Luka 9
9
Kua Uga atu e Iehu ona Hoko e toka Hefululua ke Tālaki
(Mataio 10.5-15; Maleko 6.7-13)
1Kua fakapotopoto mai e Iehu ona hoko e toka hefululua, oi tuku atu ai e ia ki a te ki lātou te mana ma te pule ke tuli ai ki fafo nā tēmoni uma, ma fakamālōlō ai nā tauale. 2Oi uga atu ai e ia ki lātou ke tālaki e uiga ki te Mālō o te Atua, ma fakamālōlō nā tino tauale, 3kae kua uma ai te lea vēnei atu ki ei, “Nahe koutou kaveagia he mea e fokotahi i te koutou malaga: nahe kavea he tokotoko, he taga, he meakai, he tupe, pe ko he kofutino fakaleoleo. 4Ko fea lava e talia ai koutou, nonofo i te fale tēnā ke pa ki te taimi e toe olo kehe ai koutou mai te kakai tēnā; 5#Gāl 13.51#Luk 10.4-11ma ko fea lava e hē talia ai koutou e tagata, olo kehe ma te kakai tēnā ma lūlū kehe te pefu mai outou vae, ke fai ma fakailoga ke ki lātou iloa ai te ikuga ka pa ki lātou ki ei.”
6Oi olo ai nā hoko, kua kui atu i nā tamā kakai uma, ma tālaki atu te Tala Lelei, ma fakamālōlō ia tagata i nā koga uma lele.
Kua Fakahētonu te Māfaufau o Helota
(Mataio 14.1-12; Maleko 6.14-29)
7 #
Mat 16.14; Mlk 8.28; Luk 9.19 I te lagonaga e Helota te tupu o Kalilaia, nā mea uma iēnei kua tutupu, oi na fakahētonu lele ai tona māfaufau, ona e i ei ni tino na lea, ko Ioane te Papatiho kua toe ola mai. 8Ko iētahi tino na lea vēia ko Elia kua hau, kae ko iētahi kua lea ko hētahi o nā pelofeta i nā aho kua leva, kua toe ola mai. 9Kua lea vē atu ia Helota, “Na kō fakatonua ke tipi kehe te ulu o Ioane; kae ko ai te tino tēnei kua fakalogo atu au e ia faia nā mea iēnei?” Oi na taumafai ai lava ia Helota ke feiloaki ki lāua ma Iehu.
Kua Fafaga e Iehu he Kaifenua Tokalahi
(Mataio 14.13-21; Maleko 6.30-44; Ioane 6.1-14)
10Kua toe foki mai te kau apohitolo, ma na taku e ki lātou ki a Iehu nā mea uma na fai e ki lātou. Oi kave ai e ia ki lātou, kua olo nā ko ki lātou ki he kakai e igoa ko Petehaita. 11I te lagonaga e nā tino te mea tēnei, oi mulimuli atu ai ki lātou ki a te ia. Na talia fiafia e ia te kaifenua, oi tautala atu ai ki ei e uiga ki te Mālō o te Atua, ma fakamālōlō ki lātou nae fia mālōlō mai o lātou tauale.
12Kua fakaafiafi, oi ōmamai ai te kau hoko e toka hefululua ki a Iehu, kua lea vē mai ki ei, “Uga ko nā tino ke olo ki nā nuku ma nā fatoaga e pili mai, ke maua ai ni mea ke momoe ma kakai ai, auā ko ki tātou e i he mea e tū fua.”
13Kae kua vāgana atu ia Iehu ki ei, “Fōki ifo e koutou he lātou mea ke kai.”
Kua tali mai ki lātou, “Oioti lava a tātou meakai, e lima ia falaoa ma nā ika e lua. E fofou la koe ke olo ki mātou oi fakatau mai ni meakai mā te kaifenua kātoa uma tēnei?” 14(E tuha ma te lima afe ia taulelea nae i ei.)
Oi vāgana atu ai ia Iehu ki ona hoko, “Fakanonofo fai vāega nā tino ki lalo, taki tau toka limahefulu.”
