Lŭka 9

Bōhmubicè tòcò Adèb́èthodŏ

(Mattĕo 10.5-15; Mărko 6.7-13)

1Jezŭ jo ladēplo Zo bōhmubicè scigībwè, kî Ci ilagè lōwa tòcò aphlŭathere d́ŏ dèscidèhnè tòcò akho kî agā prahlè̆mè̄ dèsè̆ amŏamo anikhĭ nu. 2Kî Zo thodŏgè lōwa tòcò agē le d́òŭd́ò̆sa Kib́ĭcè ahtĭage awîakè̆, kî agè̄ mèhmage ascwiasè̆ tòcò nu. 3Cò d́ògè lōwa tòcò gōjo, “Klèkhoklèlò anikhĭ hèibò̄ ḿè dè dimĭ ḿè, hèibò̄ ḿè thab́ăhnèhtò ḿè, hlŭthikĭ ḿè, tokodikhli ḿè, pĭd́ŏpĭsa mè, scid́ŏ akhlŏakhlè ḿè ḿè. 4Thĭ gā htanī bò̄bwè ahi hwahwă, ò b́ĕ nu kî hèhtaphlòḿĭbò̄ ḿè. 5B́eḿĕ bija gè̄ dè lèkha thĭ ńò d́ō, hèhtaphlòḿĭbò̄ d́ŏ u akhlŏ nu acab́ô̆ dèkhathè̆thî ahtad́ĕd́ò cè tòcò nu.”

6Bōhmubicè tòcò hèhta kî legè tod́osò̆ hwă tod́osò̆, d́òŭd́ò̆sa Vanzĕlō kî mèhmage bija dagwālè̄ lò.

Èrŏdè Adè Htèniwĭniwa

(Mattĕo 14.1-12; Mărko 6.14-29)

7Galilĕa Mādo Èrŏdè thîhè̆b́è dèlŏcăcè htè Jezŭ mègè tòcò nu d́ō, zè htèniwĭniwagè, manè̄ d́ō bija tòcò d́ò, “Zowănnī htabogegè dèthĭ aklè̆,” cò d́ò do. 8Kî tòcò cò d́ò ḿî, “Elĭjah d́è̆lî̄htagè ane.” Òwed́ò̆ tòcò cò d́ò ḿî, “Prò̆fèt tòcò cò aklè̆ dèbwèbwè htabogegè.” 9Barasă Èrŏdè d́ò, “Zowănnī nu je bēhtè̆dū htŏ zò gò̄, barasă ji thîhè̆b́è dè ajo tòcò ḿî bò̄bwè awîakè̆ bwè?” cò d́ò do, hwă za thaè tcahtîsôgè lōwa.

Jezŭ B́oa Bija Abwè Jè̄htò

(Mattĕo 14.13-21; Mărko 6.30-44; Zowănnī 6.1-14)

10Bōhmubicè tòcò doge d́ō cè tòcò d́ò̆sagè Jezŭ gajă zè mèhwă htŏ tòcò nu. Jezŭ jo dòbò hwă cè tòcò d́ō Ze geb́agè d́ŏ Bèthsaĭda u nu. 11Barasă bija aboahò tòcò thîhè̆kô d́ō, zô lôkôgè lōwa ale. Jezŭ jo cè kî d́ò̆sagè cè tòcò Kib́ĭcè Ahtĭage awîakè̆ kî mèhmagegè bija aòhtĭòda tòcò nu.

12Lumu thamò̆ ladēnīgè, bōhmubicè scigībwè lehtî Cè kî cò d́ò, “Hnagebò̄ bija aboahò cab́ô̆htè ze ge lenībò̄ d́ŏbu phăbu, agò̄ sò̆dūsòd́è̆ kî a ò̆bò̄ nu. Manè̄ wò ò alleaklè khŏnujo ḿî hmîlè̄khotholè̄klè̆ akhoacè̆ lò,” cò d́ògè lōwa do.

13Barasă Jezŭ d́òge Cè tòcò, “Thĭ thè̆ne ibò̄ cè tòcò dèadèò̆,” Cò d́òge lōwa do. Ḿî cè tòcò d́òge Cè, “Aòni wa ḿî toko jè̄d́ŏ kî dāpho gīb́ò̆ lò. We gē de lebwî ma bija aboahò anikhĭ dèa ńò d́ō, wè dè mè za tèpwè dimĭ ńò,” cò d́òscĭge lōwa do.

14Manè̄ b́ĕnu bija ògè abwè jè̄htò.

Mèhwă Cò d́ògè Zo bōhmubicè tòcò, “Hnabò̄ bija sanălăò lākho abwè jè̄scĭ dopho, jè̄scĭ dopho,” cò d́ò lōwa do.

