Matyo 15

Ɨnu tsa bə Kɔ́ʼɔ́nguʼ Díʼnə́

(Mar 7:1-13)

1Bə Farisao bə tse abɔʼnɨ bɨdiʼ bɨ nyɔngɔŋ bɨ ló a Yerosalɛm ngyen mbitɨ a Yeso ngə́, 2“Bɨyɛʼ bo se ndzúʼnɨ́ ɨnu tsa bɨta ɨbɨgɨnə bə kɔ́ʼɔ́nguʼ díʼnɨ́ lá ngə́ ke le? Ka bo sugə awa mbó ɨma ndzɔ́ŋə́ adzaŋ za a tsinɨ a mu Nyɔngɔŋ bɔŋ ɨ dzɨə!” 3Yeso a chwɨ́gɨ́ ngə́, “Nɨ tiʼ nkeʼ ntɨgə Ŋwi a ndě mbáŋnə́ ndzɔŋə be ɨnu ɨtsən tsa nɨ diʼnə lá ngə́ ke le? 4Mbɨ́ʼ ngə́ Ŋwi a sóŋ ngə́, ‹Diʼ mbɔm zɨ shiʼnɨ a mbó ta ɨgho bo nɨmi ɨgho ghe.› Nkɨ nkwiʼtɨ ngə́, ‹Ŋwɔn tsum wa a ghamnɨ ɨnu tsɨ tɔmnɨnɨ mbɨ́ʼ a ta ɨyi kə nɨmi ɨyi, bɨ tsi nɨ njwitɨ zɨə.› 5Lá nɨ diʼə ngə́ be ŋwɔn a tsi nɨ azúm za a chinɨ lɔgɨ ɨ kwatɨ a ta ɨyi bo nɨmi ɨwu, lá mbə soŋ ngə́, ‹Zɛnə, a nɨ zə Ŋwi ə,› 6ka a tsi ayi nɨ ɨ bə kɔʼsɨ a ta ɨyi atɨ́ ə. Mbáʼ nɨ ghɨnə mə lan lá, nɨ wágɨ́nɨ́ ntɨgə Ŋwi, mbɨ́ʼ ngə́ nɨ lǒ ndzɔŋ ɨnu tsa nɨ diʼnə ghe. 7Bɨŋ ngaŋ ngɨ ɨtsi! Ntom Ŋwi Asaya kwɛ́ nkuʼnɨ be tɨ́sə́n a sóŋə́ mbɨ́ʼ awən ngə́,

8‹Ŋwi a soŋ ngə́, “Ɨbɛn ben, bo kɔ́ʼsə́ aghan atɨ́ tsɛʼ nɨ ɨwəŋ ntsu ɨtsa, lá mɨntəm ɨma tsi nəghagɨ a nye me ghe.

9Bo ghúʼsə́ aghə atú adaŋədaŋə, mbɨ́ʼ ngə́ bo dǐʼ ntɨgə tsa a ghɨnɨ ŋwɔn mɨsɔŋ tso ngə́ a nɨ bɨnyɔngɔŋ ɨbə!”›”

Ɨnu tsa tsɨ Ghɨnə Ŋwɔn a Keʼ Fɛm a Ɨshi Ɨmɨgɨ Ŋwi ə

(Mar 7:14-23)

10Yeso a tíʼ ntɔ́ŋ ɨnɔ wa ɨ soŋ a mbó bo ngə́, “Zhwiʼtɨnə nkɨ ndzuʼ nkɨ njinə anu za a benɨ zɛrə ghe! 11Ka a be ayi azúm za ŋwɔn a dzɨ́nə́ mbáʼ a ghɨnə ŋwɔn a keʼ fɛm a ɨshi ɨmɨgɨ Ŋwi; a baŋnɨ mbe be za ŋwɔn a fɨ́gɨ́nə́ sóŋə́ nɨ ntsu ɨyi mbáʼ a ghɨnə a keʼ fɛm a ɨshi ɨmɨgɨ Ŋwi ə.”

12Bɨyɛʼ ɨbyi tíʼ ngyen soŋ wəmbo ngə́, “O zhi ngə́ anu za o sóŋnɨ́ lá a tsə́ŋ mɨntəm mɨ bə Farisao le?”

