Lŭka 5

Bōhmubicè Ab́èjo Ŭsu tòcò

(Mattĕo 4.18-22; Mărko 1.16-20)

1B́ĕ bija tòcò sathîńîwè̄ Jezŭ alò cab́ô̆htè zò sòkhĕńebò̄ Kib́ĭcè Alēahwè akhî nu, Jezŭ sò̆htoògè d́ŏ Genesarè̆t hnò awe nu. 2Ca tcahtîgè bija cŏlăglo khlĭ gīb́è d́ŏ hnòwe nu, apôa dāpho tòcò khè̆ladē hwă khlĭbu zu dutrub́ăgè zi dwī tòcò. 3Jezŭ htanī hwă khlĭ tè b́è abu, htè Simŏnè è̆ nu d́ō Za hna lōwa wa dotho kî khò̆kho tîkî. Za sańăla hwă d́ŏ khlĭbu, Cô thôithò̆igè bija aboahò.

4B́ĕ Cô thôithò̆i hwă dè nu, Cò d́ògè Simŏnè, “Wab́abò̄ khlĭ d́ŏ htĭlajò̄ alle nu kî bālabò̄ ni dwī dakha.”

5Simŏnè d́òscĭgegè Cè, “Sara, thèd́è̆nè̆ adābu wu htukhohtuă nòthò̆ hnò̆nu wô tô pônigè dāpho tòb́ò̆ ńò. Barasă Ńò d́ò atherĕ nu ja gā bāla d́ò̆è dwī.” 6B́ĕ zè mèhwă gōnu lò za bā nigè dāpho òèòò pwĕ dwī thaḿò̆ htèlègè nu. 7Kî cè tòcò jogè zò khò̆ aò d́ŏ khlĭ alewe tèb́è abu nu gē le mèzo lōwa. Cè tòcò le kî htunī pĕhtagè dāpho d́ŏ khlĭ gīb́è lōlō abu pwĕ athaḿò̆ laprugè nu. 8B́ĕ Simŏnè Petru tcahtî dè ajo nu d́ō, zò gò̄la d́ŏ Jezŭ akhalemē lò, cò d́ò, “Sè dòbòbò̄ jè, manè̄ ji ḿî dèkhòwèpho, Ŏ B́ĭcè!”

9Manè̄ kò̄ d́òdo dō, cè kî aòplo cè tòcò htèdômô̄dahmă sôgè d́ŏ cô pôni dāpho òèòcara akhoacè̆ nu. 10Zebedi apho Zăkomo kî Zowănnī htè amèplogè Simŏnè dèmè tòcò ḿîgè gōnu lò lò. Ḿî Jezŭ d́ògè Simŏnè, “Scisăbò̄ ḿè, khŏnujo phlò̆ ahlò̆mò̄ nî gî̄ ḿîkò̆ apô bija.”

11Mèhwă cè tòcò wawè̄ge khlĭ d́ŏ khò̆dewēlò, bāphlòmĭ lŏ dè gŏmi kî lôkôgè Jezŭ ale.

Akaĺaki Dèbwè

(Mattĕo 8.1-4; Mărko 1.40-45)

12Tapla b́ĕ Jezŭ òwe d́ŏ u abu nu, tcabò̄ bija akaĺaki thèd́è̆bwè ògè dèbwè. B́ĕ ca tcahtî Jezŭ akhî nu, zo gò̄la b́îtèd́è lōwa ahlò̆mò̄, damò lōwa kî d́ò, “Ŏ B́ĭcè, nè dèthaèni kò ò ma d́ō, nè mètcăge za tèpwè jè.”

