Lŭka 1

Dèd́ò̆sa Ŭsu Bwèdo Theò̆philo

1Acab́ô̆ bija òè̆bwè̆ d́ò̆sa wa dèwîdèkè̆ aphî̆hta htŏ d́ŏ wo kho wè klè̆ tòcò nu, 2atcahtî thè̆ne hlĕ mocè̆kho nu ògè tòcò d́ō, d́ŏ dèjî̄b́èdòdò aklè̆ nu, zi phîlailani tèpwè wa, 3mègōnu d́ō jè ḿî ḿî jè bè̄lagè ja tha agô̄ lô wāhlè dè awîakè̆ ajo lŏcăcè kî agē hwe d́ò̆sa nè, Bwèdo Theò̆philo, 4cab́ô̆htè ni gī thîhè̆bò̄ dèjî̄b́è htè ab́èila nè tòcò ḿî aladilase lò nu.

Dèd́ò̆sadòlò Zowănnī Baptĭsta Adèòla

5Hlĕ Judĕage Saphra Èrŏdè alethîkhè̆ nu, phŭgi ami ḿî Zakarĭa ògè dèbwè, htè Abbĭa acô klè̆ bu nu, kî zè hmè̆ ami ḿî Èlĭzabèt. Zè hmè̆ Èlĭzabèt nu ḿîgè Aaròn akhwĭ aklè̆ lò. 6D́ŏ Kib́ĭcè ahlò̆mò̄ nu, cè gībwè lōlō ḿî bija adî̄ahma, aòi thoŏthèè Kib́ĭcè adèhmèla kî amèkô pĕhtazòhta akă. 7Barasă zo pho tò ò ńò. Manè̄ d́ō, Èlĭzabèt ḿî asò̆dopho; kî cè tòcò thobwethabwesôgè.

8-9Khŏnujo dèphî̆htagè gōjo; acab́ô̆ anuad́ò̆ ò adĕ nu, dèmè ladēgè Zakarĭa akho htè zè gè̄ mèb́è phŭgi adèmè d́ō, ze lenīb́ègè Zarādo bu kî scwigè dèhnŭẃi d́ŏ B́ĭcè ahlò̆mò̄ nu. 10Kî bija aboahò thèb́è̆htagè d́ŏ akhlŏ b́ĕ dèhluhta dèhnŭẃi akhî nu.

11Kib́ĭcè Amò̄khobwèzo pòhtahtîgè cè, kî sò̆htoògè d́ŏ dèscwigè̄hòi dèhnŭẃi adèthèb́è̆kho adèhtwè dòkhò̆ nu. 12Zakarĭa tcahtî cè d́ō, cè b́èhjŏb́èma kî thaphuthaganāgè. 13Barasă Mò̄khobwèzo d́ògè cè, “Scisăbò̄ ḿè, Zakarĭa, manè̄, Kib́ĭcè sòkhĕńe htŏ nè dèdahta kî nè hmè̆ Èlĭzabèt nu gō phozelaikò̆ zo phokhŏ dèbwè. Kî na gā htăb́èkò̆ zi mi Zowănnī. 14Ni gī nib́èkò̆ dèthalōthala, dèthaganāi kî bija òè̆bwè gō thalōthalaikò̆ d́ŏ Zè dè òla acè̆ nu. 15Zî gî̄ ḿîkò̆ Bija Adoamu d́ŏ B́ĭcè ahlò̆mò̄ nu. Cò kò tò ò̆kò̆ thobiscihtĭ ńò kî dèhmupò ńò ńò, kî cò kò òi pĕhtakò̆ Spirito Tcahtĭ b́ĕ cò òwe zo mo aphŭbu lò nu. 16Cè kè thè̆geihŭkò̆ Israè̆lpho òè̆bwè d́ŏ Kib́ĭcè Dèado ò nu. 17Kî ze gē leŭsukò̆ d́ŏ Dèado ahlò̆mò̄ acab́ô̆ Prò̆fèt Elĭjah atha kî adèkhodèă nu, Ca ka d́ab́akò̆ apa tòcò atha d́ŏ apho ò nu, kî ka d́ab́agekò̆ bija htè atu b́ugè bija adî̄ahma tòcò adèhtî̆nigô̄ni ńò nu. Ze gē le lōwa tòcò ahlò̆mò̄ kî pradòlò Kib́ĭcè anikhĭ bija apĕhtazòhta dikhwĭ.”

