Luka 12

Apoapoakiga e uiga ki te Fakagutugutulua

(Mataio 10.26-27)

1 # Mat 16.6; Mlk 8.15 I te taimi tēnā, e faitau afe ia tagata kua fakapotopoto mai ma kua tumu lele kua fakatau tūfēke; oi lea vē muamua atu ai ia Iehu ki ona hoko, “Koutou ke fakaeteete i te mea fakafefete a te kau Falehaio — te fakagutugutulua o ki lātou. 2#Mlk 4.22; Luk 8.17E hēai he mea e tatao ke galo ka hē toe kitea, pe mumuni ka hē toe iloa. 3Ko te mea ia, he ā lava he kupu kua lea ai koe i te pōuli, ka lagona i te ao teatea, ma ko te mea e faitala muhumuhu ai koe i loto o he potu e tapuni te faitotoka, ka vākai i loto o te malae.#12.3 vākai i loto o te malae; pe vākai mai luga o tuākaukau o nā fale.

Ko te Tino e tatau ke Mātataku ai

(Mataio 10.28-31)

4“Oku uho, e lea atu au ki a te koutou, koutou nahe mātataku i nā tino e tāmate e ki lātou te tino o te tagata, ma gata ai foki lava i kinā te mea e ki lātou mafaia. 5Kae ka fakailoa atu e au ki a te koutou te tino e tatau ke mātataku ai koutou: mātataku i te Atua, auā e ia te ia te pule ke togi ai he tino ki kēna, kāfai e uma te ia tāmatea. Talitonu mai ki a te au, ko ia te tatau ke mātataku ai koutou!

6“E hē lima nei ia tamā manulele e mafai ke fakatau atu i ni pene e lua? Kae e hēai he tamā manulele o nā manulele iēnei, e puli i te kikilaga a te Atua. 7Ma e pa foki lava ki nā laulu i outou ulu, kua uma te faitau. Koutou la nahe mātataku; e hili lele atu te tāua o koutou i te Atua i lo nā tamā manulele e lahi.

Ko te Talia pe ko te Teteke ki a Iehu.

(Mataio 10.19-20, 32-33; 12.32)

8“E lea atu au ki a te koutou, ko nā tino e folafola e ki lātou i mua o tagata ko ki lātou e āku, ka vēnā foki oi fai e te Ataliki o te Tagata i mua o nā agelu a te Atua. 9Kae ko nā tino e ki lātou tetekea au i mua o tagata, ka vēnā foki oi tetekea ki lātou e te Ataliki o te Tagata, i mua o nā agelu a te Atua.

10 # Mat 12.32; Mlk 3.29 “Ko ai lava e faia he kupu e teteke ai ki te Ataliki o te Tagata e mafai ke fakamāgalo; kae ko nā tino e faia ni kupu fāifāi ki te Agaga Paia, ka hē fakamāgaloa lele.

11 # Mat 10.19-20; Mlk 13.11; Luk 21.14-15 “Ma kāfai koutou e kave e ki lātou ke fakamahino i loto o nā hūnako, pe ki mua o nā kōvana pe ko nā tupu, koutou nahe popole pe ka tali vēhea ake koutou ki a lātou mōliga, pe ka vēhea ake foki ni kupu ke tautatala ai koutou. 12Auā ka fakaako atu koutou e te Agaga Paia, kāfai e pa ki te taimi tēnā, i nā kupu e tatau ke tautatala ai koutou.”

Ko te Talafakatuha o te Tino Maukoloa Valea

13Kua lea vē mai he tino i te potopotoga ki a Iehu, “Te Faiakoga, lea ko ki toku uho ke vāevāe loa ki a te ki māua nā tofi kāiga na tuku mai e to mā tamana mo ki māua.”

14Ka kua tali atu ki ei ia Iehu, “Na hei faia au ma fakamahino, pe ke pule i te vāevāega o nā mea a koulua ma tō uho?” 15Oi lea atu ai ia Iehu ki te kaifenua uma, “Kikila lelei ma ia koutou ke fakaeteete i te mānumanu; auā ko te ola o te tagata e hē fua fakatataua ki te lahi o ana koloa.”

16Oi fai ai e Iehu te talafakatuha tēnei ki a te ki lātou: “Nae i ei he tino maukoloa, na maua mai i tona fenua he helehelega lahi lele. 17Kua vē ake i tona loto, ‘He ā nei ta aku ka fai? E hēai he mea e teu ki ei te helehelega.’ 18Oi lea vē ifo ai ki a te ia lava, ‘Ko tēnei taku mea ka fai; ka kō tala kehea oku falehaito kae toe fau ni fale e lalahi atu; i loto i kinā, ka kō teua ai te haito ma aku koloa uma lele. 19Ma ka lea vē ifo au ki a te au lava; kua lava lele aku mea lelei e teu mo nā tauhaga e lahi. He ā te toe fai fītoi ai, ko te kai lava ma te inu, ma ke fiafia!’ 20Kae kua vāgana atu ki ei te Atua, ‘Te Vale! Ko te pō nei lava ka uma ai tō ola; ko nā mea uma la a koe kua hāuni, ko ai te ka kave ma ia?’ ”.

