Ioane 9

Kua Fakamālōlō e Iehu he Tamāloa na fānau mai e Tāuaho

1E havali atu ia Iehu kae ia kitea he tamāloa na fānau mai lava e tāuaho. 2Oi fehili ai ona hoko ki a te ia, “Te Faiakoga, e āi nei te agahala na māfua ai te fānau mai o te tamāloa e tāuaho? E ā ia lava, pe ā ona mātua?”

3Kua tali mai ia Iehu, “E hē ona ni agahala e ā ia pe ā ona mātua. E tāuaho kae ke mafai ai ia gāluega mamana a te Atua ke fakaalia, e ala ia te ia. 4E tatau ke fai pea lava e ki tātou te gāluega a tē na ia uga maia au meamanū koi ao; e pa mai loa te pō, e hēai he tino e mafai ke galue. 5#Mat 5.14; Ioa 8.12Ka koi i te lalolagi au, ko au ko te mālamalama o te lalolagi.”

6Kua uma atu tana kupu tēnā, oi feanu ai ki te kelekele ma palupalu nā palapala i ona feanuga, ma uku ai nā mata o te tamāloa, 7ma lea vē atu ki ei, “Fano la oi fufulu ō mata i te Vaitākele ko Hiloma.” (“Ko te uiga o te kupu ‘Hiloma’ ko te ‘Uga’ ”) Oi fano ai te tamāloa kua fufulu ona mata, ma e liliu mai, kua kitea e ona mata.

8Ko nā tuākoi o ia, ma nā tino na ki lātou kiteagia te tamāloa nae māhani oi kaitagōgō, kua fehili vē, “E hē ko te tagata tēnei te nae māhani oi nofo ma kaitagōgō?”

9Kua lea iētahi, “Io, ko ia,” kae ko iētahi kua lea, “Hēai, e hē ko ia; kae e tāi vē lava ona fōliga.”

Oi lea atu ai loa lava te tamāloa, “Ko au ko te tino tēnā.”

10“Na vēhea la oi mafai ke toe pupula ō mata?” kua fehili mai ki lātou ki te tamāloa

11Kua tali atu te tamāloa, “Ko te tino e igoa ki a Iehu na palu e ia nā palapala ma uku ai oku mata, ma lea mai ai ko au ke fano ki te Vaitākele ko Hiloma oi fufulu ai oku mata. Oi fano ai au, ma na uma loa lava te fufulu kae kitea loa e oku mata.”

12“E i fea la ia Iehu?” kua fehili vēnā mai ki lātou.

“E hē kō iloa,” kua tali atu te tamāloa.

Kua Hukehuke e nā Falehaio te Tāuaho na Fakamālōlō

13Oi kave ai e ki lātou te tamāloa nae tāuaho ki te kau Falehaio. 14Ko te aho na palu ai e Iehu nā palapala ma fakapupula ai e ia nā mata o te tāuaho, ko he aho Hāpati. 15Oi toe fehili ai foki te kau Falehaio ki te tamāloa pe na vēhea oi mafai ke toe pupula ona mata. Kua tali atu te tamāloa, “Na tuku e Iehu nā palapala ki oku mata, oi fufulu kehe ai e au, oi pupula ai oku mata.”

16Ko iētahi o te kau Falehaio kua lea vē, “Ko te tino na ia faia te mea tēnei e hē he tino e hau mai te Atua, auā kua hē uhitaki ki te tūlāfono e uiga ki te Hāpati.”

Ka ko iētahi kua lea vē, “E vēhea ona mafai e he tino agahala oi fai ni fakailoga vēnei?” Oi na i ei ai he fekehekeheakiga ia te ki lātou.

17Oi toe fehili ai foki te kau Falehaio ki te tamāloa, “He ā hau fakamatalaga e mafai ke fai e uiga ki te tino e lea koe na ia fakapupulagia ō mata?”

“Ko te tino ko he pelofeta,” kua tali atu te tamāloa.

18Kae ko nā takitaki o Iutaia nae hē talitonu ko te tamāloa nae tāuaho moni, oi fekau ai e ki lātou nā mātua o te tamāloa, 19ma fehili atu ai ki lātou ki ei, “E o koulua te ataliki tēnei? E lea koulua na fānau mai lava e tāuaho; na mafai vēhea la ke toe pupula ona mata?”

