Lŭka 19

Jezŭ kî Adadèhmŭ Zakĕo

1Jezŭ lenī d́ŏ Jĕrikho u kî hèkôgè klè. 2Kî tcabò̄, b́ĕ nu bija Adadèhmŭ akho ami ḿî Zakĕo, htè aniò̆jòa ò dèbwè. 3Za thaè le tcahtî tèpwè Jezŭ, barasă bija aboahò òb́i zò hlò̆mò̄, d́ō za da tcahtî za lōwa ńò. Manè̄ cè ḿî bija atèńèklè dèbwè akhoacè̆ lò. 4Mègōnu d́ō, cè cwèle d́ŏ Jezŭ lekô klè ahlò̆mò̄ kî htagè d́ŏ thogādŭ kală amu tòb́ò̆ alò cab́ô̆htè ca ka tcahtîbò̄ lōwa nu, 5B́ĕ Jezŭ do d́ŏ nu, Ca tcahtîgè lōwa d́ō, Cò d́ògè lōwa, “Zakĕo, gela plaplăbò̄, khŏdini Jò gò̄ sò̆dūsòd́è̆b́è d́ŏ ni hi nu!” Cò d́ògè lōwa do.

6Zakĕo gela plaplă kî jo thalōthalaigè Jezŭ hi. 7Atcahtîkô tòcò mô̄mô̄îî lōgè kî d́ò, “Ze le mègè Ze ne tî̆tèḿè̆ d́ŏ dèkhòwèpho dèbwè ahibu nu!” cò d́ò lōwa do.

8Zakĕo sò̆hto ò kî d́ògè Jezŭ, “Tcabò̄, B́ĭcè, d́ŏ jè dè tòcò aklè̆ ji ki i tèpwè assègnè̆pho tòcò klăḿè̆. Jò kò̄ hlòhlî̆hlòplè ni b́eḿĕ bija dèbwèbwè d́ō, je gē plege lwīpla bu,” cò d́ò lōwa do.

9Jezŭ d́òscĭge cè, “Khŏdini jo dèhlô̆htage do htŏ d́ŏ hi ajo dawa abu nu. Manè̄ kòd́òdo dō, cè ḿî Abraham akhwĭ dèbwè akhoacè̆ nu. 10Bija Apho lela acab́ô̆ za gā wāhlège bija akè̆ahlè̆mè̄ tòcò nu kî mèhlô̆htage cè nu dòkhò̆,” Cò d́ògè lōwa do.

Htè̆b́e Agèlè

(Mattĕo 25.14-30)

11B́ĕ bija tòcò sòkhĕńe phătha dè ajo akhî nu, Jezŭ d́ò̆sagè bija dègèlè dèdè̆. Zo do b́ôhtîgè Jerŭsalèm u, kî bija tòcò b́ugè htè Kib́ĭcè ahtĭage gō do danāgè akhoacè̆ nu. 12Cò d́ò̆sagè lōwa tòcò gōjo, “Anedothabwe dèbwè legè d́ŏ htĭlegejî nu cab́ô̆htè zî gî̄ phîni saphra ale kî gē geb́agè nu. 13B́ĕ za thaḿò̆ hèladē nu, zo jo ladēplo hwă zô zôpho abwèsci d́ō, ci i lōwa htè̆b́e dèbwè te b́e kî cò d́ò lōwa, ‘Kŭigwāibò̄ htô̆ jo doge nu,’ cò d́ò lōwa do. 14Barasă htĭgepho tòcò dè wè̄ cè ńò; kî co thodŏle hwă bwèzo tòcò ze lekă, cò d́ò, ‘Wa da thaèni bija ajo dèbwè gè mè ane saphra wo kho ńò,’ cè tòcò d́ògè do.

