Zwâŋ 13

Yésus tí ɛsüesɛl óphōn ɓɛ̄ mɛkoō

1Ɓwók páska óyúɗɛn yā ɓɛ í í lís ɛ́lú ɛ̄gwát. Yésus ā ɓɛ tí gú nāá, ɛwolo lā ɓɛ nāá, ɛ ɗüîs tí nyúk sī tí ɛtɔ́ ɓɛ ɗáá Sāŋg ékɛ́, lí í kûl. Á ɓɛ tí ɓū kpɛl ósɔ̄ ɓɛ̄ ɓā ɓɛ tí sī nyúk ɓâk. Kpɛɛ̄l ték ī kɛ́ kum ɛ́lú ɛ̄ mɛ́sīl. 2Tɛ́m Yésus ā ɓɛ tí ɛɗɛ íɗóó ī ɓíkokō ɓá nɛ ophōn ɓɛ̄ ékɛ́, Sátan ā ɓɛ ɛ́ ɛ́ síl ɛ́ ní Yúɗas Iskayót mwán mí Símɔn tí lyêm, ɛ jüē ɛ́ osīmsā ɓɛ̄ ɛ́ɓɔ́ma Yésus. 3Yésus nyɛ mot ték ā ɓɛ tí gú nāá, í twóó mí Zɛɛ̄mb ā gbɔ́m e, ɛ́ süīs thɔ́k pyǎŋ ɓɛ yɛ̄. Ɛ gū thɔ́k nāá, Sāŋg ɛ́ ɛ́ jüe ɛ́ də́ə́ tí isínɔŋ ɓyɛ̂ɛs 4Yésus ɛ ɓúzī gbǎl ɓɛ têble, ɛ ɗüís kānd ŋgwát tí mīl ā ɓɛ nɛ myɛ̄ tí nól mîk, ɛ nwɔ́ŋ paā sánda, ɛ lyémbɛ̄l tí kuū. 5Phúla ték, ɛ nwɔ́ŋ mɛ́ɗyūū ɛ gbā tí ɓísim. Ɛ nyɛ́l ɛ́süesɛl óphōn ɓɛ̄ mɛkoō, ɛ tītínd mɛ́ nɛ paā sánda ā lyembɛl tí kuū ê. 6Ɛ ɓúzī kǔm ɓɛ ɗá mí Símɔn Pyɛ̂ɛ. Pyɛ̂ɛ nɛ nɛ̄ nāá: «Ɗâ, í wɔ kā süesɛl myám mɛkoō?» 7Yésus nɛ nɛ̄ nāá: «Sā mí ɗí tí ɛsá ɗék ékɛ́, wa a ɓɛ̄ nɛ khul ɛ lí gwók yɛ́ ɛ́chāak. Sá gwát ɛ́, ɛ́myān nɛ ɗēn ɛ́, wá á kū gwôk.» 8Pyɛ̂ɛ nɛ Yésus nāá: «Kât! Wɔ wa á süesɛl myám mɛkoō.» Yésus nɛ nɛ̄ nāá: «Mí wá ɓɛ̄ ta süesɛl ɔ́ mɛkoō nâk, wa á ɓɛ̄ nɛ līl ɛ́kɔɔ ɓɛ yâm.» 9Símɔn Pyɛ̂ɛ nɛ Yésus nāá: «Ɗâ, í ɓɛ̄ phɛ̄ ɗyaāŋ nák ɛ́, wa a dá süesɛl mɛ́ mɛkǒ nɛ mɛkoō. Süesɛl mɛ́ thɔ́k mɛɓɔ́ nɛ lô!» 10Yésus ɛ ɓúzī lɛ́ɛ́ nɛ nɛ̄ nāá: «Mot ɗí ɛ́ ɛ́ nyēē jüya ɔ́kɛ́, ā ā jé ɛ́ kā ɓākā jüya. Í dá kā je nāá, ɛsüésɛl nje ték mɛkoō. Nɛ dɔ nāá, nól nyɛ̄ nyɛ̂ɛs nyī mú ɛ́fúúfûp. Nák ɛ́, ɓyɔ̂ɔ ɓī tí fûp, sá gwát yá a ɓɛ̄ ɓén ɓyɛ̂ɛs.» 11Yésus ā ɓɛ tí gú mót ā ɓɛ nāá, á á ɓɔ́ma ɛ́ ɔ̂. Í yɛ́ ā lɛ́ɛ nāá: «Yá a ɓɛ̄ ɓén ɓyɛ̂ɛs o fúp ê.»