20Kua tali atu nā mātua, “E ki mā iloa ko te ataliki tēnei o ki māua, na fānau mai lava e tāuaho. 21Kae e hē ki mā iloa pe na vēhea ona mafai ke toe pupula ona mata, kae pe ko ai foki te na ia fakamālōlōa mai tona tāuaho. Fehili ki ei; kua matua ma kua ia mafaia lava oi tali mo ia!” 22Na lea vēnā ona mātua, ona kua mātataku i nā takitaki o Iutaia, auā kua uma te fai o te lātou tonu, ko te tino e lea ko ia e talitonu ko Iehu ko te Mehia, e tuli kehe mai loto o te hūnako. 23Ko te mea ia na lea vē ai ona mātua, “Fehili ki ei; kua matua ma kua ia mafaia lava oi tali mo ia!”

24Kua fakalua ona toe fekau e ki lātou te tamāloa na fānau mai e tāuaho, oi lea vē atu ai ki ei, “Takutino i mua o te Atua ko koe ka tautala i te meamoni! E iloa e ki mātou ko te tino na ia fakamālōlōa koe ko he tino agahala.”

25“E hē kō iloa pe ko ia he tino agahala pe hēai,” kua tali mai te tamāloa. “E fokotahi lava te mea e kō iloa; ko au nae tāuaho kae nei kua pupula oku mata.”

26“Ko he ā ta ia na fai ki a te koe?” kua lea vēnā ki lātou. “Na fakapupula vēhea e ia nā mata o koe?”

27Kua tali mai te tamāloa, “Kua uma toku lea atu ki a te koutou, kae ko koutou e hē fia fakalogo. He ā la te fofou ai koutou ke toe lea atu au ki te mea na pa au ki ei? Ko koutou foki kua fia kavea ma ona hoko?”

28Kua fakatauemu ki lātou ki te tamāloa ma lea vē ki ei, “Ko koe tēnā te hoko o ia; kae ko ki mātou ko nā hoko o Mohe. 29E iloa e ki mātou ko te Atua na vāgana ki a Mohe; ka ko te tino tēnā e lea mai ai koe, e hē ki mātou iloa foki pe hau mai fea!”

30Kua tali mai te tamāloa, “Te ofoofogia lele la o te mea tēnei! Tēnā e hē koutou iloa pe hau mai fea, kae na ia fakamālōlōgia au mai te tāuaho! 31E iloa e ki tātou ko te Atua e hē fakalogo ki nā tino agahala; kae e fakalogo ki nā tino e tāpuaki ake ki a te ia ma faia nā mea e fofou ia ki ei. 32Mai te kāloā, e hēki fakalogo lele na kua i ei he tino e ia fakapupulagia ni mata o he tino na fānau mai lava e tāuaho. 33E hē mafai e te tino tēnei oi fai he mea vēnei, vaganā na hau mai te Atua.”

34Kua tali atu ki lātou, “Ko koe na fānau ma tuputupu ake i te agahala — kae e hau koe oi akoako mai ki mātou?” Oi tuli kehe ai e ki lātou te tamāloa mai te hūnako.

Ko nā Tino Tāuaho i te Fakateagaga

35I te lagonaga e Iehu o te mea na tupu, oi fano ai kua hakili te tamāloa. I te ia mauaga, oi fehili atu ai ki ei vēia, “E talitonu koe ki te Ataliki o te Tagata?”

36Kua tali mai te tamāloa, “Te aliki, taku mai ake pe ko tēfea te tino tēnā, kae ke talitonu au ki ei!”

37Oi lea atu ai ia Iehu ki ei, “Kua uma te kē kiteagia, ma ko ia tēia e tautala atu nei ki a te koe.”

38“Te Aliki, ko au kua talitonu!” kua lea vēnā atu te tamāloa, ma tōtuli ifo ai ki lalo i mua o Iehu.

39Kua vāgana atu ia Iehu, “Ko au na hau ki te lalolagi ke fakamahino, kae ke pupula ai nā mata o nā tino nae tāuaho, kae tāuaho nā tino nae pupula o lātou mata.”

40Ko iētahi o te kau Falehaio nae i kinā, na ki lātou lagona te tala tēnei a Iehu, oi fehili vē ai ki ei, “Ko ki mātou foki la e tāuaho?”

41Kua tali atu ia Iehu, “Moinei ake koutou e tāuaho, ko koutou e hē fakahalagia; kae ona ko koutou e lea ko koutou e hē tāuaho, ko tona uiga koi nofo hala pea lava koutou.”

Currently Selected:

Ioane 9: TNT

Highlight

Copy