Matio Shúu Fù
Shúu Fù
Sáʼka wo juŋ wo wù dzəə̀n é ŋwàʼ fèn dzə̀ jii, Jesus dzə̀ á *Mfə̀ə́r wo Nyùy‑iì kàʼàn mo aŋgàa ntum Nyùyi‑iì suuy e Ŋwàʼ Mensàŋ me Mvə mè. Nyùy nèn tùm Jesus ji wù wiy, e yiì, é vinyo ve wù‑uù yiìn ne kàʼ wír və́ shó vi gheén vidzə̀m. Wù nèn lòo wìy e nsay fèn, á dzəə́ wun ji wír woó Isray mo Ŋwàʼ Nyùyi‑iì sí suuyì. A bó sáʼka Nyùy wo juŋ və̀n yòʼ dzə̀ cáʼ fo wír veé Israyi, wù dzə̀ fo wír veé kitu ke nsayi adzə̀m.
Á sìysì kimfèr ke Jesus e ŋwàʼ fèn kí wáa dzə e viliŋ viliŋ. Á tòmbìy fèr mo vé‑eè dzəən Jesus, e tùmsín mo vé‑eè wayin wun e ndzəv, Satan mùm wun, é bo wù keʼ lim rə́. Á nén a fèr mo Jesus‑eè ghán e wír veé Israyí mbìv wòŋ ye á yoŋ ji Galeli, fiʼtì kinyo ke Nyùy, yéʼey wíri, fer vé yàsíi. Á kfən màysì, e ŋeèvì vinyo ve ví‑iì kooyin Jesus e ghan sé bàm sí se wù‑uù duùn é Jerusalem, á tá wun e kintam, wù kpú, e fəə̀ fó kpu.
A ŋwàʼ və̀ne din ji Jesus dzə̀ Ŋgaà Yèʼéy woo réŋ wo kù dzə̀ naàrì wun kinyo ke nsər Nyùy dinè, e kfə̀n a naàrì mo sáʼ Nyùyi dzəə̀n. Á sìysì vinyo ve Jesus‑eè yéʼeyì e ŋwàʼ fèn ŋkèʼ sitàn. (1) Mo Jesus‑eè dzə̀ʼə̀mèn é gwan, a yeʼéy mo wír ve á yú fo sáʼ Nyùyi dzəə̀n. Wù wáa fèr liì wìr vee shooy, a fèr mo dzə̀ á wàa yiì, a dìn kilíŋ ke áwune kérí, e kfə̀n a dìn mo áwune wíy dù, e jòʼsì, (vintsə̀m vee 5–7). (2) Mo Jesus‑eè lóo tum wón və́ lìm vee nshòv sibaà e ghvə̀m ji á wáa ghan, a fìʼtì kinyo ke Nyùy, e tìr áwune, (kintsə̀m kee 10). (3) Ŋgàn se Jesus‑eè yov, naarì mo sáʼ Nyùyi dzəə̀n, (kintsə̀m kee 13). (4) Kinyo ke Jesus‑eè naarì mo wìr wo dzəə̀n ji ŋgaà və ŋgoo wáa dzə, (kintsə̀m kee 18). (5) Vinyo ve Jesus‑eè yéʼey mo ndzə rə̀n wíy mày, é bo sáʼ Nyùyi wiy ŋkuuŋkùŋ, (vintsə̀m vee 24–25).
Vilíŋ ve ŋwàʼ
Rám à Jesus Kristu wùn à mo vé‑eè dzəən wun 1.1–2.23
Kinyo ke Joon woo Ŋgaà Wáyndzəv 3.1‑12
Á wáy Jesus e ndzəv, Satan kfən mùm wun 3.13–4.11
Jesus fiʼtì kinyo ke Nyùy e Galeli 4.12–18.35
Jesus lò fo Galeli, e dù e Jerusalem 19.1–20.34
Ŋgàm Jesus kinjòʼsìbàm yeé Jerusalem 21.1–27.66
Jesus fəə̀ fó kpu, a dìn kitú kfə́ e wír vəə́ 28.1‑20
Currently Selected:
Matio Shúu Fù: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL