Alukasɨ 23

Bɨ Yen nɨ Yeso a Ɨshi Branto ghe

(Mat 27:1-2; Mar 15:1-5; Yoa 18:28-38)

1Aku aza bɨtsum a tíʼ ndo ndɔgɨ ayi ngɛn nɨ zɨ a ɨshi Branto ghe. 2Bo tíʼ mbiʼnɨ nkaŋə wɛrə ɨ sóŋə́ ngə́, “Bɨgɨ zɛ́n a ŋwɔn wɛnə a twɛfɨnə nkə́ ngvúgɨ́ ndum a tɨtərɨ ɨbɛn ɨbɨgɨ, ntsúʼnə́ awɨgɨ ngə́ á bɨgɨ keʼ ashɛbɨ a mbó Kaisa kwiʼ ntfu nkə́ sóŋə́ ngə́ zɨmboŋ zɨə nɨ Wa bɨ Zɔ́ʼnɨ́ wa, mbe ɨfɔ ghe.”

3Branto a tíʼ mbítɨ́ a wɛrə ngə́, “A nɨ gho mbe ɨfɔ bə Yuda le?” Yeso a chwɨ́gɨ́ ngə́, “A soŋ gho adzaŋ məwa.”

4Branto a tíʼ sóŋ a mbó bɨntumshe bə wi bo ɨnɔ ɨbɛn wa ngə́, “Ka ma ze aghə afənu zə tse za ŋwɔn wen a ghɨnə.”

5Lá bo kə́ mbubtə tsɛʼ bubtɨnɨ ɨ sóŋə́ ngə́, “Nɨ ɨnu tsa wɛrə a diʼnə, wɛrə a twɛfɨ ɨbɛn, ngvúgɨ́ ndum a tɨtərɨ bo a mu Yudiya tsum, ɨ lɔgɨnɨ a Galili ɨ yen kuʼ ɨghə.”

Bɨ Tsagɨ a Yeso a mbó Ɛrɔd ə

6Mbáʼ Branto a zúʼnɨ́ a məzen lá, mbitɨ ngə́ ŋwɔn wen a lá ŋwɔn bə Galili le? 7Mbáʼ wɛrə a zúʼnɨ́ ngə́ wɛrə a fú a mu mbuʼ za Ɛrɔd a kɨ́nə́ sáʼə lá, wɛrə a tságɨ́ ayi wəmbo ə. Ɛrɔd zɨmboŋ a tsí a Yerosalɛm a nkfu məwa. 8Mbáʼ Ɛrɔd a zɛ́nɨ́ a Yeso lá, wɛrə a dórɨ́ tsɛʼ nkan mbɨ́ʼ ngə́ wɛrə kə́ nkwɛ̌ ndǒ ndze zɨə. A kə́ nkwɛ̌ ndǒ ndze zɨ mbɨ́ʼ ngə́ a zúʼnə mbɨ́ʼ ayi, ntíʼə ntsíŋə́ nɨ ntəm ɨyi ɨtsum ngə́ á ghɨ anu zə yerɨnɨ-yerɨnɨ zə tse ghe. 9Ma lan, Ɛrɔd a bítɨ́ a Yeso nɨ ɨbítɨ tsə ghaʼnɨ, lá Yeso a keʼ chwɨgə. 10Bɨntumshe bə wi abɔʼnɨ bɨdiʼ bɨ Nyɔngɔŋ tsá ntɛ́m a ɨshi nkaŋ a Yeso a nye ndóm wu tɨŋə. 11Ɛrɔd bo bɨ bɨgwe ɨbyi tíʼə ngwerə nkə́ ngyígə́ ayi ɛ. Bo tíʼ ngwə́gɨ́ a tɔgɨ wu shiʼnɨ a nye wɛrə mbə́ mbyigɨ ayi a mbó Branto ghe. 12Branto bo Ɛrɔd tíʼ mbé bɨson nchwuʼnɨ a njwi məwa mbɨ́ʼ ngə́ nkfuʼ kwɛ́ ntsí a tɨtərɨ bo ghe.

