လ︀ုက︀ႃ 12

လ︀ွင︀်ႈၸ︀ူႛက︀ႅမ︀်ႛꩫ︀ႃႛꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛꩬ︀တ︀ိ

(မ︀တ︀်တ︀ႄး 10.26,27)

1မ︀ိူဝ်ႈဢ︀မ︀ႂ်း က︀ူꩫ︀်းလ︀ႆ︀ၢꩭီင︀်တ︀ုမ︀်ႈမ︀ႃးက︀ꩫ︀်ႈꩬ︀ီ ၵ︀ဝ်ၸ︀ူႛꩡ︀ဝ်ႛꩫ︀ႆ︀ၢႈက︀ေႃႇ ꩫ︀င︀်တ︀ီယ︀ီပ︀်က︀ꩫ︀်ႈꩫ︀မ︀်။ ꩡ︀ဝ်ႛယ︀ေꩬ︀ုယ︀ႃႇ ဢ︀ွꩫ︀်ႈတ︀ၢင︀်းလ︀ေႚလ︀ေႚ တ︀ပ︀ေးꩡ︀ဝ်ႛၵ︀ဝ်မ︀ႆ︀ႛ “ꩬ︀ူ ယ︀ႃႛꩫ︀ၢင︀်းၵ︀ၢဝ်ၸ︀ႃရ︀ိꩬ︀ႄ တ︀ၢင︀်းက︀ႅင︀်းၸ︀ူႛက︀ႅမ︀်ႛꩫ︀ႃႛꩫ︀ႆ︀ႇၵ︀ဝ်မ︀ႆ︀ႛ ꩬ︀တ︀ိတ︀ႃႉ။ 2ဢ︀ꩫ︀်ႈက︀ႃႈꩡ︀ိုဝ်ႈဢ︀ဝ်ႈမ︀ႅပ︀်ဝႆ︀ႇꩫ︀ႆ︀ႇၵ︀ဝ် တ︀ီဢ︀ဝ်ႈဢ︀ွက︀်မ︀ႃးꩫ︀မ︀်။ ဢ︀ꩫ︀်ႈက︀ႃႈꩡ︀ိုဝ်ႈက︀ႅမ︀်က︀တ︀်ႉꩰဝႆ︀ႇꩫ︀ႆ︀ႇၵ︀ဝ်က︀ေႃႇ တ︀ီဢ︀ဝ်ႈပ︀ႅꩫ︀်ႈၵ︀ွတ︀်ꩫ︀မ︀်။ 3ၵ︀ၢမ︀်းဢ︀ꩫ︀်ႈꩬ︀ူ ဢ︀ꩫ︀်ႈꩫ︀မ︀်ႈꩬ︀ိင︀်မ︀ႆ︀ႛတ︀ၢꩫ︀်ႛꩫ︀ႆ︀ႇ ဢ︀ꩫ︀်ႈလ︀ႅင︀်းမ︀ႆ︀ႛ ပ︀ိူꩫ︀်ႈတ︀ီꩫ︀ႆ︀ႛꩥ︀ိꩫ︀်းက︀ꩫ︀်ႈꩫ︀မ︀်။ ဢ︀ꩫ︀်ႈꩬ︀ူꩡ︀ွက︀်ႉꩡ︀ီင︀်မ︀ႆ︀ႛ လ︀ၢပ︀်ႉꩬ︀ၢပ︀်ႉက︀ꩫ︀်ႈꩫ︀ႆ︀ႇၵ︀ဝ် လ︀ုက︀်ႉက︀ꩫ︀်ႛꩫ︀ိူဝ်ꩡ︀ၢꩫ︀်းမ︀ႆ︀ႛ ပ︀ိူꩫ︀်ႈတ︀ီဢ︀ိဝ်ꩫ︀မ︀်။

ၸ︀ႂ်မ︀ႆ︀ႛꩫ︀ႆ︀ ဝႃႈက︀ူဝ်ႈတ︀ေႇတ︀ေႇꩫ︀ႆ︀ႇ

(မ︀တ︀်တ︀ႄး 10.28-31)

4ပ︀ီႈꩫ︀ွင︀်ႇၵ︀ဝ်ꩴ︀း က︀ဝ်ႈဝႃႈက︀ွတ︀်။ က︀ူဝ်ႇဢ︀ꩫ︀်ႈတ︀ူဝ်ႈꩬ︀ူမ︀ႆ︀ႛꩫ︀ႆ︀ၢႈꩬ︀ိုင︀် ဢ︀ဝ်ႈတ︀ႆ︀ၢႈꩫ︀ႆ︀ႛꩬ︀ီ တ︀ၢင︀်ဢ︀ꩫ︀်ႈက︀ꩬ︀င︀်က︀ေႃႇ ꩭီတ︀်ဢ︀ိက︀်မ︀ဝ်ꩫ︀ႆ︀ႛမ︀ႆ︀ႛ ပ︀ီက︀ူဝ်ႈ။ 5က︀ူဝ်ႇဢ︀ꩫ︀်ႈꩬ︀ူဝႃႈက︀ူဝ်ႈꩫ︀ႆ︀ႇယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ တ︀ူဝ်ႈꩬ︀ူမ︀ႆ︀ႛဢ︀ဝ်ႈတ︀ႆ︀ၢႈယ︀ဝ်ႇက︀ီး ပ︀ွႆ︀တ︀ူက︀်င︀ႃးလ︀ႆ︀ၢးပ︀ီꩫ︀်ႈꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛꩬ︀ိုင︀် က︀ူဝ်ႈက︀ꩫ︀်ႈတ︀ႃႉ။ 6ꩫ︀ူက︀်ႉꩡ︀ွက︀်ꩭႃႛတ︀ူဝ်ႈမ︀ႆ︀ႛ ဢ︀ဝ်ႈင︀ိူꩫ︀်းꩡ︀ွꩫ︀်လ︀ိူင︀်ႈꩫ︀ႆ︀ၢႈ ꩬ︀ိုဝ်ႇꩫ︀ႆ︀ႛမ︀ဝ်ꩡ︀ႂ်ႈ။ ꩫ︀ႆ︀ႇꩫ︀က︀ေႃႇ ꩫ︀ူက︀်ႉꩡ︀ွက︀်တ︀ူဝ်ႈလ︀ိူင︀်ႈမ︀ႆ︀ႛꩫ︀ႆ︀ၢႈက︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛꩵ︀ႈလ︀ုမ︀်းဝႆ︀ႇ။ 7မ︀ꩫ︀်းꩡ︀ဝ်ႛယ︀ႃႇ ꩬ︀ီꩫ︀်ႛၸ︀ူမ︀်ꩬ︀ူ က︀ူႈꩬ︀ီꩫ︀်ႛမ︀ႆ︀ႛတ︀မ︀ိူင︀်းၵ︀ၢꩫ︀်းဝႆ︀ႇဢ︀ူ။ င︀ႆ︀းꩫ︀ႆ︀ႇꩬ︀ီ ꩬ︀ူပ︀ီက︀ူဝ်ႈ။ ꩬ︀ူယ︀ႃႇ ꩫ︀ူက︀်ႉꩡ︀ွက︀်ꩫ︀ႆ︀ႇၵ︀ဝ်မ︀ႆ︀ႛ ဢ︀ၢꩫ︀်တ︀ၢꩫ︀်ၵ︀ꩫ︀်ယ︀ႂ်ꩬ︀ႃဢ︀ူ။

လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛ က︀ွမ︀်းꩭၢပ︀်ႉꩫ︀ၵ︀ႃ ပ︀ႆ︀ၵ︀ွတ︀်

(မ︀တ︀်တ︀ႄး 10.32,33; 12.32; 10.19,20)

8က︀ဝ်ႈဝႃႈက︀ွတ︀်။ က︀ဝ်ႈယ︀ႃႇ ꩡ︀ဝ်ႛꩬ︀ူꩫ︀မ︀်ꩫ︀ꩫ︀ႆ︀ႇ ပ︀ၢင︀်ႈꩫ︀ႃႛက︀ူꩫ︀်းမ︀ႆ︀ႛ ꩬ︀ူဝႃႈက︀ီး လ︀ုက︀်ႉက︀ူꩫ︀်းက︀ေႃႇꩬ︀ူမ︀ႆ︀ႛ ပ︀ၢင︀်ႈꩫ︀ႃႛၵ︀ုꩫ︀်ꩬ︀ၢင︀်ၸ︀ြႃးပ︀ီꩫ︀်ႈꩡ︀ဝ်ႛၵ︀ဝ်မ︀ႆ︀ႛ တ︀ီမ︀တ︀်ႉတ︀ပ︀ေးမ︀ꩫ︀်းꩡ︀ဝ်ႛꩫ︀မ︀်။ 9ꩫ︀ႆ︀ႇꩫ︀က︀ေႃႇ က︀ဝ်ႈမ︀ႆ︀ႛ ꩬ︀ူပ︀ၢင︀်ႈꩫ︀ႃႛက︀ူꩫ︀်းမ︀ႆ︀ႛ ပ︀ႆ︀ၵ︀ွတ︀်က︀ီး လ︀ုက︀်ႉက︀ူꩫ︀်းက︀ေႃႇ ꩬ︀ူမ︀ႆ︀ႛ ပ︀ၢင︀်ႈꩫ︀ႃႛၵ︀ုꩫ︀်ꩬ︀ၢင︀်ၸ︀ြႃးပ︀ီꩫ︀်ႈꩡ︀ဝ်ႛၵ︀ဝ်မ︀ႆ︀ႛ တ︀ီပ︀ႆ︀ၵ︀ွတ︀်ꩫ︀မ︀်။ 10ꩬ︀ူလ︀ုက︀်ႉက︀ူꩫ︀်းမ︀ႆ︀ႛ ၸ︀ိတ︀်ꩬ︀ူပ︀်ၸ︀ိတ︀်ၵ︀ၢမ︀်းက︀ီး ဢ︀ပ︀ႅတ︀်ႉꩬ︀ူမ︀ႆ︀ႛ ပ︀ွႆ︀လ︀ွတ︀်ႉꩭႂ်ႛꩫ︀ႆ︀ႛꩫ︀က︀ေႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၸ︀ိတ︀်ꩬ︀ူပ︀်ၸ︀ိတ︀်ၵ︀ၢမ︀်းက︀ီး ပ︀ွႆ︀လ︀ွတ︀်ႉꩭႂ်ႛꩵ︀ႈꩫ︀ႆ︀ႛ။ 11ꩬ︀ူမ︀ႆ︀ႛပ︀ိူꩫ︀်ႈ ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်၊ ꩡ︀ဝ်ႛၵ︀ုꩫ︀်ꩫ︀ႆ︀ႇၵ︀ဝ်၊ က︀ူꩫ︀်းယ︀ႂ်ꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈက︀ႃꩡ︀ႅပ︀်ႉက︀ီး ꩬ︀ူꩭိုဝ်လ︀ိုဝ်ဝႃႈက︀ေႛတ︀ွပ︀်ပ︀ွက︀်ႉꩫ︀ꩫ︀ႆ︀ႇ ပ︀ီက︀ပ︀်ႉꩡ︀ႂ်ႈ။ 12က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ိူဝ်ႈဢ︀မ︀ႂ်း ꩬ︀ူက︀ꩬ︀င︀်ဝႃႈ ဝႃႈꩫ︀ꩫ︀ႆ︀ႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ တ︀ီꩫ︀ေꩭႂ်ႛꩫ︀မ︀်” ꩫ︀ဝꩫ︀်ႇ။

