Luka 21

Ko te Tāulaga a te Fafine kua oti tana Āvaga

(Maleko 12.41-44)

1Ko Iehu nae i te Mālumalu, oi kitea atu ai e ia nā tino maukoloa, e tuku a lātou tāulaga ki loto o te puha tupe mo nā tāulaga mo te Mālumalu. 2Na ia kitea atu foki he fafine mativa kua oti tana āvaga, kua tuku e ia ki loto ni tupe apamemea e lua. 3Oi lea atu ai ia Iehu, “E takutino atu e au ki a te koutou, e hili atu te lahi o te tāulaga a te fafine mativa tēnei, i lo iētahi tino uma lele. 4Auā ko iētahi tino na ki lātou ofo atua ma tāulaga, mai nā tupe totoe e lahi mai to lātou tamaokāiga; ka ko te fafine tēnei, e ui lava i tona mativa, kae na ofo atu e ia ana mea uma nae fakamoemoe e ola ai.”

Kua Tautala ia Iehu e uiga ki te Fakakinoga o te Mālumalu

(Mataio 24.1-2; Maleko 13.1-2)

5Ko iētahi o te kau hoko nae faitatala e uiga ki te Mālumalu; ki te mānanaia o nā fatu e fau ai, ma nā meaalofa kua ofo atu mo te Atua. Kua lea atu ia Iehu, 6“Ko nā mea uma iēnei e koutou kitea atu — e hau te taimi ka hē toe i ei he fatu e fokotahi e tū i luga o hētahi fatu; ko nā fatu takitahi uma lele ka togi kehe uma ki lalo.”

Ko nā Puapuagā ma nā Fakahāuāga

(Mataio 24.3-14; Maleko 13.3-13)

7Kua fehili atu ona hoko, “Te Faiakoga, ko āfea te fakataunuku ai te mea tēnei, ma ko he ā foki he fakailoga ke iloa ai e ki mātou kua tāli pa ki te taimi e fakataunuku ai?”

8Oi lea atu ai ia Iehu, “Koutou ke mataala kae ke nahe fakahehēa ai koutou; auā e tokalahi nā tino ka ōmamai i toku igoa, ma lea vē atu, ‘Ko au ko te Mehia!’ ma, ‘Kua pa ki te taimi!’ Kae ia koutou nahe mulimuli ki ei. 9Ma kāfai e lagona e koutou nā fakamatalaga e uiga ki nā taua ma nā vevehiga lahi, koutou nahe mātataku; ko nā mea iēnei e tatau lava ke tutupu, kae e hē vēake ai la ko te ikuga kua tāli pa mai.”

10Oi toe lea vē atu ai ki a te ki lātou, “Ka hiki taua tētahi fenua ki tētahi fenua; tētahi mālō ki tētahi mālō. 11Ka i ei nā mafuie lalahi, nā oge ma nā fāmai pēhi i nā koga kehekehe uma; ma ka kitea ake ki te lagi nā fakailoga tūkehe ma te fakamātakutaku. 12Kae ko hēki tutupu nā mea uma iēnei, ko koutou ka puke ma fakahāuāgia; ka tuku atu koutou ke fakamahino i loto o nā hūnako, ma tuku ki loto o nā falepuipui; ka kave koutou ki mua o nā tupu ma nā kōvana, ona ko au. 13Ko tēnei te avanoa ke fakailoa atu ai e koutou te Tala Lelei. 14#Luk 12.11-12Ke tonu muamua i outou māfaufau ko koutou ke nahe popole pe ka vēhea ake he koutou tali, 15auā ka fōki atu e au ki a te koutou nā kupu o te poto; ma ka hē mafai ai e nā fili o koutou oi tali ki ei, pe ki lātou taku hehēa nā mea e lea ai koutou. 16Ka tuku atu koutou ki te fakamahinoga e outou mātua, outou uho, outou kāiga ma autou uō; ma ka i ei nā tino o koutou e tāmate. 17Ka inohia koutou e tagata uma ona ko au. 18Kae e hēai he laulu e fokotahi o outou ulu e pakū kehe. 19Ko te koutou onohai, ka maua ai e koutou te ola moni.

