Matyo 26

Ɨbɛn Korɨ a Mɨnaŋ a Njwítɨ́ Yeso ghe

(Mar 14:1-2; Alu 22:1-2; Yoa 11:45-53)

1Yeso a ghɨnə mɛ́tɨ́ a ndiʼ ɨnu tsiŋ ɨtsum, ɨ soŋ a mbó bɨyɛʼ ɨbyi ngə́, 2“Nɨ zhi ngə́ a ndzum njwi tsi bá, Nɨdorɨ nɨ Tsa-yɛʼnɨ mɨ tsi, á bɨ tiʼ nga a Mɔn Ŋwɔn á bɨ kwemtɨ atɨ abaŋnɨ-baŋnɨ ə.”

3Bɨntumshe bə wi abɔʼnɨ bɨkum bɨ alaʼ bómnkɨ́ a ntɔ́ʼ Kayafasɨ, wa a bénɨ́ ntumshe wu ngwi, 4nkəmnɨ ngɨ a mɨnaŋ adzaŋ za bo mɨ ko a Yeso ndzum ndzum ɨ zhwitə. 5Lá bo sóŋ ngə́, “Bɨgɨnə mɨ keʼ zagɨ ngɨ a məzen a nkfu nɨdorɨ na, muŋ ɨbɛn mɨ bvugɨ ndum ə.”

Bɨ Zɔʼ a Yeso nɨ Mɨvwurɨ a Bɛtani ə

(Mar 14:3-9; Yoa 12:1-8)

6A nkfu za Yeso a tsínɨ́ a Bɛtani a ndá Samɔn ŋwɔn bəkfuʼə, 7mangye wu tse a kɔ́ʼtɨ́ ngyen wə mbyɛn, ntiʼtɨ a zhwɛʼ#26:7 Zhwɛʼ wen a bé tɔ́gɨ́rə́ wa bɨ nyɛ́tɨ́nɨ́ nɨ azúm zə tse bɨ tɔŋə ngə́ alabasta mbe azúm za bɨ nyɛ́tɨ́nɨ́ nɨ ngɔʼ tsɨ fúə. wa bɨnyuʼtə bə atɨŋndvuŋ tsínɨ́ wə mu, nchwirɨ bɨnyuʼtə bə atɨŋndvuŋ ba atú Yeso, mbáʼ a shíʼtɨ́nɨ́ ntsí atú atɛkɨ ndzɨə ghe. 8Mbáʼ bɨyɛʼ ba zɛ́nɨ́ a məzen lá, bo lwí ntɔŋ ɨ soŋ ngə́, “Ntsəŋ azúm zen lá ɨ nɨ mbɨ́ʼ ake le? 9Bɨ chi fiŋ bɨnyuʼtə bə atɨŋndvuŋ ben atú təkɔʼ bɨ nkáb, ɨ gha nkáb zɨ wu a mbó ɨfúm ə.”

10Yeso a zhí anu za bo kɨ́nə́ sóŋə́, ma lan, ntiʼ soŋ a mbó bo ngə́, “Nɨ ghǎ ngɨ́ʼ a mbó mangye wen ngə́ ke le? A nɨ ngótí anu zə shiʼnɨ za a ghɨnɨ a mbó me ghe. 11Ɨfúm tsi bɨŋ bo nkfu tsum, lá ma ghɨ kaʼ bɨgɨnə tsi nkfu tsum ə. 12A chwirɨ bɨnyuʼtə ben a ɨnye me lá, nkyaŋtɨ aghan adzaŋ za bɨ mɨ twəŋə. 13Tsɛʼ a nkənu, ma soŋə awɨŋ ə, adiʼ atsum za bɨ soŋnɨ nkən wu shiʼnɨ wen ɨwu a mu mbyi tsum, anu za wɛrə a ghɨnɨ lá, bɨ mɨ soŋənə a zɛrə a nkwémtɨ́ ɨkum ɨyi ɛ.”

Yuda a Bem Ɨ Fiŋ Yeso ghe

(Mar 14:10-11; Alu 22:3-6)

14Táʼ a tɨtərɨ bɨyɛʼ ba nɨghúm ntsɔb bá, wa bɨ kɨ́nə́ ntɔ́ŋə́ ngə́ Yudasɨ Iskario, a ghɛ́n a mbó bɨntumshe bə wi 15mbitɨ awa ngə́, “Nɨ mɨ gha ake a mbó me mbáʼ be ma gha a Yeso a mbó bən le?” Bo kwáʼtɨ́ ɨbagɨ tsə́ŋtsə́ŋ mɨghúm mi mɨntárə́ nga wəmbo ə. 16Ɨ lɔgɨnɨ a nyom məwa, Yudasɨ a kə́ ntíʼə ndǒ mɨndóm a nchyɛ́ nɨ abárɨ́ zə shiʼnɨ ɨ fen a Yeso a mbó bo ghe.