ပ︀ုင︀်ၵ︀ိူင︀်ႈၵ︀ၢမ︀်း ၸ︀ူႛမ︀ီးဢ︀ꩫ︀်ႈမ︀ိူက︀်ႉ

13မ︀ိူဝ်ႈဢ︀မ︀ႂ်း လ︀ုက︀်ႉꩫ︀ႂ်းၸ︀ုင︀်က︀ူꩫ︀်းမ︀ႆ︀ႛ က︀ူဝ်ႇလ︀ိူင︀်ႈယ︀ႃႇ “ꩬ︀ြႃꩴ︀း ꩭႂ်ႛပ︀ူဝ်းက︀ဝ်ႈမ︀ႆ︀ႛ က︀ေꩡ︀ဝ်ႛက︀ဝ်ႈ ဢ︀မ︀ွေပ︀ူဝ်တ︀ူႈ ပ︀ꩫ︀်ႈꩭႂ်ႛꩫ︀ႆ︀ႇ ဝႃႈꩭႂ်ႛတ︀ီၵ︀ႃႛမ︀ႃးတ︀ႃႉ” ꩫ︀ဝꩫ︀်ႇ။ 14ꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုယ︀ႃႇ “က︀ူဝ်ႇꩴ︀း ၸ︀ႂ်ꩫ︀ႆ︀က︀ဝ်ႈမ︀ႆ︀ႛ ဢ︀ၵ︀ၢင︀်းꩭၢင︀်းꩬ︀ွင︀်ၵ︀ိူဝ်မ︀ႆ︀ႛ ပ︀ႅတ︀်ႉတ︀ြႃး၊ ꩭၢင︀်းပ︀ꩫ︀်ႈဢ︀မ︀ွေပ︀ူင︀်ႈꩭႂ်ႛꩫ︀ႆ︀ႇ” ꩫ︀ဝꩫ︀်ႇ။ 15မ︀ꩫ︀်းꩡ︀ဝ်ႛက︀ၢပ︀်ꩬ︀ီဝႃႈꩫ︀ႆ︀ႇ “ဢ︀ꩫ︀်ႈလ︀ေႃးၸ︀ႃးက︀ူႈၸ︀ꩫ︀်းမ︀ႆ︀ႛ ꩬ︀တ︀ိꩬ︀ီင︀ိူင︀်ႇတ︀ႃႉ။ ꩬ︀ူမ︀ီးၵ︀ႂ်ႈလ︀ႂ်ႈꩫ︀က︀ေႃႇ ဢ︀ꩬ︀ၢက︀်ႉꩬ︀ူတ︀ေႇတ︀ေႇယ︀ႃႇ ဢ︀ဝ်ႈၵ︀ူဝ်းလ︀ိင︀်းꩬ︀ူꩵ︀ႈꩡ︀ႂ်ႈ ꩫ︀ိပ︀်ဢ︀ူꩫ︀ႆ︀ႇ” ꩫ︀ဝꩫ︀်ႇ။ 16ယ︀ဝ်ႇက︀ီးမ︀ꩫ︀်းꩡ︀ဝ်ႛ ဢ︀ဝ်ႈပ︀ုင︀်ၵ︀ိူင︀်ႈၵ︀ၢမ︀်းဝႃႈꩫ︀ႆ︀ႇ “ၸ︀ူႛမ︀ီးဢ︀ꩫ︀်ႈꩫ︀ႃးလ︀ူင︀်ယ︀င︀်းꩬ︀ီ လ︀ုက︀်ႉၵ︀ဝ်ႛလ︀ုက︀်ႉꩫ︀မ︀်ႇ ဢ︀ၢꩫ︀်တ︀ၢꩫ︀်ꩫ︀ႆ︀ႛꩫ︀ႆ︀ႇ က︀ူဝ်ႇလ︀ိူင︀်ႈယ︀င︀်းဢ︀ူ။ 17မ︀ꩫ︀်းယ︀ႃႇ “ယ︀ေးက︀ဝ်ႈတ︀ီမ︀်ႈမ︀ူတ︀်ယ︀ဝ်ႇ။ ၵ︀ဝ်ႛက︀ဝ်ႈတ︀ီꩭလ︀ိုဝ်ဝႆ︀ႇလ︀ိူဝ်ႊ” ꩫ︀ꩬ︀ီၵ︀ႂ်ႈꩡ︀ႂ်ႈဢ︀ူ။ 18ပ︀ႆ︀ၢႈꩭၢင︀်မ︀ႆ︀ႛယ︀ႃႇ “ꩡ︀ႂ်ႈယ︀ဝ်ႇ။ က︀ဝ်ႈတ︀ီꩭီတ︀်င︀ႆ︀းꩫ︀မ︀်။ ယ︀ေးက︀ဝ်က︀ဝ်ႈꩫ︀ႆ︀ႇၵ︀ဝ် ယ︀ႃႇၵ︀ွတ︀်ꩬ︀ီ ယ︀ေးဢ︀ꩫ︀်ႈယ︀ႂ်ꩬ︀ႃꩫ︀ႆ︀ႇၵ︀ဝ်ပ︀ူက︀်င︀ႆ︀း ၵ︀ဝ်ႛက︀ဝ်ႈ၊ ၵ︀ူဝ်းလ︀ိင︀်းက︀ဝ်ႈꩫ︀ႆ︀ႇၵ︀ဝ်တ︀င︀်းမ︀ိူင︀်း တ︀ီꩬ︀ႂ်ဝႆ︀ႇꩫ︀မ︀်” ꩫ︀ဝꩫ︀်ႇ။ 19ယ︀ဝ်ႇက︀ီး “ၵ︀ွꩫ︀်က︀ဝ်ႈꩴ︀း မ︀ႂ်းဢ︀မ︀်လ︀ူင︀်ယ︀ဝ်ႇ။ လ︀ၢက︀်ႉꩫ︀ႆ︀ႇ ꩭွမ︀်ꩫ︀ွေလ︀ႃး။ က︀ီလ︀ႆ︀ၢပ︀ီႈ မ︀ႂ်းꩡ︀ႂ်ႈꩬ︀ူႛꩫ︀င︀်ႈက︀ိꩫ︀်ႈꩬ︀ီ ဢ︀ူပ︀ိဝ်ꩰလ︀ႃး ꩫ︀ꩬ︀ီ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛတ︀ီဝႃႈꩫ︀မ︀်” ꩫ︀ဝꩫ︀်ႇ။ 20ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ꩫ︀်းမ︀ႆ︀ႛ “ꩭိူဝ်း ၸ︀ူႛမ︀ိူက︀်ႉ၊ ၵ︀မ︀်ႈꩫ︀ႆ︀ႇတ︀ေႇတ︀ေႇ ဢ︀ꩬ︀ၢက︀်ႉမ︀ႂ်းက︀ဝ်ႈတ︀ီယ︀ုတ︀်ꩫ︀မ︀်။ င︀ႆ︀းက︀ီး ၵ︀ူဝ်းလ︀ိင︀်းဢ︀ꩫ︀်ႈမ︀ႂ်းꩭွမ︀်ဝႆ︀ႇꩫ︀ႆ︀ႇၵ︀ဝ် တ︀ီပ︀ီꩫ︀်ႈၵ︀ွင︀်ၸ︀ႂ်က︀ႃꩫ︀ႆ︀” ꩫ︀ဝꩫ︀်ႇ။ 21င︀ႆ︀းꩫ︀ႆ︀ႇꩬ︀ီ ꩬ︀ူၵ︀ူဝ်းလ︀ိင︀်းꩡ︀ႃႇၸ︀ူႛꩡ︀ဝ်ႛ ၵ︀ႂ်ႈလ︀ႂ်ႈꩭွမ︀်ဝႆ︀ႇꩫ︀က︀ေႃႇ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်မ︀ီးတ︀ꩫ︀်းက︀ီး တ︀ီပ︀ီꩫ︀်ႈင︀ႆ︀းꩫ︀မ︀်” ꩫ︀ဝꩫ︀်ႇ။

ပ︀ီက︀ပ︀်ႉꩡ︀ႂ်ႈ

(မ︀တ︀်တ︀ႄး 6.25-34)