18Kî Zakarĭa d́ògè Mò̄khobwèzo gōjo, “Jî gî̄ thîhè̆bò̄ dè ajo cadè̄? Manè̄ jî ḿî bija aphŭbwe dèbwè kî jè hmè̆ ḿî athabwegè gè.”

19Mò̄khobwèzo d́òscĭ cè kî cò d́ò lōwa, “Ji ḿî Gabriĕlè̄, htè asò̆hto ò d́ŏ Kib́ĭcè ahlò̆mò̄ dèbwè nu, kî jè b́è thodŏlegè agî̄ jî̄b́èhtî nè kî akò d́ò̆htôlani nè Vanzĕlō jo nu. 20Kî tcabò̄, nî blî gō glo kî ni di jî̄b́è zakò̆ ńò htô̆do muni dini htè dè ajo tòcò gî̄ phî̆hta hwă nu, d́ŏ nu tu b́u jè dèjî̄b́è htè ake pĕhtazòhtab́è d́ŏ akhîagla bu tòcò ńò akhoacè̆ nu.”

21Bija tòcò òsô̆wô̄ Zakarĭa kî htèniwĭniwagè d́ŏ cò ò thôklôthebĕ ma d́ŏ Zarādo dèthèb́è̆kho gōnu nè acè̆ nu. 22B́ĕ zè hèhta tapla nu, zî dî jî̄b́èhtî zagè lōwa tòcò ńò. Kî cè tòcò thîhè̆gè ca tcahtî htŏ dèd́è̆lî̄ cè d́ŏ Zarādo bu nu. Zô jô̄ cu jô̄ kha hwă lò d́ō cò ògè ablîglo gōnu be lò.

23Zakarĭa adèphîdèmè d́ŏ Zarādo bu hwă d́ō, ze gegè d́ŏ zi hi nu. 24Munimuthè̆ tòcò jo phlòtôlô hwă zè hmè̆ Èlĭzabèt muthèd́ŏ kî òhuzòlògè d́ŏ hibu nu jè̄hlè̆ adābu. 25Cò d́ò, “Kib́ĭcè thaè phîkè̆ bija adèdòbijīla d́ŏ jo kho nu d́ō, Zè mèni htŏ jè dè ajo d́ŏ munimuthè̆ tòcò abu nu.”

Dèd́ò̆sadòlò Jezŭ Adèòla

26Ò hwă ahlè̆thăthô d́ō, Mò̄khobwèzo Gabriĕlè̄ nu, Kib́ĭcè thodŏlegè cè d́ŏ Galilĕage, Nazarè̆th U, 27d́ŏ Aphôthèmo htè ab́èd́è̆nigè agî̄ phîcu amikhŏ ami ḿî Zŏzè dèbwè ò nu. Zî ḿî Dăvid akhwĭathèlè̆ kî aphôthè ami ḿî Marĭa. 28B́ĕ Mò̄khobwèzo dohtî cè nu, cò d́ò, “B́èmò, aòpĕhta kî dèwîdèmò dèbwè, Kib́ĭcè òkô na kă. Amihmu aklè̆ ab́è dèhôwî ḿî nè.”