Bɨ Chɛrɨ ɨsáʼ ngə́ bɨ mɨ Zhwitɨ a Yeso ghe

(Mat 27:15-26; Mar 15:6-15; Yoa 18:39–19:16)

13Branto a tíʼ ntɔ́ŋ ngǒtə bɨntumshe bə wi, bɨsáʼ bɨ alaʼ ndzɔŋ nchintɨ ɨbɛn bɨ alaʼ, 14ntiʼ soŋ a mbó bo ngə́, “Nɨ yén nɨ ŋwɔn wen a mbó me ɨ soŋ ngə́ a twɛfə nkə́ ngvúgɨ́ ndum a tɨtərɨ ɨbɛn ə. Ma sáʼ ayi a ɨshi bən, nkaʼ ze a vwonu a nye ɨnu tsa nɨ káŋnɨ́ ayi ɨwu lá. 15Ɛrɔd a sé kɨ ndzɛ́n a vwonu ɨyi, mbɨ́ʼ ngə́ a bə́ ntsagɨ ayi a mbó bɨgɨnə ghe. Ka ŋwɔn wɛnə a fə ayi anu zə tse mbáʼ be bɨ zhwitɨ ayi ɛ. 16Ma lan, ma mɨ shwom ayi, ɨ nyɛʼtɨ ayi ɛ.” 17#23:17 Ɨŋwaʼnɨ tsə lvuŋ tsə mɔʼɔ kwiʼtɨ nkaŋ 17 ngə́ a nkfu Nɨdorɨ nɨ Tsa-yɛʼnɨ nɨtsum Branto a kə́ fɨ́gə́ a táʼ ŋwɔn atsáŋ ngǎ a mbó bo ghe.

18Lá ɨnɔ ɨbɛn wa ɨtsum ɨ búgɨ́ ngə́, “Lwɛʼtɨ a ŋwɔn wiŋ ə! Nga a Barabasɨ a mbó bɨgɨ ə!” 19(Barabasɨ wen a bé ŋwɔn wa a bvúgɨ́nɨ́ ndum a mu alaʼ nkɨ njwitɨ ɨbɛn, bɨ nɨŋ ayi atsáŋ ə.)

20Branto a kə́ ndǒ nyɛʼtɨ Yeso ghe. Ma lan, wɛrə a kwíʼ ndɛ́gɨ́ ɨnɔ ɨbɛn wa. 21Lá bo sákɨ́ ngə́, “Kwemtɨ ayi ɛ! Kwemtɨ ayi ɛ!”

22Wɛrə a kwíʼ mbítɨ́ a mbó bo a nye nkfu tsa tsɨ kúʼnɨ́ tsi tárə́ ngə́, “Ngə́ ke le? Anu zə tɔmnɨnɨ za a ghɨnɨ a nɨ zɨŋə le? Ka ma ze aghan anu zə tse za a fanɨ mbáʼ bɨ chinɨ zhwitɨ ayi ɛ; ma lan, ma mɨ shwom ayi, ɨ nyɛʼtɨ ayi ɛ.”

23Lá bo kə́ nyəmə tsɛʼ nyəmnɨ nɨ nji tsɨ tən ngə́ kwemtɨ ayi ɛ. Anu za bɛrə kɨ́nə́ ndǒ lá a fúə. 24Adzaŋ məwen, Branto a tíʼ nchɛrɨ ngə́ á bɛrə ghɛn ngɨ adzaŋ za bo kɨ́nə́ ndǒ lá. 25Wɛrə a tíʼ fɨ́gɨ́ a ŋwɔn atsáŋ wa bo kɨ́nə́ ndǒ ngə́ á nyɛʼtɨ lá, wa a bvúgɨ́nɨ́ ndum nkɨ njwitɨ ɨbɛn lá, ntiʼ nga a Yeso a mbó bo adzaŋ za bo kɨ́nə́ ndǒ lá.

Bɨ Kwemtɨ a Yeso a Atɨ Abaŋnɨ-baŋnɨ ə

(Mat 27:32-44; Mar 15:21-32; Yoa 19:17-27)

26Bɨgwe ba lɔ́gɨ́ a Yeso ntiʼə ntíntə́ ngěn nɨ zɨə. Mbáʼ bo kɨ́nə́ ngěn lá, mbom a Samɔn, mbe ŋwɔn bə Sirin, mbáʼ a lónɨ́ afɔn nkwě ngěn a ntáʼmbagə wu wi ə. Bɨ fé ayi, njiʼ ayi nɨ abaŋnɨ-baŋnɨ za, wɛrə byɛʼ ntiʼə ndzɔŋə a Yeso ghe.