13Jezŭ tad́ăhta acukhò, tòb́è cè kî d́ògè, “Jè dèthaèni ò hŏ, wîtcăge d́ò̆è.” Taplakhă lò, akaĺaki dèsè̆ hlè̆mè̄ danāgè. 14Jezŭ htulahmèlagè cè akò̄ tò d́ò̆sa bija dèbwè̆ ńò, ḿî Cò d́ò lōwa, “Le kî d́è̆lî̄bò̄ ne ne phŭgi kî ilabò̄ dèhlu dèòwîòtcăge anikhĭ acab́ô̆ Mŏzè hmèla adĕ nu cab́ô̆htè agî̄ ḿîbò̄ cè tòcò anikhĭ thè̆thî nu.”

15Barasă dèwîdèkè̆ ajo hŏhtathèla kî bija aboahò ladēplogè cab́ô̆htè zò gò̄ sòkhĕńebò̄ lōwa adèthôdèthò̆ kî agè̄ mèhmagebò̄ zi bija ascwiasè̆ tòcò nu. 16Barasă Ze legè d́ŏ lothĭḿizekho kî b́ĕnu Cè thèb́è̆htagè.

Bija Acuthĭkhathĭ d́ŏ Kapèrnaum U Dèbwè

(Mattĕo 9.1-8; Mărko 2.1-12)

17Dinidèthè̆ Jezŭ sanălăò kî thôithò̆igè bija kîd́ò̆ d́ŏnu pharizè̆pho kî skrĭbāpho tòcò sanălăò, zi ḿî bija aò d́ŏ Galilĕage kî Judĕage ad́ŏaphă tòcò kî Jerŭsalèm u bu tòcò nu. Kîd́ò̆ B́ĭcè acô̆thèlè̆ ògè Zò lò cab́ô̆htè Zè gè̄ mèhmagebò̄ lōwa tòcò nu. 18Kî tcabò̄, bija le j́aigè acuthĭkhathĭ dèbwè d́ŏ leḿĭkho nu, cè tòcò thaè le d́ò̆lă lōwa d́ŏ Jezŭ ahlò̆mò̄ nu. 19Ḿî zî tî plînīkèhta bija aboahò aklè̆ ńò d́ō, cè tòcò hta d́ŏ hikho, b́aphlò̆ hwă sòkho d́ō zèlagè lōwa leḿĭ abu, d́ŏ Jezŭ ahlò̆mò̄ nu. 20Jezŭ tcahtî lōwa adèb́u d́ō Cò d́ò, “Ŏ Athò, nè dèkhòwè b́è b́ăplèkè̆ htŏ.”

21Ḿî Skrĭbāpho kî Pharizè̆pho tòcò d́ò̆sahlè lōwa cò d́ò, “Bija ajî̄b́è htad́ĕd́ò Kib́ĭcè ajo dèbwè ḿîgè bò̄bwè? Kib́ĭcè gā hwă ab́ăplèza bija adèkhòwè ḿî bò̄bwè?”

22Jezŭ thîhè̆ lōwa tòcò adègomo d́ō, Cò d́òscĭge lōwa tòcò gōjo, “Thĭ gomo ma dè d́ŏ thĭ thaobu gōnu nè? 23Ahjŏ d́osè ḿî d́òlè̄ dèdè̆ dè̆, htè kò d́ò, ‘Nè dèkhòwè b́ahlô̆ htŏ ā?’ Ḿî̆dîḿî ńò, ‘Wè̄hto hèbò̄ kha nu ā?’ 24Barasă cab́ô̆htè thĭ gî̄ thîhè̆b́è htè Bija Apho nu zu phlŭ ze there ò d́ŏ Lākho jo akā b́ăplè bija adèkhòwè nu,” d́ō Cò d́ògè acuthĭkhathĭ dèbwè gōjo, “Jò d́ò nè, wè̄hto, phî ne leḿĭ kî gebò̄ ni hi.”

25Mègōnu zè wè̄htodanā d́ŏ bija ahlò̆mò̄, phî̆hta ze leḿĭ htè zò sòmĭlăigè nu kî gegè ahi d́ŏ dèhtăhtai Kib́ĭcè abu nu. 26Bija lŏcăcè htèdômô̄dahmă, htăhtai Kib́ĭcè kî ò pĕhtagè dèscisă kî d́ò, “Khŏdini wa tcahtî htŏ dè acòklîcòhjè̆.”