29B́ĕ zi thîhè̆b́è lōwa adèjî̄b́è nu, zè htèniwĭniwagè, kî gomocahlègè dèhnŭsè ajo dèdè̆ ḿîgè danè̄ nu. 30Kî Mò̄khobwèzo d́ògè cè, “Scisă ḿè, Marĭa. Manè̄ ni nib́ègè Kib́ĭcè adèwîdèmò. 31Tcabò̄, nu gū muthèd́ŏhta ikò̆ d́ŏ nu phŭbu kî phozelaikò̆ no phokhŏ dèbwè kî na gā htăb́èkò̆ Zi mi Jezŭ. 32Zo gō do gū mukò̆, kî Cè kè b́èjokò̆ Ahtajîgudŭ Aphokhŏ kî Dèado B́ĭcè ki ilakò̆ Cè Ca Pa Dăvid ana, 33kî Zi gî̄ ḿîkò̆ Jăkòb akhwĭ Asaphra thèjô̆ lahtŭlablo kî Zi htĭ Ze ge gū du kŭdu zakò̆ ńò.”

34Kîd́ò̆ Marĭa d́òge Mò̄khobwèzo, “Jî dî thîhè̆gè amikhŏ ńò d́ō, dè ajo gî̄ phî̆hta za cadè̄?”

35Kî Mò̄khobwèzo d́òscĭ cè kî d́ò, “Spirito Tcahtĭ gē lelakò̆ no kho kî Ahtajîgudŭ acô̆thèlè̆ gā lagāb́ikò̆ nè; kî Atcahtĭ akò òlab́è dèbwè kè b́èjokò̆ Kib́ĭcè Apho. 36Kî tcabò̄, ni khwĭ ńò khò̆ htè Èlĭzabèt nu, mubwe nòthò̆gè hnò̆nu apho kò̄ òla dèbwè, cè htè bija d́ò ḿî mob́î dèbwè nu muthèd́ŏ b́ahtŏ ahlè̆thăthô htŏ. 37Manè̄, Kib́ĭcè anikhĭ nu, dè di phî̆hta za ńò tò ògè dimĭ ńò.”

38Mègōnu, Marĭa d́ò, “Jè ḿî Kib́ĭcè azômo. Dè gî̄ phî̆htani d́ò̆è jè acab́ô̆ ńò d́ògè nu.” Kîd́ò̆ Mò̄khobwèzo hèhtabāḿĭ tèpwègè d́ŏ cò ò nu.

Marĭa Lehtî Èlĭzabèt

39Anu Hwă d́ō, Marĭa wè̄hto kî le plaplăgè d́ŏ Jŭda u tu u htè aò d́ŏ khò̆mukhòlò̆ lò nu. 40Ze lenīgè Zakarĭa ahibu kî hnŭsègè Èlĭzabèt. 41B́ĕ Èlĭzabèt thîhè̆b́è Marĭa adèhnŭsè alē nu, abĭsèpho ò d́ŏ zu phŭbu bè̄htagè akă, kî Èlĭzabèt ò pĕhtakî Spirito Tcahtĭ lò. 42Cò d́òhta sôtèklè ze lē kî d́ògè, “Amihmu aklè̆ nu, ab́è dèhôwî ḿî nè, kîd́ò̆ ab́è dèhôwî ḿî Abĭsèpho htè nu muthèd́ŏhtai dèbwè nu! 43Ja tanid́ò̆ dè adoamu phî̆htani jè, htè jî B́ĭcè Amo gē lehtî jè cadè̄? 44Manè̄ d́ō, tcabò̄, b́ĕ nè dèhnŭsè alē thènī ji nigubu lò, abĭsèpho ò d́ŏ ju phŭbu bēhta tèpwè akă d́ŏ dèthalōthalai abu nu. 45Kîd́ò̆ ab́èhôwî ḿî cè htè ab́u htŏ dèbwè nu, manè̄ d́ō Kib́ĭcè gè̄ mè pĕhtazòhtakò̆ dè htè Co ŏlăphlala lōwa tòcò nu.”

Marĭa Adèhtăhtai Adèthăbô̄

46Kî Marĭa d́ògè;

“Ja tha dèmè̆ bè̄dobè̄mu jî B́ĭcè,

47kî thalōthalaigè amèhlô̆htage jè Kib́ĭcè akhoacè̆;

48manè̄ Ca tcala hmòb́ègè Zô zômo adèphî̆dèjā;

manè̄, khŏnujo phlò̆ ahlò̆mò̄, bija dôzô hwă dôzô gō jokò̆ jè ab́èhôwî.