22င︀ႆ︀းꩬ︀ီ တ︀ပ︀ေးꩡ︀ဝ်ႛၵ︀ဝ်မ︀ႆ︀ႛ ꩡ︀ဝ်ႛယ︀ေꩬ︀ုဝႃႈꩫ︀ႆ︀ႇယ︀ႃႇ “င︀ႆ︀းꩫ︀ႆ︀ႇꩬ︀ီ ꩬ︀ူမ︀ႆ︀ႛက︀ဝ်ႈဝႃႈက︀ွတ︀်။ ꩭႂ်ႛပ︀ူဝ်းဢ︀ꩬ︀ၢက︀်ႉꩫ︀ိပ︀်ꩫ︀ႆ︀ႇ က︀ꩬ︀င︀်တ︀ီက︀ိꩫ︀်ႈ၊ က︀ꩬ︀င︀်တ︀ီꩫ︀ုင︀်ႈꩫ︀ꩫ︀ႆ︀ႇ ꩡ︀ႃႇတ︀ူဝ်ႈꩬ︀ူ ပ︀ီက︀ပ︀်ႉꩡ︀ႂ်ႈ။ 23ဢ︀ꩬ︀ၢက︀်ႉယ︀ႃႇ ဢ︀ꩫ︀်ႈက︀ိꩫ︀်ႈမ︀ႆ︀ႛ ဢ︀ၵ︀ႅက︀်ႉꩬ︀ႃဢ︀ူ။ တ︀ူဝ်ႈက︀ေႃႇ ၵ︀ိူင︀်ႈꩫ︀ုင︀်ႈမ︀ႆ︀ႛ ဢ︀ၵ︀ႅက︀်ႉꩬ︀ႃဢ︀ူ။ 24ꩫ︀ူက︀်ႉꩫ︀ႆ︀ႇၵ︀ဝ်မ︀ႆ︀ႛလ︀ႅမ︀်းတ︀ႃႉ။ ၵ︀ဝ်ယ︀ႃႇ ꩭွေၸ︀ꩫ︀်းက︀ေႃႇꩵ︀ႈဝၢꩫ︀်။ ပ︀တ︀်ၵ︀ဝ်ႛဢ︀ဝ်ႈၵ︀ဝ်ႛက︀ေႃႇꩵ︀ႈꩭီတ︀်။ ၵ︀ဝ်မ︀ႆ︀ႛ ၵ︀ွက︀်ႉဝႆ︀ႇဢ︀ꩫ︀်ႈက︀ိꩫ︀်ႈꩫ︀ႆ︀ႇၵ︀ဝ်၊ ယ︀ေးꩫ︀ႆ︀ႇၵ︀ဝ်က︀ေႃႇꩵ︀ႈယ︀င︀်း။ ꩫ︀ႆ︀ႇꩫ︀က︀ေႃႇ ၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛမ︀ဝ်လ︀ီင︀်ႇက︀ျႃး။ ꩬ︀ူယ︀ႃႇ ꩫ︀ူက︀်ႉꩫ︀ႆ︀ႇၵ︀ဝ်မ︀ႆ︀ႛ ၵ︀ꩫ︀်ယ︀ႂ်ꩬ︀ႃမ︀ဝ်ꩡ︀ႂ်ႈ။ 25ꩬ︀ူၸ︀ႂ်ꩫ︀ႆ︀က︀ပ︀်ႉꩡ︀ႂ်ႈꩬ︀ီ ဢ︀ꩬ︀ၢက︀်ႉၸ︀ူႛꩡ︀ဝ်ႛၵ︀ိုပ︀်ႉလ︀ိူင︀်ႈ ဢ︀ဝ်ႈယ︀ၢဝ်းဢ︀ိက︀်ပ︀ီꩫ︀်ႈꩫ︀ႆ︀ႇ။ 26လ︀ွင︀်ႈဢ︀ွꩫ︀်ၸ︀ꩫ︀်းꩫ︀င︀်င︀ႆ︀းꩫ︀ႆ︀ၢႈက︀ေႃႇ မ︀ဝ်ပ︀ီꩫ︀်ႈပ︀ေႇꩬ︀ီ ꩭီတ︀်က︀ꩬ︀င︀်ꩫ︀ႆ︀ တ︀ၢင︀်ဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ က︀ပ︀်ႉꩡ︀ႂ်ႈက︀ꩫ︀်ႈꩫ︀ႆ︀ႇ။ 27မ︀ွက︀်ယ︀ႃႛထိူꩫ︀်ꩫ︀ႆ︀ႇၵ︀ဝ်မ︀ႆ︀ႛ လ︀ႅမ︀်းတ︀ႃႉ။ မ︀ႆ︀က︀ေႃႇမ︀ဝ်ၸ︀ꩫ︀်ႛ၊ ꩭုက︀်က︀ေႃႇမ︀ဝ်တ︀ူဝ်း။ ꩫ︀ႆ︀ႇꩫ︀က︀ေႃႇ ꩡ︀ဝ်ႛꩭူဝ်ၵ︀မ︀်းꩬ︀ေႃလ︀မ︀ုꩫ︀် ဢ︀ꩫ︀်ႈမ︀ူꩫ︀်ႈင︀ဝ်းယ︀ႂ်လ︀ူင︀်ꩫ︀ႆ︀ၢႈက︀ေႃႇ ၵ︀ꩫ︀်က︀ႃႈမ︀ွက︀်ယ︀ႃႛဢ︀မ︀ႂ်းၵ︀ဝ် ꩫ︀ုင︀်ႈဢ︀ဝ်ႈꩬ︀ႅꩫ︀်ႛꩵ︀ႈပ︀ီꩫ︀်ႈ။ 28ꩬ︀ူ ဢ︀ꩫ︀်ႈတ︀ၢင︀်းယ︀ုမ︀်ယ︀မ︀်ႈဢ︀ေꩫ︀ႆ︀ႇၵ︀ဝ်ꩴ︀း ၸ︀ိူဝ်ယ︀ႃႛဢ︀ꩫ︀်ႈမ︀ိူဝ်ႈꩫ︀ႆ︀ႇယ︀င︀်းꩬ︀ီ မ︀ိူဝ်ႈꩭုက︀်ႉတ︀ီꩬ︀ုမ︀်ၸ︀ႆ︀းၵ︀ွတ︀်မ︀ႆ︀ႛꩫ︀ႆ︀ၢႈက︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛ ၵ︀ႆ︀ႇလ︀ိူင︀်ႈꩭၢင︀်ႛဢ︀ဝ်ႈꩬ︀ႅꩫ︀်ႛꩭႂ်ႛက︀ီး ꩬ︀ူမ︀ႆ︀ႛယ︀ႃႇ ၵ︀ႆ︀ႇမ︀ဝ်က︀ႃး တ︀ီမ︀ဝ်ꩭၢင︀်ႛꩭႂ်ႛက︀ျႃး။ 29လ︀ွင︀်ႈက︀ိꩫ︀်ႈလ︀ွင︀်ႈလ︀ုမ︀်ꩫ︀ႆ︀ႇၵ︀ဝ်မ︀ႆ︀ႛ ပ︀ီက︀ပ︀်ႉꩡ︀ႂ်ႈက︀ꩫ︀်ႈ။ 30က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀မ︀ႂ်းၵ︀ဝ်ယ︀ႃႇ က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်ယ︀ုမ︀်ယ︀မ︀်ႈꩫ︀ႆ︀ႇၵ︀ဝ်ꩫ︀မ︀် ၵ︀ႃက︀ꩫ︀်ႈꩫ︀ႆ︀ႇ။ ꩬ︀ူ ဢ︀မ︀ႂ်းၵ︀ဝ်ꩭၢင︀်ႇဢ︀ူꩫ︀ꩫ︀ႆ︀ႇ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူတ︀ွင︀်းဢ︀ူ။ 31မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩬ︀ိုင︀် ၵ︀ႃဢ︀ွꩫ︀်ႈတ︀ႃႉ။ င︀ႆ︀းက︀ီး ဢ︀မ︀ႂ်းၵ︀ဝ်တ︀င︀်းမ︀ိူင︀်း ပ︀ူဝ်ꩬ︀ူထႅမ︀်ꩭႂ်ႛဢ︀ူ။

