Matyo 19

Yeso a Diʼ Anu mbɨ́ʼ Ɨsaʼnɨ Nɨzɔ́ʼ ə

(Mar 10:1-12)

1Yeso a ghɨnə mɛ́tɨ́ a sóŋ ɨnu mətsen, ntiʼ ndo a Galili nkon a mbuʼ Yudiya, a ndaŋ ndzɨŋə Mɨzam Yorɨdan ə. 2Ɨbɛn a ɨnɔ ɨnɔ zɔ́ŋ ayi, a tsuʼ awa ɨwu ə.

3Bə Farisao bə tse yén wəmbo ndɔbtɨ a mbentɨ zɨ, mbitɨ ayi ngə́, “A kuʼnɨ a mu Nyɔngɔŋ ɨwɨgɨnə ngə́ á ŋwɔn mbáŋnɨ́ a kɨŋ a ngwe ɨyi mbɨ́ʼ ɨshwúrɨ́ wu tse le?”

4Yeso a chwɨ́gɨ́ ngə́, “Nɨ bvurɨ tɨ tɔŋ ngə́ wɛrə wa a káʼnɨ́ awa a mbiʼnə, a káʼ awa mbáŋnɨ́ bo mangye le? 5Ŋwi a sóŋ ngə́, ‹Mbɨ́ʼ ma lan, ŋwɔn mbáŋnɨ́ a ghɨ lo ɨ nyɛʼtɨ a ta ɨyi bo nɨmi ɨyi, ɨ bosɨ bo ngwe ɨyi, á bo wa bɨbá tiʼ mbe táʼ ɨnyam ɨnye ə.› 6Ma lan, ka bo bə mbe awa lá bi bɨbá, bo be be táʼ ɨnyam ɨnye ə. Za Ŋwi a bosɨnɨ lá, á ŋwɔn tsɛrə a keʼ saʼnə.”

7Bə Farisao bítɨ́ ayi ngə́, “Mǒse a ghɨ́ ntíʼ ngá a nyɔngɔŋ ngə́ á ŋwɔn mbáŋnɨ́ a gha aŋwaʼnɨ a saʼnɨ nɨzɔ́ʼ a mbó ngwe ɨyi ntiʼ nkɨŋ ayi lá ngə́ ke le?”

8Yeso a chwɨ́gɨ́ a mbó bo ngə́, “Mǒse a nyɛ́ʼtɨ́ awən ngə́ á nɨ saʼnɨ nɨzɔ́ʼ bɨŋ bɨ bəngye ɨbən nkɨŋ awa mbɨ́ʼ ngə́ mɨntəm ɨmɨŋ chigɨrɨ be tɨsɨŋə, lá a mbiʼnə a sé mə lá be. 9Ma tiʼə sóŋə́ a mbó bən ngə́: ŋwɔn tsum wa a kɨŋnɨ a ngwe ɨyi, be a tú be be mbɨ́ʼ achwurɨ, ndzɔ́ʼ a wə daŋ, a chwurə.”

10Bɨyɛʼ ɨbyi sóŋ wəmbo ngə́, “Be a be adzaŋ za a tsinɨ a tɨtərɨ mangye bo ndóm muŋ, a kwɛ́ mbɔŋ ngə́ á ŋwɔn a tsi ayi be tɨ zɔʼə.”

11Lá Yeso a sóŋ a mbó bo ngə́, “Anu zen ka a tsi ayi lá a mbó mbáŋnɨ́ ɨtsum ə, a tsi be a mbó mbáŋnɨ́ tsa a nɨ anu aza ghe. 12Mbɨ́ʼ ngə́ bəkfó ɨkfúʼ tsi ɨwu ndɔgɨnɨ mbáʼ bɨ jwínɨ́ awa, bəkfó ɨkfúʼ tsi ɨwu ba a ghɨnɨ ɨbɛn, bə mɔʼɔ ghɨ ɨtumbəm ɨtsa a nye bəkfó ɨkfúʼ mbɨ́ʼ anu a Nɨfɔ nɨ fɔməbvurə ghe. Ŋwɔn wa a chinɨ kwarɨ a məzen, á kwarə.”

Yeso a Fɔgɨ Ɨbɔ bə Kɨʼnɨ ə

(Mar 10:13-16; Alu 18:15-17)

13Ɨbɛn bə tse yén nɨ ɨbɔ bə kɨʼnɨ a mbó Yeso ngə́ á wɛrə a nyɔŋ mbó ɨmyi a nye bo, ntsaʼtɨ a Ŋwi atú bo ghe. Bɨyɛʼ ɨbyi ghámtɨ́ ɨbɛn ba; 14lá Yeso a sóŋ ngə́, “Nyɛʼtɨnɨ ɨbɔ bə kɨʼnɨ á bɨ ngyíŋə́ a mbó me, nkeʼ awa a nkɨ́ŋə́, mbɨ́ʼ ngə́ Nɨfɔ nɨ fɔməbvurə tsi lá a mbó bo ghe.”

15A nyɔ́ŋ mbó ɨmyi a nye bo ɨ fɔgɨ awa ntiʼ ngɛn ayi ɛ.

Mɔn Mbáŋnɨ́ Nchwiʼ Nɨkɔŋ wa a Tsínɨ́ nɨ Afuʼ zə wi ə

(Mar 10:17-31; Alu 18:18-30)

16A nkfu tse, mbáŋnɨ́ zɨ tse yén a mbó Yeso mbitɨ ayi ngə́, “Ndiʼ aŋwaʼnɨ, anu zə shiʼnɨ za ma mɨ zagɨ ghɨ bɔŋ ɨ kwarɨ ntsi ntən nɨnkoŋ, a nɨ zɨŋə le?”