49Manè̄ kò̄ d́òdo dō, Amèzadè lŏcăcè dèbwè mènigè ji nikhĭ dè adoamu,

kîd́ò̆ Zi mi ḿî Atcahtĭ.

50Zè dèkhòwèhmòb́è gā lab́èkò̆ bija ascisăni Ze le tòcò akho,

dôzô hwă dôzô.

51Cè d́è̆lî̄hta htŏ Zè dècô̆dèthèlè̆ d́ŏ Ze wehta Zu cukhò abu nu,

Zè mèphrulaphrî̆hta htŏ bija abè̄htahtô̆ ane d́ŏ Zè dèlîḿakakwè̆ abu tòcò nu.

52Zî htîladē htŏ bija akhob́ăădo tòcò d́ŏ za na abu,

kî Zè bè̄htajîkò̆ abè̄b́ôla ane tòcò nu.

53Co b́oakogè athaẃithaò̆ tòcò dèẃidèscĭ,

kî hnage hlòthô̆gè aniò̆jòa tòcò nu.

54Ci ila htŏ dèmèzo d́ŏ Israè̆l Zô zôpho nu,

Zo gomohtanigè Zè dèkhòwèhmòb́è,

55Zî jî̄b́èhtîgè wa pa tòcò,

htè Abraham kî zo pho zi li tòcò thèjô̆ lahtŭlablo.”

56Kî Marĭa òkô hwă ca kă thŏhlè̆ adābu d́ō, ze gegè d́ŏ zi hi za phă nu.

Zowănnī Baptĭsta Adèòla

57Èlĭzabèt anikhĭ akhîb́èglab́ègè d́ō, zo phozelaigè zo phokhŏ dèbwè. 58Bija aòb́ôhtîb́ôwa cè kî zi khwĭ zò khò̆ tòcò thîhè̆b́è Kib́ĭcè adèkhòwèhmòb́è dohta d́ŏ Zò lò nu d́ō, thaganāikôgè ca kă.

59B́ĕ zo pho òla hwă athè̆ lwīthô nu, cè tòcò legè d́ŏ dèhô̆rîkî̆ abĭsèpho apwè̆bu nu, kî cò kòmò̆ htă lōwa ami Zakarĭa acab́ô̆ ca pa ami nu. 60Barasă zo mo d́òscĭge cè tòcò, “Tè b́è gōnu ńò, gā htăb́è zi mi Zowănnī.”

61Ḿî cè tòcò d́ò lōwa, “D́ŏ ni khwĭ nè thèlè̆ aklè̆ ami b́èhtă gōnu tò ò mè dèbwè̆ ńò.” 62Cè tòcò d́è̆lî̄ cu d́è̆lî̄ kha hwă d́è̆gè ca pa htè ca thaè htăgè abĭsèpho ami danè̄ nu.

63Za da hwă bija lob́e d́ō, ze hwegè gōjo, “Zi mi ḿî Zowănnī.” Cè tòcò htèdômô̄dahmă lōgè. 64B́ĕnu lò zò lòmò tab́ă kî zî blî b́ăplè d́ō, zî jî̄b́è zagè, kî htăhtaigè Kib́ĭcè. 65Akhwĭakhò̆ lŏcăcè scisăgè, kî bija hè d́òigè dèwîdèkè̆ ajo d́ŏ Judĕage kî khò̆mukhòlò̆ tòcò akho nu. 66Kî gajă bija athîhè̆b́è dè ajo tòcò òigè d́ŏ atha bu kî cò d́ò, “Abĭsèpho ajo dèbwè gî̄ phî̆htagè bija danè̄?” Manè̄ B́ĭcè acô̆thèlè̆ òkôgè ca kă.