Yeso a Dzɨ Mɨdzɨ mɨ Tsa-yɛʼnɨ bo bɨ Bɨyɛʼ ɨbyi ɛ

(Mar 14:12-21; Alu 22:7-14, 21-23; Yoa 13:21-30)

17A benə a nye ntsambyi njwi nɨdorɨ nɨ abán tɨ mbɛgə, bɨyɛʼ bɨ Yeso yen mbitɨ ayi ngə́, “O lǒ ngə́ á bɨgɨ ghɛn nkyaŋtɨ mɨdzɨ mɨ Tsa-yɛʼnɨ a mbó gho lá ɨ ghé le?” 18A sóŋ a mbó bo ngə́, “Nɨ ghɛn a mbó ŋwɔn wu tse a mu ntáʼmbagə wu wi, ɨ soŋ wəmbo ngə́, ‹Ndiʼ aŋwaʼnɨ a soŋ ngə́, nkfu Ɨzan ɨ tiʼ abó; ma mɨ dzɨ mɨdzɨ mɨ Tsa-yɛʼnɨ a ndá gho bɨgɨ bɨ bɨyɛʼ ɨbə.› ”

19Bɨyɛʼ ɨbyi ghɨ́ tsɛʼ adzaŋ za Yeso a tɨ́gɨ́tɨ́nɨ́ awa, nkyaŋtɨ mɨdzɨ mɨ Tsa-yɛʼnɨ ma.

20A ghɨnə mbé a nkwɛfɔ, Yeso a shiʼtɨ ntsi a ɨshe bo bɨ bɨyɛʼ ɨbyi ba nɨghúm ntsɔb bá a ndzɨ́ə ghe. 21Mbáʼ bo kɨ́nə́ ndzɨ́ə lá, Yeso a sóŋ ngə́, “Tsɛʼ a nkənu, ma soŋə awɨŋ ə, táʼ ŋwɔn nɨ bən a mɨ korɨ a mɨnaŋ atú ɨghə.”

22Bɨyɛʼ ba lánɨ́ ntsí nɨ adzə́ŋnɨ, ntiʼ mbiʼnɨ mbitɨ zɨ ɨ mɔ́ʼɔ́ mɔ́ʼɔ́ ngə́, “Tsɛʼ a nkənu, Maʼmbyí o sóŋə́ lá ngə́ a nɨ me le?”

23Yeso a chwɨ́gɨ́ ngə́, “Ŋwɔn wa a tsagɨnɨ abó azhi a shiʼ mbom bo azan a mu akəb, a mɨ korɨ a mɨnaŋ atú ɨghə. 24Mɔn Ŋwɔn a mɨ kfo adzaŋ za Aŋwaʼnɨ a Ŋwi a soŋnɨ ngə́ a mɨ kfo, lá ngɨ́ʼ zɨ ngwi ɨ tsi atú ŋwɔn wa a korɨnɨ a mɨnaŋ atú Mɔn Ŋwɔn ə! A kwɛ́ bé bɔŋ mbáʼ be bɨ sé a ŋwɔn məwa jwiə!”

25Yudasɨ, ŋwɔn wa a kórɨ́nɨ́ a mɨnaŋ atú ɨyi a kɨ́ mbítɨ́ ngə́, “Tsɛʼ a nkənu, a Ndiʼ Aŋwaʼnɨ, ka o soŋə agho lá ngə́ a nɨ me ghe?” Yeso a chwɨ́gɨ́ ngə́, “A soŋ gho ghe.”

Ntárɨ́ Maʼmbyí ɛ

(Mar 14:22-26; Alu 22:14-20; 1Ko 11:23-25)

26Mbáʼ bo kɨ́nə́ ndzɨ́ə, Yeso a lɔ́gɨ́ mbɛʼ abán, ngɨ atsaʼtɨ a Ŋwi zə nga mɨya, mbatɨ a zɛrə, ntiʼ nga a mbó bɨyɛʼ ɨbyi, ɨ soŋ ngə́, “Konə, kfurɨnə; nə nɨ ɨnyam ɨnye ɨzan ɨ ziŋ ə.”

