Lŭka 15

Thŏ Ahlè̆mè̄

(Mattĕo 18.12-14)

1Adadèhmŭ tòcò kî dèkhòwèpho tòcò le òb́ôhtî Jezŭ kî sòkhĕńegè Ze lē Zè hwè. 2Ḿî Pharizè̆pho kî Skrĭbāpho tòcò mô̄mô̄îî kî d́ògè, “Bija ajo dèbwè òplosò̆jī kî a plo ò̆ plogè dèkhòwèpho tòcò nu!” cè tòcò d́ò lōwa do. 3Kîd́ò̆ Jezŭ d́ò̆sagè cè tòcò dègèlè dèdè̆:

4“D́ŏ thĭ klè̆ nu bija thŏ ò ad́ŏ dègèjè dèbwè, aè̆ gè̄ hlè̆mè̄ ma tod́ŏ d́ō, zè gè̄ mè cadè̄? Zè lè̄lakè̆ hwă alewe lwīthôdiscĭ lwithô tod́ŏ d́ō za da wāhlège ahlè̆mè̄ to d́ŏ htô̆ ca pahtîge nu ńò ā? 5Kîd́ò̆ b́ĕ ca pahtîge hwă nu, ca j́ahta thalōthalai lōwa d́ŏ ce plĕb́akho nu. 6Zo doge hi tapla zo jo hwă zò khò̆ zè khè, cò thò ze d́e tòcò cò d́ò lōwa, ‘Thaganāi kôbò̄ ja kă, manè̄ d́o ja pahtîge htŏ jo thŏ ahlè̆mè̄ to d́ŏ nu,’ cò d́ò lōwa tòcò do. 7Jò d́ò̆sa thĭ, gōnu akhò̆ d́ŏ Mò̄kho nu dèthalōthalai d́ŏ dèkhòwèpho abajalage atha dèbwè akho nu, adolĭkî bija adî̄ahma ado loba abajalage atha ńò lwīthodiscĭ kî lwīthôdèbwè nu!” Cò d́ògè lōwa do.

Krelî Ahlè̆mè̄

8“Amihmu ò dèbwè, zô hô̆ ò ab́esci, ahlè̆mè̄thĭwī cè tèb́e, d́ō zo dola hmî, zi hwi za wā hi dôkad́è̆ htô̆ ca pahtîge nu tè b́è ńò ā? 9Kî b́ĕ ca pahtîge hwă nu, zo joplo hwă zò khò̆ zò thò tòcò d́ō, ‘Thaganāi kôbò̄ ja kă, manè̄ ja pahtîge htŏ hô̆ ahlè̆mè̄ tèb́e nu!’ cò d́ò do. 10Gōnu akhò̆ jò d́ò̆sa thĭ, dŏ Kib́ĭcè abwèzo tòcò aklè̆ nu dèthalōthalai kò òkò̆ d́ŏ dèkhòwèpho abajalage ane dèbwè akho nu!” Cò d́ògè lōwa tòcò do.

