Gāluega 13

Kua Filifilia ia Panapa ma Haulo ma uga ki he Fekau fakapitoa

1Nae i te Ekalehia i Anitioka he vāega o te kau pelofeta ma ni faiakoga: ko Panapa, ko Himeona (nae fakaigoa ko te Nekelō), ko Loukio (mai Kulene), ko Manaene (tēia na ola fakatahi ake ma Helota#13.1 Helota: Helota Anitipaha, te tupu o Kalilaia (kikila ki te Luk 3.1). te kōvana), ma Haulo. 2Ka koi tāpuaki atu ki lātou ki te Aliki ma fakalāina, kae vāgana vē atu ki ei te Agaga Paia, “Tofi mai ma āku ia Panapa ma Haulo, ke fai te gāluega kua kō filifilia mo ki lāua.”

3Kua fakalāina ia tagata o te Ekalehia ma fai talohaga ma fakaeke atu o lātou lima ki luga o te toka lua tēnei, oi uga ai ke olo.

Kua Taunuku ia Panapa ma Haulo ki Kupulona

4I te ugaga o Panapa ma Haulo e te Agaga Paia, oi olo ai ki Heleukeia, ma malaga ai i he vaka mai kinā ki te motu e igoa ko Kupulona. 5Kua pa atu te toka lua ki Halamini, oi tālaki ai e ki lāua te kupu a te Atua i loto o nā hūnako o tagata Iutaia. Nae ia te ki lāua ia Ioane Maleko ke fehoahoani ki te gāluega.

6Na malaga atu ki lāua mai kinā ki Pafoho i tētahi itū o te motu, ma ko kinā na fetaui ai ma he taulāitu e igoa ki a Pā-Iehu,#13.6 Pā-Iehu i te gagana Alamaika ko tona uiga ‘ataliki o Iehu’, pe ‘ataliki o Iohua’. he tino Iutaia nae lea ko ia ko he pelofeta, oi kae e hē ko he pelofeta. 7Nae he uō e a Hekio Paulo, te Kōvana o te motu. Ko Hekio he tino poto ma na fekau e ia ia Panapa ma Haulo ke ōake, ona nae fia fakalogo ki te kupu a te Atua. 8Kae na teteke ki a te ki lāua te taulāitu ko Eluma (ko tona igoa ia i te gagana Eleni), ma nae taumafai ke tataki kehe te Kōvana ke nahe talitonu ki te Atua. 9Oi fakatumulia ai ia Haulo — e igoa foki ki a Paulo — e te Agaga Paia; kua kikila hako atu ia Paulo ki te taulāitu, 10ma lea vē atu ki ei, “Ko koe ko te ataliki o te Tiāpolo! Ko koe ko te fili o nā mea uma e lelei. Ko koe kua tumu i nā itūkāigā togafiti kino uma, ma e taumafai pea lava koe ke fakaliliu te kupu moni a te Aliki ke fai ma kupu pepelo! 11Ko te mea ia ka pakū atu ai ki ō luga te lima o te Aliki i te taimi nei lava; ko koe ka tāuaho ma ka hē kē kitea te māina o te la mo he taimi.”

Ko te taimi lava tēnā na lagona ai e Eluma he puao uliuli kua pupuni ai ona mata, oi havali holo ai ke tau ia ki he tino ke takitakia ia i te lima. 12Kua kitea e te Kōvana te mea kua tupu, oi talitonu ai; auā na ofo lahi lele i nā akoakoga e uiga ki te Aliki.

Kua Olo ia Panapa ma Paulo ki Anitioka i Pihitia

13Oi folau ai ia Paulo ma ona hoa mai Pafoho ma taunuku atu ki Pelekē, he kakai i Pamefulia; ko kinā te na tētēka ai ki lātou ma Ioane Maleko ona kua toe foki ki Ieluhalema. 14Na fakaauau pea te lātou malaga mai Pelekē ma taunuku ki Anitioka i Pihitia; ma kua pa ki te Hāpati oi olo ai ki te hūnako ma nonofo ki lalo. 15Kua uma te faitauga mai te Tūlāfono a Mohe ma nā tuhituhiga a te kau pelofeta, oi kave ai te faifekau a nā takitaki o te hūnako ki a te ki lātou e vē, “O mātou uho, kāfai e i ei hautou kupu fakamālohi mo te fakapotopotoga, e mafai ke fai i te taimi nei.” 16Na tū atu loa ia Paulo, kua fakatū atu tona lima ki te fakapotopotoga ma kāmata loa oi tautala:

“Koutou oku tagata Ihalaelu ma tagata nukukehe uma i kinei e tāpuaki ki te Atua: fakalogo mai! 17#Eho 1.7; 12.51Ko te Atua o tagata Ihalaelu te na filifilia o tātou tupuna ma na faia ma mālō tokalahi, i nā aho nae nonofo ai i Aikupito. Ko te Atua te na ia kaumaia ki lātou mai Aikupito i tona mālohi lahi, 18#Nūm 14.34; Teu 1.31ma e fahefulu ia tauhaga nae onohai ai lava te Atua i o lātou uiga,#13.18 onohai ai lava te Atua i o lātou uiga; ko iētahi tuhituhiga e lea mai oi tauhi ai lava ki lātou e te Atua. i te toafa. 19#Teu 7.1; Ioh 14.1Na ia faia ke fakatōkilalo nā mālō e fitu i te fenua e igoa ko Kanana, ma ia fōkia te fenua ke fai ma tofi o ona tagata. 20#Fkm 2.16; 1 Ham 3.20Ko nā mea uma lele iēnei na tutupu i ni tauhaga e fahelau limahefulu.

“Kua uma atu nā mea tēnei,#13.20 Ko nā mea uma lele iēnei na tutupu i ni tauhaga e fahelau limahefulu. Kua uma atu nā mea tēnei; pe Mulimuli ake, kua kātoa te fahelau limahefulu tauhaga. oi tōfia ai e te Atua o lātou fakamahino, ke pa ki nā aho o te pelofeta ko Hamuelu. 21#1 Ham 8.5; 10.21Ma i te leaga o ki lātou ki a Hamuelu ki ho lātou tupu, oi filifili ai e te Atua ia Haulo te ataliki o Kihi, mai te puikāiga o Peniamina, ke fai ma o lātou tupu mo ni tauhaga e fahefulu. 22#1 Ham 13.14; 16.12; Hal 89.20I te kave kehega e te Atua o Haulo, oi ia filifilia ai ia Tavita ke hui ki ei. E vēnei te vāgana a te Atua na fai e uiga ki a Tavita, ‘Kua iloa e au ko Tavita te ataliki o Iehe, ko te itūkāigā tagata ia e fofou au ki ei, he tino ka ia faia nā mea uma e fofou au ki ei.’ 23Ka ko Iehu, tē na tupuga mai ia Tavita, te na fai e te Atua ma Fakaola o tagata Ihalaelu, e vē ko te mea na ia folafolagia. 24#Mlk 1.4; Luk 3.3Kae ko hēki kamatagia te gāluega a Iehu, ka kua tālaki e Ioane ki tagata e tokalahi o Ihalaelu, ke liliu kehe mai a lātou agahala, ma ke papatihogia. 25#Mat 3.11; Mlk 1.7; Luk 3.16; Ioa 1.20, 27Ma kua tau fakauma te gāluega a Ioane, oi lea vē atu ai ki tagata, ‘Ko koutou nei e vēakē ko ai au? E hē ko au te tino e fakatalitali koutou ki ei. Kae fakalogo mai! Ko te tino e fakatalitali koutou ki ei e hau mulimuli kāfai e uma aku gāluega, ma e hē aogā au ke kō tatala kehea nā taka mai ona vae.’

26“Te kau uho, koutou nā lāpuna o Apelaamo, ma nā tino nukukehe e tāpuaki ki te Atua: ko te fekau e uiga ki te fakaolataga, kua kaumai mo ki tātou. 27Auā e hēki iloa e nā tino e nonofo i Ieluhalema ma o lātou takitaki, ko Iehu ko te Fakaola, ma e hēki mālamalama foki ki lātou i nā kupu a te kau pelofeta e faitau ki tagata i Hāpati takitahi uma. Ka kua kavea te fakahalagia e ki lātou o Iehu, ma mea kua fakataunuku ai nā kupu a te kau pelofeta. 28#Mat 27.22-23; Mlk 15.13-14; Luk 23.21-23; Ioa 19.15Ma e ui lava e hēki ki lātou maua he mea na tatau ke fakahala ai ia Iehu i te oti, kae na lea lava ki a Pilato ke tāmate ia Iehu. 29#Mat 27.25-61; Mlk 15.42-47; Luk 23.50-56; Ioa 19.38-42Ma ina kua uma te fakataunuku e ki lātou o nā mea uma e lea mai ai nā Tuhituhiga Paia e uiga ki a Iehu, oi tuku ifo ai e ki lātou tona tino ki lalo mai te hātaulo, ma tuku ai ki loto o he tugamau. 30Kae na toe fakatū mai ia e te Atua mai te mate, 31#Gāl 1.3ma e lahi nā aho na fakaali ai ia ki nā tino na malaga fakatahi ma ia, mai Kalilaia ki Ieluhalema. Ko ki lātou iēnei te kua kavea ma molimau e uiga ki a te ia, ki tagata o Ihalaelu. 32-33#Hal 2.7Oi ko ki māua e i kinei ke kaumai te Tala Lelei ki a te koutou: ko te mea na folafola e te Atua ki o tātou tupuna e ia faia, kua uma te ia fakataunukua mo ki tātou o lātou lāpuna, e ala i te toe fakatū mai o Iehu mai te mate. E vē oi tūhia i te lua o Halamo:

‘Ko koe ko toku Ataliki;

ko te aho nei kua fai ai au ma ō Tamana.’

