Gāluega 3

Kua Fakamālōlō he Pipili

1I tētahi aho na olo ai ia Petelu ma Ioane ki te Mālumalu i te tolu i te afiafi, ko te itūaho ia e fai talohaga ai ia tagata. 2I kinā i te Faitotoka Gali, e vē ona fakaigoa ai e tagata, nae i ei ai he tino nae pipili i tona ōlaga kātoa. Ko aho uma e hauhau mai ai ki te faitotoka tēnei ke kaitagōgō tupe ai ki tagata e holo ki loto o te Mālumalu. 3I te ia kitea atuga o Petelu ma Ioane ka ulu atu ki te Mālumalu, oi gogō ai ki ei ki hana mea. 4Kua kikila hako atu ki ei te toka lua, oi lea atu ai ia Petelu ki ei, “Kikila mai ki a te ki māua!” 5Oi kikila ai te pipili ki te toka lua, ma tona manatu lava ka fōki ake hana mea. 6Kae kua lea vē atu ia Petelu ki ei, “E hēai haku tupe e fokotahi, kae ka kō fōki atua te mea e ia te au; i te igoa o Iehu Keliho o Nahaleta, e lea atu ai au ki a te koe, tū ki luga oi havali!” 7Oi tago atu ai ia Petelu ki te lima taumatau o te pipili oi fakatū ki luga. Ko te taimi lava tēnā na mālohi ai nā vae ma nā tapuvae o te pipili; 8na oho loa ki luga te pipili, kua tū ki luga ma kāmata oi havalivali. Oi fano ai ki loto o te Mālumalu fakatahi ma te toka lua, e havali ma tūtaoho ma viviki ki te Atua. 9Kua kitea atu ia e tagata e havali ma viviki ki te Atua; 10ma i te matea atuga e ki lātou ko te tino tēnei ko te pipili nae nofo i te Faitotoka Gali ma kaitagōgō ki tagata, na matuā tēteki lele ma ōfo ki te mea kua tupu ki ei.

Ko te Fakamālamalamaga a Petelu ki Tagata i loto o te Mālumalu

11Ka koi pipiki atu te pipili ki a Petelu ma Ioane i loto o te Poletito o Holomona, e vē ko te igoa nae fakaigoa ai e tagata, na ōfo lahi lele ia tagata ma na lolofi fakatahi mai ai ki a te ki lātou. 12Kua kitea atu e Petelu nā tino, oi lea vē atu ai ki ei, “Oku uho Ihalaelu, he ā te tēteki ai koutou i te mea tēnei, ma he ā foki te kikila vēnā mai ai outou mata ki a te ki māua? E vēake koutou ko he mana e o ki māua lava, pe ko ki māua e lelei i te kikila a te Atua, te na mafai ai e ki māua oi fakahavali te tino tēnei? 13#Eho 3.15Ko te Atua o Apelaamo, o Ihaako ma Iakopo, te Atua o nā tupuna o ki tātou, na ia fōkia te mamalu ki a Iehu tana kaukauna. Kae kua koutou tukulima atua ia ki takitaki o Iutaia, ma teteke e koutou i mua o Pilato, e ui lava na tonu ia Pilato ke fakahaoloto. 14#Mat 27.15-23; Mlk 15.6-14; Luk 23.13-23; Ioa 19.12-15Ko Iehu nae paia ma lelei, kae na teteke koutou ki a te ia ma lea koutou ki a Pilato ke tatala ma fakahaoloto te tino tāmate tino. 15Na tāmate e koutou te tino e takitaki e ia ia tagata ki te ola moni, kae kua toe fakatū e te Atua mai te oti — ma ko ki mātou ni molimau ki te mea tēnei. 16Ko te mana o Iehu te na mālohi ai te pipili. Ko te mea kua kikila koutou ki ei ma iloa e koutou, na fai e ala i te fakatuatua ki tona igoa; ko to mā fakatuatua ki a Iehu, te na mafai ai ke fakamālōlō te pipili i mua o koutou uma.

17“Ko te mea ia oku uho Ihalaelu, e iloa e au ko te mea a koutou ma outou takitaki na fai ki a Iehu, na māfua ona ko koutou e hē mālamalama. 18Na folafola e te Atua i nā aho kua leva e ala i te kau pelofeta uma, ko tana Mehia e tatau ke maua i nā puapuagā; ma na ia fakataunukuagia tēnei vāloaga i te auala tēnei. 19Ko te mea ia, halamō loa i autou agahala ma liliu ki te Atua, kae ke fakamāgalo ai autou agahala. Kāfai e koutou faia te mea tēnei, 20ka mafai ke kavatu e te Aliki ki a te koutou he taimi mo te fakafougia o nā agaga o koutou, ma ka ia uga maia ia Iehu, ko ia te Mehia kua uma te ia tōfiagia mo koutou. 21E tatau ke nofo pea ia i te lagi ke pa ki te taimi e fakafougia ai ia mea uma, e vē ona folafola e te Atua e ala i te kau pelofeta paia nae tautua mo ia i nā aho kua loa. 22#Teu 18.15, 18Auā na lea vēia ia Mohe, ‘Ko te Aliki te Atua ka ia uga atua he pelofeta ki a te koutou, e vē foki lava ko te ia uga atuga o oku,#3.22 e vē foki lava ko te ia uga atuga o oku; pe e vē ko au. ma ko he tino lava mai ia te koutou. E tatau koutou ke fakalogo ki ei i ho he mea e lea atu ai. 23#Teu 18.19Ho he tino e hē fakalogo ki te mea e lea atu ai te pelofeta tēnā, ka fakateka kehegia ia mai tagata o te Atua, ma fakaumatia.’ 24Ma ko nā pelofeta uma na ki lātou fakailoa maia te fekau mai te Atua, e aofia ai ia Hamuelu ma ki lātou i tua mai, na folafola foki e ki lātou nā mea e tutupu i nā aho nei. 25#Ken 22.18Ko nā folafolaga a te Atua na kui mai i nā pelofeta, e mo koutou, ma ko koutou e aofia i te feagaiga na ohi e te Atua ma outou tupuna. E vē ona vāgana te Atua ki a Apelaamo, ‘Ka kō fakamanuiagia ia tagata uma i te lalolagi, e ala atu i nā lāpuna o koe.’ 26Ma na filifilia ai la e te Atua tana Kaukauna ko Iehu ma uga muamua atu ki a te koutou, ke fakamanuia ki a te koutou e ala i te takitaki kehega o koutou uma mai outou uiga kino.”

Currently Selected:

Gāluega 3: TNT

Highlight

Copy