Epelu 13
13
Ko te Mea e Fiafia ki ei te Atua
1Ke tūmau pea te alofa o tētahi ki tētahi e vē ona tatau ke fai e tagata uma kua mulimuli ki te Aliki. 2#Ken 18.1-18; 19.1-3Ke mautinoa e talia e koutou nā tino kehe ki loto o outou fale. E i ei nā tino na ki lātou faia te mea tēnei ma ki lātou talia ni agelu, kae hē ki lātou iloa. 3Ke manatua e koutou nā tino i te falepuipui, e vē lava koutou ni tino nae i te falepuipui ma ki lātou. Ke manatua nā tino puapuagā e vē lava ko koutou ni tino nae puapuagā e vē ko ki lātou.
4Ke fakamamalu e koutou uma te āvaga fakaipoipo, ma e tatau te tāne ma te fafine kua fakaipoipo, ke fakamāoni tētahi ki tētahi. Ka fakamahinogia e te Atua nā tino e faia nā āmio kino ma te mulilua.
5 #
Teu 31.6, 8; Ioh 1.5 Koutou nahe mānumanu ki te tupe, kae talia ma te fiafia nā mea kua maua e koutou. Auā kua vāgana te Atua, “E hē kō tukua lele koutou; ka hē kō tiakia lele koutou.” 6#Hal 118.6Tātou fakamākeke la ma lea vē,
“Ko te Aliki ko toku fehoahoani ia,
ko au ka hē mataku.
He ā ta he tino e mafai ke fai mai ki a te au?”
7Māfaufau ki nā takitaki muamua o koutou kua momoe atu, iēia na ki lātou fakailoa atua te kupu a te Atua ki a te koutou. Māfaufau ki o lātou ōlaga ma pe na vēhea ona feoti, ma fakatakitaki ki to lātou fakatuatua. 8Ko Iehu Keliho e tutuha lava i te aho ananafi, te aho nei, ma ke pa lava ki te fakavavau. 9Ia koutou nahe takitaki kehea mai te auala moni ona ko te mau akoakoga kehekehe. E lelei te maua o te loto mākeke mai te alofa tūnoa o te Atua, kae hē mai te uhitaki ki nā tūlāfono e uiga ki nā meakai; ko nā tino e uhitaki ki nā tūlāfono iēnei e hēki ki lātou mauagia he fehoahoani ona ko to lātou uhitaki ki ei.
10Ko nā ohitāulaga e tautua i te Mālumalu o tagata Iutaia, e hēai he lātou aiātatau ke ki lātou kaia ai ho he tāulaga e ofo i luga o te fata faitāulaga. 11#Lev 16.27E kaumai e te Ulu Ohitāulaga Iutaia te toto o nā manu ki loto o te Nofoaga e Hili te Paia ke ofo atu ma tāulaga mo nā agahala; kae ko nā tino o nā manu e huhunu i fafo o te mea e nonofo ai ia tagata. 12Ko Iehu foki na oti i fafo o te kakai, kae ke fakamamā ai ia agahala a tagata i tona toto. 13Tātou olo foki la ki a te ia i fafo o te kakai, ke fakamātagā fakatahi ai ki tātou ma ia. 14Auā e hēai he nuku tūmau mo ki tātou i lalo nei; ko ki tātou e hakilikili ki te kakai e tuku e pa mai. 15E tatau ai la ke ofo ake pea lava e ki tātou he tāulaga ki te Atua e ala ia Iehu, he tāulaga e ofo ake i nā laugutu kāfai ki tātou e lea vē, “ko ia ko to tātou Aliki.” 16Tautuanā e fai e koutou ni gāluega lelei ma fehoahoani tētahi ki tētahi, auā ko iēnā nā tāulaga e fiafia ki ei te Atua.
17Uhitaki ki nā takitaki o koutou ma fai nā mea e fakatonu atu ai koutou. E hē mapu lele ki lātou i te kikilaga o koutou, auā e tatau ke ki lātou tuku atua ki te Atua he fakamatalaga e uiga ki a lātou gāluega tautua. Kāfai koutou e uhitaki ki ei, ka fiafia foki ki lātou i te faiga o te lātou gāluega; kae kāfai koutou e hē uhitaki, ka gālulue foki ki lātou ma te fakanoanoa, ma e hē ko he mea tēnā e lelei mo koutou.
18Nahe uma te koutou tatalo mo ki mātou. Ko o mātou lotofuatia e mamā, ma e taumafai lava ki mātou i taimi uma, ke fai te mea e tonu. 19Ko au e toe talohaga atu lava ko koutou ke tatalo fakapitoa ki te Atua, ke mafai au ke ia toe uga atua ki a te koutou, i he taimi lata mai.
Tatalo Fakaiku
20-21Kua toe fakatū e te Atua to tātou Aliki ko Iehu mai te oti, ko ia ko te Leoleomāmoe Hili, ona ko tona toto#13.20-21: tona toto; pe tona mate ke fai ma tāulaga. kua fakamautū ai te feagaiga ke pa ki te fakavavau. Ke fōki atu ki a te koutou e te Atua o te fīlēmū nā mea lelei uma e manakomia e koutou, kae ke mulimuli ai koutou ki tona finagalo, ma ke fai e ia ki a te ki mātou e ala ia Iehu Keliho, nā mea e fiafia ia ki ei. Ma ke vīkia pea lava ia Keliho ke pa ki te fakavavau! Amene.
Nā toe Kupu
22Ko au e talohaga atu ki a te koutou te kau uho, ko koutou ke fakalogo lelei ki te fekau tēnei e fakamālohi atu ki a te koutou; auā ko te tuhi tēnei e pukupuku. 23Ko au e fofou ke iloa e koutou ko te koutou uho ko Timoteo, kua tatala ki tua mai te falepuipui. Kāfai e vave mai, ka oatu fakatahi ki māua ke kikila koutou.
24Momoli atu o mātou alofaaga ki nā takitaki o koutou ma tagata uma o te Atua. E momoli atu foki nā alofaaga mo koutou mai nā tino kua talitonu ki te Atua i Italia.
25Ke ia te koutou uma te alofa tūnoa o te Atua.#13.25 Ko iētahi tuhituhiga kua leva e fakaopoopo ki ei te Amene
Currently Selected:
Epelu 13: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
