Mattĕo 15

Jezŭ kî Pharizè̆pho tòcò

(Mărko 7.1-13)

1B́ĕnu Skrĭbāpho kî Pharizè̆pho aò Jerŭsalèm u tòcò lehtî Jezŭ kî cò d́ò, 2“No bōhmubicè tòcò khè̆b́a ma adoabwe hlemo tòcò anuad́ò̆ nè̄? Manè̄ kòd́òdo dō, b́ĕ ca a toko nu, cu tu ŭsab́ă cu cukhò ńò.”

3Ḿî Cò d́òge lōwa tòcò gōjo, “Thĭ ḿîthè̆, thĭ khè̆b́a Kib́ĭcè adèhmèla d́ŏ thĭ dènudèd́ò̆ abu nu nî̄. 4Manè̄ kò̄ d́òdo dō, Kib́ĭcè d́ò, ‘D́ŏb́èj́ab́è no mo kî na pa,’ kîd́ò̆ ‘bija ahôkî̆kkè apa ḿîwî amo ḿîwî dèbwè kè̄ b́è d́ò̆è dèthĭ.’ 5Barasă thĭ d́ò, ‘Bija dèbwèbwè kò d́ò apa ḿî̆dîḿî ńò amo gōjo, “Dèhlu arră ju hlu nu, gî̄ ḿîkò̆ Kib́ĭcè anikhĭ,” 6kî co to d́ŏ ta jă b́èkò̆ ca pa ḿîwî zo mo ḿîwî ńò; kî zè dè mèzo b́èkò̆ ca pa ḿîwî zo mo ḿîwî ńò,’ kîd́ò̆ thĭ mèkè̆gè Kib́ĭcè adèhmèla d́ŏ thĭ dènudèd́ò̆ aklè̆ nu. 7Bija awî tòpòkho, Izaĭah d́ò̆sadòlò thuŭthèègè thĭ wî thĭ kè̆ gōjo, 8‘Bija ajo tòcò d́ŏb́èj́ab́è Jèkî zò lòmò lò, ḿî ca tha òjîkî Jè. 9Zu thub́uthèb́è̆ hnahnă tèpwè Jè, nòthò̆ hnò̆nu zè dèthôdèthò̆ tòcò ḿî bija adèhmèla lò.’”

Dè Amèb́ò Bija

(Mărko 7.14-23)

10B́ĕnu Zo jo b́ôhtî hwă bija aboahò khwè̆b́a Cè d́ō, Cò d́ò lōwa, “Sòkhĕńe kî thîhè̆bò̄ ajo. 11Dè alenī bija ahòbŭ dè mèb́ò bija ńò, amèb́ò bija ḿî dè ahèhta bija ahòbŭ dòkhò̆.”

12B́ĕnu Zo bōhmubicè tòcò le d́ò Cè gōjo, “Pharizè̆pho tòcò thîhè̆b́è hwă dèjî̄b́è ajo d́ō, za thasè̆b́ègè Nè nu ni thîhè̆bò̄ ā?”

13Ḿî Cò d́òge lōwa tòcò, “Dèmu htè Apa aò Mò̄kho dèbwè do sola ńò nu, dè gā hjakè̆kò̆ gŏ ab́ò̆ lò. 14Cò ò d́ò̆è cè è̆; zi ḿî bija agādŭkhi htè ad́è̆lî̄ agādŭkhi aklè lò. Agādŭ khi kî agādŭkhi gè hèihŭhlè lōwa d́ō, za ladēnī bòbu gībwè lōlō lò.”

15Petru d́òge Cè gōjo, “D́òhlî̆htanibò̄ wa dègèlè ajo ahtabohtab́ă tîkî.”

16Cò d́ò, “Htô̆ khŏnujo thĭ dî thîhè̆ dè hnî̆ńò ā? 17Dè arră alenī bija ahòbŭ nu, adonī bija aphŭbu d́ō, ahèhtakè̆ d́ŏ bòbu nu, thĭ di thîhè̆ ńò ā? 18Barasă dè ahèhta bija ahòbŭ ḿî dè ahèhta bija atha bu; kîd́ò̆ amèb́ò bija ḿî dè anu tòcò nu. 19Manè̄ kò̄ d́òdo dō, dègomo akî̆kkè, dèmèthĭ bija, dèlathulakèḿè, dè ahuatoklŏ, dèkhathè̆thî adîdî̄dahma ńò, dèd́òkè̆d́òô bija, ajo tòcò ḿî ahèhta d́ŏ bija tha abu nu. 20Dè ajo tòcò ḿî amèb́ò bija, barasă bija tu ŭsab́ă acukhò ńò, ca a cò ò̆ nu dè mèb́ò cè ńò.”

