Thodŏpho 3

Bwèdadè Akhad́e Hmage

1Dinitèthè̆, b́ĕ lumula thŏnare nu Petru kî Zowănnī hta thèb́è̆gè d́ŏ Zarādo bu nu. 2D́ŏnu bija akhad́e hlĕ aòwe amo aphŭbu nu ògè d́ŏ Zarādo akhaglè̄, htè bija jo ami Khaglè̄mò akăhtî nu. Bija j́ale kî d́ò̆lă cè b́ĕnu gŏ ani cab́ô̆htè za gā dabò̄ bija alenī hèhta Zarādo bu tòcò pĭsa anikhĭ nu. 3Petru kî Zowănnī lenī Zarādo bu d́ō, za dagè lōwa tòcò akī icè pĭsa. 4Cè gībwè lō tca dîgrînî hwă lōwa d́ō, Petru d́ògè cè, “Tcahtabò̄ wa.” 5Za tcahta lōwa tòcò d́ŏ dèsascĭi agī nib́è dè dimimi abu nu. 6Barasă Petru d́ò cè, “Jô hô̆ jè htè̆ tò ò ńò, aòni jè atherĕ jî̄ i tèpwè nè. D́ŏ Nazarè̆thpho Jezŭ Krĭstu ami abu, wè̄hto, khè̆lebò̄,” cò d́ò lōwa do. 7Mèhwă d́ō, cô pôglo lōwa acukhò adèhtwè dòkhò̆ kî cwiwè̄htogè lōwa. Taplakhă lò anu dèbwè akhakhò kî akhabîrî̄ sahmagegè. 8Ze bēhta hwă ca kă, sò̆hto ò, kî hè dîwî̄dewegè. Mèhwă ze bekhobekă, htăhtai Kib́ĭcè kî lenīkôgè cè tòcò akă d́ŏ Zarādo bu. 9Bija aò b́ĕnu tòcò tcahtîgè zè hè kî htăi Kib́ĭcè, 10kî hmăigè cè htè zî ḿî asańălăò hwă d́ŏ Zarādo Akhaglè̄mò akhahtî kî daagè dè dèbwè nu d́ō, cè tòcò htèdômô̄dahmă kî htèniwĭniwagè d́ŏ dèphî̆htagè Zò lò dèdè̆ akhoacè̆ nu.

Petru Adèd́ò̆htô d́ŏ Zarādo bu

11B́ĕ cò cò̆kweglo Petru kî Zowănnī akhî nu, bija tòcò cwèle d́ŏ Sòlòmòn Adadākho nu kî htèdômô̄dahmă lōgè. 12B́ĕ Petru tcahtî dè ajo d́ō, cò d́ògè bija tòcò, “Ŏ Israè̆lpho tòcò, thĭ htèdômô̄dahmă manè̄? Thĭ tca dîgrî̄nî̄ ma wa mè cab́ô̆ wo kho wa ă kî wè dèwîdètcahtĭ akhoacè̆ wè mè bija ajo dèbwè khè̆thîge nu nè? 13Abraham Ab́ĭcè, Izăko Ab́ĭcè, Jăkòb Ab́ĭcè kî thĭ phĭ thĭ phŭ Ab́ĭcè bè̄dòbè̄thegè Zo Pho Jezŭ nu, thĭ lehô̆lă kî lè̄ ladēdagè d́ŏ Pilăto ahlò̆mò̄ nu. Ca thaè b́ăplèkè̆ lōwa dòkhò̆. 14Barasă thĭ bāphlòḿĭgè Atcahtĭ kî Adî̄ahma dèbwè kî dagè Cè kèb́è ilaphlòḿĭ thĭ cukhò bu agè̄ mèthĭ Cè nu, 15mèhwă thĭ mèthĭgè Dèò Ab́ĭcè, ḿî Kib́ĭcè b́awè̄htogegè Cè dèthĭ aklè̆ kî wa thè̆ne khagè thè̆thî. 16Kîd́ò̆ d́ŏ Jezŭ Ami acô̆thèlè̆ abu, bija akhad́e dèbwè jo akhakhò b́è mèhmagegè. Dè htè thĭ tcahtî kî thîhè̆b́è nu ḿî d́ŏ dèb́u Jezŭ Ami akhoacè̆; ilani htŏ cè dèòsôòhma nu thĭ tcahtî lŏ htŏ tèpwè.

17“Thè̆buwe tòcò, khŏnujo jî thîhè̆ htŏ htè thĭ mètŏmutŏsănigè acab́ô̆ akhoane tòcò mè nu. 18Barasă ajo ḿî Kib́ĭcè thè̆ne mèpĕhtagè Zè dè thaèni acab́ô̆ Cò d́òdòlògè Prò̆fèt tòcò alòmò bu, htè Krĭstu gā khab́è dèssègnè̆bòdò nu. 19Mègōnu d́ō bajalage thĭ ne kî d́ab́agebò̄ d́ŏ B́ĭcè aò, cab́ô̆htè thĭ dèkhòwè kè̄ b́è duhtrukè̆bò̄ nu. 20Akhî kè̄ b́èkò̆ htè Spirito Tcahtĭ aò d́ŏ Kib́ĭcè ò gā ladohtî thĭ, kî Zo gō thodŏlekò̆ B́ĭcè Jezŭ htè Mèssĭah ab́èrôhta d́ŏ thĭ nikhĭ nu. 21Cò kò òb́è d́ŏ Mò̄kho htô̆ akhî dole htè dèlŏcăcè kè̄ b́è mèthè̆htage, acab́ô̆ Kib́ĭcè dò dòlògè d́ŏ Prò̆fèt Tcahtĭ tòcò alòmò bu hlemo tòcò nu. 22Manè̄ Mŏzè d́ògè gōjo, ‘Thĭ B́ĭcè Dèado gô rôhtakò̆ Prò̆fèt dèbwè d́ŏ thĭ klè̆ nu acab́ô̆ Zô rôhtagè jè nu. Zî jî̄b́èhtî thĭ atherĕ thĭ gò̄ sòkhĕńeb́è. 23Bija adò sòkhĕńe Prò̆fèt anu dèbwè alē ńò dèbwèbwè nu, kè̄ b́è phîhtakè̆kò̆ d́ŏ B́ĭcè Abija tòcò aklè̆ kî cè kè̄ b́è mèkè̆mèôkò̆.’ 24Gohta b́ĕ Prò̆fèt Samuĕlè̄ le ahlò̆mò̄ Prò̆fèt tòcò d́ò̆sadòlò htŏ munimuthè̆ ajo tòcò nu. 25Thĭ ḿî Prò̆fèt tòcò aphoali htè Kib́ĭcè mènigè Dèaḿăkhai tòcò nu, htè b́ĕ Cò d́ògè Abraham, ‘D́ŏ ni khwĭ nè thèlè̆ abu Lākhopho thèd́è̆gumu kè̄ b́èhôwîkò̆ nu.’ 26Kib́ĭcè lè̄htani ŭsu thĭ Zôpho, Zo thodŏle lōwa agô̄ hôwî thĭ cab́ô̆htè bija gŏ abwè gā bāphlòḿĭbò̄ adèkî̆kkèmèhlò̆ nu,” cò d́ògè lōwa tòcò do.

Currently Selected:

Thodŏpho 3: GRNT21

Highlight

Copy