12Phúla ā sîl ɛsüesɛl ɓɛ́ mɛkoō ékɛ́, Yésus ɛ ɓúzī ɓākā ɓwát kānd wɛ̄, ɛ zí ɓākā ɗi sī ɓɛ têble ɛ jí ɓɛ́ nāá: «Ɓí í gwók mɛ́tiān mɛ̄ sá mí sā ɓén ɗyaāŋ ékɛ́? 13Ɓí jóó mɛ́ nāá: “Yêkle” gú thɔ́k “Ɗâ.” Ɓí nɛ kham nɛ dɔ nāá, mí ku Yêkle, mi thɔ́k Ɗâ. 14Í ɓɛ̄ nāá, myam Ɗâ nɛ Yêkle mí í süesɛl ɓén mɛkoō nâk, ɓyɔ̂ɔ thɔ́k ɓí dalǎ nɛ ɛsüesla mɛ́koō pāká nyēn. 15Mi jüē ɓén ŋgúmǎ ndɛm tí nāá, ɓyá á sá thɔ́k pāká nyēn ɗɛ mí sā ɓén ê. 16Mí lɛ̄ɛ̄ ɓén twóó oceece nāá: Sɛ́l ā ā tháŋ ndə́ə́ wɛ̄, thɔ́k mwâmilōmōl ā ā tháŋ mót lwōm ɛ́ ɔ̂. 17Isá ɓīnɛ́ɛ̌ŋ ɓyɛ̂ɛsa, ɓí í gú ɓyɛ́ ɛ́chāak. Ɓí wā ɗúɛl ɓyɛ́ nâk, ɓí nɛ lɛ̄m. 18Sá mí ɗí tí ɛlɛ́ɛ́ ɗék ékɛ́, yā ā jüāk ɓén ɓyɛ̂ɛs. Mí tí gú ɓɛ̄l ō mí tɔɔ̄p ɓâk. Sá gwát ɛ́, í je nāá, mɛkɛ́l mɛ̄ ɗí mitilā twóó Mɛkanā mɛ̄ Zɛ́mb nāá: “Mot zá nɛ nɛ̄ ɗiɗɛ̄ pyaāt gwát ɔ́kɛ́, ɛ mú zīzyūŋ wám mák ɛ́,” mɛ̄ lwónd e. 19Mí lɛ̄ɛ̄ ɓén sá ték ɛ́chāak ɛsɔ́k nāá, i sɛ́ɛ́ ê. I zyē tɛ́m í wá kā sɛ́ɛ́ ékɛ́, ɓyá á ɓûkla nāá: “Myam Ɗî.” 20Mí ɓākā lɛ́ɛ́ ɓén twóó oceece nāá, nɔ̄l wā ɓɛla nɛ mot mí wā thes ɔ́kɛ́, ɛ́ ɛ́ ɓɛla nɛ naām. Thɔ́k ɛ́, mot ɓɛ́lā nɛ naām ɔ́kɛ́, ɛ́ ɛ́ ɓɛla nɛ mot ā thes mɛ ɔ̂.»

Yúɗas á á ɓɔ́ma Yésus

(Mat 26.20-25; Mák 14.17-21; Lók 22.21-23)

21Phúla Yésus ā sîl ɛlüii ɗyáŋ ékɛ́, okhwɔɔka ɓɛ̄ ɓúzī lwónd ɛ́ tí lyêm, nyɛ nāá: «Mí lɛ̄ɛ̄ ɓén tí oceece nāá, mot ŋgwát tí ndɔŋ wēn á á ɓɔ́ma mɛ̂.» 22Ophōn ɓɛ̄ ɓɛ̄ ɓúzī jijüâkla nɛ jijíila nāá: «Í nɛ khul ɛɓɛ zɛ̄?» 23Nɔ̄l phōn tí ndɔŋ wɔ̄ɔ̄ Yésus ā ɓɛ tí kpɛl ɔ́kɛ́, ā ɓɛ ndumɛ nɛ nɛ̄. 24Símɔn Pyɛ̂ɛ ɛ ɓúzī kwáp ɛ́, tí ɛlɛ́ɛ́ ɛ́ nāá, ɛ jî Yésus nāá: «Í zɛ̄ ē?» 25Phōn ték ɛ ɓúzī lyáŋɔɔ́ ɓɛ pák mí Yésus ɛ táplā nɛ nɛ̄ tí ɛjí ɛ́ nāá: «Ɗâ, mot ték ɛ zɛ̄?» 26Yésus nɛ nɛ̄ nāá: «Mi mú tí ɛɗuu pɛ́s mwâpha tí vyāŋ, mot mí wā jüe ɛ́ pɛ́s mwâpha ték ɔ́kɛ́, í nyɛ wā ɓɔ́ma mɛ̂.» Yésus ɛ ɓúzī ɗuu pɛ́s mwâpha, ɛ nwɔ̂ŋ ɛ jüē Yúɗas mwán mí Símɔn Iskayôt. 27Ɗɛ Yúɗas dá nwɔŋ pɛ́s mwâpha énɛ́ɛ̌ŋ ékɛ́, Sátan ɛ dá ní ɛ́ tí nôl. Yésus nɛ Yúɗas nāá: «Sā sá ú dálā nɛ ɛsá ékɛ́, ɛ́vaava.» 28Mot ŋgwát nɛ ŋgwát tí ndɔŋ ɓót o ɓā ɓɛ tí têble ɓák ɛ́, a a gwôk sá yā sâ nāá, Yésus ɛ lɛ́ɛ nɛ nɛ̄ ɗyaāŋ ê. 29Ɗakɛ Yúɗas ā ɓɛ mbakɛl ɛkūt ékɛ́, ɓɛ̄l ɓót tí ndɔŋ wɔ̄ɔ̄ ɓɛ̄ dá sîmsa nāá, Yésus ā lwōm ɛ nāá, ɛ kɛ̌ ɓwám ɓɛ́ isá ī ɓɛ́ wá ɓɛla nɛ ɓyɛ́ tí ɓwók ɓîk. Gú thɔ́k nāá, ɛ kɛ̂ jüe mípwêepweē sísīnɔ̄ŋ. 30Ɗɛ Yúɗas ā dā nwɔŋ pɛ́s mwâpha ékɛ́, ɛ́ dá gbás gbās ê. Yā ɓɛ ī mú tí pum.