15Kua uma te fai e nā hoko te mea tēnei, 16oi puke atu ai ia Iehu ki nā falaoa e lima ma te luagamata ika. Kua kikila ake ki te lagi ma fakafetai ki te Atua, oi tavaevae ai ma fōki ki te kau hoko ke tufatufa ki nā tino. 17Na kakai uma ki lātou ma kua mākokona, oi ao ai e te kau hoko nā toegā meakai, ma na tūtumu ai nā polapola lalahi e hefululua.
Ko te Takutinoga a Petelu e uiga ki a Iehu
(Mataio 16.13-19; Maleko 8.27-29)
18I tētahi aho nae tatalo tautahi ai ia Iehu, kae ōmamai ki ei ona hoko. Oi fehili atu ai ia Iehu ki ei, “Ko nā tino e lea, ko ai au?”
19 #
Mat 14.1-2; Mlk 6.14-15; Luk 9.7-8 Kua tali mai ki lātou, “Ko Ioane te Papatiho; kae ko iētahi tino e lea ko koe ko Elia, ka ko iētahi e lea ko koe he tino o te kau pelofeta mai te kāloā, kua toe ola mai.”
20 #
Ioa 6.68-69
Oi lea atu ai ia Iehu ki a te ki lātou, “Kae e vēhea ake la koutou. E lea koutou ko ai au?”
Kua tali mai ia Petelu, “Ko koe ko te Mehia a te Atua.” 21Oi fakatonu ai ki lātou e Iehu, ke nahe ki lātou takua lele ki he tino te mea tēnei.
Kua Tautala ia Iehu e uiga ki ona Puapuagā ma tona Mate
(Mataio 16.20-28; Maleko 8.30—9.1)
22Kua toe vāgana atu ia Iehu ki a te ki lātou, “Ko te Ataliki o te Tagata e tatau ke maua i nā puapuagā e lahi ma teteke ki ei ia toeaina, nā ohitāulaga hili, ma nā faiakoga o te Tūlāfono. Ka tuku atu ia ke tāmate, kae i tona tolu o aho, ka toe fakatū mai ai mai te oti.”
23 #
Mat 10.38; Luk 14.27 Oi vāgana atu ai ia Iehu ki a te ki lātou uma, “Kāfai he tino e fia mulimuli mai ki a te au, e tatau ke tīaki e ia nā mea e fiafia ia ki ei, kae amo tona hātaulo i aho uma, ma mulimuli mai ki a te au. 24#Mat 10.39; Luk 17.33; Ioa 12.25Auā ko ai lava e mānumanu ki tona ola, ka hē ia mauagia; kae ko ai lava e māumau tona ola ona ko au, ka maua e ia. 25He ā nei te aogā kāfai e maua e he tino te lalolagi kātoa, kae fano ma māumau ai tona ola? 26Auā ko ai lava e mā ona ko au ma aku akoakoga, ka vēnā foki oi mā te Ataliki o te Tagata i te tino tēnā, kāfai e hau i tona mamalu ma i te mamalu o tona Tamana ma o te kau agelu paia. 27Kae e lea atu au ki a te koutou, e i ei nā tino ka ki lātou kiteagia te Mālō o te Atua, ka ko hēki feoti ki lātou!”
Ko te Hūiga ki te Tino o Iehu
(Mataio 17.1-8; Maleko 9.2-8)
28Kua kātoa te valu o aho talu te lea atu o Iehu i nā mea iēnei, oi kave ai e ia ia Petelu, ma Ioane ma Iakopo, kua olo fakatahi ma ia ki luga o he mauga, ke tatalo ai. 29Koi tatalo ia Iehu, ka kua i ei te hūiga i ona fōliga, ma ona kofu kua paepae hihina. 30Kae teki lava kua toka lua ia tamāloa e faitatala ma Iehu. Ko Mohe ma Elia, 31kua fakaali mai o lā tino i te mamalu fakatelagi, ma e faitatala ma Iehu e uiga ki te auala ka ia fakataunukua ai te fuafuaga a te Atua, e ala i te mate o ia, i Ieluhalema. 32Ko Petelu ma ona hoa nae momoe mate; kae i te fealaga, na ki lātou kitea atu te mamalu o Iehu, ma nā tamāloa e toka lua e tutū mai ma ia. 33Kua hāuni nā tamāloa ka olo kehe, oi lea atu ai ia Petelu ki a Iehu, “Te Faiakoga, te lelei ko ki mātou e i kinei! Ka fakatutū la e ki mātou ni fakamalumalu e tolu; ko tētahi mo koe, ko tētahi mo Mohe, ma tētahi mo Elia.” (E hē mālamalama lelei ia Petelu i te uiga o ana kupu iēnei.)