17Yeso a chwɨ́gɨ́ ngə́, “O bitɨ aghan mbɨ́ʼ anu za a bɔŋnɨ lá ngə́ ke le? A tsi tsɛʼ Táʼ ŋwɔn wa a bɔŋnə. Be a be ngə́ o ghɨ kón a mu ntsi ntən nɨnkoŋ za, len ntɨgə tsa.”

18A tíʼ mbítɨ́ a Yeso ngə́, “Tsɨŋə ntɨgə le?”

Yeso a tíʼ nchwɨ́gɨ́ ngə́, “Koʼ zhwitə, Koʼ chwurə, Koʼ ze, Koʼ be atɛmə-ndze ɨchwenu a nye anu a ŋwɔn, 19diʼ mbɔm zɨ shiʼnɨ a mbó ta ɨgho bo nɨmo ɨgho, nkɨ nkɔŋ a ŋwɔn nɨbarə ɨgho tso atuəmbəm azo ə.”

20Mɔn mbáŋnɨ́ nchwiʼ nɨkɔŋ wa a tíʼ nchwɨ́gɨ́ wəmbo ngə́, “Ma lɛnə ntɨgə tsiŋ ɨtsum ə. Ma bə nkwiʼ mboŋ lá ake le?”

21Yeso a sóŋ wəmbo ngə́, “Be o tsi nɨ nkɔʼ ɨ tɛm ngə́ tsáŋ, ghɛn fiŋ azúm atsum za o tsinɨ nɨ zɛrə, nga nkáb zɨ wu a mbó ngaŋ afúm, o mɨ tiʼ tsi nɨ afuʼ a fɔməbvurə; ntiʼ ngyen ndzɔŋ aghə.” 22Mbáʼ mɔn mbáŋnɨ́ nchwiʼ nɨkɔŋ wa a zúʼnɨ́ a məzen lá, a ló ngɛn ayi nɨ adzə́ŋnɨ; mbɨ́ʼ ngə́ a tsí nɨ afuʼ zə wi ə.

23Yeso a tíʼ sóŋ a mbó bɨyɛʼ ɨbyi ngə́, “Tsɛʼ a nkənu, ma soŋ a mbó bɨŋ ə, a ghɨ tən a mbó ŋwɔn nkáb a nkúŋə́ a mu Nɨfɔ nɨ fɔməbvurə ghe. 24Ma kə nkwiʼə sóŋə́ a mbó bən ngə́, a yaŋnɨ a mbó aŋaŋuʼə ɨ tosɨ tsa a mu ngvo ɨsáʼ ntsa adzaŋ za be ŋwɔn afuʼ zə wi a kon a mu Nɨfɔ nɨ Ŋwi ə.”

25Mbáʼ bɨyɛʼ ɨbyi zúʼnɨ́ a məzen lá, a kɨ́ʼnɨ́ awa be tɨ́sə́n, bo tiʼə mbítə́ ngə́, “Ɨloŋ lá a ghɨ tíʼ dzɨ́ ɨwa le?”

26Yeso a lén awa ɨ soŋ a mbó bo ngə́, “A mbó ŋwɔn mɨsɔŋ a ntsu a nɨ anu za a chinɨ keʼ fuə, lá a mbó Ŋwi ɨnu ɨtsum chi fuə.”

27Bita a tíʼ nchwɨ́gɨ́ ngə́, “Ze azo, bɨgɨ nyɛʼtɨ ɨdzúm ɨtsum ndzɔŋ agho ə. Bɨgɨ ghɨ tiʼ tsi lá nɨ azɨgɨ ake le?”

28Yeso a sóŋ a mbó bo ngə́, “Tsɛʼ a nkənu, ma sóŋə́ awɨŋ ə, a mu mbyi zɨ fi za, mbáʼ Mɔn Ŋwɔn a ghɨnɨ shíʼtɨ́ tsí atú abərɨ a nɨfáŋ azhi lá, bən ba nɨghúm ntsɔb bá ba nɨ zɔ́ŋnɨ́ aghan lá, nɨ ghɨ kɨ shiʼtɨ tsi atú ɨbərɨ nɨghúm tsɔb bá, ɨ saʼnɨ ɨtsé tsə wi tsɨ bə Izrai tsa nɨghúm tsɔb bá ghe. 29A ŋwɔn tsum wa a nyɛʼtɨnɨ ndá kə ɨbɔmbɨma bə mbáŋnɨ́ kə ɨbɔmbɨma bə bəngye kə a ta ɨyi kə a nɨmi ɨyi kə ɨbɔ ɨbyi kə ɨbɨŋ ɨshe ɨchi mbɨ́ʼ ɨkum ɨghan, a mɨ bə tsi nɨ tsɛrə nkfu táʼ nkɨ, ɨ kɨ kwarɨ ntsi ntən nɨnkoŋ ə. 30Lá bə ghaʼnɨ ba bo nɨ bɨtsabɨmbyi ghɨ tiʼ be bɨtsɨrɨ bɨ ndzum, á bɨtsɨrɨ bɨ ndzum be bɨtsabɨmbyi ɛ.”

Currently Selected:

Matyo 19: MNT

Highlight

Copy