27Ɨnɔ ɨbɛn kə́ nkumə ndzɔŋə ayi; a tɨtərɨ bo, bəngye bə tse tsí ɨwu, ndánə́ ndzɛʼə nkə́ mbúgə́ sákə́ mbɨ́ʼ atú a Yeso ghe. 28Yeso a bə́ŋ ayi ɨ soŋ a mbó bo ngə́, “Bəngye bɨ Yerosalɛm, á nɨ keʼ mbúgə́ be mbɨ́ʼ atú azə, á nɨ mbúgə́ be mbɨ́ʼ ɨtumbəm ɨtsən nɨ ɨbɔ ɨbɨŋ ə. 29Mbɨ́ʼ ngə́, njwi yiŋə tsa mbáʼ ɨbɛn ghɨ sóŋ ngə́, ‹Abɔŋətú zə wi a nɨ zə afərɨ a mangye, zə mangye wa a sé jwi a mɔn abɔʼnɨ mangye wa a sé nyɔŋtə!› 30Lə mɨ be nkfu za mbáʼ ɨbɛn mɨ tíʼə soŋənə ngə́, ‹Mbám kumnɨ njiʼ awɨgɨ ə!› abɔʼnɨ ngə́, ‹Mɨntáʼ, lwɛʼ awɨgɨ ə!› 31Mbɨ́ʼ ngə́ be ɨdzaŋ ɨnu tso tsenə ɨ tɨ fuə mbáʼ atɨ a bvurɨnɨ zə shwe, anu a ghɨ tíʼ bé lə mbáʼ be atɨ məza a zom le?”

32Bɨ kɨ́ fɨ́gɨ́ bɨbuʼbənu bə tse bi bɨbá atsáŋ, ntsi nɨ njwitɨ bo, bo bɨ Yeso ghe. 33Bo ghɨnə ngɛ́n nkuʼ adiʼ zə tse, bɨ tɔŋə nɨ “Aghɔʼrə atú ə” ntiʼ nkwemtɨ a Yeso ɨwu, bo bɨ bɨbuʼbənu ba bi bɨbá, táʼ a bagɨ abó zə maʼə, táʼ wu mɔʼɔ a bagɨ abó zə ntə́ŋ ə. 34Yeso a sóŋ ngə́, “Tarɨ lɨgɨnɨ mɨbvu ɨma ghe! Ka bo zhi awa anu za bo ghɨnə ghe.”#23:34 Salms 22:18

Bo máʼ ndzɔʼ, a njí adzaŋ za bo mɨ yɛbtɨ ɨtsɛʼ wɛrə ghe. 35Ɨbɛn tɛ́mnkɨ́ ɨwu ndyíŋə́ anu za a kɨ́nə́ fúə le buŋ bɨntsagɨnɨ bɨ bə Yuda kə́ ngwerə ayi ɨ sóŋə́ ngə́: “A lóŋ ɨbɛn bə daŋ ə; á loŋ atuəmbəm azhi mbáʼ be a be Wa bɨ Zɔ́ʼnɨ́ wa Ŋwi a tsɔʼnə!”

36Bɨgwe ba kɨ́ ngwerɨ ayi ɛ: bo kɔ́ʼ ngɛn nga tɨntsəgɨ mɨluʼ wəmbo,#23:36 Salms 69:21 37ntiʼ nkɨ soŋ ngə́, “Be o be ɨfɔ bə Yuda, loŋ atuəmbəm azo ə.”

38Bɨ ŋwáʼnɨ́ mbán wu atú atɨ́ ngə́, “Lə nɨ ɨfɔ bə Yuda a wɛnə ghe.”

39Táʼ mbuʼənu wa wu mɔʼɔ, wa bɨ kwémtɨ́nɨ́ awa bɨ Yeso lá, a zɔ́m a wɛrə, mbitɨ ngə́, “Be o lá Wa bɨ Zɔ́ʼnɨ́ wa le? Loŋ atuəmbəm azo nkwiʼtɨ awɨgɨ ə!”

40Lá, wu mɔʼɔ wa a yágɨ́ ayi, mbitɨ ngə́, “O so a Ŋwi a mbɔ́gə́ le? O tsi a mu ndəŋndəŋ ngɨ́ʼ tso wɛrə ghe. 41Tsɛʼ a nkənu, tɨ tfǔ ndzo a nye mɨnu ma tɨ buʼnə; lá ŋwɔn wen ka a fə ayi anu zə tsɛrə ghe.” 42Ntiʼ mbə nkwiʼtɨ ngə́, “Yeso, waʼtɨ aghan a nkfu za o yenɨ tso ɨfɔ ghe.”

43Yeso a chwɨ́gɨ́ wəmbo ngə́, “A nkənu, ma kaʼ agho, ɨ sɨŋə wen, o mɨ tsi bɔgə a Baradiso ghe.”