34 # Iha 55.3 Ma ko tēnei te vāgana a te Atua na fai fakatatau ki te toe fakatū mai o tona Ataliki mai te oti, ma ke hē pala lele tona tino i te tugamau:

‘Ka fōki atu e au ki a te koe nā fakamanuiaga e paia ma moni

na folafola e au ki a Tavita.’

35 # Hal 16.10 E vē foki lava oi tūhia i nā Tuhituhiga paia:

‘Ka hē tukua e koe tau kaukauna fakamāoni ke pala tona tino i te tugamau.’

36Auā na fakataunuku e Tavita nā fuafuaga a te Atua ka koi ola ai. Kae i te otiga, na tanu fakatahi ma ona tupuna, ma na pala tona tino. 37Kae e hēki vēnei te mea na pa ki tē na fakatū e te Atua mai te oti. 38-39Te kau uho, ko au e fofou ke koutou iloa ko te fekau e uiga ki te fakamāgaloga o agahala, e folafola atu ki a te koutou e ala ia Iehu; ma ko ki lātou uma e talitonu ki a te ia, e fakahaoloto mai nā agahala uma e hē mafai e te Tūlāfono a Mohe oi fakahaoloto mai ai koutou. 40Ia koutou la ke fakaeteete, kae ke nahe taunuku te mea na vavalo e te kau pelofeta e tupu ki a te koutou:#13.40 Ko iētahi fakamaumauga e hē i loto ai te ki a te koutou.

41 # Hap 1.5 ‘Kikila, koutou iēnā e fakatauemu ki taku kupu! Koutou ke ofo ma feoti!

Auā ko te mea e kō faia i te aho nei,

ko he mea ka hē talitonu lele koutou ki ei,

e tuha lava pe fakamālamalama atu e he tino ki a te koutou!’ ”

42Kua tutū atu ia Paulo ma Panapa ka olo kehe mai te hūnako, kae talohaga mai ki ei ia tagata ke toe ōmamai i te Hāpati ka hohoko mai, ke fakaauau a lā talanoaga ki nā mea iēnei. 43Kua tākape te maopoopoga i te hūnako, oi taumulimuli ai ki a Paulo ma Panapa nā tino Iutaia e tokalahi, vēnā ma nā tino nukukehe e tokalahi kua liliu ki te tāpuakiga Iutaia. Oi tautatala atu ai nā apohitolo ki a te ki lātou, ma fakamākekeke ki ei ke tūmau pea to lātou ola fakalagolago ki te alofa tūnoa o te Atua.

44I te Hāpati na hohoko ai, na ōmamai ai toetoe lava ko nā tino uma i te kakai, ke fakalogologo ki te kupu a te Aliki. 45I te kitea atuga e nā tino Iutaia te kaifenua tokalahi, oi fakatumulia ai ki lātou i te lotokino; kua taku pepelogia e ki lātou nā mea e lea ai Paulo, ma faikupu kino ki ei. 46Kae kua fakaatili ai te hē mātataku o Paulo ma Panapa ma lea vē atu ki a te ki lātou, “Ko te kupu a te Atua na folafola muamua atu ki a te koutou, ma ko he mea e hako lava. Kae ona ko koutou e teteke ki ei ma i ei outou manatu ko koutou e hē aogā ke maua e koutou te ola e fakavavau, ka tuku ai koutou e ki māua kae olo ki nā tino nukukehe. 47#Iha 42.6; 49.6Auā ko tēnei te fakatonuga a te Aliki kua tuku mai ki a te ki māua,

‘Kua kō faia koe ma mōlī ki tagata nukukehe,

kae ke kave ai e koe te fakaolataga ki te gataga o te lalolagi.’ ”

48I te lagonaga o te mea tēnei e tagata nukukehe, na fiafia lele ki lātou ma vīkia e ki lātou te fekau a te Aliki; ma ko nā tino kua filifilia e te Atua ke maua e ki lātou te ola e fakavavau, kua talitonu.

49Kua halalau te kupu a te Aliki ki itū uma o te koga tēnā. 50Kae kua fakakupu e nā tino Iutaia nā takitaki o te kakai ma nā fafine nukukehe fakaaloalogia kua talitonu ki te Atua, ke teteke mālohi ki a Paulo ma Panapa, ma ke tuli kehe mai to lātou pitonuku. 51#Mat 10.14; Mlk 6.11; Luk 9.5; 10.11Na tūtū kehe e nā apohitolo te pefu mai o lā vae, ke fakailoa ai ki tagata o te kakai to lā hē fiafia, ma na olo ai ki Ikononu. 52Ko nā tino kua talitonu ki te Atua i Anitioka kua fakatumulia i te fiafia lahi ma, i te Agaga Paia.

Currently Selected:

Gāluega 13: TNT

Highlight

Copy