Yoane 9

Yeso a Tsuʼ a Ŋwɔn wa bɨ Jwínɨ́ a nye Ɨfɨgɨ ə

1Mbáʼ Yeso a kɨ́nə́ ntɛ́mə́ ngěn, wɛrə a zɛ́n a ŋwɔn wa bɨ jwínɨ́ a nye ɨfɨgɨ ə. 2Bɨyɛʼ ɨbyi bítɨ́ ayi ngə́, “Ndiʼ Aŋwaʼnɨ, a nɨ ɨbvu ɨwa wa ɨ ghɨnɨ bɨ jwi a ŋwɔn wen a be ɨfɨgɨ ə, ɨbvu ŋwɔn wen kə wu ta ɨyi bo nɨmi ɨyi le?”

3Yeso a chwɨ́gɨ́ ngə́, “A sé bé ngə́ ŋwɔn wen a ghɨ́ ɨbvu, kə ta ɨyi bo nɨmi ɨyi ɛ. A fɨgɨ lá taŋ á bɨ ze adzaŋ za mɨtən mɨ Ŋwi faʼnə wə ɨnye ə. 4Mbáʼ bɨgɨnə bvurɨnɨ ntsi nəzhwɨgɨnɨ lá, bɨgɨnə tsi nɨ ɨ zagɨ faʼnə afaʼ a ŋwɔn wa a tságɨ́nɨ́ aghə; ɨtfúʼ ɨ fɨ́ŋə́ ngyíŋə́ mbáʼ ŋwɔn a chinɨ keʼ bə faʼə. 5Adzaŋ za ma bvurɨnɨ ntsi atuəshe lá, ma nɨ nkaʼ a mbó atuəshe.”

6Mbáʼ a sóŋnɨ́ a məzen lá, ntfugɨ mɨtwe a tɨshe, ntɔbtɨ atətsáʼnɨ́ ɨwu, ndɔgɨ atətsáʼnɨ́ za ndzɔʼ ɨmɨgɨ mɨ ŋwɔn wa ɨwu, 7ɨ soŋ wəmbo ngə́, “Ghɛn sugɨ ɨshi ɨgho a mu atsum a Silom ə.” (Ɨ diʼ lá ngə́ “Tyigə”). Ma lan, ŋwɔn wa a ghɛ́n sugɨ ɨshi ɨyi ɨwu ntɨ bɨŋ ə, ngyiŋə ndzě ɨdiʼ ə.

8Ngaŋ nɨbarə abɔʼnɨ ɨbɛn ba bɨ kwɛ́nə ndzɛ́n ayi tso ŋwɔn wa a lɔ́ntɨ́nɨ́ ɨdzúm, tíʼ mbítɨ́ ngə́, “A se ŋwɔn wa a kɨ chinə shíʼtə́ nchyɛ̌ ndɔ́ntɨ́ ɨdzúm lá a wen be le?”

9Bə tse chwɨ́gɨ́ ngə́, “A nɨ zɨə,” lá bə mɔʼɔ chwɨ́gɨ́ ngə́, “Ngáŋ a se zɨ be; a fi ayi ɨ finə.” Ma lan, ŋwɔn wa zɨmboŋ a sóŋ ngə́, “Ma lá wɛrə ghe.”

10Bo bítɨ́ ayi ngə́, “A ghɨ ake o chi bə ze ɨdiʼ tɨtsɔŋnɨ le?”

11Ŋwɔn wa a chwɨ́gɨ́ ngə́, “Ŋwɔn wa bɨ tɔ́ŋnə́ ngə́ Yeso lá a lo ntɔbtɨ atətsáʼnɨ́ ndzɔʼ ɨmɨgɨ ɨman ɨwu, ɨ soŋ a mbó me ngə́ á ma ghɛn atsum Silom ɨ sugɨ ɨshi ɨghan ɨwu ə. Ma lan, ma lo ngen. Tsɛʼ mbáʼ ma lonɨ sugɨ ɨshi ɨghan lá, ɨmɨgɨ ɨmə ŋaʼnə.”

12Bo bítɨ́ ayi ngə́, “A me?”

A chwɨ́gɨ́ ngə́, “Ka ma zhi aghə adiʼ za a tsinə.”

Bə Farisao Tsɔʼ Aku adzaŋ za bɨ Tsanɨ Ntsuʼ Ɨfɨgɨ za

13Bɨ tíʼ ndɔgɨ a ŋwɔn wa a fómnɨ́ mbé ɨfɨgɨ lá ngɛn nɨ wɛrə a mbó bə Farisao ghe. 14Ze azo, njwi za Yeso a tɔ́btɨ́nɨ́ atətsáʼnɨ́ za ɨ ŋaʼ ɨmɨgɨ mɨ ŋwɔn wa ɨwu lá, ɨ bé Njwi Alaʼ Ŋwi ə. 15Bə Farisao tíʼ bə nkwiʼ mbitɨ adzaŋ za ɨmɨgɨ ɨmyi tsánɨ́ ɨ ŋaʼnə. Ŋwɔn wa a sóŋ a mbó bo ngə́, “A lo ndzɔʼ atətsáʼnɨ́ a ɨmɨgɨ me, ma tiʼ ngɛn ɨ sugɨ ɨshi ɨghan, ntiʼ ndze ɨdiʼ ə.”

