Gāluega 19

Kua Folafola atu e Paulo te Tala Lelei i Efeho

1I te taimi ka koi i Kolinito ai ia Apolo, na faimalaga ai ia Paulo kui loto o te kogāfenua o Kalatia ma Fulugia, ma taunuku atu ki Efeho. Na maua e ia i kinā ni tino Kelihiano, 2oi fehili vē ai ki ei, “Na fanaifo te Agaga Paia ki outou luga i te kaveaga o koutou ma Kelihiano?”

Kua tali mai ki lātou, “E hēki fakalogo lele ki mātou e i ei he Agaga Paia.”

3Kua fehili atu ia Paulo, “He ā te uiga o te papatihoga ki a te koutou?”

Oi tali mai ai ki lātou, “Ko te papatihoga na folafola e Ioane.”

4 # Mat 3.11; Mlk 1.4, 7-8; Luk 3.4, 16; Ioa 1.26-27 Kua lea atu ia Paulo ki ei, “Ko te papatihoga a Ioane, e mo ki lātou kua liliu kehe mai a lātou agahala; ma na lea foki ia Ioane ki tagata o Ihalaelu ke talitonu ki te tino e hau mulimuli mai ia te ia — ko tona uiga, ko Iehu.”

5I te fakalogoga o ki lātou ki te mea tēnei, oi papatiho ai loa ki lātou i te igoa o te Aliki ko Iehu. 6Na fakaeke atu nā lima o Paulo ki o lātou luga, oi afio ifo ai te Agaga Paia ki o lātou luga; na tautatala ki lātou i nā gagana kehekehe, ma folafola atu e ki lātou te fekau a te Atua. 7E tuha e toka hefululua fakatahi ki lātou taulelea.

8Na kātoa te tolu māhina ko Paulo nae fano ho ki loto o te hūnako ma tautala ki tagata ma te hē mataku, i ni taumafaiga ke mafai ai ki lātou ke talitonu e uiga ki te Mālō o te Atua. 9Kae ko iētahi o ki lātou kua loto makaka ma hē fia talitonu, ma faikupu fakatafafai i mua o tagata, e uiga ki te Ala o te Aliki.#19.9 Ala o te Aliki: Kikila ki te 9.2. Oi na tuku ai loa e Paulo ki lātou, kae kua fano ma kave nā tino kua talitonu, ma ko aho uma lava#19.9 Ko iētahi fakamaumauga e fakaopoopo ki ei te mai te 11 i te taeao ki te 4 i te afiafi. nae fai ana fakatalatalanoaga i te potu e fai ai nā akoakoga a Tulano. 10Na kātoa te lua tauhaga nae fai ai e ia te mea tēnei, ma ko nā tino uma nae nonofo i te itūmālō o Ahia, nā tino Iutaia ma nā tino nukukehe, na ki lātou lagona te kupu a te Aliki.

Ko nā Ataliki o Hekeva

11Ma e i ei ni itūkāigā vāvega uiga kehe na fai e te Atua, e ala ia Paulo. 12Ke pa lava ki nā holoholo ma nā kie talipefu nae fakaaogā e Paulo, na kave ki nā tino tauale ma na tuli kehe ai o lātou tauale, ma olo ai ki fafo nā agaga kino mai ia te ki lātou. 13E i ei ni tino Iutaia nae feoaki ma tuli ki fafo nā agaga kino, ma nae taumafai foki ke ki lātou fakaaogā te igoa o te Aliki ko Iehu ke fai ai te mea tēnei. Nae lea vēnei atu ki nā agaga kino, “E kō fakatonua atu koutou i te igoa o te Aliki ko Iehu, tēia e tālaki e Paulo.” 14E toka fitu te kau uho, ni ataliki e o he Ulu Ohitāulaga Iutaia e igoa ki a Hekeva, nae ki lātou faia te mea tēnei.

15Ka kua tali vē mai te agaga kino ki a te ki lātou, “E iloa e au ia Iehu, ma e iloa e au ia Paulo; kae ko koutou — ko ai koutou?”

16Na ohofaki e te tino nae ulufia e te agaga kino, ki lātou uma. Na fakaogohia lele ki lātou e ia ma tahae kehe o lātou kofu, oi fētutuli kehe ai ki lātou mai tona fale. 17Kua lagona te tala tēnei e nā tino Iutaia uma, vēnā ma nā tino nukukehe uma nae nonofo i Efeho; oi na mātataku uma lele ai ki lātou, ma fakaatili ai oi vīkia lahi e ki lātou te igoa o te Aliki ko Iehu. 18E tokalahi nā tino Kelihiano na ōmamai ma takutaku ma fakailoa atu i mua o tagata nā mea na fai e ki lātou. 19Ko te tokalahi o ki lātou nae fai mea fakataulaitu, na kaumai a lātou tuhi ma huhunu fakatahi i mua o tagata. Na ki lātou fakaopoopoa fakatahi te tau kātoa na fakatau mai ai na tuhi iēnei, ma na kātoa te 50,000 tupe hiliva.#19.19 tupe hiliva: Ko te tupe hiliva e fokotahi ko te totogi ia o te tino faigāluega fatoaga i te vaiaho e fokotahi (kikila ki te Mat 20.2). 20Ko nā mea iēnei na fai ma mea na halalalau ma tuputupu ai pea te ola o te kupu a te Aliki.