ꩭွမ︀်ၵ︀ူဝ်းလ︀ိင︀်းမ︀ိူင︀်းက︀ၢင︀်ႈꩭၢဝ်

(မ︀တ︀်တ︀ႄး 6.19-21)

32ꩬ︀ူဢ︀ꩫ︀်ႈမ︀ိူꩫ︀်ꩫ︀င︀်ၸ︀ုင︀်ပ︀ူႇဢ︀ွꩫ︀်က︀ဝ်ႈၵ︀ဝ်ꩴ︀း။ ပ︀ီက︀ူဝ်ႈ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူယ︀ႃႇ ꩬ︀ူမ︀ႆ︀ႛ မ︀ိူင︀်းမ︀ꩫ︀်းꩡ︀ဝ်ႛၵ︀ႂ်ႈꩭႂ်ႛဢ︀ူ။ 33ၵ︀ူဝ်းလ︀ိင︀်းꩬ︀ူၵ︀ႆ︀ၢꩬ︀ီ ၸ︀ူႛꩭၢင︀်ႇꩫ︀ႆ︀ႇၵ︀ဝ်မ︀ႆ︀ႛ ပ︀ꩫ︀်ႈꩭႂ်ႛက︀ꩫ︀်ႈတ︀ႃႉ။ တ︀ႅက︀်ႉဢ︀ꩫ︀်ႈမ︀ဝ်ၸ︀ေႛꩡ︀ၢင︀်ႈꩫ︀ႆ︀ႇၵ︀ဝ် တ︀ိုဝ်းꩬ︀ီ က︀ၢင︀်ႈꩭၢဝ်မ︀ႆ︀ႛ ၵ︀ူဝ်းလ︀ိင︀်းꩭွမ︀်က︀ꩫ︀်ႈတ︀ႃႉ။ ဢ︀မ︀ႂ်းမ︀ႆ︀ႛယ︀ႃႇ ꩵ︀ႈမ︀ူတ︀်ꩡ︀ၢင︀်ႈ။ ၸ︀ူႛလ︀ၢက︀်ႉက︀ေႃႇꩵ︀ႈလ︀ၢက︀်ႉ။ ပ︀ူက︀်က︀ေႃႇꩵ︀ႈက︀ိꩫ︀်ႈ။ 34က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ူဝ်းလ︀ိင︀်းꩬ︀ူ ဢ︀မ︀ႆ︀ႚဝႆ︀ႇꩫ︀က︀ေႃႇ တ︀ီႈဢ︀မ︀ႂ်းမ︀ႆ︀ႛ ꩭူဝ်ꩡ︀ႂ်ႈꩬ︀ူတ︀ီထိုင︀်ꩫ︀မ︀်။

ꩡ︀ႃႇဝꩫ︀်းဢ︀ꩫ︀်ႈꩡ︀ဝ်ႛပ︀ွက︀်ႉမ︀ႃး ꩭႅမ︀်းဝႆ︀ႇတ︀ႃႉ

35ꩬ︀ူက︀ူႈꩡ︀ွင︀်ႈက︀ူႈလ︀ွင︀်ႈꩭႅမ︀်းထုက︀်ꩰင︀ႆ︀း ၸ︀ႆ︀းက︀ႆ︀ႛဝႆ︀ႇꩬ︀ီ ပ︀ႂ်ႇတ︀ႃႉ။ 36ၸ︀ူႛꩡ︀ႂ်ႇဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်းꩫ︀ႆ︀ႇၵ︀ဝ်ယ︀ႃႇ ꩡ︀ဝ်ႛၵ︀ဝ်လ︀ုက︀်ႉပ︀ွႆ︀းဢ︀ဝ်ႈꩬ︀ၢဝ်မ︀ႆ︀ႛ ပ︀ွက︀်ႉမ︀ႃးက︀ီး တ︀ၢင︀်းပ︀တ︀ူႈက︀ꩡ︀ူးပ︀ုတ︀်ꩭႂ်ႛက︀ွတ︀်ꩫ︀ꩬ︀ီ ပ︀ႂ်ႇထႃႛဢ︀ူꩫ︀က︀ꩫ︀်ႈ ꩬ︀ူက︀ေႃႇ ပ︀ႂ်ႇထႃႛက︀ꩫ︀်ႈတ︀ႃႉ။ 37မ︀ိူဝ်ႈꩡ︀ဝ်ႛၵ︀ဝ်ပ︀ွက︀်ႉမ︀ႃးꩫ︀ႆ︀ႇ ၸ︀ူႛꩡ︀ႂ်ႇဢ︀မ︀ႂ်းၵ︀ဝ် ꩭႅမ︀်းထုက︀်ꩰဝႆ︀ႇꩬ︀ီ ထႃႛဢ︀ူꩫ︀ႆ︀ႇမ︀ႆ︀ႛꩭꩫ︀်က︀ီး ꩡ︀ႃႇၵ︀ဝ်ယ︀ႃႇꩫ︀ီႈလ︀ူင︀်ꩫ︀မ︀်။ က︀ဝ်ႈဝႃႈက︀ွတ︀်။ ꩡ︀ဝ်ႛꩫ︀ႆ︀ႇ မ︀ꩫ︀်းၸ︀ူႛꩡ︀ဝ်ႛꩬ︀ိုင︀် ၵ︀ိူင︀်ႈၸ︀ူႛမ︀ိုင︀်ႇၸ︀ိူꩫ︀်ꩫ︀ုင︀်ႈꩬ︀ီ ၸ︀ူႛꩡ︀ႂ်ႇဢ︀မ︀ႂ်းၵ︀ဝ်မ︀ႆ︀ႛ ၸ︀ိူꩫ︀်မ︀ႆ︀ႛꩭႂ်ႛꩫ︀င︀်ႈင︀ႆ︀း ꩭီတ︀်ဢ︀ၵ︀ႅက︀်ႉဢ︀ၵ︀ျႃ တ︀ီလ︀ီင︀်ႇဢ︀ွႆ︀ꩫ︀မ︀်။ 38င︀ႆ︀းꩫ︀ႆ︀ႇꩬ︀ီ ꩡ︀ဝ်ႛမ︀ꩫ︀်း က︀ၢင︀်ႈၵ︀ိုꩫ︀်းမ︀ႆ︀ႛပ︀ွက︀်ႉမ︀ႃးပ︀တ︀ု၊ က︀ၢင︀်ႈလ︀ႂ်ꩡ︀ဝ်ႇꩰမ︀ႆ︀ႛပ︀ွက︀်ႉမ︀ႃးပ︀တ︀ု ၸ︀ူႛꩡ︀ႂ်ႇꩫ︀ႆ︀ႇ ပ︀ႂ်ႇထႃႛဢ︀ူက︀ီး ꩡ︀ႃႇမ︀ꩫ︀်းꩫ︀ီႈလ︀ူင︀်ꩫ︀မ︀်။ 39ꩬ︀င︀်ဝႃႈ ယ︀ၢမ︀်းဢ︀ꩫ︀်ႈၸ︀ူႛလ︀ၢက︀်ႉတ︀ီမ︀ႃးမ︀ႆ︀ႛ ꩬ︀ူတ︀ွင︀်းက︀ီး ꩭိူꩫ︀်းꩬ︀ူမ︀ႆ︀ႛ ၸ︀ူႛလ︀ၢက︀်ႉတ︀ီမ︀ဝ်ꩭႂ်ႛၵ︀ဝ်ႛမ︀ဝ်ꩡ︀ႂ်ႈ။ 40င︀ႆ︀းꩫ︀ႆ︀ႇꩬ︀ီ ꩭႅမ︀်းထုက︀်ꩰဝႆ︀ႇက︀ꩫ︀်ႈတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး လ︀ုက︀်ႉက︀ူꩫ︀်း မ︀ိူဝ်ႈလ︀ႂ်ႈတ︀ီမ︀ႃးꩫ︀ꩫ︀ႆ︀ႇ ꩬ︀ူꩵ︀ႈတ︀ွင︀်း” ꩫ︀ဝꩫ︀်ႇ။

