Zowănnī 16

1“Jò d́ò̆sa thĭ dè ajo cab́ô̆htè thĭ gā da bāphlòḿĭbò̄ thĭ dèb́udènè ńò nu. 2Cè tòcò gā hna hèhtakè̆ thĭ d́ŏ Sinagŏgā akhlŏ. Akhî kè̄ b́è d́ŏ bija amèthĭ thĭ dèbwè gō gomo è̆ ḿî zè mè Kib́ĭcè adèthaèni nu. 3Zè gè̄ mèkò̆ dè ajo d́ŏ zî dî thîhè̆ Apa kî Jè ńò akhoacè̆ nu. 4Barasă Jò d́ò̆sa htŏ thĭ dè ajo tòcò nu, cab́ô̆htè b́ĕ dè ajo tòcò gî̄ phî̆hta tapla nu thĭ gō gomohtanikò̆ htè Jò d́ò̆sa hwă htŏ thĭ tòcò nu.

Spirito Tcahtĭ Adèphîdèmè

“Hlĕ mocè̆kho nu Jò tò d́ò̆sa ni thĭ hnî̆ńò, manè̄ Jò òkôwe thĭ kă akhoacè̆ nu. 5Khŏnujo Je gē legè d́ŏ athodŏle Jè dèbwè ò nu, kî thĭ tè d́è̆gè Jè, ‘Ne le d́òlè̄?’ nu dèbwè̆ ńò. 6Jò d́ò̆sa hwă htŏ dè ajo tòcò akhoacè̆, dèothootha ò pĕhta htŏ thĭ thabu. 7Barasă jò d́ò̆sa thĭ dèdî̄dèhma, thĭ nikhĭ akè è d́okhlŏ ḿî Jè gè̄ hèbā thĭ. Jè ge de le ma ńò d́ō, Amèzodè dèbwè gē de lehtî tèpwè thĭ ńò. Ḿî Je gē le ma d́ō, Jo gō thodŏle tèpwè Cè d́ŏ thĭ ò nu. 8Ze gē le hwă tapla nu, Cè kè mèhlî̆htakò̆ Lākhopho tòcò adètcahtî ab́èkja dèkhòwè awîakè̆, dèdî̄dèhma awîakè̆ kî Kib́ĭcè adècirra awîakè̆. 9Cè tòcò mè dèkhòwè kî kèḿègè d́ŏ cu tu b́u Jè ńò acè̆ nu, 10cè tòcò kèḿègè ab́èkja dèdî̄dèhma, manè̄ Je gē legè d́ŏ Ja Pa aò kî thĭ gā ta tcahtî be Jè ńò, 11kî cè tòcò kèḿègè ab́èkja dècirra, manè̄ d́ō Lākho ajo tèb́è asaphra b́è cirra htŏ nu.

12“Jò mò d́ò̆sa thĭ dè òwe pwĕdimi be, barasă khŏnujo thĭ dò sòkhĕńe kèhta hnî̆ńò. 13Barasă Cè htè dèdî̄dèhma aSpirito Tcahtĭ gē le tapla nu, Cò kò d́ò̆sa lŏkò̆ thĭ Kib́ĭcè adèdî̄dèhma. Manè̄ d́ō, tè b́è Zî gî̄ jî̄b́è dò̆ Zu phlŭ Ze there abu ńò, ḿî d́ŏ dè htè Zî thîhè̆b́è kî htè agî̄ phî̆htab́è tòcò nu. 14Zè gè̄ bè̄dòbè̄thekò̆ Jè, manè̄ d́ō, dèjî̄b́è d́ŏ Zî phîni Jò ò tòcò nu Cò kò d́ò̆sakò̆ thĭ. 15Dè aò d́ŏ Ja Pa aò tòcò nu, ḿî lŏ Jè è̆ lò. Mègōnu akhoacè̆, Jò d́òkò̆ gajă Zi nib́è tòcò ḿî Jè è̆, kî Cè kè d́èlî̄htakò̆ nu.

Dèthaganāi kî Dèothootha

16“Akò ò tod́opho be thĭ gā ta tcahtîb́è be Jè ńò, kî tod́opho be thĭ gā tcahtîkò̆ Jè,” Cò d́ò lōwa tòcò do.

17Mègōnu d́ō, bōhmubicè tòcò d́è̆hlègè lōwa, “Cò d́ò̆sa wa dè ajo dèdè̆ ḿîgè danè̄? Tod́opho be thĭ gā ta tcahtîb́è be Jè ńò, kî tod́opho be thĭ gā tcahtîkò̆ Jè, kî Je gē legè d́ŏ Ja Pa aò dèdè̆ nu?” 18Cè tòcò d́òwe, “Akò ò tod́opho be ḿîgè danè̄? Cò d́ò danè̄ nu wî dî thîhè̆ mè ńò!” cò d́òhlè lōwa do.

