Madiu 7

Yeisu ina vatulúkwana koya goi: Sedao adi takínona manuna

(Luke 6:37-42)

1Tuwaina kana,

‘Taabu semiyao kotaakinōidi kidi toogoyoidi, govila bei Yaubada itakinoimi komi toogoyoimi. 2Moe moitamo. Nakonakae tomota kotakinoidi kidi toogoyoidi, e Yaubada nakae bei itakinoimi komi toogoyoimi. O kada, “Nakonakae imi guinuwa tomota yaidi, e Yaubada nakae bei iguinuwe yaimi.”

3E manakae? Semiyao idi goyo giyaidi mosamosa giyaina nakae matadi goi koogitedi go, komi imi goyo gagaidi alovagabugabu nakae toinimi matami goi ikaaiyaka geya kogiteyeta ae? 4Komi manakae semiyaoyadi kolatuwokoidi kami, “Kutagonēgu mosamosa giyaina matam goi akabi”? Go alovagabugabuyana toinimi matami goi nava ikaaiyaka! 5Komi todedevimi polapola! Mainao alovagabugabuyana matami goi kokābi bei itoboinemi kogita dókana namlieta baige mosamosayana giyaiina semiyao matadi goi kokābi. Moe nakae semiyao kokamamaetalidi.

6Kaga kimaasabaina Yaubada umana taabu weiniya koovinīdi, govila bei situgavila sikanimi. Imi esaesa taabu koolavēdi bao matadi goi, govila bei sivabaibailidi. Tomota Yaubada valena sikatae nakae; taabu kovatuulukōidi, govila bei valayana sitagiwoi o sibugoyaimi.’

Yeisu ina vatulúkwana koya goi: Awanoi manuna

(Luke 11:9-13)

7Tuwaina Yeisu kana,

‘Kokawanōi Yaubada yaina, e bei ivinimi. Kaga kokiseeyeseye Yaubada yaina goi koolusāle, e bei kobabane. Kokaukeeyakēya, e Yaubada komi yaimi totom bei ikatupáeve. 8Moitamo. Tokawanoi liliudi yaidi Yaubada ikaiguyau. Tolusala liliudi bei sibabane. Tokaukeyakeya liliudi yaidi Yaubada totom bei ikatupáeve. 9Avatauwa komi yaimi goi ma natuumiyao go, neta awoinu sikawanoiye, manakae? Gurewa bei kovinidi? Geya ae? 10O nakona íyana sikawanoiye go, manakae? Moteta bei kovinidi? Geya ae? 11Tauna komi toogoyoimi go, koyagoi manakaemi yabobona dedevidi natumiyao kovinidi ae? Go Tamada guma yábana todedevina, tauna neta kokawanoi Tauyana yaina, yabobona dedevidi moitamo bei ivinimi.

12E tauna nakonakae latuwomi bego tomota siguinuwe yaimi, e komi nakae tauyadi yaidi kogimiguinūwe. Ame adi vatulúkwana adi masi.’#Luk 6:32.

Yeisu ina vatulúkwana koya goi: Vatulúkwana enao aiyuwo manudi

(Luke 13:24)

13Tuwaina Yeisu kana,

‘Kedawowotu totomna paaevaina. Tuwo ana siu be ana ketoiya sikakapu go, kedawowotuyana goi aba vailai kobabane. Totomyana goi boda badabadaidi bei sisiu. Tauna komi kedavapola totomna giyaina goi kosīu. 14Yawana vata ana kenao kedavapola nakae totomna giyaiina. Tuwo ana siu be ana ketoiya moumoudi go, kedavapolayana goi yawana vata bei kobabane. Ago totomyana goi taudi adi taiyuwomo bei sisiu.’

Yeisu ina vatulúkwana koya goi: Tokabivalavala polapola be tonumisa polapola adi kaba kinana

(Luke 6:43-46; 13:25-27)

15Tuwaina Yeisu kana,

‘Ami dodōkana! Tokabivalavala polapola bei sima; adi kaigigita kaitoowosidi nakae. Kom go vatau? Kidi sinaedi weiniya woliwoli nakae latuwodi sikanimi! 16Tauyadi keuwoidi goi bei kokinanedi. Manakae? Itoboinemi taliboibo goi kilekile koguwe? O goitagoita goi keukeu koguwe? Geya ae? 17E alova nakae. Alova tamo tamo dedevidi, keuwoidi dedevidi sikeuwoedi go, alova goyogoyoina keuwoina goyogoyoina ikeuwoe. 18Alova dedevina geya itoboineyeta keuwoina goyogoyoina ikeuwoe. E alova goyogoyoina nakae, geya itoboineyeta keuwoina dedevina ikeuwoe. 19Neta ava kalova geya ikeuwodokoneta, alovayana tatalai talave yeu goi tagabu.#Mad 3:10; Luk 3:9. 20Tauna tauyadi keuwoidi goi itoboinemi kokinanedi nakae alova keuwoidi goi takinanedi.#Mad 12:33.

21Tomota maniyedi sikatomooyaegumo Yaubada ina bodayauwo geya sisiukoidita bego ikalibubudi unana ina nuwonúwana geya siguinuweyeta. Go sem avatauwa neta Tamagu guma yábana ina nuwonúwana siguuinuwe, bei sisiu. 22Amo maliyalinayana goi#7:22 Amo maliyalinayana goi: Ame nakona Yaubada ina tuta bei tomota itakinoidi. maniyena tomota bei silatuwokoigu kadi,

“Ima Tomoya, kai yoim goi badabadaidi kaguuinuwedi.”

23Amo tutayana tauyadi bei alatuwokodokoidi kagu,

“Yau geya ayagoimita; komi geya yau guna bodao geya. Komi tokapipilova, kosīya!”’#Sam 6:8.

Yeisu ina vatulúkwana koya goi: Vada ana toyówana adi taiyuwo tetelidi

(Luke 6:46-49)

24Tuwaina Yeisu kana,

‘Tauna avatauwa neta yau guna livalayadi sinovedi be nakae sisabokuuliyedi, e tauyadi koroto tonanamsa nakae. Korotoyana ina vada gurewa yatana goi iyowo. 25Niga kúwana ikúwana, e mluwa idau, nakae yágira itowo vadayana goi ikona go, geya iyaobasiyeta. Bogina koyagoi. Gurewa yatana goi iyowo.

26Avatauwa neta yau guna livalayadi ame sitaiyakekedi go, geya sisabokuliyedita, e tauyadi koroto yaaluwoina nakae. Korotoyana ina vada ediédila yatana goi iyowo. 27Niga kúwana ikúwana, e mluwa idau be nakae yágira itowo vadayana goi ikona, tuwo vadayana iyaobasi isou, ivatuligeligei toina.’

Yeisu ina guinuwa be ina bóbwara goi Yaubada ina togaga ivagitakoe

(Madiu 7:28—10:42)

Yeisu ina vatulúkwana pasina boda sikainaopa

28Tutayana Yeisu ina bóbwara ilukavavedi, e ina vatulukwanayana pasina boda sikainaopa, 29kadi,

‘Tauyana ina vatulúkwana geya kada kidi Yaubada ina Katukeda ana tovatulukwanayao nakae geya, go sem mana lovina ivaatulúkwana.’#Mak 1:22; Luk 4:32.

Currently Selected:

Madiu 7: GVS

Highlight

Copy