Zwâŋ 3

Yésus ɓá nɛ Nikoɗɛ̂m

1Í i ɓɛ nɛ nɔ̄l mót ɗín lɛ̄ nāá, Nikoɗɛ̂m. Ā ɓɛ nɔ̄l Ndə́ə́ oyúɗɛn tí ndɔŋ Ófatizyɛ̂ŋ. 2Ɛ ɓúzī tɔ́ tí pum ɓɛ̄ ɗá mí Yésus nyɛ nɛ nɛ̄ nāá: «Láɓi, zī tí gú nāá, í Zɛ̌mb thes ɔ́ tí ɛzī jüe ɓés sukûl. Nɛ dɔ nāá, nɔ̄l mót a a ɓɛ̄ nɛ khul ɛsá mbi mɛ́simbā mák, Zɛ̌mb ta ɓɛ nɛ nɛ̄.» 3Yésus nɛ nɛ̄ nāá: «Mí lɛ̄ɛ̄ ɔ́ tí óceece nāá, mot a a ɓɛ̄ nɛ khul ɛní tí Də́ə́ mí Zɛ̌mb nyɛ ta nyēē ɓyɛ́l mbyɛ̄lā mbá.» 4Nikoɗɛ́m ɛ ɓúzī jí nɛ Yésus nāá: «Mot mú tōmbá ɔ, ɛ nɛ khul ɛsá ná tí nāá, ɛ ɓákā ɓyɛ̂l? Í lyākɛ̄l nāá, á á ɓākā ní tí mo náŋg ɛ ɓákā ɓyɛ́l ɛ̂?» 5Yésus nɛ nɛ̄ nāá: «Mí lɛ̄ɛ̄ ɔ́ tí óceece nāá, mot a a ɓɛ̄ nɛ khul ɛní tí Də́ə́ mí Zɛɛ̄mb nyɛ ta ɓā ɓyɛ́l tí mɛɗyūū nɛ Áchāāchǎnj Sisîmb. 6Nɔ̄l ɓyɛ̄l ɓɛ pák ípúnd ɔ́kɛ́, ɛ mot ipûnd, nɔ̄l ɓyɛ̄l tí Sisímb mí Zɛɛ̄mb ɔ́kɛ́, ɛ Sisîmb. 7Wa a sɛ́mɛ̌ tɔɔ̄p mí lɛ̄ɛ̄ ɔ́ nāá: “Í je nāá, ɓī ɓáka ɓyɛ́l ê.” 8Puūp í pupɛ̌l pyaāt í kám e, u gwōk kukuu wɛ̄. Sá gwát wā ā gū pyaāt í ɗüís ékɛ́, nɛ pyaāt í tɔ́ ê. Í thɔ́k jwok gwát nɛ gwát ɗakɛ ɓɛ̄l ō ɓyɛ̄l tí Áchāāchǎnj Sisímb ɓâk.»

