Maleko 16

Ko te Toetū o Iehu

(Mataio 28.1-8; Luka 24.1-12; Ioane 20.1-20)

1Kua teka te Hāpati, oi olo ai ia Malia te Makatala, ko Halome, ma Malia te mātua o Iakopo, oi fakatau mai nā mea manogi ke kave oi uku ai te tino o Iehu. 2I te taeaopō o te aho Hā, kua hopo ake te la, oi olo ai ki te tugamau. 3-4Kua lea vē atu tētahi ki tētahi, “Ko ai nei te ka ia fuli kehea te fatupae i te gutu o te tugamau?” (Ko he fatupae lahi lele.) Kae kikila atu ki lātou ko te fatupae kua uma te fuli kehe. 5Oi ulu atu ai ki lātou ki loto o te tugamau ma ki lātou kitea atu he taumalo e nofo mai i te itū taumatau, e kofu i he kofu tatao paepae loloa e pa ki ona tapuvae; oi na mātataku lele ai ki lātou.

6“Koutou nahe popole,” kua lea vē mai te taumalo. “E iloa e au ko Iehu te Nahaleta tēia na fakahātaulo, ta koutou e hakili. E hē i kinei — kua toe tū mai i te oti! Kikila ki te mea nae tuku ai tona tino. 7#Mat 26.32; Mlk 14.28Olo loa oi fai te fekau tēnei ki ona hoko ma Petelu: ‘Ko ia e muamua atu ia te koutou ki Kalilaia; ka koutou kitea ia i kinā, e vē lava ko te mea na lea atu ai ki a te koutou.’ ”

8Oi olo ai ki fafo nā fafine, kua fētutuli kehe mai te tugamau auā kua maua ki lātou i te loto popole ma te atuatuvale. E hēki takua foki e ki lātou ki he tino, auā kua mātataku.#16.8 I loto o iētahi tuhituhiga kua hili atu te leva, ko te Mau a Maleko e uiga ki te Tala Lelei e uma i te fuaikupu e 8. Ka ko iētahi tuhituhiga mulimuli mai, e i loto ai te Fakaikuga Loa (9-20), ma ko iētahi e i loto ai foki ma te Fakaikuga Pukupuku (9-10).

KO TE FAKAIKUGA LOA O TE MAU A MALEKO E UIGA KI TE TALA LELEI

Kua Fakakitea ia Iehu ki a Malia te Makatala

(Mataio 28.9-10; Ioane 20.11-18)

[ 9I te toe tū maiga o Iehu mai te oti i te taeaopō o te aho Hā, na fakakitea muamua ki a Malia te Makatala, tēia na ia tuli kehea mai ai nā tēmoni e toka fitu. 10Oi fano ai ia Malia oi taku ki nā tino nae fakatahi ma Iehu, nae faitatagi i to lātou loto fakanoanoa. 11Kae i te ki lātou lagonaga ko Iehu kua toe ola, na kitea e Malia, e hēki talitonu ki ei.

Kua Fakakitea ia Iehu ki nā Hoko e Toka Lua

(Luka 24.13-35)

12Kua uma atu te mea tēnā, oi fakakitea ai ia Iehu i he tūlaga e kehe mai i te fakakiteaga muamua, ki ni hoko e toka lua ka koi havavali kehe atu ki lāua mai te kakai. 13Na toe liliu te toka lua ki Ieluhalema oi taku ki iētahi o te kau hoko, kae e hēki talitonu he tino ki ei.

Kua Fakakitea ia Iehu ki nā Hoko e toka Hefulutahi.

(Mataio 28.16-20; Luka 24.36-49; Ioane 20.19-23; Gāluega 1.6-8)

14Mulimuli ake oi fakakitea ai ia Iehu ki nā hoko e toka hefulutahi ka koi fai te lātou katiga. Oi munaia ai e ia ki lātou ona ko to lātou hē fakatuatua ma te loto makaka, kua hē talitonu ai ki nā tino na ki lātou kiteagia ia talu tona toe tū mai i te oti. 15#Gāl 1.8Oi vāgana atu ai ki a te ki lātou, “Olo ki itū uma o te lalolagi oi tālaki atu te Tala Lelei ki tagata uma. 16Ko ai lava e talitonu ma papatihogia, ka fakaolagia; ka ko ai lava e hē talitonu, ka fakahalagia. 17Ko nā tino kua talitonu ka ia te ki lātou te pule e fai ai nā vāvega; ka ki lātou tuli kehea nā tēmoni; ka tautatala i nā gagana kehe; 18kāfai e hiki ki luga e ki lātou nā gata, pe inu ki ho he meakona, ka hē āfāina ai ki lātou; kāfai e fakauta o lātou lima ki luga o nā tauale, ka mālōlō ai nā tauale.”

Kua Hikitia ake ia Iehu ki te Lagi

(Luka 24.50-53; Gāluega 1.9-11)

19 # Gāl 1.9-11 Kua uma te vāgana atu o te Aliki ko Iehu ki a te ki lātou, oi hikitia ake ai ki te lagi ma nofo i te itū taumatau o te Atua. 20Oi olo ai nā hoko oi tālaki atu te Tala Lelei ki nā itū uma o te lalolagi; nae gālulue fakatahi foki ki lātou ma te Aliki, ma na fakamāonia te moni o ta lātou tālakiga i nā vāvega nae ki lātou faia.]

KO TE FAKAIKUGA PUKUPUKU O TE MAU A MALEKO E UIGA KI TE TALA LELEI

[ 9Kua olo nā fafine ki a Petelu ma ona hoa, oi taku ki ei nā mea uma lele na lea ake ai ia Iehu ki a te ki lātou. 10Kua uma atu te mea tēnei, oi fakahalalau ai e Iehu, mai hahae ki hihifo, te fekau paia ma te moni e uiga ki te fakaolataga e fakavavau, e ala i ona hoko.]

Currently Selected:

Maleko 16: TNT

Highlight

Copy