27A tíʼ ndɔgɨ ndɔ́ŋ, ngɨ atsaʼtɨ a Ŋwi zə nga mɨya, nga a mbó bo, ɨ soŋ ngə́, “Nonə, bən bɨtsum ə; 28nə nɨ alɛm azan a zen, mbáʼ lá fɛnwu akan a Ŋwi, alɛm azan za bɨ chwirɨnɨ a mbó bə ghaʼnɨ taŋ á bɨ lɨgɨnɨ mɨbvu ə. 29Ma soŋ a mbó bən ngə́ ma láʼ kaʼ mɨluʼ məmen kwiʼ no ɨ kɔʼ kuʼ njwi za ma ghɨnɨ no a mə fi ma bɨgɨnə a mu Nɨfɔ nɨ Ta ɨghə.”

30Bo tíʼ ndzúmtɨ́ azúmtɨ, ɨ fu nkɔʼ ngɛn atú ntáʼ Olif ə.

Yeso a Fɨʼtɨ Adzaŋ za Bita a Ghɨnɨ Tón ayi ɛ

(Mar 14:27-31; Alu 22:31-34; Yoa 13:36-38)

31Yeso a sóŋ a mbó bo ngə́, “Bən bɨtsum mɨ kɨəkɨ ɨ nyɛʼ aghan nɨ ɨtfúʼ sɨŋə, mbɨ́ʼ ngə́ aŋwaʼnɨ a Ŋwi a soŋ ngə́, ‹Ŋwi a mɨ zhwitɨ a ntsiŋ mɨnyam, á mbyindzɨ tsa tsɨ tsinɨ a mu akarɨ a mbyindzɨ tiʼ ndzagɨnə.› 32Lá mbáʼ bɨ zhwemnɨnə aghan, ma mɨ ghɛn a mbyi bən a Galili ə.”

33Bita a ghám, ɨ soŋ a mbó Yeso ngə́, “Be bɨtsum kwɛ nkɨəkɨ nyɛʼ agho, muŋ ma láʼ kaʼ agho nyɛʼtə!”

34Yeso a sóŋ a mbó Bita ngə́, “Ma soŋ a mbó gho ngə́ bɔŋ á ankɨʼə a tɔŋ nɨ ɨtfúʼ sɨŋə, o mɨ soŋ nkfu tsi tárə́ ngə́ ka o zhi agho aghə.”

35Bita a chwɨ́gɨ́ ngə́, “Ma láʼ kaʼ mə lá soŋ, mbáʼ be a kwɛ ndiʼ ngə́ á ma kfo bɔgə ghe!” Bɨyɛʼ ɨbyi ba bɨtsum zɔ́ŋ nkɨ soŋ tsɛʼ ndəŋndəŋ anu ə.

Yeso a Tsaʼtɨ a Ŋwi a Gɛtɨsemani ə

(Mar 14:32-42; Alu 22:39-46)

36Yeso a tíʼ ngɛn bo bɨ bɨyɛʼ ɨbyi a nye adiʼ zə tse za bɨ kɨ́nə́ ntɔ́ŋə́ ngə́ Gɛtɨsemani, ɨ soŋ a mbó bo ngə́, “Tsinə ɨghan, á ma ghɛntɨ a bagɨ yirɨ ntsaʼtɨ a Ŋwi ɨwu ə.” 37A lɔ́gɨ́ a Bita bo bɨ ɨbɔ bɨ Zebɛdi bə mbáŋnɨ́ ba bi bɨbá bo bo ghen. Ntəm ɨyi dɨ́rɨ́ ndon nɨ adzə́ŋnɨ, 38a tiʼ soŋ a mbó bo ngə́, “Adzə́ŋnɨ za a tsinɨ a mu ntəm me a tən be tɨ́sə́n a nye ndóm wa a chinɨ zhwitɨ aghə. Nɨ ghɔŋ ɨghan ə, á bɨgɨnə tsi a nɨkyerə bɨtsum ə.”

39A bɔ́nɨ́ mbə ngɛntɨ a mbyi, ɨ shiʼ ngvo nkubɨnɨ ɨshi ɨyi a tɨshe ntsaʼtɨ a Ŋwi ngə́, “Ta ɨghan, be a chi fu, kwarɨ ndɔ́ŋ ngɨ́ʼ zen a mbó me ghe. Lá, á be be adzaŋ za o lɔnə nkeʼ be be adzaŋ za a lɔnə me ghe.”