Zakarĭa Adèd́òdòlò

67Ca pa Zakarĭa nu ò pĕhtakî Spirito Tcahtĭ, kî d́òdòlògè dè, cò d́ò;

68“Israè̆l Ab́ĭcè Dèado kè̄ b́è d́ò̆è dèhôwî,

manè̄ kòd́òdo dō, Ze lehtîgè Za bija kî mènigè lōwa tòcò dèhlô̆htage.

69Zè mènigè wa dèhlô̆htage akhob́ăădo

d́ŏ Zô zôpho Dăvid akhwĭathèlè̆ abu nu.

70Co ŏlăphlala htŏ Prò̆fèt Atcahtĭ hlemo tòcò alòmò bu,

71dèhlô̆hta d́ĕd́òròkhè tòcò acukhòbu,

kî gajă bija adèwè̄dèsè̆ wa ńò tòcò acô̆thèlè̆ abu nu.

72Cè kè̄ d́è̆lî̄ wi phĭ wu phŭ tòcò Zè dèkhòwèhmòb́è

d́ŏ dègomohtani dèŏlăphlala tcahtĭ tòcò nu,

73-74Dèhôd́ă htè Zô hôd́ănigè wa pa Abraham

htè Zè gè̄ mèhlô̆htagekò̆ wa d́ŏ d́ĕd́òròkhè tòcò acukhòbu nu akhoacè̆,

wa gā khazôkò̆ cè d́ŏ dè di scisăthabob́è ńò abu,

75d́ŏ dèwîdètcă kî dèdî̄dèhma abu

d́ŏ wu munimuthè̆ ò atherĕ nu.

76Nè, abĭsèpho nu, nè kè b́èjokò̆ Ahtajîgudŭ Aprò̆fèt,

manè̄ ne gē lekò̆ d́ŏ Dèado ahlò̆mò̄

cab́ô̆htè na gā pradòlò cè klè nu.

77Ni ki ikò̆ ji bijakhwĭpho tòcò dèhlô̆htage adèthîhè̆

d́ŏ dèb́ahlô̆ dèkhòwè abu nu.

78D́ŏ Kib́ĭcè adèkhòwèhmòb́è adèb́èlò̄ akhoacè̆,

aò d́ŏ lumuhta dèbwè lehtîgè wa,

79zî hlî̆lab́ègè bija aò d́ŏ dèkhiklè̆ kî dèthĭ adèolab́è tòcò akho,

agē leihŭ cè tòcò d́ŏ dècodèkhli aklèbu nu.”

80Abĭsèpho dohtagè phehî kî thotha, kî cò ògè d́ŏ lothĭḿizekho htô̆ Zè d́è̆lî̄ Ze ne d́ŏ Israè̆lpho tòcò ahlò̆mò̄ nu.

Currently Selected:

Lŭka 1: GRNT21

Highlight

Copy

Want to have your highlights saved across all your devices? Sign up or sign in

Learn More About Geba Roman New Testament

Popular Bible Verses from
Lŭka 1

Videos for Lŭka 1

Luke 1:1-25

Lumo Project

Luke: The Book of Acts

Eyewitness Bible Series

Theophilus & Luke: The Book of Luke

Eyewitness Bible Series

Mary: The Book of Luke

Eyewitness Bible Series

Lŭka 1

Popular Bible Verses from
Lŭka 1

Videos for Lŭka 1

Luke 1:1-25

Luke: The Book of Acts

Theophilus & Luke: The Book of Luke

Mary: The Book of Luke

Bible:

Karen, Geba

Version: Geba Roman New Testament - GRNT21

Lŭka 1

Lŭka 1

Popular Bible Verses from Lŭka 1

Videos for Lŭka 1

Luke 1:1-25

Luke: The Book of Acts

Theophilus & Luke: The Book of Luke

Mary: The Book of Luke

Bible:

Karen, Geba

Version: Geba Roman New Testament - GRNT21

Lŭka 1

Popular Bible Verses from
Lŭka 1