21Oi toe lea atu ai ia Iehu, “E vēnā lava nā tino e ki lātou fakaputua nā koloa mo ki lātou lava, kae e hē maukoloa i te kikila a te Atua.”

Nahe Popole

(Mataio 6.25-34)

22Kua vāgana atu ia Iehu ki ona hoko, “Ko te mea ia e lea atu ai au ki a te koutou, ia koutou nahe popole ki nā ola o koutou, pe ni a te ka kakai ai koutou; nahe popole foki ki nā tino o koutou, pe ni a te ka kokofu ai koutou. 23Auā e hili atu lele te tāua o te ola i lo nā meakai, ma te tino i lo nā kofu. 24Kikila koutou ki nā ōleva: e hē ki lātou totōa ni fatu haito pe helehelea; e hēai ni o lātou fale haito pe ni potu ke teu ai te haito, kae e fafaga ki lātou e te Atua! Kae e hili lele atu te tāua o koutou i lo nā manulele! 25E i ei nei he tino o koutou e ia mafaia oi fakaopoopo he kupita ki tona ola,#12.25 fakaopoopo he kupita ki tona ola; pe fakaopoopo he kupita ki tona loa. Ko te kupita e tāli maua te āfa mita te loa. i te popole ki ei? 26Kāfai e hē koutou mafaia oi fai he tamā mea vēnei, he ā la te popole tauanoa ai koutou ki iētahi mea? 27#1 Tup 10.4-7; 2 NT 9.3-6Kikila ki nā tiale o te vao pe ola vēhea; e hē gālulue pe hui ni o lātou kofu. Kae e lea atu au ki a te koutou, ke pa lava ki te Tupu ko Holomona ma te lahi o ana koloa, e hēki ia maua ni kofu mānanaia e vē ko he tiale o nā tiale iēnei. 28Kae kāfai ko te Atua te ia fakakofua te mutia ola vale, te ia e ola mai i te aho nei, kae taeao e togi ki loto o te ogāumu ke huhunu, ka hē hili atu nei la ona mautinoa ka ia fakakofua koutou? Kai te taigole ātili o te koutou fakatuatua!

29“Ko te mea ia, nahe koutou popole pe ni ā ta koutou e kai pe inu. 30(Auā ko nā mea iēnei e popole ki ei nā tino fakapaupau o te lalolagi tēnei.) E iloa e te koutou Tamana ko nā mea iēnei e manakomia e koutou. 31Kae hakili atu ki tona Mālō, oi foki atu ai e ia ki a te koutou nā mea iēnei.

Nā Koloa i te Lagi

(Mataio 6.19-21)

32“Koutou nahe mātataku, taku lafu māmoe tokaititi, auā ko te koutou Tamana, e fiafia ke fōki atu ki a te koutou te Mālō. 33Fakatau atu autou mea, ma fōki te tupe ma nā tino mātitiva. Fai ni autou ato teu tupe e hē mafai ke fano e gatu, ma teu ni autou koloa i te lagi, te mea e hē mafai ke fakaitiitia ai, auā e hēai he tino kaihohoa e mafai ke pa ki ei, pe ni mogamoga ke ki lātou fakakinoa. 34Auā ko te mea e i ei autou koloa, ka i ei ai foki ma outou loto.

Ko nā Kaukauna nonofo Hāuni

35 # Mat 25.1-13 “Koutou ke nonofo hāuni mo ho he mea e ono tutupu; hulu nā fuhipaku ki outou taugātiti ma fakamumū autou mōlī, 36#Mlk 13.34-36e vē ko nā kaukauna e fakatalitali ki to lātou matai ke foki mai i te kaiga o he fakaipoipoga. Kāfai e pa mai oi tukituki mai ai, ma tatala vave atu ai e ki lātou te faitotoka ki ei. 37Amutia nā kaukauna e maua mai e to lātou matai, e āla ma hāuni ki tona toe foki mai! E lea atu au ki a te koutou, ka ia ui keheagia tona kofulahi ma fakanonofo ki luga nā kaukauna, oi laulau ai e ia he lātou mea ke kai. 38Amutia nā kaukauna kāfai e maua mai e te matai e nofo hāuni, e tuha lava pe pa mai i te tūlua o te pō, pe ko te vaveao. 39#Mat 24.43-44Ma e mautinoa lelei lava ka na he mea na iloa e te tino e o ia te fale te taimi e hau ai te tino kaihohoa, e hē ia tukua he avanoa ke kaihohoa ai tona fale. 40Ko koutou foki la e tatau ke nonofo hāuni, auā ko te Ataliki o te Tagata e hau i he taimi e hē manatu koutou e hau ai.”