40Wɛrə a tíʼ mbə mbə́n ngyen a mbó bɨyɛʼ ɨbyi ba ndzɛn bo nɔŋ ndyě; wɛrə a bitɨ a Bita ngə́, “Njingə nɨ lo chi keʼ tsi a nɨkyerə bɨgɨnə atú táʼ nyom le? 41A nkyerɨnə nkə́ ntsaʼtɨnə a Ŋwi mbɨ́ʼ nɨ vwo a mu akwaʼnɨ ə. Azhwi a lǒ ghe, lá ɨnyam ɨnye ɨ ghɔgə.”

42A nye nkfu tsa tsɨ kuʼnɨ tsi bá, Yeso a nyɛ́ʼtɨ́ awa ngɛn ntsaʼtɨ a Ŋwi ngə́, “Ta ɨghan, be a be ngə́ bɨ chi keʼ kwarɨ ndɔ́ŋ ngɨ́ʼ zen a mbó me tɨgha ma no a zɛrə, á fu tsɛʼ za o lɔnə ghe.” 43A bə́ tɨ kwiʼ bən ndzɛn awa bɨ lyenə ghe; bo kɨ chi keʼ ɨmɨgɨ ɨma ŋaʼ mbɨ́ʼ ngə́ mɨ lón nɨ fɨlye ə.

44Yeso a kwíʼ nyɛʼtɨ awa, ngɛn adiʼ adaŋ ntsaʼtɨ a Ŋwi a nye nkfu tsa tsɨ kúʼnɨ́ tsi tárə́, nkə́ nkwátə́ tsɛʼ mɨgham mə mbyi ma. 45A tíʼ bə mbə́n a mbó bɨyɛʼ ɨbyi ba mbitɨ awa ngə́, “Nɨ bvurə ndyě nkə́ njwítə́ awən le? Zɛnə! Nyom a kuʼnə, á bɨ gha a Mɔn Ŋwɔn a mbó ngaŋ ngɨ mɨbvu ə. 46Lonə atɨ́, á bɨgɨnə ngěn ghe. Zɛnə, ŋwɔn wa a taŋnɨ a mɨnaŋ atú ɨghan a wɛnə ɨghə.”

Bɨ Ko a Yeso ghe

(Mar 14:43-50; Alu 22:47-53; Yoa 18:3-12)

47Yeso a kə́ mbvúrə́ ngámə́ mbáʼ Yudasɨ, wa a bénɨ́ táʼ a tɨtərɨ bɨyɛʼ ba nɨghúm ntsɔb bá, a yénə́. Wɛrə a tsí bo bɨ nángyérə́ wu ngwi wa bɨ tíʼtɨ́nɨ́ bɨlumban abɔʼnɨ mbaŋ fɨlam, ndo a mbó bɨntumshe bə wi abɔʼnɨ bɨkum bɨ alaʼ ə. 48Ntǎŋ mɨnaŋ wa a kwɛ́nə soŋ anu za zɨə mɨ ghɨ a mbó nángyérə́ wa ngə́, “Ŋwɔn wa ma mɨ chwɨgɨ, a nɨ ŋwɔn wa nɨ lɔnə ghe. Nɨ shiʼ mbó wə ɨnye ə!”

49Yudasɨ a byí ntíʼ nkɔ́ʼ ngɛ́n a mbó Yeso, ɨ soŋ wəmbo ngə́, “Ndiʼ Aŋwaʼnɨ, ma tsaʼtə agho!” ntiʼ nchwɨgɨ ayi ɛ.

50Yeso a chwɨ́gɨ́ ayi ngə́, “Ɨson ɨghan, o tsi ɨghan lá mbɨ́ʼ ake?”