15“Zî phîni hwă saphra ale d́ō, ze geb́agè. Mèhwă zo joplogè zô zôpho htè ze belanigè htè̆b́e tòcò nu kî htôtcadè̆cagè cè tòcò htè zè mèkŭmègwāi ani òèhtagè cadè̄ nu. 16Aŭsu dèbwè le kî cò d́ò, ‘Nè htè̆b́e te b́e mèni òèhtagè jè ab́esci,’ cò d́ò do. 17Kî cò d́ò lōwa, ‘Aè hŏ, zôpho aè, d́ŏ nè dèdî̄dèhma ò d́ŏ dè atîkîpho akho nu akhoacè̆, nu ku ŭicaib́èkò̆ u ausci,’ cò d́ò lōwa do. 18Gībwè dèbwè le kî cò d́ò, ‘B́ĭcè, nè htè̆b́e te b́e mèni òèhtagè jè jè̄b́e be,’ cò d́ò lōwa do. 19Cò d́òscĭge lōwa, ‘Nè ḿî ḿî ŭicaibò̄ u jè̄ u akho,’ cò d́ò lōwa do. 20Zôpho alewe dèbwè le kî cò d́ò, ‘B́icè, nè htè̆b́e ò jo, htè jò b́ògloigè tîkî̆jā nu. 21Manè̄ ni ḿî bija alarūbohtĭ dèbwè akhoacè̆ ji scisăni ne le. Dè d́ŏ nè tè b́è̆lă ńò nu nî phîge, dè d́ŏ no do solabāla ńò nu nè kège,’ cò d́ò lōwa do. 22Cî b́icè d́òge cè, ‘Nè, zôpho akî̆kkè dèbwè, Ji cirra nè kî dè aò d́ŏ ńò lòmò bu ahèhta atherĕ lò. Ni thîhè̆ thè̆ ji ḿî bija alarūbohtĭ dèbwè, dè d́ŏ jè tè b́è̆lă ńò nu jî phîge, dè d́ŏ jo do solabāla ńò nu jè kège nî̄! 23Ne de le b́è̆lă ma jô hô̆mubwe d́ŏ hô̆gòlò bu cab́ô̆htè ji gī nib́èbò̄ hô̆ kî apho papa nu ńò nè?’ cò d́ògè lōwa do. 24Kîd́ò̆ cò d́ògè bija asò̆hto ò d́ŏnu tòcò, ‘Phîthĭwī cè htè̆b́e kî ibò̄ aè̆ ò htŏ ab́esci dèbwè nu,’ cò d́ò lōwa tòcò do. 25Barasă cè tòcò d́òscĭge cè, ‘B́ĭcè, zè htè̆b́e ò htŏ ab́esci tè b́è ńò ā?’ cè d́è̆ge lōwa do. 26‘Jò d́ò̆sa thĭ, htè aè̆ ò dèbwè nu, kèb́è i d́okhlŏkò̆, barasă aè̆ tò ò ńò dèbwè nu, aòni cè tîkî lò hnò̆nu, kè̄ b́è phîkè̆ thĭwīkò̆ cè. 27Ḿî je d́ĕd́òròkhè ada thaèni jè acab́ô̆ saphra aŭi zo kho ńò tòcò nu, lei cè b́ĕjo kî mèthĭ cè tòcò d́ŏ jò hlò̆mò̄ nu!’ cò d́ò do.”

Dèlenī Jerŭsalèm u bu Dèdòdèthe Aklè̆

(Mattĕo 21.1-11; Mărko 11.1-11; Zowănnī 12.12-19)

28B́ĕ Cò d́ò hwă dè ajo tòcò nu, Ze legè ahlò̆mò̄, htagè d́ŏ Jerŭsalèm u nu. 29B́ĕ Zo dola b́ôhtî Bèthphage kî Bèthănia aò khòlò̆ htè bija jo ami Òlĭvo dèmè̆ nu, Za hna le ŭsu Zo bōhmubicè gībwè, 30kî zè hmèlagè lōwa, “Le danāṕibò̄ ahlò̆mò̄ d́ŏ d́ŏbu nu. B́ĕ thĭ lenī d́ŏbu nu, thĭ gā tcahtîb́èkò̆ thîrîd́ŏ òcŏwè̄glo htè bija tò d́òb́è dakhă hnî̆ńò tod́ŏ. B́ăplèkè̆ kî cwib́agei b́ĕjo. 31Bija kè d́è̆ thĭ dèbwèbwè, ‘Thĭ b́ăplè ma dèphodèwe nè?’ d́ō, d́ògebò̄ cè tòcò, ‘Alobagè Sara anikhĭ,’ d́ò cè do.”