Kănnamo Dèbwè Adèb́u

(Mărko 7.24-30)

21Hwădō Jezŭ hèhta d́ŏnu, kî Ze le ò dothogè d́ŏ Tĭro kî Sidŏna U ab́ôhtîb́ôwa nu. 22Kîd́ò̆ tcabò̄, Kănnamo ahèhta d́ŏ ale anu taklaẃa abu dèbwè kèwo kî cò d́ò lōwa, “Khòwèbò̄ jè Ŏ Dăvid Apho; dèhnè lô zô̄gè jo phomu.”

23Barasă Cò tò d́òge lōwa dèjî̄b́è dôhmô̆ ńò. Kîd́ò̆ Zo bōhmubicè tòcò leb́ôhtî ki d́òmògè Cè gōjo, “Hnahèbò̄ cè, manè̄ kòd́òdo dō, zè hè gō hè tra kô ge le.”

24Ḿî Cè nu, Cò d́òge, “Jè b́è thodŏle ḿî htĕ thŏ htè aò Israè̆l ahibu, htè ahlè̆mè̄ tòcò anikhĭ lò.”

25Barasă amihmu le gò̄la Za khahtî kî cò d́ò, “B́ĭcè, mèzobò̄ jè tîkî.”

26Cò d́òge lōwa gōjo, “Pholi atoko gî̄ phî kî ge hwĕni htwi aḿî atè b́è ńò.”

27Amihmu d́ò, “B́èhŏ B́ĭcè! Htwi tòcò ab́è tèpwè toko akîńîkôńô aladē d́ŏ ab́icè adadālè̄ nu.”

28B́ĕnu Jezŭ d́òge cè, “Amihmu, nè dèb́u do hŏ. Dè gi phî̆hta d́ò̆è acab́ô̆ na thaèni nu.” Kîd́ò̆ anu tè thèrè abu lò, zo phomu hmagegè.

Jezŭ Mèhmage Bija Akhab́è Dèscwidèsè̆ tòcò

29Jezŭ hèhta hwă b́ĕnu d́ō, Ze lekôgè d́ŏ Galilĕa Pèllèwe nu. Kîd́ò̆ Za hta hwă khòlò̆ dèmè̆ akho, Za sańăògè d́ŏ nu. 30Kîd́ò̆ bija aboahò lehtî Cè, lei akhad́e, amēkhi, acuthĭwikhathĭwi, adumūtaa kî alewe pwĕdimi, kîd́ò̆ cè b́è̆lă lōwa d́ŏ Jezŭ akhahtî kî Zè mèhmage lŏ tèpwè lōwa tòcò. 31Htô̆ḿî bija aboahò tòcò tcahtî adumūtaa jî̄b́è, acuthĭwikhathĭwi ège, akhad́e hè, amēkhi tcahtî dè d́ō, zè htèdômô̄dahmăgè kî za htăigè Israè̆l Ab́ĭcè.

Jezŭ B́oa Bija Abwè Lwīhtò

(Mărko 8.1-10)

32Jezŭ joplo hwă abōhmubicè tòcò Cò d́ò lōwa, “Jò khòwè bija aboahò ajo tòcò jo, manè̄ kò̄ d́òdo dō, zè hèkô Ja kă ò htŏ thŏthè̆ adābu, kî ze dèa tò ò dimĭ ńò. Ja da thaè hnage sò̆ ta acè tòcò ńò. Za gā laphlîladā da thòrò̆ klèkhoklèlò d́òbĕ.”

33Kîd́ò̆ zo bōhmubicè tòcò d́òge Cè, “D́ŏ hmîlè̄klè̆ jo gè̄ mèni kèhta toko htô̆kî agô̄ sô̆ abija òèòò pwĕ ajo d́òlè̄?”

34Jezŭ d́ò cè tòcò, “Thĭ toko ò bwīd́ŏ?”

Cè tòcò d́òscĭge lōwa, “Ò thăthôtod́ŏ kî dāpho aguru tîkî.”

35B́ĕnu Za hna bija aboahò sańăla lākho. 36Kîd́ò̆ Zi phî toko thăthôtod́ŏ kî dāpho, kî Zô hôwî, Ca b́îpha kî Ci i Zo bōhmubicè tòcò belani tèpwè bija. 37Bija a lŏ gô̆ abwè kî ca a sô̆ a tèpwè tòcò kî zi phîge akò̆b́ukò̆lā, akholakăsè pĕhta thăthô taṕahlu be. 38Bija a ab́è tòcò ògè lwīhtò, abĭsèpho kî amihmu tòcò òwe.

39Kîd́ò̆ Za hnage hwă bija aboahò d́ō, Zè khè̆htanī khlĭ tèb́è abu, Ze legè d́ŏ Magedan alākhobu nu.

Currently Selected:

Mattĕo 15: GRNT21

Highlight

Copy