15Cè tòcò mèkô gōnu d́ō bija lŏcăcè sańălăògè lākho. 16Jezŭ phî toko jè̄d́ŏ kî dāpho gīb́ò̆, Za tcahta d́ŏ Mò̄kho, Zô hôwî kî Ca b́apha toko, Ci igè Zo bōhmubicè tòcò agē be abija aboahò nu. 17Bija lŏcăcè a sô̆agè, kî zè b́è̆ploge akholakăsè d́ō apĕhta tèpwè scigīṕahlu.

Petru D́òhlî̆hta Jezŭ Awîakè̆

(Mattĕo 16.13-19; Mărko 8.27-29)

18Dinidèthè̆ B́ĕ Jezŭ ò dèbwè lò Cè thèb́è̆hta akhî nu, Zo bōhmubicè tòcò lehtî Cè d́ō, Cè d́è̆ lōwa tòcò, “Bija aboahò tòcò d́ògè Ji ḿî bò̄bwè?” Cè d́è̆ lōwa do.

19Cè tòcò d́òscĭge Cè, “Bija tòcò cò d́ò ḿî Zowănnī Baptĭsta, kî alewe tòcò d́ò Elĭjah; kî alewe tòcò be, htè Prò̆fèt hlemo tòcò aklè̆ dèbwèbwè htaboge,” cò d́ò lōwa do.

20Ḿî Cò d́òge lōwa tòcò, “Thĭ nu thĭ d́ò d́ò̆ Ji ḿî bò̄bwè?” cè d́è̆ge lōwa tòcò do.

Petru d́ò, “Kib́ĭcè aMèssĭah,” cò d́òscĭge lōwa d́o.

Jezŭ D́ò̆sadòlò Adèssègnè̆bòdò kî Adèthĭ

(Mattĕo 16.20-28; Mărko 8.30—9.1)

21Mèhwă Zè hmèla grî̄ṕîńî lōwa tòcò akò tò dò̆sa bija alewe dèbwè̆ ńò. 22Kî Cò d́ò, “Bija Apho gā khab́è pwĕdimi, kè̄ b́è bāphlòḿĭkò̆ d́ŏ anedothabwe, kî Phŭgido tòcò kî Skrĭbāpho tòcò ò kî kè̄ b́è mèthĭkò̆ kî thŏni dini Za gā htabogekò̆,” Cò d́ò̆sa lōwa tòcò do.

23Kîd́ò̆ Cò d́ò̆sa lŏ lōwa tòcò, “Bija dèbwèbwè gā thaè lôkô ma Je le d́ō, za gā jab́i d́ò̆è ze ne, j́ahta zu Krusu gŏ ani kî lôkô d́ò̆è Je le. 24Manè̄ d́ō bija athaè mèhlô̆hta atha dèbwè gū sub́èkò̆ aè̆. Barasă bija asuapa atha Ji nikhĭ dèbwè nu gè̄ mèhlô̆htakò̆ aè̆. 25Manè̄ kòd́òdo dō, bija dèbwè gī nib́è hwă Lākho thèd́è̆b́è barasă zu gū su gā pa ma ze neb́î̆cè d́ō akhlŏhtamame ḿî danè̄? 26Gajă bija athăwāi Jè kî Jè dèjî̄b́è tòcò dèbwèbwè nu, Bija Apho gā thăwāikò̆ cè b́ĕ Ze lenī Zò dò Ze the abu, kî Ca Pa adòathe abu kî Mò̄khobwèzo atcahtĭ adòathe abu akhè̆ nu. 27Barasă Jò d́ò̆sa thĭ adî̄ahma, b́ĕ bija asò̆hto ò b́ĕjo tòcò aklè̆ nu gî̄ dî dî̄tcab́èkò̆ dèthĭ ńò htô̆ ca tcahtîb́è Mò̄kho Ahtĭage nu,” Cò d́ògè lōwa tòcò do.

Jezŭ B́ăkhlèhta Ahô̆ajò

(Mattĕo 17.1-8; Mărko 9.2-8)

28Jezŭ d́ò hwă dèjî̄b́è ajo alekă ani lwīthô nu Za htajoigè Petru Zăkomo kî Zowănnī d́ŏ khòlò̆kho cab́ô̆htè Cè kè thèb́è̆hta nu. 29B́ĕ Cè thèb́è̆hta phătha nu Zu mūkă b́ăkhlèhta, kî Zè dèkô̆dèthò b́ôthădisci gè̄gòbrògè. 30Kî tcabò̄, bija gībwè dòdò̄htî Cè. Bija ajo gībwè ḿî Mŏzè kî Elĭjah, 31htè apòhta d́ŏ dèdòdèthe abu, d́ò̆sagè Zè dèthĭ awîakè̆ htè agē ṕĕhtazòhtakò̆ d́ŏ Jerŭsalèm u bu nu. 32B́ĕnu Petru kî Zò khò̆ gībwè sòḿĭkhĕgè. B́ĕ zô phôthèńè akhî nu ca tcahtîgè Jezŭ adèdòdèthe kî bija asò̆hto òplo Cè gībwè nu. 33B́ĕ cè tòcò hèbā Jezŭ akhî nu Petru d́ògè Jezŭ, “Sara, kò ò b́ĕjo ḿî aè zî̄ hŏ. Gā prahta hipho thŏ wa nā! Ni nikhĭ dawa, Mŏzè anikhĭ dawa kî Elĭjah anikhĭ dawa,” cò d́ò do d́ō, cò d́ò danè̄ nu zè di thîhè̆gè cè è̆ ńò.