19Jezŭ thîhè̆ htè cè tòcò thaè d́è̆ Cè d́ō, Cò d́ò lōwa tòcò, “D́ŏ Jò d́ò, akò ò tod́opho be thĭ gā da tcahtîb́è be Jè ńò, kî tod́opho be thĭ gā tcahtîkò̆ Jè, d́ō thĭ htôtcad́è̆tca hlègè lōwa ā? 20Jò d́ò̆sa thĭ adî̄ahma, thĭ gō jo gā hab́èkò̆, ḿî Lākhopho gā thalōthalaikò̆, kî thĭko othoothab́è, ḿî thĭ dèothootha ka b́ăkhlèhtakò̆ dèthalōthalai. 21Amihmu apho kò òb́ôhtî dèbwè nu othoothab́è, manè̄, cè è̆ akhîb́ègè za gā khab́è dèssègnè̆bòdò acè̆ nu. Barasă zo pho òla hwă tapla d́ō, zo do gomohtani be zè dèssègnè̆ ńò, manè̄, ca thaganāi d́ŏ bija òlagè Lākho athè̆ dèbwè akhoacè̆ nu. 22Thĭ nu, thĭ othoothab́è khŏnujo, barasă Ja gā tcahtî thĭ tapla be, kî thĭ tha dèmè̆ ka thalōthalaikò̆ kî bija gî̄ dî phîkè̆ thĭwīkò̆ thĭ dèbwè̆ ńò.

23“D́ŏ muni dini nu, thĭ gè̄ tè d́è̆kò̆ Jè dè dimĭ ńò. Jò d́ò̆sa thĭ adî̄ahma, thĭ gā da ma Apa dè dimimi d́ŏ Ji mi abu nu d́ō, Ci ki i tèpwè thĭ. 24Htô̆ khŏnujo, thĭ da dagè dè d́ŏ Ji mi abu dimĭ hnî̆ńò. Dabò̄, thĭ gī nib́èkò̆ kî thĭ dèthaganāi gē pĕhtakò̆.

Dènodèbè Lākho

25“Jò d́ò̆sa htŏ thĭ dè ajo d́ŏ dègèlè abu nu. Akhî b́ôhtî htŏ htè Jî gî̄ dî jî̄b́èhtî be thĭ d́ŏ dègèlè abu ńò, Jò kò d́ò̆sa thĭ Ja Pa awîakè̆ d́ŏ dèhlî̆dèṕla aklè̆ nu. 26B́ĕnu dini nu, thĭ gā dakò̆ dè d́ŏ Ji mi abu, kî Jò tò d́ò agā da nikhĭ thĭ d́ŏ Apa ò nu ńò. 27Manè̄, Apa b́èlò̄ thĭ akhoacè̆ nu. Apa b́èlò̄ thĭ ḿî thĭ b́èlò̄ Jè kî thĭ b́u htè Jò ò d́ŏ Apa aò, kî lagè d́ŏ Lākho akhoacè̆ nu. 28Jò ò d́ŏ Apa aò kî lagè d́ŏ Lākho ajo tèb́è abu, kî tapla be Jè gè̄ hèhta hwă Lākho kî legè d́ŏ Apa ò nu.”

29Zo bōhmubicè tòcò d́ò Cè, “Tcabò̄, nî jî̄b́è hlî̆htaphlò̆hta htŏ. Ḿî ńò tò d́òi dègèlè ńò. 30Wî thîhè̆ htŏ tèpwè htè ni thîhè̆ dè gŏmihtĭda, kî ado loba mè bija gô̄ htô kè d́è̆ nè ńò. Dè ajo akhoacè̆ wu b́u htè Nè hèhta d́ŏ Kib́ĭcè ò nu,” cè tòcò d́ògè lōwa do.

31Jezŭ d́òge cè tòcò, “Thĭ b́u htŏ ā? 32Tcabò̄, akhî kè b́èkò̆, kî ab́è htŏ dòkhò̆, htè thĭ gè̄ sè phrulaphrî̆hta, dèbwè dèbwè ge ahiaphă kî lè̄ladēdakò̆ Jè. Barasă Jò tò òladē da tèpwè ńò. Manè̄, Apa òkô Ja kă akhoacè̆ nu. 33Jò d́ò̆sa thĭ dè ajo tòcò nu cab́ô̆htè thĭ gī nib́èbò̄ dècodèkhli d́ŏ thĭ ò Ju bu acè̆ nu. Thĭ gā khab́èkò̆ dèbadèsè̆ d́ŏ Lākho akho jo. Barasă, khŭhè̆bò̄. Jo no Jè b́è htŏ Lākho,” Cò d́ò lōwa tòcò do.

Currently Selected:

Zowănnī 16: GRNT21

Highlight

Copy