13Yeso a chwɨ́gɨ́ ngə́, “Atɨ atsum za Ta ɨghan a fɔməbvurə a sé bi, bɨ ghɨ dvuŋ a zɛrə ghe. 14A nɨ keʼ ɨnye ɨtsən a mbúʼə mbɨ́ʼ awa ghe! Bo lá bɨfɨgɨ ba bɨ tsagɨnɨnɨ bɨfɨgɨ ə; a ghɨ́ ntíʼ mbé ngə́ ɨfɨgɨ ɨ tsagɨnə a zɨ mɔʼɔ muŋ bo bɨtsum mɨ vwokɨ a mu abɨ́ ə.”

15Bita a sóŋ a mbó Yeso ngə́, “Fɨʼtɨ anu za nɨgham nə nanɨ niŋ diʼnɨ a mbó bɨgɨ ə.”

16Yeso a bítɨ́ awa ngə́, “Lá be ngə́ nɨ bvurɨ nkɨ mbe tsɛʼ bɨtəyigɨnɨ tso abvuʼ a ɨbɛn le? 17Nɨ sě ndzúʼə nkə́ njíɛ anu za a benɨ zɛrə le? Azúm atsum za a kónə́ a ntsu ŋwɔn, a kúŋə́ ngěn lá wə mɨto, ndzɔŋtɨ ntsa fu ayi wə mu ɨnye ə. 18Lá, ɨnu tsa ŋwɔn a fɨ́gɨ́nə́ ɨ sóŋə́ nɨ ntsu ɨyi, tsɨ lǒ lá wə mu ntəm, nkɨ mbe lá ɨnu tsa tsɨ ghɨnə ŋwɔn a keʼ fɛm a ɨshi ɨmɨgɨ Ŋwi ə. 19Mbɨ́ʼ ngə́ ɨwiʼtɨ tsə tɔmnɨnɨ fúə lá a mu ntəm ɨyi, ntyíŋə́ ayi ntságə́ ngə́ á zhwitɨ a ŋwɔn, nchwurɨ nkɨ ngɨ ɨtɨshwe ɨnu tsɨ mɔʼɔ; ndze, nchwe ɨnu nkɨ ngam ɨnu tɨbɔŋ mbɨ́ʼ ɨbɛn bə mɔʼɔ ghe. 20Nə nɨ ɨnu tsa tsɨ ghɨnə ŋwɔn a keʼ fɛm a ɨshi ɨmɨgɨ Ŋwi ə. Lá a ndzɨ́ə tɨ sugɨ mbó adzaŋ za bo sóŋnə́ lá — ka məzen a ngɨə ayi á ŋwɔn a keʼ fɛm á ɨshi ɨmɨgɨ Ŋwi ə.”

Mangye wa a Tsínɨ́ nɨ Abeməntəm ə

(Mar 7:24-30)

21Yeso a ló adiʼ wa ngɛn a mu mbuʼ za ɨ fátɨ́nɨ́ a Taya bo Saidɔn lá. 22Búʼshe mangye bə Kanaʼan wa a kɨ́nə́ nchyɛ̌ a mbuʼ məwa a yén wəmbo ə. A búʼ mbó wəmbo nɨ nji zɨ ntən ngə́, “Mɔn Devidɨ; ko a mɨlɨŋnɨ ɨghə, a Tə̧! Dzɨŋ a tsi a nye mɔn ɨghan wu mangye, ntsi ɨzhi tɨtsɔŋnɨ ɨ bɨ́gɨ́ be tɨsɨŋə.”

23Lá Yeso a sé anu zə tsɛrə wəmbo soŋə. Bɨyɛʼ ɨbyi yén mbúʼ mbó wəmbo ngə́, “Kəntɨ a mangye wiŋ ə! A zɔŋə awɨgɨnə njǎ ɨdiʼ ə!”

24Yeso a tíʼ nchwɨ́gɨ́ ngə́, “Bɨ tyígɨ́ aghan lá tsɛʼ a mbó bə Izrai ba bɨ benɨ tso mbyindzɨ tsa tsɨ byenə.”

25Mbáʼ Yeso a sóŋnɨ́ a məzen lá, mangye wa a yén ngvo a mɨku Yeso ɨ soŋ ngə́, “Kwatɨ aghə, a Tə̧!”

26Yeso a byígɨ́ ngə́, “Ka a kuʼnɨ ayi a ndɔgɨ mɨdzɨ mɨ ɨbɔ ɨ maʼ a mbó ngvo ə.”

27Mangye wa a chwɨ́gɨ́ ngə́, “Tsɛʼ a nkənu ə, a Tə̧. Lá tsɛʼ ngvo dzɨ̌ ɨbagɨ mɨdzɨ tsa tsɨ lonə atú atɛkɨ a ta ɨwa ngvókə́ a tɨshe.”