34B́ĕ cò d́ò phătha we gōjo akhî nu, dè̄tob́o dokhlo pòhta kî lagāb́igè cè tòcò kî cè tòcò scisăgè. 35D́ŏ dè̄tob́o aklè̆ dèlē thèhtagè dèdè̆ ad́ò, “Ajo ḿî Jo Pho Jô rôhtagè dèbwè nu, sòkhĕńebò̄ Ze lē,” ad́ò do.

36Dèlē thèhta hwă nu, aò ḿî Jezŭ dèbwè be lò. B́ĕnu lò cè tòcò bôlab́i alòmò kî dè htè ca tcahtîgè tòcò nu cò tò d́ò̆sa bija dèbwè̆ ńò.

Amikhŏpho Dèhnèmèjo

(Mattĕo 17.14-18; Mărko 9.14-27)

37Alekă dini Cò ò khòlò̆kho Ze gela d́ō bija aboahò lescĭgè Cè klè. 38Bija aboahò aklè̆ amikhŏ dèbwè kèwohta, “Sara, ja damò Nè agā tcawè̄ jo pho alò tîkî, manè̄ cè ḿî jo pho aò dèbwè lò; 39Kî tcabò̄, dèhnè phîb́è cè kî za haphuhta; ahtîlakhu cè d́ō ca thaṕòthaî pwĕ zo hòbŭ thob́ohta nu. Amèkĕmèbrô hwă cè adè hèhta hjŏkakî ńò! 40Ja damò No bōhmubicè tòcò gā hna hèhtaphlòḿĭ cè, barasă cè tòcò dè mèkèhta tèpwè ńò,” cò d́ò̆sa lōwa d́o.

41Jezŭ d́ò̆sage cè tòcò, “Ŏ bija adèb́u tò ò ńò kî asèphròklè dikhwĭ, Jò kò òkôb́è thĭ kă kî khòthad́ò̆ib́è thĭ dādè̄? Leibò̄ no pho d́ŏ Jò ò jo,” Cò d́ò lōwa d́o.

42B́ĕ ze leb́ôhtî Jezŭ akhî nu, dèscidèhnè htîladē hwă cè d́ō mèthĭmūklègè cè. Jezŭ hò̆ hwă dèhnè akî̆kkè d́ō, Zè mèhmage abĭsèpho; mèhwă Ci igegè lōwa ca pa. 43Bija lŏcăcè htèdômô̄dahmă nigè Kib́ĭcè aphlŭdotheredo akhoacè̆.

Jezŭ D́òdòlò Zè Dèthĭ Awîakè̆ Gīpla tapla

(Mattĕo 17.22,23; Mărko 9.30-32)

B́ĕ bija tòcò htèdômô̄dahmă ni thebĕ Jezŭ adèphîdèmè alle nu, Cò d́ògè Zo bōhmubicè tòcò, 44“Gomoibò̄ dèjî̄b́è ajo d́ŏ thĭ tha abu nu. Bija Apho kè̄ b́è hô̆lăkò̆ d́ŏ bija tòcò acukhòbu nu,” Cò d́ò̆sagè lōwa tòcò do. 45Barasă cè tòcò dî thîhè̆gè ahtabohtab́ă ńò. Manè̄ ab́èlè̄hugè d́ŏ cè tòcò ahlò̆mò̄ nu cab́ô̆htè zi gī dî thîhè̆bò̄ ńò nu, kî cè tòcò dô htô tè d́è̆ b́ugè Cè ńò.

Adogudŭ Ḿî Bò̄bwè

(Mattĕo 18.1-5; Mărko 9.33-37)

46Bōhmubicè tòcò darahlègè lōwa htè d́ŏ cè tòcò aklè̆ nu adogudŭ ḿî bò̄bwè nu. 47Jezŭ thîhè̆ cè tòcò atha adègomo d́ō Zo jo hwă abĭsèpho dèbwè d́ŏ Zo wōlò, 48kî d́ògè lōwa tòcò, “Gajă bija alèkha abĭsèpho dèbwèbwè d́ŏ Ji mi abu nu, mè cab́ô̆ zè lèkha Jè lò. Kî gajă bija lèkha Jè dèbwè nu, mè cab́ô̆ zè lèkha Cè htè athodŏlegè Jè dèbwè nu. Manè̄ d́ō, thĭ klè̆ nu asciphogudu dèbwè ḿî adogudu lò,” Cò d́ògè lōwa d́o.