9Ɗyaāŋ ték ɛ́, Nikoɗɛ́m ɛ ɓúzī jí nɛ nɛ̄ nāá: «Sá ték í nɛ khul ɛsɛ́ɛ́ nā?» 10Yésus ɛ ɓúzī ɓɛ́s nɛ nɛ̄ nāá: «Wɔ mot ɗí ŋgūmōt yêkle tí kanda Ízaɛ́l ɔ, wā ā gū ísá ī ték ɛ̂? 11Tí óceece, mí kū lɛ́ɛ́ ɔ́ nāá, zí lüii wák isá í zí ɗi tí gū ɓîk, zī ɓákā lɛ́ɛ́ ísá ī zā ɓɛɛ ɓîk. Sá gwát ɓyā ā kám lɛ̄ɛ̄ā wēs têk. 12Ɓī nyéé ɗǐ ta kam óceece mí lɛ̄ɛ̄ ɓén ī jüāk ísá ɓɛ̄ íɓwaās e, ɓyá á ɓū kɛ̄ kam yīl mí wā lɛ́ɛ́ ɓén ī ɗúm nɛ ɓīl ijwóó ɓík ɛ? 13Nɛ dɔ nāá, nɔ̄l mót a a ɓá tɔ́ ɓɛ̌ jwóó phúla myam Mwán mí mot, nɔ̄l ā ɗüis ɓɛ̌ jwóó ɔ̂. 14Ɗɛ Moís ā cel vekle nwɔ́ŋ tí lē ɓɛ̌ sɔ̄sā sī ékɛ́, í je nāá, Mwán mí mot ɛ ɓénaa thɔ́k ɗyaāŋ. 15Ī zyē nāá, mot nyɛ̂ɛs wā ɓûkla ɛ́ ɔ́kɛ́, á á ɓyě cyuk mɛ́lú myɛ̂ɛs. 16Ɗyaāŋ ték ɛ́, Zɛɛ̄mb ɛ́ ɛ́ ɓū thaŋ ɛ́kpɛl ɓót ɓɛ̄ íɓwaās tí ɛjüe ɓɛ́ ɛcúk ɛ̄ Mwán lɛ̄ tí nāá, mot nyɛ̂ɛs wā ɓûkla ɛ́ ɔ́kɛ́, a á ɗîmb, sá gwát, á á ɓyě cyuk mɛ́lú myɛ̂ɛs. 17Nɛ dɔ nāá, Zɛɛ̄mb a a thes Mwán wɛ̄ tí sī nyík tí ɛzī dɔ́s ɓôt. Sá gwát ɛ́, ɛ thes ɛ́ tí ɛzī cis ɓɛ̂. 18Nɔ̄l ɓūklā Mwán mí Zɛɛ̄mb ɔ́kɛ́, Zɛɛ̄mb a á dɔ́s ɛ̂. Sá gwát nɔ̄l ɗí ta ɓûkla ɛ̄ ɔ́kɛ́, Zɛɛ̄mb ɛ́ ɛ́ síl ɛ́cyúkɛl dɔ́s yɛ̄ tɔɔ̄p nāá, a a ɓûkla ɛ́cyúk ɛ̄ Mwán wɛ̄. 19Zɛɛ̄mb ɛ́ cyūkɛ̄l dɔ́s pāká ɓá nɛ ɓot ɗêk: Ɛɓyakɔɔ lí í zye tí iɓwaās, sá gwát ɓot ɓɛ̄ kpɛ́l khɔmwaāl nɛ dɔ nāá, misāwā myɔ̄ɔ̄ myā ā nwɔ̂ŋ. 20Tí ɛkū ɓɛɛ ɛ́, mot sā ɛ́ɓyóó ɔ́kɛ́, ā ā kám ɛ́ɓyakɔɔ. Thɔ́k ɛ́, ā ā kám ɛ́zyě ɓɛ ɛ́ɓyakɔɔ tí ɛkámb nāá, misāwā myɛ̄ myá a ɓwɔ̂ɔ nyên. 21Sá gwát, ɓɛ̄l ō sā ɗɛ Zɛ́mb kpɛ́l ɓák ɛ́, ɓɛ̄ tí ɛtɔ́ ɓɛ ɛ́ɓyakɔɔ. Tí nāá, ɓot ɓá á ɓɛɛ mísāwā myɔ̄ɔ̄, ɓɛ̄ ɓɛ́ɛ́ ɗakɛ ɓɛ́ ɗūɛ̄l Zɛ́mb ê.»

Zwáŋ mɛɗuu-ɓot ɓá nɛ Yésus

22Phúla ték ɛ́, Yésus ɓá nɛ ophōn ɓɛ̄ ɓɛ ɓúzī tɔ́ ɓɛ̌ cǐl ɓwǎs Yuɗê. Ɓá nɛ nɔ̄ɔ̄ ɓɛ̄ ɗí pyaāŋ, ɛ ɗīɗúú ɓôt. 23Tí tɛ́m gwát nɛ gwát ték ɛ́, Zwáŋ ā ɓɛ thɔ́k ɓɛ wɛ̄ pák tí ɛɗuu ɓót ɓɛ̌ Enɔ́ŋ ɗí ndumɛ nɛ khandǎ Salím ê. Nɛ dɔ nāá, pyaāt ték yā ɓɛ nɛ thūnd mɛ́ɗyūū. Ɓot ɛ́ɓuuɓu ɓɛ̄ ɓú zizyě ɓɛ yɛ̄, ɛ ɗīɗúú ɓɛ̂. 24Tí tɛ́m ték ɛ́, Zwáŋ ā ɓɛ ta ɓā tɔ́ mbok.