Pho Ahlè̆mè̄

11Kî Jezŭ d́òwe, “Bija dèbwè aphokhŏ ò gībwè. 12Ascipho dèbwè d́ò ca pa, ‘Apa, i jè dèculekhakho jò mò nib́è tòcò nu.’ Kî ze belani tèpwèpho gībwè anikhĭ zè dèculekhakho tòcò nu. 13Tò òjî̄òkja ńò ascipho dèbwè phî̆htani hwă zè dèculekhakho d́ō zô zôlasè̆lakè̆ hwă lŏ cè è̆, ze legè d́ŏ htĭjîgejî kî zè mèkè̆mèôikò̆ cè è̆ d́ŏ dèkî̆kkèmèhlò̆ adèmè abu nu. 14Zî dî̄ zè dè lōklikligè. Kîd́ò̆ htĭge anu tèb́è abu dèwīthô̆gè d́ō ca thaẃilad́ò thaò̆laphlîgè. 15Ze le khazôgè htĭgepho dèbwè d́ō co thodŏ lōwa akō b́oa i zò htò asè d́ŏ ze gebu nu. 16Ca thaè azî̄ nòthò̆ thîb́î̆thè htè bija i htò a nu hnò̆nu, bija ti igè ca a dèbwè̆ ńò. 17Barasă b́ĕ zî thîhè̆lage ze ne akhî nu cò d́ò, ‘D́ŏ ja pa ahi nu dèmèpho anikhĭ dèa ò pulacò̆hta tèpwè. Ḿî jè jo, ja gā lad́òthĭ tèpwè b́ĕjo lò! 18Jè gè̄ wè̄hto kî le d́ŏ apa ò nu kî jò kò d́ò cè, Apa, jè mèkèḿègè Mò̄kho kî d́ŏ ńò hlò̆mò̄ nu. 19Ja ta tani be akè b́è jo no pho be ńò. Lè̄labò̄ jè acab́ô̆ nò zô ab́èhtŭb́èngā dèbwè lò,’ cò d́ògè do. 20Mèhwă zè wè̄hto kî gegè d́ŏ ca pa ò nu. Barasă b́ĕ cò òwe d́ŏ ajî nu ca pa tcahtî cè d́ō, zò khòwèhmòb́èsôgè lōwa, cè cwèlehtî lōwa, phòb́aglo lōwa kî cwîgè lōwa.

21“Kî apho dèbwè d́ògè ca pa, ‘Apa, jè mèkèḿègè Mò̄kho kî d́ŏ ńò hlò̆mò̄ nu. Ja ta tani be akè b́è jo no pho ńò,’ cò d́ò do. 22Barasă ca pa d́ògè azôabwè tòcò, ‘Le phî̆hta plaplă dèkô̆dèthò aègudŭ kî d́okô̆d́othònibò̄ cè kî ibò̄ cè cuthî̆rî̄ kî khatòkò. 23Mèhwă mèthĭ bopho ab́ôtòlòkò tod́ŏ, ka a kò ò̆ hwă gā kha pwè̆ kha la. 24Manè̄ d́ō jo phokhŏ ajo dèbwè thĭgè, ḿî za htaboge htŏ; zè hlè̆mè̄gè, ḿî gā pahtîge htŏ cè!’ cò d́ò do. Mèhwă cè tòcò khapwè̆khalagè.

25“Zo pho ado dèbwè ò khlòlèbu, doge hi, b́ĕ zo doge b́ôhtî akhî nu, zî thîhè̆b́è dèudèbò̄ kî dègolōèŭ alē. 26Zo jo hwă zôpho tòcò aklè̆ dèbwè kî htôtcadè̆cagè dèwîdèkè̆. 27Kî zôpho d́ò cè ‘Nî ṕîkò̆ doge htŏ, kî na pa mèthĭgè bopho ab́ô to d́ŏ, d́ŏ zo dogehtî mòmòwîwî lōwa acè̆ nu,’ cò d́ò̆sagè lōwa do. 28Pho ado dèbwè thèhtè akhoacè̆ ze de genī tèpwè hibu ńò. Mègōnu d́ō ca pa le damògè cè. 29Barasă cò d́òge ca pa, ‘Tcabò̄, ja khazôgè nè ad́eahlè̆ pwĕ gōjo, kî jè dè khè̆b́agè nè dèhtulahmèla taplă ńò. Mè nòthò̆ do hnò̆nu cab́ô̆htè ja gā khapwè̆khalakô jò khò̆ jò thò tòcò anikhĭ nu ni ti igè jè bègôlèpho tod́ŏ ńò. 30Barasă no pho amèlō hwă ahô̆ahtè̆ d́ŏ momarè tòcò akhoacè̆ dèbwè ge d́ō nè mèthĭni tèpwè cè bopho ab́ôatho tod́ŏ dòkhò̆,’ cò d́ògè ca pa do. 31Ḿî ca pa d́ò cè, ‘Apho, ńò òkô thèjô̆ ja kă d́ō jè dèlŏcăcè ḿî nè è̆ lò. 32Barasă ja kha pwè̆ kha la nib́è nî ṕîkò̆. Manè̄ nu zi thĭgè kî za htaboge, zè hlè̆mè̄gè ḿî gā pahtîge cè,’ cò d́ò lōwa do.”

Currently Selected:

Lŭka 15: GRNT21

Highlight

Copy