Ko te Kaukauna Fakamāoni pe ko te Hē Fakamāoni

(Mataio 24.45-51)

41Kua lea atu ia Petelu, “Te Aliki, ko te talafakatuha tēnei e fakatatau ki a te ki mātou, pe ki tagata uma?”

42Kua lea atu te Aliki, “Ko ai la te kaukauna e fakamāoni ma poto? Ko ia tē ka tōfia e tona matai te pule i ana kaukauna, ma fakahoa a lātou meakai i te taimi tatau? 43Amutia te kaukauna tēnei kāfai e maua mai e tona matai, koi galue lava i tona tofi na tuku ki ei! 44E takutino atu e au ki a te koutou, ka tōfia ia e tona matai ke pule i ana mea uma lele. 45Kae kāfai te kaukauna tēnei e lea vē ifo ki a te ia lava, ‘ko toku matai e tuai mai,’ oi kāmata ai oi kini e ia nā kaukauna tagata ma nā kaukauna fafine, ma kai ma inu ma konā. 46Kae ka toe foki mai tona matai i he aho e hēki manatu te kaukauna e toe foki mai ai, ma i he taimi e hē ia iloa. Ka tukimomo lele ia#12.46 tukimomo lele ia; pe ato ki fafo. e tona matai, oi tuku atu ai ki te mea e i ei ai nā tino hē talitonu.

47“Ko te kaukauna kua ia iloa te mea e fofou ki ei tona matai, kae hē nofo hāuni ki ei, pe ia fakatinoagia te finagalo o tona matai, ka kini lahi lele. 48Kae ko te kaukauna e hēki ia iloa te mea e fofou ki ei tona matai, kae kua ia faia he mea e tatau ke kini ai, ka hē kini lahia. Ko nā tino e fōki ki ei ni mea e lahi, e lahi foki nā mea e tatau ke maua mai ia te ki lātou. Ma e lahi atu foki la nā mea e tatau ke maua mai i nā tino e lahi atu nā mea e fōki ki ei.

Ko Iehu te Māfuaaga o Fevaevaeakiga

(Mataio 10.34-36)

49“Ko au na hau oi kaumai te afi ke huhunu ai te lalolagi, ma kai au te fofou lele ko te afi kua uma te fakamumū! 50#Mlk 10.38E i ei te papatihoga e papatiho ai au,#12.50 E i ei te papatihoga e papatiho ai au: E fakatatau ki nā puapuagā ka pa ia ki ei. ma ka popole pea lava toku loto ke pa ki te taimi e fakataunuku ai! 51E vēake koutou ko au na hau ke kaumai te fīlēmū ki te lalolagi? Hēai, e hē ko te fīlēmū, kae ko fevaevaeakiga. 52Auā e kāmata atu nei ka fevaevaeaki te toka lima i loto o he fale, ka teteke te toka tolu ki te toka lua, ma teteke te toka lua ki te toka tolu. 53#Mik 7.6Ka teteke te tamana ki te ataliki ma teteke te ataliki ki te tamana, ka teteke te mātua ki te afafine ma teteke te afafine ki te mātua, ka teteke te fai mātua ki te fafine āvaga ki loto o te kāiga ma teteke te fafine āvaga ki loto o te kāiga ki tona fai mātua.”

Ke Mālamalama i te Uiga o te Taimi

(Mataio 16.2-3)

54Na vāgana atu foki ia Iehu ki tagata, kua vē atu, “Kāfai e koutou kitea atu he ao kua tū mai i hihifo, e vave oi lea koutou ka ua — ma e ua lava. 55Ma kāfai e koutou kitea te matagi mai haute kua agi, e lea koutou ka vevela — oi e vevela lava! 56Ko koutou ni tino āmio pepelo! E koutou iloa oi fakamatala te uiga o nā mea e koutou kitea i te lalolagi ma te lagi; he ā la te hē koutou iloa ai oi fakamatala te uiga o nā mea e tutupu i nā aho nei?”

Fakalelei ma te Tino e Teteke atu ki a te Koe.

(Mataio 5.25-26)

57“He ā te hē fuafua ai lava e koutou te mea e hako ma tatau ke koutou faia? 58Kāfai he tino e fai hana tagi ma mōlia koe ki te fakamahinoga, taumafai ke fakalelei te fekehekeheakiga i toulua va, ka ko hēki pa koulua ki te fakamahinoga. Auā kāfai e hē faia e koe te mea tēnei, ka toho koe e ia ki te fakamahino, oi tuku atu ai koe e te fakamahino ki leoleo, oi togi ai koe ki loto o te falepuipui. 59I kinā, e lea atu au ki a te koe, ka nofo ai pea koe ke pa lava ki te taimi e uma ai te totogi o te toe hene o tau hala.”

Currently Selected:

Luka 12: TNT

Highlight

Copy