25Ɓɛ̄l ophōn ō mí Zwáŋ ɓɛ̄ ɓú ɓiɓul nɛ nɔ̄l Yúɗɛn tí sá ɗúm nɛ ɛsáŋ mɛ́chānj tí mɛtum mɛ̄ Óyúɗɛn ê. 26Ɓɛ̄ ɓú kɛ̄ ɓyela Zwâŋ, ɓɔ̂ɔ nɛ nɛ̄ nāá: «Láɓi, mot ɓyā nɛ nɛ̄ ɓyā ɓɛ kák ɓɛ wūl pák Yuuɗɛ́n ɔ̂, nɔ̄l wā lilɛ́ɛ́ ɓot tɔɔ̄p wɛ̄ ɔ́kɛ́, ɛ mú kák tí ɛɗuu ɓôt. Thɔ́k ɛ́, mot nyɛ̂ɛs ɛ tí ɛtɔ́ ɓɛ yɛ̄.» 27Zwáŋ ɛ ɓúzī ɓɛ́s nɛ nɔ̄ɔ̄ nāá: «Mot a a ɓɛ̄ nɛ khul ɛsá ló-sɛ̄ɛ̄ ta ɓɛ nāá, Zɛ̌mb jüē ɛ́ wá. 28Ɓyɔ̂ɔ ɓot oték ɓyā ɓɛ ɓí í gwók ɗɛ mā lɛ́ɛ nāá: “Ma a ɓɛ̄ Kūmāndē Zɛ́mb ā kɛs ɔ̂. Sá gwát, mi mot ā thesaa ɛsɔ́k nɛ nɛ̄ ɔ̂.” 29Mot ɗí nɛ mumá ɔ́kɛ́, í ndôm mumá. Sá gwát, sɔ̄ ndóm mumá nyɛ ɛ náǎŋ ndumɛ nɛ nɛ̄ tí ɛsú lɛ̄ ɛ́gwókɛl sá ɛ́lɛ́ɛ́ ê. Thɔ́k ɛ́, ɛ nɛ myaŋla tí ɛgwók jwōnd ndôm mumá. Ɛ́chāak ɛ́, myaŋla wám ték ú ú lwônd. 30Í je nāá, nyɛ ɛ ɓéna, myam mí sûl.»

Nɔ̄l ɗüís ɓɛ ɛ́kó ɔ̂

31«Nɔ̄l ɗüǐs ɓɛ ɛ́kó ɔ́kɛ́, ɛ kwóó ɓot ɓyɛ̂ɛs. Nɔ̄l ɗí tí iɓwaās ɔ́kɛ́, ɛ mot iɓwaās. Thɔ́k ɛ́, ɛ́ lüii mítɔɔ̄p mɛ̄ íɓwaās. Ɓyela nāá, nɔ̄l ɗüǐs ɓɛ̄ jwóó ɔ́kɛ́, ɛ kwóó ɓot ɓyɛ̂ɛs. 32Ɛ tí ɛlɛ́ɛ́ ɓót isá ā ɓɛɛ nɛ ɛgwók ɓîk. Sá gwát, mot ŋgwát nɛ ŋgwát ā ā kám lɔ́ŋ wɛ̄. 33Mot kám lɔ́ŋ wɛ̄ ɔ́kɛ́, ɛ́ ɛ́ lyákɛl nāá, Zɛɛ̄mb ɛ́ lɛ̄ɛ̄ óceece. 34Tí ɛkū ɓɛɛ ɛ́, nɔ̄l Zɛ́mb ā thes ɔ́kɛ́, ɛ́ lɛ̄ɛ̄ mɛkɛ́l mɛ̄ Zɛ́mb. Nɛ dɔ nāá, Zɛɛ̄mb ɛ́ ɛ́ lwóndɛl ɛ́ nɛ Áchāāchǎnj Sisîmb. 35Sāŋg ɛ tí kpɛl Mwân, í yɛ́ ɗí ɛ́ ɛ́ jüe ɛ́ sá yɛ̂ɛs ê. 36Nɔ̄l ɓūklā Mwán ɔ́kɛ́, ɛ mú nɛ cyuk mɛ́lú myɛ̂ɛsa. Sá gwát, nɔ̄l wā ɗi ta ɓûkla ɔ́kɛ́, a á ɓyě cyuk têk. Thɔ́k ɛ́, ɛɓūk ɛ́ mí Zɛɛ̄mb lī tí ɛsüee ɛ́ tí nôl.»

Currently Selected:

Zwâŋ 3: MPU

Highlight

Copy