Luka 23

Kua Kave ia Iehu ki mua o Pilato

(Mataio 27.1-2, 11-14; Maleko 15.1-5; Ioane 18.28-38)

1Na tutū uma loa ki luga te Taupulega kātoa, oi kave ia Iehu ki mua o Pilato, 2ma ko kinā na kāmata ai oi mōlia e ki lātou ia Iehu ki a Pilato. Kua lea vē atu ki lātou, “Na maua e ki mātou te tino tēnei, e fakahehē e ia o mātou tagata. Na lea ki ei ke nahe totōgia a lātou lāfoga ki a Kaihala, ma ko ia ko te Mehia, ko he tupu.”

3Kua lea atu ia Pilato ki a Iehu, “Ko koe moni ko te tupu o tagata Iutaia?”

Kua tali mai ia Iehu, “Ko koe tēnā e lea ai.”

4Oi lea atu ai ia Pilato ki nā ohitāulaga hili ma te kaifenua, “E hēai he mea e kō kitea e tatau ai ke fakahala te tino tēnei.”

5Kae kua fakaatili ai to lātou fīnau ma vē mai, “Kua fakaaogā e ia ana akoakoga, ke fakatupu ai te vevehi o tagata i Iutea kātoa. Na kāmata mai i Kalilaia, ma kua pa mai lava ki kinei.”

Kua Kave ia Iehu ki mua o Helota

6I te lagona atuga e Pilato o te mea tēnei, oi fehili ai vē, “Ko te tagata tēnei ko he Kalilaia?” 7I te ia iloaga ko Iehu e hau i te itūmālō e pūlea e Helota, oi uga ai e ia ki ei ia Iehu. Ko Helota foki nae i Ieluhalema i te taimi tēnā. 8Na fiafia lele ia Helota i te ia kiteaga o Iehu, ona na ia lagona nā tala e uiga ki a te ia, ma kua leva lele te fia kikila ki ei. Ko Helota nae fofou ke ia kitea ni fakailoga e fai e Iehu. 9Ko te mea ia na lahi ai ana fehili na fai ki a Iehu, kae e hēki tali lele ki ei ia Iehu. 10Kua tutū atu ki mua nā ohitāulaga hili ma nā faiakoga o te Tūlāfono, ma fai a lātou mōliga mamafa e uiga ki a Iehu. 11Ko Helota ma ana fitafita nae fakatauemu ma fai kupu kino ki a Iehu; oi na fakakofu ai e ki lātou ia Iehu i he kofu tatao manaia, kae toe uga ki a Pilato. 12Ko te aho lava tēnā na toe lelei ai te va o Helota ma Pilato; nae fai to lā va lahi lele, ka ko hēki tupu te mea tēnei.

Kua Fakahala ia Iehu i te Oti

(Mataio 27.15-26; Maleko 15.6-15; Ioane 18.39—19.16)

13Kua fakapotopoto mai e Pilato nā ohitāulaga hili, nā takitaki o te Taupulega ma tagata, 14oi lea vē atu ai ki ei, “Na koutou kaumaia te tino tēnei ki a te au, ma lea mai koutou, nae ia fakahehēa ia tagata. Nei, kua uma te kō hukehukea i mua o koutou, ma e hēai he mea kua kō maua ke hala ai ia i nā mea kua koutou mōlia ai. 15E hēki maua foki e Helota he mea ke fakahala ai, ko tēia na toe ia uga maia ai ki a te ki tātou. E hēai he mea kua fai e te tino tēnei, e tatau ai ke tāmate. 16-17Ko te mea ia ka fakatonu ai e au ke kini, oi tatala ai ke fano.”#23.16-17 Ko iētahi tuhituhiga e fakaopoopo ki ei te fuaikupu e 17: Kāfai e fai nā Kaiga Fakamanatu takitahi uma lele o te Pāheka, e māhani lava oi tatala e Pilato he pagotā e fokotahi mo ki lātou. (Kikila ki te Mlk 15.6).

18Kae kua taufai kālalaga fakatahi uma atu te kaifenua, “Tāmate ia Iehu! Tatala mai ia Palapa ki a te ki mātou!” 19(Ko Palapa na falepuipui ona ko he vevehitū na tupu i te kakai, ma te tāmate tino.)

