Zowănnī 19

1Mègōnu d́o, Pilăto hna bija mūhta Jezŭ. 2Klĭpho tòcò păthegwĕ hwă dèscu acab́ô̆ khocò̆ d́ō za phlalagè lōwa akokho. Cò thònigè lōwa scid́ŏ alîrè tèb́è. 3Bija le Zò hlò̆mò̄ kî d́è Zè nèhtî kî sòlŭsò̆jè̄gè Cè, “B́èmò, Jŭdapho Asaphra!” cò d́ògè lōwa do.

4Pilăto hèhta akhlŏ tapla be kî cò d́ògè bija tòcò, “Tcabò̄, jè kè d́è̆lî̄kò̆ thĭ cè htè ja da pahtî dèkèḿè amò b́è cirra òzòlò dimĭ ńò dèbwè nu.” 5B́ĕnu Jezŭ hèhta akhlŏ, dèscu athagwă ò d́ŏ Co kokho, Zi scid́ŏ ḿî alîrè. Pilăto d́ògè bija tòcò, “Tcabò̄, bija ajo dèbwè jo!”

6B́ĕ Phŭgido tòcò kî bija atcadôi Zarādo tòcò tcahtî Cè nu, cè kèwohtasô, “Htalaglo thĭ Cè! Htalaglo thĭ Cè!”

Pilăto d́ò cè tòcò, “Phî Cè kî htalaglo thĭ dò̆ d́ò̆è Cè, ḿî jè nu ja da pahtî dèkèḿè d́ŏ Zò lò nu dimĭ ńò.”

7Bija aboahò d́òscĭge cè, “Wè dèhmèla ò kî ajo acè̆ Zi gī thĭ b́è, manè̄ kò̄ d́òdo dō, Cò d́òlagè Ze ne Kib́ĭcè Apho nu.”

8Pilăto thîhè̆ dè ajo d́ō, zi scisăsôgè. 9Ze genī ge d́ŏ za nabu kî cè d́è̆gè Jezŭ, “Ńò ò d́òlè̄ Ne le?”

Barasă Jezŭ tò d́òscĭge cè dôhmô̆ ńò. 10Pilăto d́ò Cè, “Ńò tò d́òscĭ jè ńò ā? Nî dî thîhè̆ htè jò òi dècô̆thèlè̆ agā htalaglo Nè Krusulò ḿîwî, agè̄ mèhlô̆hta Nè ḿîwî nu ńò ā?”

11Jezŭ d́òscĭge cè, “Ńò òi dècô̆thèlè̆ jo kho ḿî tèpwè Kib́ĭcè ila nè lò. Ḿî bija htè aila jè nu cukhò bu dèbwè nu, zè dèkhòwè gō dolĭkò̆ ajo.”

12Pilăto thîhè̆b́è dè ajo d́ō, za wāhlègè klèthòò̆ d́ŏ agè̄ mèhlô̆hta Jezŭ anikhĭ lò. Barasă bija aboahò kèwohta, “Nè gè̄ mèhlô̆hta Cè d́ō, nî dî ḿî Caĕsarè athò ńò! Bija dèbwèbwè kò d́òla ane Saphra d́ō, zî ḿî ahtad́ĕd́ò Caĕsarè lò,” cè tòcò d́ògè do.

13B́ĕ Pilăto thîhè̆b́è dè ajo d́ō, za hna hèhtai bija Jezŭ d́ŏ akhlŏ nu, kî za sańălăògè dècirra ale, htè bija jo ami “Lothab́ab́î” kî Hebrè̆upho tòcò jo ami “Gabatha,” dokhlo nu. 14B́ĕnu akhî ḿîgè dèprahnè Păskwa Pwè̆ ani Lumu thaḿò̆ htihtagè nu. Pilăto d́ògè bija aboahò tòcò, “Tcabò̄, thĭ saphra jo nu!”

15B́ĕnu bija aboahò tòcò kèwohtasô, “Mèthĭ Cè! Mèthĭ Cè! Htalaglo Cè Krusu alò!”

Pilăto d́è̆gè cè tòcò, “Thĭ thaèni ja gā htalaglo thĭ Saphra Krusu alò ā?”