Ko te Vevehitū i Efeho

21Kua uma atu nā mea iēnei, oi tonu ai i te māfaufau o Paulo#19.21 oi tonu ai i te māfaufau o Paulo; pe na tonu ai ia Paulo, i te takitakiga a te Agaga Paia. ko ia ka malaga kui atu i Maketonia ma Akaia, ma fakaauau ai ki Ieluhalema. Na vēia tana kupu, “Kāfai e uma toku āhiāhi ki Ieluhalema, e tatau foki au ke āhiāhi ki Loma.” 22Oi na uga ai e Paulo ia Timoteo ma Elahito, ni tino e toka lua o nā tino nae fehoahoani ki a te ia, ke olo ki Maketonia, kae kua toe nofo ia mo ni aho i te itūmālō o Ahia.

23E tuha ko te taimi tonu iēnei na tutupu ai ni fakafītāuli e lahi i Efeho, ona ko te Ala o te Aliki. 24Nae i ei he tino gaohi mea e fai i nā hiliva e igoa ki a Temetilio, nae fai ana tamā fakatuha hiliva o te mālumalu o te atua fafine ko Atemito, ma na lahi lele nā tupe a tana kau faigāluega nae maua i tana pihinihi. 25Kua fakamāopoopo mai e ia tana kau faigāluega uma, vēnā ma iētahi tino e vēnei foki a lātou gāluega, oi lea vē atu ai ki ei, “Taulelea, e iloa e koutou ko te tamaokāiga o ki tātou e maua mai i te gāluega tēnei. 26Nei, kua kikila ma fakalogo koutou ki te mea a te tagata tēnei ko Paulo e fai. E lea vēia ko nā atua e fai i lima o tagata e hē ni atua moni, ma kua tokalahi lele nā tino i kinei i Efeho ma te itūmālō kātoa o Ahia kua talitonu ki a te ia. 27E i ei la nā tūlaga fakapopolegia lahi kua kitea. E hē gata ka faitiogia e tagata te itūkāigā pihinihi tēnei, kae ka fai foki ma mea ka hē fakatāua ai e tagata te fale tāpuaki o te atua fafine takutakua ko Atemito, ma ono kave kehea mai ai foki lava ma tona mamalu — te atua fafine e tāpuaki ki ei ia tagata uma i Ahia, ma te lalolagi kātoa!”

28Kua fakalogo te kaifenua ki nā kupu iēnei, oi fēkakai lele ai ma kāmata oi taufōlua vē, “E hilihili lava te mamalu o Atemito o Efeho!” 29Kua halalau te vevehi ki te kakai kātoa. Oi puke ai e te kaifenua ia Kaio ma Alihitako, ni tino Maketonia nae malaga fakatahi ma Paulo, ma kave ki te malae e maopoopo ki ei ia tagata o te kakai. 30Na fofou lava ia Paulo ko ia ke tautala ki te kaifenua, kae na tāofi e te kau Kelihiano. 31Ko iētahi o takitaki o te fenua, ni uō e a Paulo, na kave foki te lātou fakatagi ki a Paulo ke nahe fano ki te malae. 32I te taimi tēnā, ko te maopoopoga kua piha valevale: e kehe te mea e taukalalaga ai iētahi tino, kae e kehe foki te mea e lea ai iētahi tino, ona ko te tokalahiga e hē ki lātou iloa pe ko he ā te na maopoopo ai ki lātou. 33Ko iētahi tino na i ei to lātou tāofi, ko Alehana te na māfua ai te mea tēnei ona na uga e nā tino Iutaia ke fano ki mua. Oi fakatū atu ai te lima o Alehana ki tagata ke nahe piha, ma na taumafai ai ke fakamālamalama ki ei, ko te vevehitū e hēki māfua ia te ia ma ona hoa. 34Kae i te matea atuga e ki lātou ko Alehana ko he Iutaia, oi taukalalaga fakatahi ai lava vēnei mo he lua itūlā, “E hilihili te mamalu o Atemito o Efeho!”

35Mulimuli ake oi fakatotoka ai te kaifenua e te failautuhi o te kakai. Kua lea vē atu ia, “Oku uho Efeho, e iloa e tagata uma ko te kakai o Efeho te ia kikilagia te mālumalu o te atua ko Atemito, vēnā ma te fatu tapu na pakū ifo mai te lagi. 36E hēai he tino e hē ia iloa nā mea iēnei. E tatau ai la koutou ke fakatotoka ma nahe koutou faia he mea e aunoa ma te māfaufau lelei muamua ki ei. 37Kua kaumai e koutou nā taulelea iēnei ki kinei kae e hēki ki lātou kaihohoagia nā faletapuaki, pe fāifāi ki to tātou atua fafine. 38Kāfai ia Temetilio ma tana kau faigāluega e i ei he lātou mōliga fakatatau ki ho he tino, e i ei nā aho kua fakapitoa e fai ai nā fakamahinoga e nā tino e pūlea to tātou kakai: e mafai ke kaumai ki ei nā mōliga iēnā. 39Kae kāfai e i ei he tahi mea e kehe mai ai i te mea tēnei e fofou koutou ki ei, e tatau la ke kave ke fai ki ei he fakaikuga i he fono aloakia a tagatānuku o te kakai. 40Auā e ono mōlia ki tātou kua fakatutupu e ki tātou he vevehitū, ona ko te mea kua tupu i te aho nei. E hēai lele he mea na tatau ai ke tupu he vevehitū vēnei, ma e hēai foki he māfuaaga tatau.” 41Na uma loa tana tautalaga oi fakatūkua ai e ia te maopoopoga.

Currently Selected:

Gāluega 19: TNT

Highlight

Copy