Adzaŋ za Yeso a Kfónə́

(Mat 27:45-56; Mar 15:33-41; Yoa 19:28-30)

44A bé tso ntənɨ nyom, ndzumnɨ ɨ lám alaʼ za atsum ngɨ́ nkɔ́ʼ nkúʼ a nye bɨnyom bɨtárə́, 45abagɨ atsɛʼ zə nkwasə a mu Ndáŋwi zɨ Ngwi a wánɨ́ ɨbagɨ tsi bá ghe.#23:45 Ezikiɛ 26:31-33 46Yeso a búgɨ́ tsɛʼ nɨvwo nɨvwo ngə́, “Tarɨ! Ma nɨŋ azhwi azan a mu mbó gho ghe!” A mɛtɨnə a sóŋ məzen lá, ntsəmə.#23:46 Salms 31:5

47Tantso bɨgwe nkɨ wu fɨgɨnɨ a zɛ́n anu za a fúnɨ́ lá, mbontɨ a Ŋwi, ɨ soŋ ngə́, “Tsɛʼ a nkənu ŋwɔn wen a bé mbuʼ ə!”

48Mbáʼ ɨbɛn ba bɨ ghótɨ́nɨ́ adiʼ wa a ndzé anu za a kɨ́nə́ fúə lá, bo ghɨnə ndzɛ́n a məzen, ntíʼə nkwě ngěn a wa nɨ njwuʼ ɨtsa, ɨ nyɔŋ mbó ɨma a nɨgo bo a mu adzə́ŋnɨ ə. 49Ɨkaʼ ɨchi bo bɨ bəngye ba bɨ kɨ́nə́ ndzɔŋə ayi nchwuʼnɨ a Galili, bɨ tɛ́m nəghagɨ ndzě ɨnu tsenə ghe.#23:49 Alukasɨ 8:2-3

Adzaŋ za bɨ Twə́ŋnɨ́ a Yeso ghe

(Mat 27:57-61; Mar 15:42-47; Yoa 19:38-42)

50Yosɛb, wa a lónɨ́ a ntáʼmbagə Arimatia a mu Yudiya, a bé ŋwɔn wu shiʼnɨ, nkə́ ngɨ̌ ɨnu tsa tsɨ tɛ́mnɨ́nɨ́ a ɨshi ɨmɨgɨ Ŋwi ə. Wɛrə a kə́ ntsǐŋ nkfu za Nɨfɔ nɨ Ŋwi na ghɨnɨ yiŋə. 51A báʼtɨ́ mbe be táʼ ŋwɔn wu mɔʼɔ abɔʼnɨ Ngaŋ Sáʼ Abyɛn lá, nton ayi anu za bɛrə bémnɨ́nɨ́ nkɨ ngɨ lá. 52Wɛrə a ghɛ́n a mbó Branto, mbitɨ akfú a Yeso wəmbo ə. 53Mbáʼ a ghánɨ́ lá, a tíʼ shíʼsɨ́ a zɛrə, ndwɛrɨ a mu atsɛʼ atɨŋndvuŋ zə fúə. Wɛrə a nyɔ́ŋ a mu nɨshe na nɨ bénɨ́ ɨfúʼ wa bɨ tóŋnɨ́ a tɨtərɨ aláŋsə́ ngɔʼ ə. Bɨ láʼnə mbvurɨ a ŋwɔn tse ɨwu tɨ nyɔŋə. 54A bé njwi za bɨ kɨ́nə́ nkyáŋtɨ́ ɨnye á Njwi Alaʼ Ŋwi ɨ tiʼ ndə̌.

55Bəngye ba bɨ kɨ́nə́ ndzɔŋə a Yeso nchwuʼnɨ a Galili lá, bɨ zɔ́ŋ ndzɛ́n nɨshe na, abɔʼnɨ adzaŋ za Yosɛb a nyɔ́ŋnɨ́ akfú za a mu nɛrə ghe. 56Bo tíʼ mbən awa, ngɛn nkyaŋtɨ bɨnyuʼtə abɔʼnɨ mɨvwurɨ mɨ ɨfɔgɨ wu shiʼnɨ a ndzɔ́ʼ akfú za ɨwu ə.

A benə a Njwi Alaʼ Ŋwi, bɛrə zhwitɨ ndzɔŋ adzaŋ za Nyɔngɔŋ a sóŋnə́.#23:56 Ɛksɔdɔsɨ 20:10

Currently Selected:

Alukasɨ 23: MNT

Highlight

Copy