32Anu gībwè legè acab́ô̆ Zè dèhmèla ò nu kî cè tòcò tcahtîgè dè acab́ô̆ Jezŭ d́ògè nu. 33B́ĕ cè tòcò b́ăplèkè̆ thîrîd́ŏ akhî nu, ab́icè d́è̆ cè tòcò, “Thĭ b́ăplèmă thîrîd́ŏ gōnu nè?”

34Cè tòcò d́ògè lōwa htè alobagè za sara anikhĭ nu. 35Mèhwă d́ō, Zi cwi leigè thîrîd́ŏpho d́ŏ Jezŭ ò nu, kî d́è̆lă hwă zi scid́ŏ akhlŏ tòcò lōwa akhlŏkho d́ō, zè mèzogè Jezŭ htad́ò akho. 36B́ĕ Jezŭ led́òi thîrîd́ŏ klèlò akhî nu, bija d́è̆lă ascid́ŏkhlŏ tòcò d́ŏ klèlò nu.

37B́ĕ Zo dob́a b́ôhtî Jerŭsalèm, Òlĭvo khòlò̆ adebela alle nu, bōhmubicè aboahò lŏcăcè tòcò thalōthalai, cè tòcò hè kèwo htăhtai B́ĭcè d́ŏ za tcahtîb́ègè dèd́è̆lî̄hta acòklî lŏcăcè tòcò acè̆ nu. 38Cè tòcò kèwohta kî d́ò, “Ab́èhôwî ḿî Saphrado ale d́ŏ B́ĭcè ami abu nu. Dèmòdèma d́ŏ Mò̄kho kî dèdòdèthe d́ŏ Ahtajî gudu nu.”

39Pharizè̆pho aògè bija aboahò aklè̆ tòcò d́ògè Cè, “Sara, hò̆bò̄ no bōhmubicè dalā nu!”

40Jezŭ d́òge cè, “Cè tòcò kò òzòlò ma d́ō, jò d́ò thĭ, Lo tòcò kè kèwohta dò̆ aè̆ lò,” Cò d́òscĭgegè lōwa tòcò do.

Jezŭ Hagè Jerŭsalèm Anikhĭ

41B́ĕ Zo dole b́ôhtî kî Za tcahtî Jerŭsalèm u akhî nu, Jezŭ hagè. 42Kî Cò d́ò, “Nî gî̄ thîhè̆ ma khŏdini dècodèkhli anikhĭ aloba ḿî danè̄ d́ō, akè èkò̆ pwedè̄ lò! Barasă dè mèb́igè na gādŭ. 43Dinidèthè̆, nè d́ĕd́òròkhè tòcò gō gòbòb́i nè, kî ze gē we khwè̆b́akò̆ nè! 44Zî gî̄ htîladēkò̆ nè, kî no pho ni li aò nu u thara abu tòcò d́ŏ lākho, lo tò d́ò̆lăb́èbekò̆ ane tod́ŏ kî tod́ŏ akho to d́ŏ ńò. Manè̄, nî dî thîhè̆gè dè dolehtî nè akhî ńò acè̆ lò,” Cò d́ògè lōwa do.

Jezŭ Le d́ŏ Zarādo

(Mattĕo 21.12-17; Mărko 11.15-19; Zowănnī 2.13-22)

45Jezŭ lenī Zarādo abu, kî Zò hmòhtakè̆ bija abwîasè̆ dè tòcò d́ŏ akhlŏ, 46Cò d́ò lōwa tòcò, “Dèhwela ò, ji hi ḿî dèthèb́è̆ ahi, barasă thĭ mèigè cè dehwĕpho abò!” Cò d́ògè lōwa tòcò do.

47Mèhwă Jezŭ thôithò̆igè dè d́ŏ Zarādo abu nu gŏ ani lò. Barasă Phŭgido tòcò, Skrĭbāpho tòcò kî Jŭdapho akhoane tòcò wāhlègè akrò agè̄ mèthĭ Cè nu. 48Barasă zè dè mèkèhta dimĭ ńò, ḿî d́ŏ bija tòcò j́ăwè̄glo Zè dèjî̄b́è alò akhoacè̆ nu.

Currently Selected:

Lŭka 19: GRNT21

Highlight

Copy