀ႃႛမ︀ႆ︀ႛမ︀ႃးꩬ︀ီ ပ︀ွႆ︀းမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ီꩫ︀င︀်ႈက︀ꩫ︀်ႈꩫ︀မ︀်။ 30ꩬ︀ူ က︀ူꩫ︀်းဢ︀ꩫ︀်ႈင︀ႆ︀ႚဢ︀ူပ︀ႆ︀ၢႈꩭၢင︀်ꩫ︀ႆ︀ႇၵ︀ဝ် တ︀ီထိုင︀်က︀ꩫ︀်ႛꩫ︀ႃႛလ︀ေႚလ︀ေႚက︀ႃꩫ︀မ︀်၊ ဢ︀ꩫ︀်ႈင︀ႆ︀ႚက︀ꩫ︀်ႛꩫ︀ႃႛလ︀ေႚလ︀ေႚမ︀ႆ︀ႛဢ︀ူꩫ︀ႆ︀ႇၵ︀ဝ်ယ︀ႃႇ တ︀ီက︀ွႆ︀ႛလ︀င︀်ပ︀ိူꩫ︀်ႈက︀ႃꩫ︀မ︀်” ꩫ︀ဝꩫ︀်ႇ။

ꩡ︀ဝ်ႛယ︀ေꩬ︀ု ꩡ︀ႃႇဝီင︀်းယ︀ေရ︀ုꩬ︀လ︀ိမ︀်ၵ︀ီၵ︀ုမ︀်

(မ︀တ︀်တ︀ႄး 23.37-39)

31မ︀ိူဝ်ႈဢ︀မ︀ႂ်း ၸ︀ႃရ︀ိꩬ︀ႄက︀မ︀်ႈၸ︀ွင︀်း ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ “လ︀ုက︀်ႉတ︀ီႈꩫ︀ႆ︀ႇမ︀ႆ︀ႛ ဢ︀ွက︀်က︀ႃတ︀ၢင︀်တ︀ီႈတ︀ီၵ︀ႃႛမ︀ႃးတ︀ႃႉ။ မ︀ႂ်းꩡ︀ဝ်ႛ မ︀ႆ︀ႛ ꩭေရ︀ုတ︀် ၵ︀ႂ်ႈဢ︀ဝ်ႈတ︀ႆ︀ၢႈတ︀ီၵ︀ႃႛဢ︀ူ” ꩫ︀ဝꩫ︀်ႇ။ 32ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈ မ︀ိူဝ်ႈꩫ︀ႆ︀ႇꩫ︀ၵ︀ႃမ︀ိူဝ်ႈꩭုက︀်ႉယ︀ႃႇ ၸ︀ီꩭၢႆ︀ႇꩫ︀ႆ︀ႇၵ︀ဝ်မ︀ႆ︀ႛ ဝႃႈꩭူဝ်ႛ၊ ၸ︀ူႛၵ︀ႆ︀ႛၸ︀ူႛꩡ︀ီပ︀်ꩫ︀ႆ︀ႇၵ︀ဝ်မ︀ႆ︀ႛ ဝႃႈဢ︀ဝ်ႈꩫ︀ီႈꩭႂ်ႛꩫ︀မ︀်။ မ︀ိူဝ်ႈꩭိုဝ်းယ︀ႃႇ ဢ︀မ︀ူးက︀ဝ်ႈတ︀ီဢ︀ဝ်ႈယ︀ဝ်ႇꩫ︀မ︀်ꩫ︀ꩬ︀ီ မ︀ႃꩫ︀ိꩫ︀်ႈဢ︀မ︀ႂ်းမ︀ႆ︀ႛ က︀ႃဝႃႈတ︀ႃႉ။ 33မ︀ိူဝ်ႈꩫ︀ႆ︀ႇ၊ မ︀ိူဝ်ႈꩭုက︀်ႉင︀ႆ︀း မ︀ိူဝ်ႈꩭိုဝ်းယ︀ႃႇ က︀ဝ်ႈတ︀ီပ︀ႆ︀ႈတ︀ၢင︀်းꩫ︀မ︀်။ ပ︀ရ︀ေႃးၸ︀ႅတ︀်ႉꩫ︀ꩫ︀ႆ︀ႇယ︀ႃႇ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛလ︀ိူဝ်ꩬ︀ီ ဢ︀မ︀ႆ︀ႚက︀ေႃႇတ︀ႆ︀ၢႈꩵ︀ႈထႅက︀်ႉ။ 34ဝီင︀်းယ︀ေရ︀ုꩬ︀လ︀ိမ︀်ꩴ︀း မ︀ႂ်းယ︀ႃႇ ပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်မ︀ႆ︀ႛဢ︀ဝ်ႈတ︀ႆ︀ၢႈမ︀ႃး၊ ၸ︀ူႛꩡ︀ႂ်ႇၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩭိꩫ︀်ꩬ︀ိုင︀်းမ︀ႃးယ︀ဝ်ႇ။ ꩫ︀င︀်က︀ႆ︀ဢ︀ွꩫ︀်ꩫ︀ႆ︀ႇၵ︀ဝ်မ︀ႆ︀ႛ က︀ႆ︀တ︀ူဝ်ႈမ︀ေႈ ၵ︀ႂ်ႈꩭႂ်ႛꩬ︀ွꩫ︀်ႈပ︀ိက︀်မ︀ꩫ︀်းꩫ︀က︀ꩫ︀်ႈ လ︀ုက︀်ႉမ︀ႂ်းꩫ︀ႆ︀ႇၵ︀ဝ်မ︀ႆ︀ႛ က︀ီလ︀ႆ︀ၢပ︀ၢꩫ︀်ႈꩫ︀မ︀် က︀ဝ်ႈၵ︀ႂ်ႈက︀ွတ︀်တ︀ုမ︀်ႈမ︀ႃးꩫ︀ႆ︀ႇ။ ꩫ︀ႆ︀ႇꩫ︀က︀ေႃႇမ︀ႂ်းယ︀ႃႇ ꩵ︀ႈꩡ︀ူးမ︀ႃး။ 35င︀ႆ︀းꩫ︀ႆ︀ႇꩬ︀ီ ꩡ︀ွင︀်းၿိက︀်ႉမ︀ၢꩫ︀်မ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛတ︀ီၵ︀ွတ︀်ꩫ︀မ︀်။ က︀ဝ်ႈဝႃႈက︀ွတ︀်။ “ꩡ︀ဝ်ႛဢ︀ꩫ︀်ႈဢ︀ဝ်ႈꩡ︀ိုဝ်ႈၸ︀ြႃးပ︀ီꩫ︀်ႈꩡ︀ဝ်ႛ က︀ျွႃးမ︀ႃးꩫ︀ႆ︀ႇ မ︀ၢင︀်က︀လ︀ႃꩭႂ်ႛယ︀င︀်းက︀တ︀ႃႉ” ꩫ︀ꩬ︀ီက︀ႃႈမ︀ႂ်းမ︀ဝ်ဝႃႈယ︀ႃႇ မ︀ႂ်းက︀ဝ်ႈမ︀ႆ︀ႛꩵ︀ႈꩫ︀ႆ︀ႛꩭꩫ︀်ယ︀ဝ်ႇ” ꩫ︀ဝꩫ︀်ႇ။

Currently Selected:

လ︀ုက︀ႃ 13: kht

Highlight

Copy