Kua Tautala ia Iehu e uiga ki te Fakataugāgia o Ieluhalema

(Mataio 24.15-21; Maleko 13.14-19)

20“Kāfai e koutou kitea ia Ieluhalema kua hiko fakatāmilo e vaegākau, oi ka koutou iloa ai kua pili mai te aho ka fakataugāgia ai. 21Ko koutou la e nonofo i Iutea, e tatau ke hōhola ki luga o nā mauga; ko koutou i loto o te kakai e tatau ke olo kehe, ma ko koutou e i fafo o te kakai, e hē tatau ke toe foki ki ei. 22#Hoh 9.7Auā ko nā taimi iēnā o nā ‘Aho o te Fakahalaga,’ ke taunuku ai nā mea uma e vē ona tūhia i nā Tuhituhiga Paia. 23Kai te fakaalofa o te mea ka pa ki ei nā fafine e manavakīkī ma nā mātua koi fakahuhu a lātou pepe, kāfai e pa ki nā aho iēnā. Auā ka pa mai nā puapuagā ki te lalolagi, ma ka pakū mai te fakahalaga a te Atua, ki luga o ona tagata. 24Ko iētahi tino ka tāmate i te pelu, ka ko iētahi ka kave fakapagotā ki atunuku uma; ma ko Ieluhalema ka holi ki lalo i vae o tagata nukukehe, ke pa lava ki te aho e uma ai te lātou pule.

Kāfai te Ataliki o te Tagata e Haele mai

(Mataio 24.29-31; Maleko 13.24-27)

25 # Iha 13.10; Ehk 32.7; Ioe 2.31; Fkl 6.12-13 “Ka i ei nā fakailoga e hē māhani ai, ka kitea ki te la, te māhina ma nā fetu. Ka fakatumulia ia mālō o te lalolagi i te popole ma te atuatuvale i te hou o te moana ma te tāgulu o nā galu. 26Ka faimatapogia ia tagata i te mātataku ma te fakaatu ki te mea ka pa ki ei te lalolagi kātoa, ona ko nā mālohiaga o te vāteatea ka lūlū kehe mai o lātou alāvaka tūmau. 27#Tan 7.13; Fkl 1.7Ma ka kitea atu te Ataliki o te Tagata e haele mai i he ao o te lagi, ma te mana ma te mamalu hilihili kehe. 28Kāfai nā mea iēnei e kāmata oi tutupu, tutū ki luga ma tepa ake ki te lagi, auā ko te koutou fakaolataga kua tāli pa mai.”

Ko te Akoakoga mai te Mati

(Mataio 24.32-35; Maleko 13.28-31)

29Oi fai ai e Iehu te talafakatuha tēnei ki a te ki lātou: “Māfaufau ki te mati ma iētahi lākau uma. 30E kāmata loa oi kitea e koutou ko nā lau kua ola ake, e iloa e koutou ko te tau māfanafana kua tāli pa mai. 31E vēnā foki lava kāfai e koutou kitea nā mea iēnei e tutupu, ka koutou iloa ai ko te Mālō o te Atua kua tāli pa mai.

32“E takutino atu e au ki a te koutou, ko nā mea uma iēnei e tutupu ka ko hēki feoti uma nā tino o te tupulaga tēnei. 33E mou kehe atu te lagi ma te lalolagi, ka ko aku kupu e tūmau pea lava.

Koutou ke Mataala

34“Kae ia koutou ke mataala, nā ia koutou ka tuahā lahi ki nā faigākai ma nā īnuga vēnā ma popōlega o te ōlaga, kae maua mai koutou e te Aho tēnā 35e vē ni tino kua popoki i he māilei. Auā ko te Aho tēnā, ka pa mai ki tagata uma lele i ho he itū o te lalolagi. 36Mataala la i taimi uma ma tatalo ke maua e koutou te mālohi, ke hōhola kehe ai koutou mai nā mea uma iēnei ka tutupu, ma ke tutū ai koutou i mua o te Ataliki o te Tagata.”

37 # Luk 19.47 I nā aho iēnā, ko Iehu nae akoako atu i loto o te Mālumalu i nā aho takitahi, kae kāfai e pa ki te pō, e fano oi nofo i te Mauga o Ōlive. 38Ma i nā taeaopō o nā aho takitahi, ko tagata uma nae olo ki te Mālumalu, oi fakalogologo ki a te ia.

Currently Selected:

Luka 21: TNT

Highlight

Copy