Phŭgido tòcò d́òscĭ cè, “Wa Saphra ḿî Caĕsarè lò, alewe tò ò ńò,” cò d́ò lōwa do.

16Mègōnu Pilăto ilanigè Cè d́ŏ Jŭdapho tòcò acukhòbu, cab́ô̆htè za gā htalaglothĭbò̄ lōwa nu.

Bija htalaglo thĭ Jezŭ

(Mattĕo 27.32-44; Mărko 15.21-32; Lŭka 23.26-43)

Alekă Cè tòcò hèigè Jezŭ. 17Jezŭ j́ahta aKrusu kî legè d́ŏ dè ale bija jo ami Dèkokhwi, htè Hebrè̆upho alē “Gò̆lgòtha,” dokhlo nu. 18D́ŏnu bija htalaglothĭgè Cè, ploplo kî bija alewe gībwè, dòkhò̆ dèbwèbwè, kî Jezŭ d́ŏ cè gībwè amēzo nu. 19Pilăto hwelagè cèd́ŭ akè b́è b́è̆wè̄ d́ŏ Co kokho Krusu alò nu, ze hwela “Jezŭ Nazarè̆thpho, Jŭda Asaphra” 20Jŭdapho òèòò phab́ègè cè ajo, manè̄ dō, dè ale htè Jezŭ b́è htalaglo taklaẃa nu tò òjîkî u ńò. Ahwela Hebrè̆upho alē, Latin alē kî Grĭs alē. 21Phŭgido tòcò d́ògè Pilăto, “Ńò dò mò hwe ‘Jŭdapho Asaphra,’ ńò, ‘Ajo dèbwè d́òla ane; Jî ḿî Jŭdapho Asaphra,’ hwebò̄ do,” cè tòcò d́ògè do.

22Pilăto d́òge cè, “Dè htè je hwela hwă nu, a hwă htŏ.”

23B́ĕ klĭpho tòcò htalaglo hwă Jezŭ d́ŏ Krusu alò nu, zî phî lōwa akô̆athò kî ze bēpha lwīpu, zî phî dèbwè tu pupu. Zî phîkô lōwa ascid́ŏdò̄dô abu htè bija b́o adò tò ò ńò thèd́è̆b́è tèb́è nu nu. 24Klĭpho tòcò la d́òhlè lōwa, gō do htohtèlè ńo, ḿî hwĕ mè̆ kî bò̄bwè gī nib́è bwè gî̄ thîhè̆bò̄ anikhĭ nu. Mègōnu akhoacè̆, Cè Tcahtĭ adèjî̄b́è pĕhtagè htè;

“Cè belani lōwa Jè dèkô̆dèthò,

Ze hwĕgè mè̆ Ji scid́ŏ anikhĭ.”

Klĭpho tòcò mè hnèhnègè gōnu.

25Asò̆hto ò Jezŭ aKrusu akăhtî ḿîgè Zo Mo kî Zo mo athè̆buwe mihmu, Kleŏpha ahmè̆ Marĭa kî Marĭa Madalè̆nā nu. 26Jezŭ tcalahtî Zo Mo kî bōhmubicè Cè b́èlò̄ dèbwè sò̆hto òb́ôhtî lōwa d́ō, Cò d́ò Zo Mo, “Amihmu, Ajo ḿî no phokhŏ.”

27Kî Cò d́ògè bōhmubicè dèbwè gōjo, “Ajo ḿî no mo.” Kî b́ĕnu phlò̆ ahlò̆mò̄ bōhmubicè anu dèbwè òigè Cè d́ŏ zi hibu nu.

Jezŭ Adèthĭ

(Mattĕo 27.45-56; Mărko 15.33-41; Lŭka 23.44-49)

28Mèhwă d́ō Jezŭ thîhè̆gè dèlŏcăcè pĕhtazòhtagè akhoacè̆, cab́ô̆htè Cè Tcahtĭ gē pĕhtabò̄ nu, Cò d́òhtagè, “Athaò̆ Jè!”