(မ︀တ︀်တ︀ႄး 24.45-51)

41ꩫ︀ႆ︀ႇမ︀ႆ︀ႛ ပ︀ေတ︀ရ︀ုယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛ “ꩡ︀ဝ်ႛꩴ︀း ပ︀ုင︀်ၵ︀ိူင︀်ႈၵ︀ၢမ︀်းဢ︀မ︀ႂ်း တ︀ူႈၵ︀ႃႛမ︀ႆ︀ႛက︀ျႃးဝႃႈꩫ︀ႆ︀ႇ။ တ︀င︀်းမ︀ိူင︀်းမ︀ႆ︀ႛက︀ျႃးဝႃႈတ︀ီၵ︀ႃႛꩫ︀ႆ︀ႇ” ꩫ︀ဝꩫ︀်ႇ။ 42ꩡ︀ဝ်ႛယ︀ေꩬ︀ုယ︀ႃႇ “ၸ︀ူႛꩡ︀ႂ်ႇ ဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်းꩬ︀ီ ပ︀ိင︀်ꩥ︀ႃယ︀င︀်း ꩫ︀ꩫ︀ႆ︀ႇယ︀ႃႇ င︀ႆ︀းꩫ︀မ︀်။ က︀ူꩫ︀်းက︀ူဝ်ႇလ︀ိူင︀်ႈ ၸ︀ူႛꩫ︀မ︀်းꩫ︀ႂ်းမ︀ꩫ︀်းက︀ူဝ်ႇလ︀ိူင︀်ႈမ︀ႆ︀ႛ ၵ︀ူဝ်းလ︀ိင︀်းꩫ︀ႆ︀ႇၵ︀ဝ်ဢ︀ၢပ︀်ႉဝႆ︀ႇꩬ︀ီ ၸ︀ူႛꩡ︀ႂ်ႇဢ︀မ︀ႂ်း မ︀ိူဝ်ႈယ︀ၢမ︀်းထိုင︀်ꩫ︀ႆ︀ႇ ၸ︀ူႛꩡ︀ႂ်ႇတ︀ၢင︀်က︀ူဝ်ႇꩫ︀ႆ︀ႇၵ︀ဝ်မ︀ႆ︀ႛ ဢ︀ꩫ︀်ႈက︀ိꩫ︀်ႈꩭႂ်ႛꩬ︀ီ မ︀ိုင︀်ႇပ︀ွင︀်ႈလ︀ီင︀်ႇဢ︀ွႆ︀ဢ︀ူꩫ︀က︀တ︀ႃႉ။ 43မ︀ိူဝ်ႈမ︀ꩫ︀်းပ︀ွက︀်ႉမ︀ႃးꩫ︀ႆ︀ႇ ꩫ︀င︀်ဢ︀ꩫ︀်ႈမ︀ꩫ︀်း ꩬ︀င︀်ဝႆ︀ႇꩫ︀က︀ꩫ︀်ႈ ၸ︀ူႛꩫ︀မ︀်းꩫ︀ႂ်းဢ︀မ︀ႂ်းꩭီတ︀်ဢ︀ူꩫ︀ႆ︀ႇမ︀ႆ︀ႛ ꩡ︀ဝ်ႛꩭိူꩫ︀်းꩭꩫ︀်က︀ီး ꩡ︀ႃႇမ︀ꩫ︀်းꩫ︀ီႈလ︀ူင︀်ꩫ︀မ︀်။ 44က︀ဝ်ႈဝႃႈက︀ွတ︀်။ ꩡ︀ဝ်ႛꩭိူꩫ︀်းꩫ︀ႆ︀ႇ ၸ︀ူႛꩫ︀မ︀်းꩫ︀ႂ်းဢ︀မ︀ႂ်းမ︀ႆ︀ႛၵ︀ူဝ်းလ︀ိင︀်းမ︀ꩫ︀်းတ︀င︀်းမ︀ိူင︀်း ဢ︀ၢပ︀်ႉꩬ︀ီတ︀ီꩭႂ်ႛမ︀ိုင︀်ႇꩫ︀မ︀်။ 45ꩫ︀ႆ︀ႇꩫ︀က︀ေႃႇ ၸ︀ူႛꩫ︀မ︀်းꩫ︀ႂ်းꩫ︀ႆ︀ႇ “ꩡ︀ဝ်ႛက︀ဝ်ႈ င︀ႆ︀ၢႈꩰတ︀ီပ︀ႆ︀ပ︀ွက︀်ႉမ︀ႃးꩵ︀ႈꩡ︀ႂ်ႈ” ꩫ︀ꩬ︀ီ ၸ︀ူႛꩡ︀ႂ်ႇတ︀ၢင︀်က︀ူဝ်ႇꩫ︀ႆ︀ႇၵ︀ဝ်မ︀ႆ︀ႛ တ︀ုက︀်ႉꩰပ︀ူဝ်ႇꩰင︀ႆ︀း က︀ိꩫ︀်ႈꩰမ︀ဝ်းꩰꩬ︀ီဢ︀ူဢ︀ူ။ 46မ︀ိူဝ်ႈမ︀ꩫ︀်းမ︀ဝ်တ︀ႂ်းꩫ︀ႆ︀ႇ ꩡ︀ဝ်ႛꩭိူꩫ︀်းပ︀ွက︀်ႉမ︀ႃးက︀ီး မ︀ꩫ︀်းမ︀ႆ︀ႛ တ︀ႅပ︀်ထုမ︀်ႛတ︀ႅပ︀်တ︀ွꩫ︀်ႈင︀ႆ︀းꩬ︀ီ ꩫ︀င︀်က︀ူꩫ︀်းဢ︀ꩫ︀်ႈမ︀ဝ်ယ︀ုမ︀်ယ︀မ︀်ႈꩫ︀ႆ︀ႇၵ︀ဝ်ꩫ︀က︀ꩫ︀်ႈ တ︀ီꩭႂ်ႛၵ︀ၢမ︀်ꩫ︀မ︀်။ 47ၸ︀ူႛꩫ︀မ︀်းꩫ︀ႂ်းဢ︀ꩫ︀်ႈဢ︀လ︀ၢင︀်းꩡ︀ဝ်ႛꩭိူꩫ︀်း တ︀ွင︀်းꩫ︀က︀ေႃႇ မ︀ဝ်မ︀ေးꩭႅမ︀်းဝႆ︀ႇ၊ မ︀ဝ်ꩭီတ︀်ဢ︀ဝ်ႈယ︀ဝ်ႇဝႆ︀ႇꩫ︀ႆ︀ႇယ︀ႃႇ တ︀ီꩫ︀ႆ︀ႛၵ︀ၢမ︀်တ︀ၢမ︀်လ︀ူင︀်ꩫ︀မ︀်။ 48ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈဢ︀လ︀ၢင︀်းꩡ︀ဝ်ႛꩭိူꩫ︀်းမ︀ဝ်တ︀ွင︀်းꩬ︀ီ ꩭီတ︀်ၸ︀ိတ︀်ꩫ︀ႆ︀ႇယ︀ႃႇ ꩡ︀ွꩫ︀်လ︀ိူင︀်ႈꩫ︀ႆ︀ၢႈꩫ︀မ︀်တ︀ီꩫ︀ႆ︀ႛၵ︀ၢမ︀်ꩫ︀ႆ︀ႇ။ ꩬ︀ူမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ꩫ︀မ︀်ꩰဢ︀ၢပ︀်ႉဝႆ︀ႇက︀ီး ꩡ︀ႃႇမ︀ꩫ︀်းꩡ︀ဝ်ႛꩫ︀မ︀်ꩰ တ︀ီꩭႂ်ႛꩭီတ︀်ꩫ︀မ︀်။ ၵ︀ႆ︀ႇမ︀ဝ်က︀ႃးဢ︀ၢပ︀်ႉဝႆ︀ႇက︀ီး ၵ︀ႆ︀ႇမ︀ဝ်က︀ႃး တ︀ီꩭႂ်ႛꩭီတ︀်ꩫ︀မ︀်။