Lĕvi Adèb́èjo

(Mattĕo 9.9-13; Mărko 2.13-17)

27Alekă Jezŭ le d́ŏ ahlò̆mò̄ kî Za tcahtîgè Adadèhmŭ dèbwè htè ami ḿî Lĕvi, sanălăò d́ŏ bija dadèhmŭ ahipho bu nu kî Cò d́ò lōwa, “Lôkôbò̄ Je le.” 28Mègōnu d́ō za bāladē dè gŏmihtĭda kî lôkôgè Jezŭ ale.

29Mèhwă d́ō Lĕvi khascikhaṕwè̆ nigè Jezŭ d́ŏ zi hibu nu. Adadèhmŭ òèòcara kî bija alewe tòcò ladēplogè lōwa. 30Pharizè̆pho tòcò kî Skrĭbāpho tòcò mô̄mô̄îî kî cò d́ògè bōhmubicè tòcò, “Thĭ aploò̆jī ma Adadèhmŭ kî dèkhòwèpho tòcò gōnu nè?”

31Ḿî Jezŭ d́òscĭge cè tòcò, “Bija aòmô̄òhma tòcò da thaèni tèpwè dihwi sara ńò, ḿî bija ascwiasè̆ tòcò dòkhò̆. 32Ja da la joge bija adî̄ahma tòcò nu ńò, ḿî ja la joge dèkhòwèpho tòcò d́ŏ dèsalatha anikhĭ nu dòkhò̆.”

Dèd́u Dèadèò̆ Acè̆

(Mattĕo 9.14-17; Mărko 2.18-22)

33B́ĕnu cè tòcò d́ò Jezŭ, “Zowănnī abōhmubicè tòcò d́u dèjwè dèadèò̆ kî thub́uthèb́è̆, kî Pharizè̆pho tòcò mègè gōnu nu, ḿî no bōhmubicè tòcò aò̆ manè̄?”

34Jezŭ d́òscĭge cè tòcò, “Aphîcumikhŏ dèbwè òkôwe tî̆tèḿè̆ tòcò akă b́ĕ dèphîcu apwè̆bu athŭtherĕ thĭ hnazabò̄ cè tòcò d́u dèadèò̆ ā? 35Barasă muni dini gō dokò̆ htè aphîcumikhŏ dèbwè kè b́èphîkkè̆thĭwīkò̆ lōwa, kî b́ĕnu cè tòcò ku d́ukò̆ dèadèò̆.”

36Mèhwă Cò d́ò̆sage lōwa dègèlè dèdè̆, “Bija dò bòd́ège tîkî̆jā ajā kî dèkô̆dèthò athè̆ dèbwè̆ ńò. Bija gè̄ mègōnu d́ō akā d́ahto htèlè tèpwè dèkô̆dèthò athè̆, kîd́ò̆ tîkî̆jā athè̆ di nirā tèpwè tîkî̆jā ajā ńò. 37Bija dò hlònī thobiscihtĭ athè̆ d́ŏ akŏdèphe alila abu dèbwè̆ ńò, dî ḿî ńò d́ō thobiscihtĭ athè̆ gā sabopha tèpwè akŏdèphe kî agā lagè̄lō tèpwè kî dèphe ḿî ḿî kè kè̆ kô ô tèpwè. 38Thobiscihtĭ athè̆ nu gō mò b́è̆nī cè d́ŏ akŏdèphe thè̆ bu nu kî akò ò èzènè tèpwè gīdè̆ lōlō. 39Bija aò̆ nènò thobiscihtĭ alila dèbwè nu, da thaèò̆ phròhlè athè̆ ńò. Manè̄, cò d́ò, ‘Alila ḿî aẃi d́osè.’”

Currently Selected:

Lŭka 5: GRNT21

Highlight

Copy