Bija Ada Htad́ĕd́ò Thĭ Ńò ḿî Thĭ Nikhĭ

(Mărko 9.38-40)

49Zowănnī d́òscĭge Jezŭ, “Sara, wa tcahtî bija dèbwè hna hèhtakè̆ dèscidèhnè d́ŏ Ni mi abu nu, zè dè hèkô wa kă ńò akhoacè̆ we mèd́îd́ăgè cè,” cò d́ò̆sagè lōwa d́o.

50Jezŭ d́òge cè, “Mèd́îd́ă ḿè cè ḿè; manè̄, bija ada htad́ĕd́ò thĭ ńò tòcò ḿî thĭ nikhĭ dòkhò̆,” Cò d́ògegè lōwa d́o.

Samarĭapho dè Lèkha Jezŭ ńò

51B́ĕ Cè è̆ akhîb́è htè Cè kè b́èphîhtage nu, Jezŭ d́ab́a amūkă d́ŏ Jerŭsalèm u kî legè d́ŏ nu. 52Aŭsu Za hnagè Zè bwèzo tòcò gē le Zò hlò̆mò̄. Mègōnu d́ō cè tòcò lenīgè Samarĭapho au tu u cab́ô̆htè ca ka pradòlòbò̄ Jezŭ anikhĭ alleaklè nu. 53Barasă Samarĭapho tòcò da thaè lekha Cè ńò, manè̄ d́ō, Za thaḿò̆ le d́ŏ Jerŭsalèm u akhoacè̆ nu. 54B́ĕ Zo bōhmubicè Zăkomo kî Zowănnī tcahtî dè ajo d́ō cò d́ò, “B́ĭcè, Na tha ò tèpwè htè hmî ò d́ŏ Mò̄kholè̄ nu gā la gè̄hòa cè tòcò nu ā?” cò d́ògè lōwa d́o.

55Jezŭ d́ab́a hwă amūkă d́ŏ lōwa tòcò ò, Zò hò̆gè lōwa, Cò d́ò, “Thĭ tho thĭ tha mègè cadè̄ nu thĭ di thîhè̆gè ńò. Bija Apho le ḿî tè b́è agè̄ mèkè̆ bija atha ńò, ḿî agè̄ mèhlô̆htage cè dòkhò̆,” Cò d́òscĭge lōwa tòcò d́o. 56Mèhwă, Ze legè d́ŏ alewe tod́osò̆ nu.

Dèkhassègnè̆ Agô̄ Lôkô Jezŭ Ale

(Mattĕo 8.19-22)

57B́ĕ cè tòcò hèkô klè akhî nu bija dèbwè d́ògè Jezŭ, “Ne gē le d́òlè̄ d́òlè̄ ḿî jô gô̄ lôkô Ne le lò,” cò d́ò lōwa d́o.

58Jezŭ d́òscĭgegè cè, “Htwimi tòcò òi abuagî̄ kî htŏpho tòcò òi abi, barasă Bija Apho nu Zò gò̄ bò̄lai co ko hnò̆nu ale tò ò ńò,” Cò d́ò lōwa do.

59Kî Cò d́ò d́ò̆ alewe dèbwè, “Lekôbò̄ Je le,” Cò d́ò lōwa do.

Barasă cò d́òge lōwa, “B́ĭcè, je gē ge b́ŭlăd́ăhta Mò̄kô ja pa,” cò d́òscĭge lōwa d́o.

60Jezŭ d́òge cè, “Athĭ tòcò ku b́ŭlă d́ò̆è athĭ, barasă nè nu le d́òŭd́ò̆sabò̄ bija Kib́ĭcè Ahtĭage awîakè̆,” Cò d́ò lōwa d́o.

61Ḿî alewe dèbwè d́ò, “Jô gô̄ lôkô tèpwè Ne le, Ŏ B́ĭcè, barasă ibò̄ jè agē ge hnŭsè ŭsu mò̄kô bija aò d́ŏ hibu tòcò nu,” cò d́ògè Jezŭ do.

62Jezŭ d́ògè Cè, “Gajă bija apôglohwă htèb́ò̆ d́ō tcab́age alekă dèbwè nu ta tani Kib́ĭcè Ahtĭage ńò,” Cò d́ò̆sagegè lōwa d́o.

Currently Selected:

Lŭka 9: GRNT21

Highlight

Copy