28Ma lan, Yeso a byígɨ́ wəmbo ngə́, “O nɨ mangye wa abeməntəm azo a faŋnɨ be tɨsɨŋə! Anu za o lɔnə lá bɨ mɨ ghɨ a zɛrə a mbó gho ghe.” Tsɛʼ a nyom məwa mɔn ɨyi wu mangye wa a shwétə́.

Yeso a Tsuʼ Ɨbɛn bə Ghaʼnə

29Yeso a ló ɨwu ntíʼə ngěn a ngə́rɨ́ Sagɨrə Galili ə. Wɛrə a kɔ́ʼ ntáʼ wu tse ɨ shiʼtɨ ntsi a tɨshe. 30Ɨnɔ ɨnɔ ɨbɛn bɨ lɔ́gɨ́ bɨtə́ngórə́kuʼ, bɨfɨgɨ, bɨmbyinkɨnɨ, ɨkɨkúgɨ́ abɔʼnɨ ɨbɛn bə ghaʼnɨ ba bɨ kɨ́nə́ ngǒ, ngyen ndɛn wə ɨshi; a tsuʼ awa ghe. 31A kɨ́ʼnɨ́ ɨbɛn adzaŋ za bo zɛ́nɨ́ ɨkɨkúgɨ́ ghamnə, bɨmbyinkɨnɨ shwetɨ, bɨtə́ngórə́kuʼ tɛmnə, bɨfɨgɨ kɨ ntíʼə ndzě ɨdiʼ ə; bo tíʼ mbontɨ a Ŋwi bə Izrai ghe.

Yeso a Dzɨgɨ Mbáŋnɨ́ Nchwuʼ tsi Nɨkwa ghe

(Mar 8:1-10)

32Yeso a tɔ́ŋ bɨyɛʼ ɨbyi ɨ soŋ a mbó bo ngə́, “Ma kǒ a mɨlɨŋnɨ ɨbɛn ben, mbɨ́ʼ ngə́ bo tsinə bɨgɨ bo atú njwi tsi tárə́ ghe. Tɨtsɔŋnɨ bɨ se nɨ azúm zə dzɨnɨ chyɛ. Ma sa kɔŋ ɨ soŋə ngə́ á bo shɛmnɨ tɨkə ma dzɨgɨ awa mbɨ́ʼ ngə́ bo chi tsúmnkɨ́ mbáʼ bo kwɛ́nə́ ngěn nɨ njwuʼ ɨtsa ghe.”

33Bɨyɛʼ ɨbyi bítɨ́ ayi ngə́, “Bɨgɨ mɨ lɔgɨ mɨdzɨ ma mɨ kuʼnɨnɨ a ndzɨ́gɨ́ ɨnɔ ɨbɛn wen lá ɨ ghé ɨghan a mu mɨkɨghonɨ men le?”

34Yeso a bítɨ́ awa ngə́, “Nɨ tsi nɨ ndvuŋ abán ake le?” Bo chwɨ́gɨ́ ngə́, “Mbɛʼ tsi samba abɔʼnɨ bə mbum ɨshwú tsə kɨʼnɨ ə.”

35Ma lan, Yeso a tíʼ sóŋ a mbó ɨnɔ ɨbɛn wa ngə́ á ɨ shiʼtɨ ntsi a tɨshe ə. 36A tíʼ ndɔgɨ mbɛʼ abán tsa tsi samba abɔʼnɨ ɨshwú tsa, ntsaʼtɨ a Ŋwi, mbatɨ nga a mbó bɨyɛʼ ɨbyi; bɨyɛʼ ɨbyi tiʼ ngyɛbɨ a mbó ɨbɛn ba. 37Bo bɨtsum dzɨ́, nzhwúrə́. Bɨyɛʼ ɨbyi tíʼ ngótɨ́ ɨbagɨ ɨbán tsa tsɨ bvúrɨ́nɨ́ tsɨ luŋ nkye tsi samba ghe. 38Ndvuŋ mbáŋnɨ́ tsa tsɨ dzɨ́nɨ́ bé nchwuʼ tsi nɨkwa tɨ kwaʼ bəngye bo bɨ ɨbɔ ə.

39Yeso a tíʼ sóŋ ɨbɛn ba shɛmnɨ, a kon a mu abáŋ a nkyi za, ntiʼ ngɛn a mbuʼ Magadan ə.

Currently Selected:

Matyo 15: MNT

Highlight

Copy