16Bə Farisao ba bə tse sóŋ ngə́, “Ŋwɔn wa a lonɨ ngɨ a məzen a chi keʼ a mbó Ŋwi lo, mbɨ́ʼ ngə́ ka a ndzúʼnə́ ayi a nyɔngɔŋ Njwi Alaʼ Ŋwi ə.”

Lá bə mɔʼɔ bítɨ́ ngə́, “Be ngaŋ ngɨ mɨbvu, a ghɨ ɨbə́ŋ ɨnu tsə yerɨnɨ-yerɨnɨ tsen lá ɨ nə́ le?” Ayɛbtɨ a tíʼ ntsí a tɨtərɨ bo ghe.

17Ma lan, bə Farisao tíʼ nkwiʼ mbə mbitɨ a ŋwɔn wa ngə́, “Mbáʼ o soŋnɨ ngə́ a ghɨ o ze ɨdiʼ lá, o soŋ ngə́ ke mbɨ́ʼ ayi le?”

Ŋwɔn wa a chwɨ́gɨ́ ngə́, “A nɨ ntom Ŋwi ə.”

18A tsánɨ́ a mbó bɨsáʼ bɨ ɨlaʼ bɨ bə Yuda a nɨ́ŋ mɨntəm ɨma ɨwu ngə́ a kwɛ́nə fɨ́gɨ́, ɨmɨgɨ ɨmyi tiʼ mbə ŋaʼnɨ, ma lan, bo tɔ́ŋ a tarɨ bo má ŋwɔn wa ɨmɨgɨ ɨmyi ŋáʼnɨ́nɨ́ lá, 19ntiʼ mbitɨ awa ngə́, “A nɨ mɔn ɨwən wu mbáŋnɨ́ a wen le? Nɨ soŋ ngə́ nɨ jwí ayi a be ɨfɨgɨ; a tiʼ ntsa lá ɨ nə́ a tiʼə ndzě ɨdiʼ tɨtsɔŋnɨ lá le?”

20Ta ɨyi bo nɨmɨ ɨyi chwɨ́gɨ́ ngə́, “Bɨgɨ zhi ngə́ a nɨ mɔn ɨwɨgɨ wu mbáŋnɨ́ a wiŋ ə, nkɨ mbe ngə́ bɨ jwí ayi a be ɨfɨgɨ ə. 21Lá adzaŋ za a tsanɨ ntiʼə ndzě ɨdiʼ tɨtsɔŋnɨ bɨgɨ se zhi, nkeʼ kɨ nji a ŋwɔn wa a ghɨnɨ ɨmɨgɨ ɨmyi ŋaʼnə. Bitɨnə ayi ɛ; a kwinə ghe, a chi kɨ chwɨgɨ a mbó atuəmbəm azhi ɛ!” 22Ta ɨyi bo nɨmi ɨyi sóŋ adzaŋ məwen lá mbɨ́ʼ ngə́ bo kə́ mbɔ́gɨ́ ɨmɨgɨ mɨ bɨsáʼ bɨ ɨlaʼ bɨ bə Yuda, ba bɨ kwɛ́nə mbemnɨ ngə́ be ŋwɔn tse a nɨŋ ntəm ɨyi ɨwu ngə́ Yeso a nɨ Wa bɨ Zɔ́ʼnɨ́, bɨ fɨgɨ ayi ɨ kwiʼ bə kon a ndáŋwi bə Yuda ghe. 23Nə nɨ anu za a ghɨ́nɨ́ ta ɨyi bo nɨmi ɨyi tiʼ soŋ ngə́, “A kwinə ghe, bitɨnə ayi ɛ!”

24A nye nkfu tsa tsɨ kuʼnɨ tsi bá, bo tɔ́ŋ a ŋwɔn wa bɨ jwínɨ́ a nye ɨfɨgɨ lá a bə ngyen a mbó bo, bo soŋ wəmbo ngə́, “Kaʼ a ɨshi Ŋwi ngə́ o mɨ soŋ nkənu ə! Bɨgɨ zhi ngə́ ŋwɔn wen wa a tsuʼnɨ agho lá a nɨ ngaŋ ngɨ mɨbvu ə.”

25Ŋwɔn wa a chwɨ́gɨ́ ngə́, “Kə a be ngaŋ ngɨ mɨbvu kə ngáŋ muŋ, ka ma zhi aghə; táʼ anu wa ma zhinɨ a nɨ ngə́, ma fɨ́gə, tɨtsɔŋnɨ ma chi ze ɨdiʼ ə.”

26Bo bítɨ́ ayi ngə́, “A kɨ ghɨ lá ake a ɨnye gho ghe? A kɨ tsa lá ɨ nə́ ntsuʼ ɨfɨgɨ ɨzo ghe?”

27A chwɨ́gɨ́ a mbó bo ngə́, “Ma kwɛnə soŋ a mbó bɨŋ ə, nɨ ton awən a njwíʼtə́ ghe. Nɨ lǒ ntiʼ kwiʼ bə zuʼ anu zə wu lá ngə́ ke le? Nɨ lǒ kɨ be bɨyɛʼ ɨbyi le?”

28Bo zɔ́m ayi ɨ soŋ ngə́, “O nɨ ngyɛʼ mba yirɨ ə, lá bɨgɨ be bɨyɛʼ bɨ Mǒse ghe. 29Bɨgɨ zhi ngə́ Ŋwi a ghám a mbó Mǒse ghe; lá mbɨ́ʼ a wiŋ ŋwɔn, ka bɨgɨ bi nji awɨgɨ adiʼ za a lonɨ ɨwu ə!”

30Ŋwɔn wa a chwɨ́gɨ́ ngə́, “Məzen a nɨ anu zə kɨʼnɨnɨ be tɨsɨŋə! Ka nɨ zhi awɨŋ adiʼ za a lonɨ ɨwu ə, lá a tsúʼ ɨfɨgɨ ɨzə! 31Bɨgɨ zhi ngə́ ka Ŋwi a njwíʼtə́ ayi a mbó ngaŋ ngɨ mɨbvu ə; wɛrə a zhwíʼtə́ a mbó ɨbɛn ba bɨ diʼnɨ mbɔm zɨ shiʼnɨ a mbó zɨ nkə́ ngɨə a za wɛrə lɔnə ghe. 32Nchwuʼnɨ mbáʼ mbyi ɨ bíʼnɨ́nɨ́, bɨ láʼnə nkeʼ zúʼ ngə́ ŋwɔn tsɛrə a ŋáʼnə ɨmɨgɨ mɨ ŋwɔn tse wa bɨ jwínɨ́ ayi a nye ɨfɨgɨ ə. 33Ŋwɔn wen a be tú lá a mbó Ŋwi lo, muŋ a chi keʼ anu zə tse ghɨə.”

34Bo chwɨ́gɨ́ wəmbo ngə́, “Bɨ jwí agho nkɨ nkugɨ a mu ɨbvu ə, o chi diʼ awɨgɨ le?” Bo tíʼ ntyiŋ ayi ntsagɨ abyɛn ndáŋwi bə Yuda ghe.

Adzaŋ za Ŋwɔn a Chinɨ be Ɨfɨgɨ a Mu Azhwi ə

35Mbáʼ Yeso a zúʼnɨ́ anu za a fúnɨ́ lá, wɛrə a tsɔ́ʼ aku a ŋwɔn wa ndzɛn ayi, ntiʼ mbitɨ ayi ngə́, “O nɨŋ ntəm ɨgho a nye Mɔn Ŋwɔn le?”

36Ŋwɔn wa a chwɨ́gɨ́ ngə́, “Tə̧, Mɔn Ŋwɔn wen a lá ɨwa, taŋ á ma chi nɨŋ ntəm ɨghan wə nye le?”

37Yeso a sóŋ wəmbo ngə́, “O kɨ zɛnə ayi ɛ, a kə́ ngámə́ wɛrə a mbó gho tɨtsɔŋnɨ ə.”

38A tíʼ soŋ a mbó Yeso ngə́, “Maʼmbyí, ma nɨŋ ntəm ɨghan wə ɨnye.” Ntiʼ nkwem mɨkwiʼtɨ ɨmyi a ɨshi Yeso ghe.

39Yeso a sóŋ ngə́, “Ma yén a mu mbyi wen a sáʼə, taŋ á bɨfɨgɨ chi zɛn ɨdiʼ, á ba bɨ zɛ́nɨ́ ɨdiʼ bəŋ bɨfɨgɨ ə.”

40Bə Farisao bə tse ba bɨ tsínɨ́ ɨwu zúʼ a məzen, ntiʼ mbitɨ ayi ngə́, “Bɨgɨ kwaʼtɨ ngə́ o so sóŋə́ lá ngə́ bɨgɨ kɨ mbe bɨfɨgɨ ə, kə ndé?”

41Yeso a chwɨ́gɨ́ ngə́, “Nɨ be be bɨfɨgɨ muŋ ka nɨ vwo awɨŋ ɨsáʼ mbɨ́ʼ ngə́ nɨ ghɨ ɨbvu ə; lá mbáʼ nɨ kaŋnə ngə́ nɨ zě ɨdiʼ lá, nɨ bvurɨ nkɨ ngvo ɨsáʼ tsɛʼ vwonə.”

Currently Selected:

Yoane 9: MNT

Highlight

Copy