Bɨ tíʼ nkɔ́ʼ ngyen nko a Yeso, ntiʼtɨ ayi nɨ mbó mə tɨŋə. 51Táʼ ŋwɔn wa a tsínɨ́ bo bɨ Yeso a dvúŋ ɨŋwi ɨzhi a mbáʼ, mbɛ atoŋnɨ abuʼ a Ntumshe wu Ngwi ɨwu ə. 52Yeso a sóŋ wəmbo ngə́, “Bə nɨŋ ɨŋwi ɨzo a mbáʼ wədiʼ ə. Ɨbɛn bɨtsum ba bɨ sɔŋnɨ ɨŋwi mbáʼ, bɨ mɨ kfo tsɛʼ a mbó ɨŋwi mbáʼ ə. 53O wiʼtɨ ngə́ ma chi kaʼ tsagɨ nkən a mbó Ta ɨghan, á byi ntsagɨ ɨkarɨ bɨtsen bɨ ndá bɨ Ŋwi a nchwuʼ a nchwuʼ a mbó me le? 54Be a be ma lan, a ghɨ tiʼ kɔʼ bomnkɨ bo bɨ ɨnu tsa bɨ ŋwaʼnɨnɨ a mu Aŋwaʼnɨ a Ŋwi ngə́ nə nɨ za a mɨ zagɨ fu lá ɨ nə́ le?”

55A nyom məwa Yeso a bítɨ́ a mbó nángyérə́ wa ngə́, “Nɨ fu tso nɨ ghěn a nkó ndzɛrə nɨ bɨlumban abɔʼnɨ mbaŋ fɨlam a nkó me le? Nɨ njwi nɨ njwi ma kə́ shíʼtə́ nchyɛ̌ a mu Ndáŋwi zɨ Ngwi ndiʼə, nɨ keʼ aghan koə. 56Lá, ziŋ atsum a funə tɨtsɔŋnɨ lá taŋ ɨ kɔʼ ɨ bomnkɨ bo bɨ ɨnu tsa ntóm Ŋwi kwɛ́nə ŋwaʼnɨ a mu Aŋwaʼnɨ a Ŋwi ə.”

Bɨyɛʼ ɨbyi bɨtsum tíʼ nyɛʼ ayi nkɨəkɨ awa ghe.

Yeso a Ɨshi Ngaŋ Sáʼ Abyɛn

(Mar 14:53-65; Alu 22:54-55, 63-71; Yoa 18:13-14, 19-24)

57Ɨbɛn ba bɨ kónɨ́ a Yeso lá bɨ tíntɨ́ ayi ngɛn nɨ zɨ a mbó Kayafasɨ, Ntumshe wu Ngwi, adiʼ wa bɨdiʼ bɨ Nyɔngɔŋ abɔʼnɨ bɨkum bɨ alaʼ bómnkɨ́nə́. 58Bita a kə́ ndzɔŋə nəghagɨ, ndzɔŋ sóté nkɔʼ nkuʼ a ɨsaŋəbyɛn Ntumshe wu Ngwi ə. Wɛrə a tsá ntsu abuʼ nkon ngɛn a ɨsaŋəbyɛn, ɨ shiʼtɨ ntsi bo bɨ ngaŋ ntsǐŋ ɨdiʼ a ndzé atsum za a ghɨnɨ fú a nye Yeso ɨ ghɛn kuʼ a ndwitə ghe. 59Bɨntumshe bə wi abɔʼnɨ Ngaŋ Sáʼ Abyɛn bɨtsum lɔ́btɨ́ a nchwé ɨnu atú Yeso taŋ ɨ zhwitɨ ayi ɛ. 60Ɨbɛn bə ghaʼnɨ báʼtɨ́ nkɔ́ʼtɨ́ a ɨshe nchwe ɨnu wu atú ɨ chwɛnɨ lá, ŋwɔ nɨbo wu tse a sé tsi nɨ ngótɨ́ anu za be bɨ kaŋ ayi ɨwu ə. A ndwɨgɨnə, mbáŋnɨ́ tsi bá kɔ́ʼtɨ́ a ɨshe 61ɨ soŋ ngə́, “Mba wɛnə a sóŋ ngə́, ‹Ma chi kum Ndáŋwi zɨ Ngwi zɨ Ŋwi ɨ bə vwu atú njwi tsi tárə́ ghe.› ”

62Ntumshe wu Ngwi a tɛ́m atɨ́ mbitɨ a Yeso ngə́, “O so nɨ anu zə chwɨgɨnɨ tsi le? A nɨ anu ake mbáʼ ɨbɛn biŋ sóŋnə́ mbɨ́ʼ agho le?” 63Lá Yeso a zúʼ ngə́ shwi ə. Ntumshe wu Ngwi wa a kwíʼ ngam wəmbo ngə́, “Tɨtsɔŋnɨ ma lǒ ngə́ o kan nɨ ɨkum Ŋwi, zɨ wa a tsinɨ ntɨŋ ə: soŋ awɨgɨ mbáʼ be o be Wa Bɨ Zɔ́ʼnɨ́ wa, wa a nɨ Mɔn Ŋwi lá.”