ꩡ︀ဝ်ႛယ︀ေꩬ︀ုယ︀ႃႇ ဢ︀ဝ်ႈက︀ၢက︀်ႉက︀ွႆ︀းဢ︀ူ

(မ︀တ︀်တ︀ႄး 10.34-36)

49က︀ဝ်ႈမ︀ိူင︀်းက︀ၢင︀်ႈမ︀ႆ︀ႛမ︀ႃးꩫ︀ႆ︀ႇ ဢ︀ꩫ︀်ႈမ︀ႃးဢ︀ဝ်ႈမ︀ႆ︀ႛ ၸ︀ႆ︀းꩫ︀မ︀်။ င︀ႆ︀ႚတ︀မ︀ိူင︀်းက︀ေႃႇ ၸ︀ႆ︀းၵ︀ႂ်ႈက︀ူဝ်ꩡ︀ပ︀်ဢ︀ူ။ 50ꩫ︀ႆ︀ႇꩫ︀က︀ေႃႇ က︀ဝ်ႈတ︀ၢင︀်းꩡ︀ူမ︀်ႈဢ︀ꩫ︀်ႈလ︀ိူင︀်ႈ ဝႃႈꩭၢပ︀်ႉဢ︀ဝ်ႈဢ︀ူ။ က︀ႃႈဢ︀မ︀ႂ်းမ︀ဝ်ယ︀ဝ်ႇယ︀ႃႇ က︀ဝ်ႈယ︀ၢက︀်ႉꩡ︀ႂ်ႈလ︀ူင︀်ꩫ︀မ︀်။ 51က︀ဝ်ႈမ︀ိူင︀်းက︀ၢင︀်ႈမ︀ႆ︀ႛမ︀ႃးꩫ︀ႆ︀ႇ မ︀ႃးဢ︀ဝ်ႈထုက︀်က︀ꩫ︀်ႈꩵ︀ႈꩡ︀ႂ်ႈ။ မ︀ႃးဢ︀ဝ်ႈက︀ၢက︀်ႉက︀ွႆ︀းက︀ꩫ︀်ႈꩫ︀မ︀်။ 52လ︀ုက︀်ႉင︀ႆ︀ႚက︀ူဝ်ꩬ︀ီ ꩭိူꩫ︀်းဢ︀ꩫ︀်ႈက︀ူꩫ︀်းꩭိူꩫ︀်း ꩭႃႛက︀ူဝ်ႇယ︀င︀်းꩫ︀ႆ︀ႇ ꩬ︀ွင︀်က︀ူဝ်ႇပ︀ႃႛလ︀ိူင︀်ႈ ꩬ︀ၢမ︀်က︀ူဝ်ႇပ︀ႃႛလ︀ိူင︀်ႈ တ︀ီက︀ၢက︀်ႉက︀ွႆ︀းက︀ꩫ︀်ႈက︀ႃꩫ︀မ︀်။ 53ပ︀ူဝ်ꩫ︀ၵ︀ႃလ︀ုက︀်ႉꩡ︀ႆ︀ၢး၊ မ︀ေꩫ︀ၵ︀ႃလ︀ုက︀်ႉꩬ︀ၢဝ်၊ မ︀ေႈꩡ︀ဝ်ႛꩫ︀ၵ︀ႃလ︀ုက︀်ႉပ︀ႂ်ႇ ၵ︀ဝ်က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ တ︀ီꩬ︀ၢꩫ︀်တ︀ၢꩫ︀်းက︀ꩫ︀်ႈꩫ︀မ︀်” ꩫ︀ဝꩫ︀်ႇ။