20Ko Pilato na fofou ke tatala ia Iehu, ma ko te mea ia na toe tautala ai ki te kaifenua. 21Kae kua taukālalaga vē mai ki lātou, “Fakahātaulo te tino tēnā! Fakahātaulo te tino tēnā!”

22Kua lea atu ia Pilato ki a te ki lātou, ma ko te fakatolu tēnei o taimi, “Aiheā, ko he holitūlāfono ā ta ia kua fai? E hēai he mea e fokotahi kua kō maua na fai e ia, e tatau ai ke tāmate! Ka fakatonu e au ke kini, oi tuku ai ke fano.”

23Kae kua taukālalaga lava leo lahi ki lātou ke fakahātaulo ia Iehu, ma na iku lava na mālō te mea na fofou ki lātou ki ei. 24Oi na fai ai loa e Pilato te fakahalaga o Iehu, e vē lava ko te mea na fofou ki ei te kaifenua. 25Kua tatala e ia te tino na fofou mai ki ei ia tagata, te tino tēia na falepuipui ona ko he vevehitū na tupu ma te tāmate tino, ka kua tuku atu ia Iehu ki te kaifenua ke fai ki ei te mea e fofou ki lātou ki ei.

Kua Fakahātaulo ia Iehu

(Mataio 27.32-44; Maleko 15.21-32; Ioane 19.17-27)

26Kua takitaki kehe ia Iehu e nā fitafita, oi fetaui ai ma he tamāloa mai Kulene ko Himona tona igoa, e agai mai ki te kakai mai nā nuku i tua. Kua tāofi e ki lātou ia Himona ma tuku ki ona luga te hātaulo ke ia amoa, ma mulimuli i tua o Iehu.

27E tokalahi te kaifenua nae mulimuli ki a Iehu, e i ei ai ni fafine nae faitatagi taukekē mo ia. 28Kua liliu atu ia Iehu ki a te ki lātou ma lea vē atu ki ei, “Tamafafine e o Ieluhalema! Koutou nahe faitatagi mo au, kae faitatagi mo koutou lava ma autou fānau. 29Auā e hau nā aho ka lea vē ai nā tino, ‘Amutia nā fafine e hē manava ola, ki lātou e hēki fānanau lele, ma e hēki fakahuhua lele e ki lātou ni pepe!’ 30#Hoh 10.8; Fkl 6.16Ko te taimi tēnā ka lea atu ai ia tagata ki nā mauga, ‘Fakapakū ifo ki o mātou luga!’ ma lea vē atu ki nā tamā mauga, ‘Mumuni ki mātou!’ 31Auā kāfai te mea tēnei e mafai ke tutupu ka ko te lākau koi mata, e vēhea ake nei la kāfai te lākau e mamago?”#23.31 Auā kāfai te mea tēnei e mafai ke tutupu ka ko te lākau koi mata, e vēhea ake nei la kāfai te lākau e mamago? Ko te fakakupuga tēnei e ono fakauiga vēnei: Kāfai te mea tēnei e mafai ke tutupu ki he tino e hēai hana agahala, e vēhea ake nei la te mea e ono tutupu ki te tino holi tūlāfono?

32E toka lua iētahi tamāloa, ni pagotā, na takitaki foki ki fafo ke tāmate fakatahi ma Iehu. 33Kua tau atu ki lātou ki te koga e takua ko te “Ulupoko,” oi fakahātaulo ai e ki lātou ia Iehu i kinā, fakatahi ma na pagotā e toka lua, ko tētahi i tona itū taumatau, ma tētahi i tona itū tauagavale. 34#Hal 22.18Oi lea vē ake ai ia Iehu, “Te Tamana, fakamāgalo atu ko ki a te ki lātou, auā e hē ki lātou iloa te lātou mea kua fai.”#23.34 Ko iētahi tuhituhiga e hē i loto ai te fakakupuga Oi lea vē ake ai ia Iehu, “Te Tamana, fakamāgalo atu ko ki a te ki lātou, auā e hē ki lātou iloa te lātou mea kua fai.

Oi fai ai te lātou vili ke iloa ai te mea kofu o Iehu e maua e te tino. 35#Hal 22.7Ko nā tino kua tutū lava i kinā oi mātamata, kae fai kupu fakatauemu na takitaki o Iutaia ki a Iehu, kua lea vē ki ei, “Na fakaola e ia iētahi tino, tuku vē la ke ia fakaola ia ia lava, pe kāfai ko ia ko te Mehia kua filifilia e te Atua!”

