Gāluega 8

1Ma na fiafia ia Haulo i te tāmatega o Hetefano

Ko nā Fakahāuāga a Haulo ki te Ekalehia

Ko te aho lava tēnā na kāmata ai oi maua ia tagata o te Ekalehia i Ieluhalema i nā fakahāuāga kino. Ma na takape ai ki lātou ki nā kogāfenua uma o Iutea ma Hāmālia, kae vāganā ai te kau apohitolo. 2Na tanu ia Hetefano e ni tino fakatuatua ki te Atua, ma na faitatagi lahi lele ki lātou i te fakanoanoa.

3 # Gāl 22.4-5; 26.9-11 Kae ko Haulo nae taumafai lava ke fakahēai te Ekalehia; na fano ki loto o nā fale o tagata takitahi ma toho ki fafo nā tino kua talitonu ki a Iehu, ko taulelea ma fafine, ma fakatonu ke kave oi togi ki te falepuipui.

Kua Folafola te Tala Lelei i Hāmālia

4Ko nā tino na takape, na halalau ki nā itū uma ma tālaki atu te fekau. 5Kua fano ia Filipo ki te kakai lahi i Hāmālia, ma folafola te Mehia ki nā tino i kinā. 6Nae fakalogologo lelei ia tagata ki nā mea nae tautala ai ia Filipo, ma kikila ki nā vāvega nae ia faia. 7Na taukekē nā agaga kino ma olo ki fafo mai ni tino e tokalahi, ma e tokalahi foki nā tino e mate ni itūtino ma nā pipili, na fakamālōlōgia. 8Ma na lahi lele te fiafia o tagata i Hāmālia.

9Nae i te kakai tēnā he tino e igoa ki a Himona nae fai ana mea fakataulaitu i he taimi kua teka atu, ma nae ofo lele ai nā tino Hāmālia. Na lea ko ia ko he tino takutakua, 10oi ko tagata uma o te kakai, mai te tino e pito maualuga tona tūlaga ke pa ki te tino pito maualalo, nae fakalogo lelei lele ki a te ia ma lea vē, “Ko te tino tēnei kua liutino ki te Atua e fakaigoa ‘Ko te Mālohi Hili’.” 11Kua fano lahi o lātou māfaufau ki a Himona ona e mataloa lele te taimi nae fai ai ana mea fakataulaitu, ma nae ofo lele ai ki lātou. 12Kae i te taimi na talitonu ai ki lātou ki te fekau a Filipo e uiga ki te Tala Lelei o te Mālō o te Atua ma e uiga ki a Iehu Keliho, oi papatiho ai ki lātou; ko taulelea fakatahi ma fafine. 13Ko Himona foki na talitonu; ma i te umaga o te papatihoga o ia, oi mulimuli ai lava ki a Filipo, ma na ofo lele i te ia kiteaga o nā mea ofoofogia ma nā vāvega nae fai.

14I te lagonaga e te kau apohitolo i Ieluhalema kua talia e tagata o Hāmālia te kupu a te Atua, oi uga ai e ki lātou ia Petelu ma Ioane ki ei. 15Kua taunuku atu ki lāua, oi tatalo ai ke maua te Agaga Paia e nā tino kua talitonu. 16Auā ko te Agaga Paia ko hēki fanaifo ki luga o hētahi o ki lātou; kua papatiho oioti ki lātou i te igoa o te Aliki ko Iehu. 17Oi fakaeke atu ai nā lima o Petelu ma Ioane ki o lātou luga, ma na ki lātou maua ai te Agaga Paia.

18I te kiteaga e Himona ko te Agaga Paia kua fōki ki nā tino kua talitonu i te fakaekega o nā lima o nā apohitolo ki o lātou luga, oi fōki ai e ia ni tupe ki a Petelu ma Ioane, 19ma lea vē atu ai ki ei, “Fōki mai foki ki a te au te mana tēnā, kae ke maua ai e ho he tino e fakauta ki ei oku lima, te Agaga Paia.”

20Ka kua tali vē atu ia Petelu ki ei, “Ko tō manatu e kē mafaia oi fakatau te meaalofa a te Atua i ni tupe! Ko koe ma au tupe e olo ki te malaia. 21E hēai hō avanoa pe ko hō vāega i ta mātou gāluega, auā ko tō loto e hē hako i te kikila a te Atua. 22Halamō la, mai ō māfaufauga kino iēnā, ma tatalo ki te Aliki ke ia fakamāgaloa koe ona ko koe kua manatu ki he mea vēnā. 23Auā e kō kitea ko koe kua tumu i te mataua, ma kua fai ma pologa a te agahala.”