34Ka koi tautala atu ia Petelu, kae hula mai he ao ma malutū ai ki lātou; ma na mātataku lele nā hoko i te tataoga o ki lātou e te ao. 35#2 Pet 1.17-18#Iha 42.1; Mat 3.17; 12.18; Mlk 1.11; Luk 3.22Oi fanaifo ai he leo mai te ao, kua vē ifo, “Ko toku Ataliki tēnei, kua kō filifilia — fakalogo ki ei!”
36Kua uma te tautala ifo o te leo, oi maua atu au ai e ki lātou ia Iehu, nā ko ia tautahi. E hēki toe vaivaia lele he tino o ki lātou, ma e hēki takua e ki lātou ki he tino i te taimi tēnā, te mea na ki lātou kitea.
Kua Fakamālōlō e Iehu he Taumalo e Ulufia e he Agaga Kino
(Mataio 17.14-18; Maleko 9.14-27)
37I te aho alafaki, oi ōifo ai ia Iehu ma ona hoko e toka tolu ki lalo mai te mauga, ma na fakafetaui atu ia e he kaifenua tokalahi. 38Ko te taimi lava tēnā na kalaga atu ai he tamāloa mai te kaifenua, “Te Faiakoga! Ko au e talohaga atu ki a te koe, ke kikila ake ko ki toku ataliki — toku ataliki lava e fokotahi! 39E teki lava kua kekē, e ulufia e he agaga kino. E fakatete tona tino e te agaga kino, ma hau te piapia i nā gutu; e fakatāugā e ia toku ataliki, ma e tau hē teka kehe lele ma ia! 40Na talohaga au ki ō hoko ke ki lātou tulia ki fafo, kae e hēki ki lātou mafaia.”
41Kua tali atu ia Iehu, “Kai te hē talitonu ma te āmio pikopiko o tagata o tēnei tupulaga. He ā nei te mataloa e tatau ke māfuta ai pea au ma koutou? He ā nei te mataloa ka onohai ai pea au!” Oi vāgana atu ai ki te tamāloa, “Kaumai tō ataliki ki kinei.”
42Koi havali mai te taumalo ki a Iehu, kae ato e te tēmoni ki lalo ma fakatete tona tino. Oi munaia ai e Iehu te agaga kino, ma fakamālōlō te taumalo, oi toe tuku atu ai ki tona tamana. 43Na ofo lele ia tagata uma, ki te uiga kehe o te mana o te Atua.
Kua toe Tautala ia Iehu e uiga ki tona Mate
(Mataio 17.22-23; Maleko 9.30-32)
Ka koi lagona pea lava e nā tino te ofo ki nā mea uma na fai e Iehu, kae kua vāgana atu ia Iehu ki ona hoko, 44“Fakalogo lelei mai ki te mea ka lea atu ai au ki a te koutou! Ko te Ataliki o te Tagata ka tukulima atu ki lalo o te pule a tagata.” 45Kae e hēki mālamalama ki lātou i te uiga o te fakakupuga tēnei. E hēki fakailoa ki ei te uiga kae ke nahe mālamalama ai ki lātou, ma nae mātataku foki oi fehili e uiga ki ei.
Ko Ai te Hili te Tāua?