36 # Hal 69.21 Na fakatauemu foki ki a te ia nā fitafita: kua olo oi fōki ki ei he uaina taugōfie, 37ma lea vē ki ei, “Kāfai koe ko te tupu o tagata Iutaia, fakaola la koe e koe lava!”

38I luga ake o ia, na tūhia ai nā kupu iēnei, “Ko te Tupu tēnei o Tagata Iutaia.”

39Ko tētahi o pagotā na fakatautau i kinā, kua fakatauemu ki a Iehu ma lea vē atu ki ei, “E hē ko koe nei ko te Mehia? Fakaola la koe ma ki māua!”

40Ka ko tētahi pagotā, kua muna vē atu ki tona hoa, “Ko koe e hē mataku i te Atua? Kua tutuha lava te fakahalaga o koe ma ia. 41Kae ko te fakahalaga o ki tāua e hako, auā kua maua lava e ki tāua te taui o a tā mea na fai; kae ko ia tēnei, e hēki i ei hana mea hehē na fai.” 42Oi lea vē atu ai ki a Iehu, “Iehu, manatua mai ko au, kāfai koe e hau, ko he Tupu!”

43Kua vāgana atu ia Iehu ki ei, “Ko au e lea atu moni ki a te koe, ko te aho nei ka fakatahi ai ki tāua i Palataiho.”

Ko te Mate o Iehu

(Mataio 27.45-56; Maleko 15.33-41; Ioane 19.28-30)

44-45 # Eho 26.31-33 I te kua ta o te itūlā e hefululua i te aoauli, oi pōulitia uma ai te lau fenua kātoa ke pa ki te tolu i te afiafi. Kua hē huhulu te la ma kua haelua te kie pupuni i loto o te Mālumalu. 46#Hal 31.5Oi kalaga leo lahi ai ia Iehu, “Te Tamana, kua kō tuku atua toku agaga ki ō lima!” Na uma lava te lea vēnā atu, oi to ai loa tana mānava.

47Kua kitea atu e te takitakikau o te toka helau te mea kua tupu, oi viviki ake ai ki te Atua, ma lea vē, “E hako lava, ko te tino tēnei e hēai hana holitūlāfono!”

48I te kitea atuga o te mea tēnei e te kaifenua na tumu atu oi mātamata, oi olo uma ai ki o lātou kāiga, ma tatuki o lātou fatafata i te fakanoanoa. 49#Luk 8.2-3Ka ko nā tino uma nae ki lātou iloa ia Iehu, e aofia ai nā fafine nae mulimuli ki ei mai Kalilaia, nae tutū mamao atu ma na ki lātou kitea nā mea uma iēnei.

Ko te Tanuga o Iehu

(Mataio 27.57-61; Maleko 15.42-47; Ioane 19.38-42)

50-51Nae i ei he tamāloa e igoa ki a Iohefa, e hau mai Alimatea, he tamā kakai ei Iutea. Ko he tino lelei ma fakaaloalogia, nae fakatalitali ma te amanaki, ke pa mai te Mālō o te Atua. E ui ko he tino e i loto o te Taupulega, kae e hēki kau ki a lātou fuafuaga ma a lātou tonu na fai. 52Kua fano te tino tēnei ki a Pilato oi fakanoi ke kave e ia te tino oti o Iehu. 53Oi tuku ifo ai e ia te tino o Iehu ki lalo, kua āfīfī i he kie vavae, oi tuku ai ki loto o he tugamau na keli ki loto o he itū-mauga papa, ma ko hēki fakaaogā lele. 54Ko te aho tēnei o Tāpenapenaga, ma kua tāli kāmata lele te Hāpati.

55Ko nā fafine nae mulimuli ki a Iehu mai Kalilaia, na olo ma Iohefa ma na kitea e ki lāua te tugamau, ma te tukuga ki loto o te tino o Iehu. 56#Eho 20.10; Teu 5.14Oi toe foki ai ki te fale oi hāuni nā meamanogi ma nā lolo mo te tino o Iehu.

Oi mālōlō ai ki lātou i te Hāpati, e vē ona fakatonu mai e te Tūlāfono a Mohe.

Currently Selected:

Luka 23: TNT

Highlight

Copy