24Kua tali atu ia Himona ki a Petelu ma Ioane, “Tatalo ko ki te Atua mo oku, kae ke nahe i ei he mea o nā mea iēnā e lea ai koulua, e pa au ki ei.”

25Kua uma te fai o te takutinoga ma te fakailoa atuga o te fekau a te Aliki e Petelu ma Ioane, oi toe foki ai ki lāua ki Ieluhalema. Na tālaki e ki lāua te Tala Lelei, ki nā tamā kakai e lahi o Hāmālia, i to lā auala ki Ieluhalema.

Ko Filipo ma te Tino o te Mālō o Aitiope

26Kua vāgana atu te agelu a te Atua ki a Filipo, “Hāuni oi fano agai ki haute#8.26 agai ki haute; pe i te vaeluaga o te aho. ki te auala e fanatu mai Ieluhalema ki Kāha.” (Ko te auala tēnei kua hē fakaaogā i nā aho nei.)#8.26 Ko te auala tēnei kua hē fakaaogā i nā aho nei; pe Ko te auala tēnei i te vao. 27-28Oi na hāuni ai loa ia Filipo ma kua fano. I te taimi tēnā, nae i luga foki o te auala he eunuka Aitiope, kua toe foki ki tona kāiga. Ko te tino tēnei ko he ofiha tāua, e pule i nā koloa a te tupu fafine o Aitiope, ma na fano ki Ieluhalema ke tāpuaki ki te Atua, ma kua toe foki i tana tāvale holofanua. E fano la tana tāvale holofanua, kae faitau e ia te tuhituhiga a te pelofeta ko Ihaia. 29Kua vāgana atu te Agaga Paia ki a Filipo, “Fano ke pili koe ki te tāvale holofanua.” 30Oi vili ai ki ei ia Filipo, ma na ia lagona atu te eunuka e faitau mai te tuhi a te pelofeta ko Ihaia; oi fehili vē atu ai ki ei, “E mālamalama koe i tau mea e faitau?”

31Ka kua tali mai te eunuka, “E mafai vēhea nei ke mālamalama au kāfai e hēai he tino ke ia fakamālamalama maia ki a te au?” Na lea ai loa ki a Filipo ke hopo ake ke nonofo fakatahi ki lāua i te tāvale holofanua. 32#Iha 53.7-8Ko te vāega o te tuhituhiga paia nae faitau e te eunuka, e vēnei:

“E vē he māmoe e kave ke tāmate;

e vē he punuamāmoe e fakalologo i te taimi e hele ai ona fulufulu;

e hēki vaivaia lele.

33Na fakamahiahigia ia, ma e hēki tū he tino oi fehoahoani ki a te ia i tona fakamahinoga.

E hēai he tino ka ia mafaia oi fakamatala e uiga ki ona lāpuna,

auā ko tona ola i te lalolagi kua pa ki te ikuga.”

34Oi lea atu ai te eunuka ki a Filipo, Taku mai ake pe ko ai te fakatatau ki ei te kupu a te pelofeta? E fakatatau nei ki a te ia lava, pe ki he tahi tino?” 35Oi kāmata ai kua tautala ia Filipo; mai te vāega tēnei o te tuhituhiga paia, na fakamatala e ia ki te eunuka te Tala Lelei e uiga ki a Iehu. 36-37Ka koi fakaauau te malaga i luga o te auala, oi tau atu ai ki he koga e i ei ni vai, oi lea vē atu ai te eunuka, “Kikila, iēnā nā vai! He ā te hē mafai ai au ke papatiho?”#8.36-37 Ko iētahi tuhituhiga e fakaopoopo ki ei te fuaikupu e 37: Kua lea atu ia Filipo ki ei, “E mafai koe ke papatiho, kāfai koe e talitonu ma tō loto kātoa.” Kua tali mai ia, “Io, ko au e talitonu ko Iehu Keliho ko te Ataliki o te Atua.”

38Na fakatonu loa e te eunuka ke fakatū te tāvale holofanua, oi olo ai ia Filipo ma te eunuka ki loto o te vai, ma na papatiho ai e Filipo te eunuka. 39I te oakega o ki lāua ki luga mai te vai, oi kāvea ai ia Filipo e te Agaga Paia. E hēki toe kitea e te eunuka ia Filipo, ka kua fakaauau pea i tona auala ma tona loto kua tumu i te fiafia. 40Kua hāfia e Filipo ko ia kua i Ahōto; oi fano ai kua kui loto atu i nā kakai uma ke pa ki Kaihaleia, ma folafola atu te Tala Lelei.

Currently Selected:

Gāluega 8: TNT

Highlight

Copy