ဢ︀ꩫ︀်ႈꩡ︀ူဝ်ႈပ︀ၢꩫ︀်ႈင︀ႆ︀ႚမ︀ႆ︀ႛဝႃႈတ︀ွင︀်း

(မ︀တ︀်တ︀ႄး 16.2,3)

54ꩡ︀ဝ်ႛယ︀ေꩬ︀ု ၸ︀ုင︀်က︀ူꩫ︀်းမ︀ႆ︀ႛဝႃႈꩫ︀ႆ︀ႇယ︀ႃႇ “ꩬ︀ူ လ︀ုက︀်ႉပ︀ႃႛဝꩫ︀်းတ︀ူက︀်မ︀ႆ︀ႛ မ︀ွက︀်ၸ︀ူꩫ︀်ၵ︀ိုꩫ︀်ႛမ︀ႃးꩫ︀ႆ︀ႇမ︀ႆ︀ႛꩭꩫ︀်က︀ီး “ၸ︀ူꩫ︀်တ︀ီတ︀ူက︀်ယ︀ဝ်ႇ” ꩫ︀ꩬ︀ီ ၵ︀တ︀်ႉၵ︀ႅင︀်းဝႃႈဢ︀ူ။ ꩫ︀င︀်ꩬ︀ူဝႃႈꩫ︀က︀ꩫ︀်ႈက︀ေႃႇပ︀ီꩫ︀်ႈဢ︀ူ။ 55လ︀ုက︀်ႉပ︀ႃႛပ︀ႆ︀ၢႈꩡ︀ၢꩫ︀်းမ︀ႆ︀ႛ လ︀ူမ︀်းမ︀ႃးꩫ︀ႆ︀ႇမ︀ႆ︀ႛꩬ︀ူꩭꩫ︀်က︀ီး “ၸ︀ႃႇတ︀ီꩫ︀ႅတ︀်ယ︀ဝ်ႇ” ꩫ︀ဝꩫ︀်ႇ။ ꩫ︀င︀်ꩬ︀ူဝႃႈꩫ︀က︀ꩫ︀်ႈ ꩫ︀ႅတ︀်ဢ︀ူ။ 56ၸ︀ူႛက︀ႅမ︀်ႛꩫ︀ႃႛၵ︀ဝ်ꩴ︀း ꩬ︀ူလ︀င︀်ꩫ︀ိꩫ︀်ႈꩫ︀ၵ︀ႃက︀ၢင︀်ႈၸ︀ႃႇမ︀ႆ︀ႛꩫ︀ူႈꩬ︀ီ လ︀ွင︀်ႈꩫ︀ႃႛၸ︀ႃႇဝႃႈꩡ︀ၢင︀်ႈက︀ီး လ︀ႆ︀ၢးꩫ︀ိမ︀ိက︀်ႉꩡ︀ူဝ်ႈပ︀ၢꩫ︀်ႈင︀ႆ︀ႚမ︀ႆ︀ႛ ꩭီတ︀်က︀ꩬ︀င︀်ꩫ︀ႆ︀ ꩬ︀ူမ︀ဝ်တ︀ွင︀်းꩫ︀ႆ︀ႇ။ 57ဢ︀ꩫ︀်ႈꩬ︀ူထုက︀်ꩭီတ︀်မ︀ႆ︀ႛ ꩭီတ︀်က︀ꩬ︀င︀်ꩫ︀ႆ︀ ꩬ︀ူၸ︀ူႛꩡ︀ဝ်ႛမ︀ဝ်တ︀ႅပ︀်တ︀တ︀်ꩫ︀ႆ︀ႇ။

ဢ︀ဝ်ႈပ︀ေꩡ︀ႂ်ႈက︀ꩫ︀်ႈတ︀ႃႉ

(မ︀တ︀်တ︀ႄး 5.25,26)

58ꩬ︀ူမ︀ႆ︀ႛပ︀ိူꩫ︀်ႈ ꩡ︀ွႆ︀းတ︀ြႃးꩬ︀ီ ꩬ︀ူက︀ႃꩡ︀ဝ်ႛတ︀ြႃးက︀ီး ၵ︀ူꩫ︀်တ︀ၢင︀်းမ︀ႆ︀ႛ တ︀င︀်းမ︀ꩫ︀်းꩬ︀ူဝ်ႛက︀ꩫ︀်ႈꩬ︀ီ မ︀ꩫ︀်းမ︀ႆ︀ႛဢ︀ဝ်ႈပ︀ေꩡ︀ႂ်ႈတ︀ႃႉ။ ꩫ︀ႆ︀ႇမ︀ဝ်ꩡ︀ႂ်ႈက︀ီး ꩬ︀ူမ︀ႆ︀ႛမ︀ꩫ︀်းဢ︀ဝ်ႈက︀ႃꩡ︀ဝ်ႛတ︀ြႃးꩬ︀ီꩡ︀ဝ်ႛတ︀ြႃးယ︀ႃႇ ꩬ︀ူမ︀ႆ︀ႛဢ︀ၢပ︀်ႉꩫ︀ႂ်းမ︀ိုဝ်းꩭၢꩫ︀်ၵ︀ဝ်င︀ႆ︀းꩬ︀ီ ꩬ︀ူမ︀ႆ︀ႛ တ︀ီꩬ︀ႂ်ထွင︀်ၵ︀ွတ︀်ꩫ︀မ︀်။ 59က︀ဝ်ႈဝႃႈက︀ွတ︀်။ င︀ႆ︀းက︀ီး က︀ႃႈတ︀ၢမ︀်င︀ိူꩫ︀်းꩬ︀ေမ︀ူတ︀်ꩰမ︀ဝ်ပ︀ီꩫ︀်ႈယ︀ႃႇ ꩬ︀ူလ︀ုက︀်ႉထွင︀်မ︀ႆ︀ႛ ꩵ︀ႈꩫ︀ႆ︀ႛဢ︀ွက︀်” ꩫ︀ဝꩫ︀်ႇ။

Currently Selected:

လ︀ုက︀ႃ 12: kht

Highlight

Copy