Ɛtyuūŋ ɛ́ myēnj

31Phúla Yúɗas ā ɓɛ ɛ́ ɛ́ gbɔ́m ékɛ́, Yésus ɛ ɓúzī lɛ́ɛ́ nāá: «Ɛ́chāak ɛ́, Zɛɛ̄mb ɛ́ ɛ́ gúmɛl Mwán mí mot. Thɔ́k ɛ́, Zɛɛ̄mb á á nwɔŋ kúm zinjá nyɛ̄. 32Zɛ̌mb nyɛ mot ték á á lyákɛl kúm Mwân. Thɔ́k ɛ́, tɛ́m ɛlyákɛl nyɛ́, í ǐ kúnɔɔ. 33Ɓwán ɓâm, í í kā lís ɓīɓyɔ̄k tɛ́m tí nāá, nī ɗíka ndɔŋ. Ɓyá á sáŋ mɛ̂, sá gwát ɛ́chāak ɛ́, mí dā ɓākā lɛ́ɛ́ ɓén sá gwát mā lɛ́ɛ nɛ Oyúɗɛn é nāá: “Ɓyá a ɓɛ̄ nɛ khul ɛtɔ́ ɓɛ mí ɗí tí ɛtɔ́ ê.” 34Mí í jüe ɓén ɛtyuūŋ ɛ̄ myēnj. Kpɛlaká pāká nyēn. Í je nāá, ɓī kpɛ́la ɗakɛ myám mā kpɛl ɓeēn ê. 35Í kpɛɛ̄l ɓí wá ɓɛ̄ nɛ yɛ́ pāká nyēn ékɛ́, wā sá nāá, ɓot ɓɛ̄ gû nāá, ɓí ophōn ɓám ê.»

Yésus ɛ́ lɛ̄ɛ̄ nāá, Pyɛ̂ɛ á á kála ɛ̂

(Mat 26.31-35; Mák 14.27-31; Lók 22.31-34)

36Símɔn Pyɛ̂ɛ ɛ ɓúzī jí nɛ Yésus nāá: «Ɗâ, ú tɔ́ wɛ̄?» Yésus nɛ nɛ̄ nāá: «Wa a ɓɛ̄ nɛ khul ɛɗú mɛ́ ɓɛ mí ɗí tí ɛtɔ́ ékɛ́ ɛ́chāak. Sá gwát ɛ́, wá á ɓū ɗiɗú mɛ̂.» 37Pyɛ̂ɛ nɛ nɛ̄ nāá: «Ɗâ, mí kā ɗí ta kā ɗú ɔ́ ɛ́chāak tí tɔɔ̄p yɛ̄? Mi mú wák kwomsā tí nāá, mi dôl cyuk yám tí ɛsú lɔ̂.» 38Yésus ɛ ɓúzī jí ɛ́ nāá: «Ú kū lɛ́ɛ́ tyâa lɔ́ŋ nāá, u mú kwomsā tí nāá, wá á dól cyuk yɔ́ tí ɛsú lám ɛ? Mí lɛ̄ɛ̄ ɔ́ twóó oceece nāá, Pyɛ̂ɛ, wá á kála mɛ́ ikɛnd ilɛ́l ɛsɔ́k nāá, kúú ɛsɔ́k ɛ kwɔ́k ê.»

Currently Selected:

Zwâŋ 13: MPU

Highlight

Copy