(Mataio 18.1-5; Maleko 9.33-37)
46 #
Luk 22.24
Kua kāmata oi fai fīnauga te kau hoko, pe ko ai to ki lātou e hili ona tāua. 47Kua iloa e Iehu te mea i o lātou loto, oi tago atu ai ki he tamaiti ma fakatū ki luga i ona tafa, 48#Mat 10.40; Luk 10.16; Ioa 13.20kae lea vēnei atu ki a te ki lātou, “Ko ai lava he tino e ia talia te tamaiti tēnei i toku igoa, kua ia talia foki au; ma ko ai lava e ia talia au, e ia talia foki tē na ia uga maia au. Auā ko te tino o koutou e pito hili ona hē tāua, ko ia tēnā e hili atu tona tāua.”
Ko te Tino e hē Teteke atu e Kau ma Koutou
(Maleko 9.38-40)
49Kua lea atu ia Ioane, “Te tamana, na ki mātou kitea he tino e ia tulia ki fafo nā tēmoni i tō igoa, oi vavao ai e ki mātou auā e hē he tino e o ki tātou.”
50Oi lea atu ai ia Iehu ki a Ioane ma iētahi ona hoko, “Nahe koutou vavaoa te tino tēnā, auā ko ai lava e hē teteke atu ki a te koutou, e kau ma koutou.”
Kua hē Talia ia Iehu e he Nuku i Hāmālia
51Kua pili ki nā aho e hikitia ake ai ia Iehu ki te lagi, oi tonu ai i tona loto, ko ia ka fano ki Ieluhalema. 52Kua uga e ia nā kavefekau ke muamua atu ia te ia ki he nuku i Hāmālia, ke hāuni ai nā mea uma mo ia. 53Kae kua hē talia e nā tino i kinā ia Iehu, ona kua ki lātou iloa, ko tana malaga e fakatū agai ki Ieluhalema. 54#2 Tup 1.9-16I te iloaga o te mea tēnei e ona hoko ko Iakopo ma Ioane, oi lea atu ai ki lāua ki a Iehu, “Te Aliki, e fofou koe ke ki mā fakatonua he afi, ke fanaifo mai te lagi ke fakaumatia ai ki lātou?”#9.54 Ko iētahi tuhituhiga e fakaopoopo ki ei e vē ko te mea na fai e Elia.
55Kae kua liliu atu ia Iehu oi muna ki ei.#9.55 Ko iētahi tuhituhiga e fakaopoopo ki ei ma lea vē atu ki ei, “E hē koulua iloa pe he ā te itūkāigā Agaga e kau ma koulua; auā ko te Ataliki o te Tagata e hēki hau ke fakaumatia ia ola o tagata, kae ke fakahao.” 56Oi olo ai ia Iehu ma ona hoko ki hētahi nuku.
Ko nā Tino nae fia Mulimuli ki a Iehu
(Mataio 8.19-22)
57Ka koi haele atu ki lātou i to lātou auala, kae lea vē atu he tino ki a Iehu, “Ko au ka mulimuli atu ki a te koe ki ho he mea lava e fano koe ki ei.”
58Kua vāgana atu ia Iehu ki a te ia, “E fai ia lua o ālope ma fai ia ōfaga o manulele; kae ko te Ataliki o te Tagata, e hēai he mea ke takoto ki ei ke mālōlō ai.”
59Kua vāgana atu ia Iehu ki hētahi tamāloa, “Mulimuli mai ki a te au.”
Kae kua tali mai te tamāloa, “Te aliki, ke mua fano ko au oi tanu toku tamana.”
60Kua tali atu ia Iehu, “Tuku vē nā tino oti ke tanu e ki lātou o lātou lava tino oti. Ka ko koe, fano oi tālaki atu ki tagata te Mālō o te Atua.”
61 #
1 Tup 19.20
Kua lea atu tētahi tino, “Te Faiakoga, ko au ka mulimuli atu ki a te koe; kae ke mua fano au oi fakamāvae ki toku kāiga.”
62Kua lea atu ia Iehu ki ei, “Ko te tino e kāmata oi fakamalū e ia te kelekele kae toe tagaki ki tua, e hē aogā ia mo te Mālō o te Atua.”
Currently Selected:
Luka 9: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
