Loma 2

Ko te Fakamahinoga a te Atua

1 # Mat 7.1; Luk 6.37 E fakamahino atu nei koe ki iētahi tino? Te uho, e tuha lava pe ko ai koe, e hēai lele he mea e tatau ai ke fai e koe he mea vēnā. Auā kāfai e fakamahino atu koe ki iētahi tino, kae toe fai foki lava e koe nā mea e ki lātou faia, ko tona uiga kua fakahalagia ia koe e koe lava. 2E iloa e ki tātou te hako o te fakamahinoga a te Atua, mo nā tino e ki lātou faia nā mea vēnei. 3Kae ko koe, te uho, e fai foki lava e koe nā mea e fakamahino atu ai koe ki iētahi tino! E vēake koe, ko koe e fakahao i te fakamahinoga a te Atua? 4Pe ko koe e manatu māmā ki te lahi o te agalelei, te fakapalepale ma te onohai o te Atua? E hē kē iloa ko te Atua e agalelei, ona e fofou ke takitaki koe ki te halamō? 5Kae ona ko tō loto e faigatā ma makaka, ka fakalahi ai lava e koe tō fakahalaga i te Aho e fakaalia ai e te Atua tona tōkahā, ma te tonu o tana fakamahinoga. 6#Hal 62.12; Alk 24.12Auā ka i ei te taui e fōki mai e te Atua mo ki tātou tau tokatahi, e tuha ai ma a tātou mea na fai. 7Ki a te ki lātou e faia pea lava nā gāluega lelei ma hakilikili ki te vīkiga, te mamalu ma te ola tūmau, ka fōki ki ei e te Atua te ola e fakavavau. 8Kae ka fakaalia tona ita ma tona tōkahā ki a te ki lātou e manatu fakapito ma teteke ki te mea e hako, kae ke mulimuli ai pea ki lātou ki te mea e hehē. 9Ka maua ki lātou uma e faia nā uiga kino i puapuagā ma mea tīgā; muamua ko tagata Iutaia ma vēnā foki ma tagata Eleni.#2.9 Eleni Ko te kupu tēnei nae fakaaogā e Paulo fakaaga ki nā tino uma e hē ni Iutaia. 10Kae ka tuku atu e te Atua ki a ki lātou uma e faia nā gāluega lelei, te vīkiga, te mamalu ma te fīlēmū, muamua ki tagata Iutaia ma vēnā foki ma tagata Eleni. 11#Teu 10.17Auā ko te Atua e hē fakapito.

12Ko nā tino uma ko hēki ki lātou iloagia te Tūlāfono a te Atua, ka fakahalagia pea e tuha ai ma a lātou mea hehē e fai. Ka ko nā tino uma kua ki lātou iloa te Tūlāfono, ka fakamahinogia e tuha ai ma te Tūlāfono. 13Auā e hē ko nā tino e lagona i o lātou taliga te Tūlāfono te fakaleleia e te Atua to lātou va ma ia, kae ko nā tino e uhitaki ki nā mea e fakatonu mai e te Tūlāfono. 14Ko tagata nukukehe e hē ki lātou iloa te Tūlāfono; kae i ho he taimi lava e fai ai e ki lātou he mea e fakatonu mai e te Tūlāfono e ala i o lātou lava lagona lilo, e fakaali mai i kinā e iloa e ki lātou nā mea e tatau ma nā mea e hē tatau ke ki lātou faia, e ui lava e hē ki lātou iloa te Tūlāfono. 15E fakaalia ia lātou mea e fai, ko nā mea e fakatonu mai e te Tūlāfono kua tūhia i o lātou loto. E fakaalia foki e ala i o lātou lotofuatia te moni o te mea tēnei, auā ko iētahi taimi ko o lātou manatunatuga e vē ake, “E hehē tau mea na fai” kae ko iētahi taimi e vē ake, “E hako tau mea na fai.” 16Ma ko te mea ia, e tuha ai ma te Tala Lelei e kō tālakia, ka vēnā foki lava te mea e pa ki ei i te Aho e fakamahino ai e te Atua e ala ia Iehu Keliho, ia manatunatuga lilo o tagata uma lele.

Ko Tagata Iutaia ma te Tūlāfono

17Kae e vēhea la koe? E lea koe ko koe he Iutaia; ko koe e fakalagolago ki te Tūlāfono, ma fai ō gugutu e uiga ki te hokotaga a koe ma te Atua; 18e iloa e koe te mea e fofou te Atua ke fai e koe, ma kua kē iloa e ala i te Tūlāfono, oi filifili te mea e hako; 19e mautinoa lava e koe ko koe ko he takitaki mo nā tino tāuaho, he mōlī mo ki lātou i te pōuliuli, 20he fakatonu mo nā tino vālelea, ma he faiakoga mo ki lātou e hē iloa he mea. E mautinoa lava e koe kua kātoatoa tō mālamalama ma tō iloa e uiga ki te meamoni, ona kua kē iloa te Tūlāfono. 21E akoako e koe iētahi tino — kae he ā te hē akoako ai lava koe e koe? E tālaki e koe vē, “Nahe kē kaihohoa” — kae ko koe e kaihohoa. 22E lea koe, “Nahe kē mulilua” — kae ko koe e mulilua. E inoino koe ki nā tupua — kae e kaihohoa e koe nā fale e i loto ai nā tupua. 23E fai ō gugutu, e kē iloa te tūlāfono a te Atua — kae ko koe te hē mamalu ai te Atua, ona ko te holi e koe o tana tūlāfono. 24#Iha 52.5Auā e vē oi tūhia i te tuhituhiga paia, “Ona ko koutou tagata Iutaia, kua fāifāi ai ia tagata nukukehe ki te Atua.”

25Ko te pelitome e aogā oioti kāfai koe e uhitaki ki te Tūlāfono; kae kāfai e holi e koe te Tūlāfono, ka vē lava koe ko he tino e hēki pelitomeagia. 26Kāfai la he tino nukukehe e uhitaki ki nā mea e lea mai ai te Tūlāfono e ui lava ko hēki pelitomeagia, ka hē vē nei ia ko he tino kua uma te pelitome i te kikila a te Atua? 27Ma ko koutou tagata Iutaia, ka taku halagia koutou e tagata nukukehe ona e holi e koutou te Tūlāfono, e ui lava na tuhituhia e koutou ma ko koutou kua uma te pelitome; kae ko ki lātou e uhitaki ki te Tūlāfono, e ui lava e hēki pelitomeagia. 28Auā ko te Iutaia moni e hē ko te tino e Iutaia i te kikila atu i fafo, ma ko te pelitome moni e hē ko te fakatinoga oioti o te tīpiga e fai ki te tino o te tagata. 29#Teu 30.6Ka ko te Iutaia moni, ko ia tēnā e Iutaia i loto, ma ko te pelitome moni ko he mea e i te fatumanava o te tino — he mea e māfua ona ko te gāluega a te Agaga Paia, kae hē ona ko te Tūlāfono kua tuhituhia. Ko te tino e vēnei, e maua e ia he vīkiga mai te Atua, kae hē mai tagata.

Currently Selected:

Loma 2: TNT

Highlight

Copy