29B́ĕnu gobo bu bija b́è̆nī pĕhta dèscîhtĭ ò do gobo. Bija trŭnī thôô dokhlo d́ŏ thobiscihtĭ ascî aklè̆ kî tîd́îwè̄ hwă hèsopo aphă hnè̆klò tòb́ò̆ alò, kî tô wè̄ d́ŏ Zò lòmò alò. 30Jezŭ dî̄tca hwă thobiscihtĭ ascî d́ō, Cò d́òhtagè, “Dèhwălō htŏ!”

Mèhwă d́ō, Zi scwila Co ko kî Ca tha hèhtagè.

Bija Sephlò̆ Jezŭ Awōzelè̄

31Anu dini ḿî dèpradòlò ani d́ō, cab́ô̆htè cè tòcò aco tò òdab́èbò̄ Krusu alò b́ĕ Munisòd́è̆ ani ńò nu, Jŭdapho tòcò dagè Pilăto akhwè agē dehtè̆dū bija anu tòcò akhakhò kî zè gè̄ hèiphlòḿĭbò̄ lōwa tòcò aco nu, manè̄ Munisòd́è̆ anu dò sòd́è̆ ḿî Pwè̆do d́okhlŏ dò sòd́è̆ acè̆ nu. 32Mègōnu klĭpho tòcò le dehtè̆dūgè bija ab́èhtalaglo plo Cè aŭsu dèbwè kî alekă dèbwè akharòbò̄. 33Ze le tca Jezŭ d́ō za tcahtîgè lōwa thĭ hwăgè. Mègōnu ze de dehtè̆dū be lōwa akharòbò̄ ńò. 34Ḿî klĭpho dèbwè phlŏphlò̆gè Zo wōzelè̄ kî thab́ă taplakhă lò d́ō, Ci thwi kî Zi htĭ cô̆hlôlagè. 35(Dè ajo nu bija atcahtî dèbwè kha hlî̆htaphlò̆htagè thè̆thî. Thè̆thî amò b́u kî zî thîhè̆ cò d́ò dè adî̄ahma lò, kîd́ò̆ za kha thè̆thî cab́ô̆htè thĭ ku b́ubò̄ nu.) 36Manè̄ dè ajo lŏcăcè phî̆htagè, cab́ô̆ Cè Tcahtĭ adèjî̄b́è ajo tòcò gē pĕhtabò̄ nu, htè ad́ò, “Zi khwi dè htè̆dūb́è tòb́ò̆ ńò,” nu. 37Kî Cè Tcahtĭ alewe dokhlo d́òwe, “Bija gā tcahtaikò̆ d́ŏ bija phlŏphlò̆gè dèbwè nu.”

Dèb́ŭlă Jezŭ

(Mattĕo 27.57-61; Mărko 15.42-47; Lŭka 23.50-56)

38Alekă Zŏzè, Arimattĕapho htè aḿî Jezŭ abōhmubicè dèbwè dagè Pilăto agî̄ phîge Jezŭ aco. (Zŏzè ḿîgè Jezŭ abōhmubicè ahuazò dèbwè htè ascisăni Jŭdapho akhoane tòcò ale lò.) Pilăto i tèpwè cè akhwè. Mègōnu ze lephîgè lōwa. 39Nikodĕmus, htè hlĕ aŭsu alehtî thă Jezŭ dèbwè nu lekôgè ca kă, ze leigè mĭrrah kî thohnŭẃi ciklè̆ asci gīscĭ jè̄zwè (Pound dègèjè). 40Cè gībwè phî Jezŭ aco kî acab́ô̆ Jŭdapho anuad́ò̆ ò adĕ nu, cò b́ògloi lōwa dèhnŭẃihnŭthòrò̆ kî tîkî̆jā lò. 41B́ĕ bija htalaglo thĭ Cè alle nu, dèludèd́ŏ ò taklaẃa, kî b́ĕ dèludèd́ŏ abu nu, lū abu htè bija tè b́è b́ŭlănī abu dèbwè̆ hnî̆ńò ògè dubu. 42Dèprahnè Pwè̆do amuni b́è Jŭdapho tòcò anikhĭ d́ō, bija b́ŭlăgè Jezŭ b́ĕ Lo abu anu dubu lò.

Currently Selected:

Zowănnī 19: GRNT21

Highlight

Copy