Kèʼlo 19

Liì kisaŋ wìr veé Sodom

1Nsheèlav se Nyùy see sibaà se sí kì loòn fó mbìy sìy si meé é Sodom e ŋkuùr, a Lot kì dzə́ e shùu kibùʼ ke kí nəə e ŋkàlaʼ foo fèy. Kù mò wù yenen wír vìy, e nèn tùm é yuv, e dù, wùn áwune tárnín. Wù tsə́m ndzəə́, e làʼ kitú e nsay, 2e yòŋ jii, «Atàr vem, kii vèn, vèn ku shaà e kwàn wóné lav. Vèn wiy, e sù wuú yéné, e shìíy, ndzə lóo jàv, é bo vèn shaa, a dù fo vèn kì du.»

Áwune bìnèr jii, «Vèr kù‑úù shiíy a dzə̀ é mvə̀m ŋkàlaʼ fèn e ŋgèŋgèr.»

3Wù nèn kù a lon áwune kitávín, á yiì lò, e biìmé, wùn à Lot nèn dù e wun lav. Lot nèn sùúy, á fèr vifá ve yi, e kfə̀n tòn *kibán kee là nyaà, áwune yí. 4Ghán sé neèm si lòo gheén, vilum veé Sodome nèn wìy, e kaàrí lav, e tàr, a yì‑iì dzə̀ vilum veé ŋkàlaʼ foo fèy adzə̀m, wónlè wùn à ŋgày sé wìr si. 5Á nèn jàŋ Lot, e dzə̀r shó jii, «Vilum ve á kì nəən wò e shùu ŋkuùri bèé? Wìy shó, bìʼ fo vèr taʼ, e shiíy e vilum vee shooyi.»

6Lot lòo fəə ji wun yén á áwune, e sə̀tí shúu lav, 7e sùúy jii, «Afə̀r vem, kii vèn, lá vèn yòʼ yiì kfə́ə liì kisaŋ və̀n. 8Vèn leéy, e yèn, m kér wón vee vikìy abaà, a bó á yòʼ‑oò yiì ne kìíy lumèn. M lo, e lì, e fo e vèn, é vèn yii aáwune mo vèn taʼà. Kí dzə̀ cáʼ ji lá vèn yòʼ yiì kinyo e wír vìne, bìʼ fo áwune beè a dzə̀ mo, a m kù kér fó kìŋsìn áwune.»

9Áwune bìnèr jii, «Kíŋrí fó dzəə, é vèr shaa. Jwè və̀n, wò‑oò wìy fen, aà dzə̀ kiŋgwìy, à dzə̀ ké la, e bó a dìn kinyo ke a dzə̀ vèr yiì. Kóʼtí fó dzəə, fo vèr nyavri e wò, e shaà mo a kì dzə̀ vèr nyàvrì aáwune.» Á ku nèn a ghiʼ Lot bèy, a tàʼ, e kiv shúu lav. 10Viŋgwìy ve ví kì wìyìn Lot vìy vi tsə́nsí kiwó, e sə̀ŋ wun, e siìr fo mvəm, e sə̀tí shúu lav. 11Mo á siìrìn Lot e lav, e nèn tsə̀m wír ve á kì tíy e shùu lav e vimfìr vi. Sí wìr dzə̀me səə́né, à ŋgàywìr, à wánlè, la á yòʼ dzəə́ a yen shúu lav gheéy.

Lot ló fó Sodom, e dù e Tsoar

12Viŋgwìy ve Lot vi nèn dzə̀r shó jii, «À dzəə́ kér wír wùmòʼ é kirə̀ʼ fen à? Kìn dzə̀ sə wò, kìn wan wò woo lumèn, kìn woo wiíy, kìn dzə̀ la wò, wo wù dzəə̀n é ŋkàlaʼ fèn, à kù fə̀ə́r fo fo, 13bìʼ fo vèr sí lo, e laàr kirə́ʼ kin. Nyùy Tàr yù ne liì kisaŋ woo kùm kirə́ʼ kin, e nèn tùm ver ji vèr wiy á, e laàr.»

14A Lot kì kér rú asə́ və́ ve wù‑uù kàʼàn wón və́ vee vikìy shó. Wù nèn dù, e yòŋ áwune jii, «Vèn lo cér fo kirə̀ʼ fen, bìʼ fo Nyùy Tàr sí lo, e laàr ŋkàlaʼ rə̀n. Á yú bey, a kwàʼ ji wù səə́ri a səə̀rín.»

15Kù bey, ndzə lòo kaʼ, nsheèlav se Nyùy sìy si wáa banrí Lot, a suúy jii, «Ku yiì cér, e lì wiiy wò wùn à wón vé vee vikìy vee abaà víne, é vèn áwune fəə́ fó fèn. Là bey, bo á lo, e tatí, e laàr vèn à wír veé ŋkàlaʼ fène.» 16A Lot kù ghvəə́ ghvəə́n, nsheèlav se Nyùy sìy si nèn ghàr wùn à wiíy, à wón vəə́, e fə̀ə́r fo ŋkàlaʼ fèy. Kí‑iì kòóy bey, a kù dzə̀ cáʼ ji Nyùy Tàr‑iì rə́r a mendzən me Lot. 17Nsheèlav se Nyùy si fəə́r áwune bey, e yòŋ jii, «Vèn wáa nyeŋ e vitú vén ví, é la wìr yòʼ lèéy bám, kìn ji wìr tiím é kirə̀ʼ, a fèn dzə̀ é mboʼ. Vèn du dúun, e kòʼ áàgwan, là bey, bo á yíi laàr sa ven fó.»

18Lot ku bìnèr aáwune jii, «Àáy atàr vem. 19Ké ru kí, vèn yèn ne kwàn wón, a kòŋ, a rər mendzən mvə, e sə̀ wun fo kpúu, yii bèy, a bó yòʼ dzə̀ m yù fóo nyeŋ, e koʼ aàgwan. A m lò a mùm, bo virómróm vin vi kù yíi koóy mo é dzəə, é m kpú. 20Leéy, e yèn, ntèʼ yìmòʼ dzə̀ fó mentsə̀m ye a kì dzə̀ m lèʼ, e dù fo. Yì dzə̀ e térí féyì, aá màʼtì, m nyéŋ, e dù fo, la m yòʼ bòy à?»

21Nshìylav Nyùy yìmòʼ bìnèr sho jii, «M kù kfə̀n‑éè shám sá wò e kin ki, e làa yòʼ laàr ntèʼ ye à yoŋ rə̀n. 22Lò cér, e lèʼ, e dù fo. Bó yòʼ dzə̀ m yiì kinyo, a bó vèn meé fó.» Mo Lot‑iì yòŋèn ntèʼ yee shooy ji ye terí, á nèn sìíy, a yòŋ yír ntèʼ rə̀y ji Tsoar#19.22: Tsoar: E Lǎm Hibru, yír rə́ne koó fo kisuŋnìn moo ji Hibru ye yì kér nsàv ji «dór.».

Nyùy laár Sodom wùn Gomorra

23Lot‑iì nə̀ə́ é ntèʼ yee Tsoar, a shùy ku tò toón. 24Nyùy Tàr ku nèn màʼ və́y fó yuv, wú wáa shwi, a baarí moo mekàŋ, e sùm Sodom wùn Gomorra, 25e nèn laàr ŋkà se laʼ see shooy wùn à mboʼ yee fó e dzə̀m. Wìr dzə̀m kpú, vifá ve ví‑iì kúy fo vi bò. 26A wiiy Lot kì wiy fo wun bàm, e nèn bìnkìr, e lèéy bám. Mo wù leeyin bey, e kù nèn bìnkìr e kilan ke dzəə̀n shiŋgwáŋ.

27Abraham bvəə́shí, e lò e yuv kijàvndzə, e nèn dù e kirə̀ʼ fo Nyùy Tàr‑iì suŋnin e wun. 28Wù máʼ sí, e lèéy mbìv Sodom wùn Gomorra, e lèéy mboʼ yee fó e dzə̀m, e yèn a kindzə́ʼ ki dzəm fo fo mo á tòn kincaàrì e kifir.

29Á mo Nyùy‑iì lóo laàr ŋkà se laʼ seé mboʼ foo fèy sìn, e kuùmé kinyo ke Abraham‑eè lonen, e fə̀ə́r Lot, e bóo laàr ŋkà se laʼ sìn, é wù boy.

Mo wír veé Moav wùn à veé Ammone‑eè ràmèn fo Lot

30Lot wáa dzə e Tsoar bèy, e nèn kèʼ, a fàn, e lì wón və́ vee vikìy vee abaà viy, wùn áwune kóʼ, a dzə e gwan, a shiíy e mbvə̀ʼ. 31Wan və woo ŋgàywìr nèn wìy lò, e sùúy e wo bàm jii, «Tàr wòsò dzə̀n ne, a wíri yòʼ dzə̀ fen vée lì wòsò ji vikìy vév, é vèsən áwune wáa dzəə́ wón. 32Wìy ri, é wòsò taʼ meluʼ, e fò, é tàr wòsò nó, é wòsò fiʼ shìíy vèsən áwune. Wù nó, mè koó, é wù shiíy e wòsò, aá tiím bvəm, e dzə̀ə́ wón, e fíʼ lèm rám yesən.» 33Áwune nèn fò meluʼ, kitàr kí nó vitsə́ʼ vee shooy. Wo mbìy dù, e shìíy wùn tàr wov, la tàr wov yòʼ fə̀m kìíy ghán se wù‑uù neèmèn, kìn se wù‑uù loòn.

34Ndzə bvəə́shí, e ràn, wo mbìy suúy e wo bàm jii, «Yén ri mbà, m sìíy, e shìíy vèr tàr wòsò. Wòsò kfən fò meluʼ sho vitsə́ʼ vé lán vi, é wù nó, áà nèn dù, é vèn wun shiíy lèn, áà fíʼ koóy wón, fo rám tàr wòsòo lay.» 35Á bèy, áwune nèn yiì, tàr wov kfən nò meluʼ vitsə́ʼ vee shooy, wo bàm nèn lò, e dù, e shìíy wùn kitàr kí, la tàr wov yòʼ fə̀m kìíy ghán se wù‑uù neèmèn, kìn se wù‑uù loòn.

36Á mo wón Lot vee vikìy víne‑eè kooyin wón fo tàr wov. 37Wo mbìy‑iì dzə̀ə́ wán lumèn, e shù yír ji Moav. Dzə̀ wun wo dzəə̀n tàr à wìr veé Moav#19.37: Moav: E Lǎm Hibru, yír rə́ne koó fo kisuŋnìn moo «lò fo kitàr kí.», e wìy meé lán. 38Wo bàm koóy sá wán woo lumèn, e shù yír ji Ben‑Ammi#19.38: Ben‑Ammi: E Lǎm Hibru, nsàv yìr rən dzə̀ ji «wán woo věr kfəə.». Dzə̀ wun wo dzəə̀n tàr à wìr veé Ammon, e wìy to lán.

Currently Selected:

Kèʼlo 19: LNB

Highlight

Copy