64Yeso a chwɨ́gɨ́ wəmbo ngə́, “A soŋ gho ghe. Lá ma soŋ a mbó bɨŋ ə: ɨ lɔgɨnɨ tɨtsɔŋnɨ ɨ ghěn nɨ mbyi, o ghɨ zɛ́n a Mɔn Ŋwɔn á shiʼtɨ ntsi abó maʼə zə Tamɨtən Mɨtsum, ɨ kə́ yenə a mu mbaʼ a fɔməbvurə ghe!”

65Mbáʼ a sóŋnɨ́ a məzen lá, Ntumshe wu Ngwi a sátɨ́ ɨtsɛʼ ɨchi, ɨ soŋ ngə́, “Nə nɨ nɨgham nɨ ndzɔm Ŋwi ə! Ka bɨgɨnə kwiʼə mbɨŋə ndǒ awɨgɨnə bətɛmə-ndzě bə daŋ ə! Nɨ zuʼnə tsɛʼ tɨtsɔŋnɨ, adzaŋ za a zɔmnɨ a Ŋwi ə! 66Nchɛrɨ ɨsáʼ ɨzən ɨ be ngə́ ke le?”

Bo chwɨ́gɨ́ ngə́, “A vwo ɨsáʼ ntsi nɨ ɨ zagɨ ɨ kfoə.”

67Bo tíʼ ntsə́rɨ́ mɨtwe wə ɨshi nkɨ shwom ayi ɛ. Ba bɨ kɨ́nɨ́ ndúbɨ́ ayi lá, 68bɨ sóŋ ngə́, “Wa bɨ Zɔ́ʼnɨ́, fɨʼtɨ a mbó bɨgɨ ə! Agho lá a tsɔgɨ ɨwa?”

Bita a Ton a Yeso ghe

(Mar 14:66-72; Alu 22:56-62; Yoa 18:15-18, 25-27)

69Bita a shíʼtɨ́ ntsí abyɛn a ɨsaŋəbyɛn Ntumshe wu Ngwi ə. Ngaŋ afaʼ zɨ mangye ɨ yén wəmbo ɨ soŋ ngə́, “O kɨ chi nkɨ ntsi bɨŋ Yeso ŋwɔn bə Galili ə.”

70Lá wɛrə a tón ayi a ɨshi bo bɨtsum, ɨ soŋə ngə́, “Ka ma zhi aghə anu za o sóŋnə́ ghe.” 71A ghɨnə fú ngɛ́n a ntsu abuʼ ɨsaŋəbyɛn za, ngaŋ afaʼ zɨ mangye za zɨ mɔʼɔ ɨ zɛn ayi, ɨ soŋ a mbó ɨbɛn ba bɨ tɛ́mkɨ́nɨ́ a ngɔbə ngə́, “Ŋwɔn wɛnə a tsí bo Yeso ŋwɔn Nazarɛ ghe.”

72Bita a bə́ nkwiʼ ntón ayi, nkantɨ ngə́, “Ka ma zhi aghə a ŋwɔn məwa.”

73Abaŋ a bənə mbe ɨwu, ɨbɛn ba bɨ tɛ́mnkɨ́nɨ́ a ngɔbə, bɨ kɔʼtɨ a mbyɛn Bita ɨ soŋ ngə́, “Tsɛʼ a nkənu, o kɨ mbe táʼ ŋwɔn nɨbo, mbɨ́ʼ ngə́ mbɔm nɨgham ɨzo ɨ kyɛʼ agho ə!”

74Bita a tíʼ soŋ ngə́, “Ma kan ngə́ ma sóŋə́ lá nkənu ə! A Ŋwi a nɨŋ ngɨ́ʼ a ɨnye me mbáʼ be ma tú soŋənə lá nkənu ə! Ka ma zhi aghə a ŋwɔn yirɨ ə!”

Tsɛʼ tɨkə a fú wə ntsu, ankɨʼə a tɔ́ŋə. 75Bita a tíʼ ngwáʼtɨ́ nɨgham nɨ Yeso na ngə́, “Mbɔŋə ankɨʼə a ntɔ́ŋə́, o mɨ soŋ nkfu tsi tárə́ ngə́ o so aghan zhyɛ.” A tíʼ fú ngɛ́n abyɛn mbugɨ nɨ mɨlɨŋnɨ ə.

Currently Selected:

Matyo 26: MNT

Highlight

Copy