Madiu 20
20
Livalakaibala toni tánuwo ina topaisewayao manudi
1Tuwaina kana,
‘Moe moitamo. Vaiwówana ana kaiguyau ituli aiyako sinaena goi. Aiyakoyana tétala ame nakae:
Koroto tayamo ikaaiyaka, tauyana toni poyapoya. E nobuyana nava matagougouna itaoya ina asa goi topaisewa ilusala bei ina tanuina goi sipaisewa. 2E maniyedi ibabanedi ilatuwokoidi idigo kana,
“Neta ame kopaisewa, mani tayamo goi bei aemaisimi.”
E kidi sitagona, tuwo ietunedi sina ina tanuwoyana goi sipaisewa.
3Níyala tupwana ituko, aiyuwoina tauyana itaoya ina asa goi bego topaisewa tuwaina ilusala. Ima ikandobala, tomota maniyedi igitedi moteo goi sikaiyako beso. 4Tuwo amo tauyadi ilatuwokoidi idigo kana,
“Komi nakae kōna guna tánuwo kopaisēwa go, ava maisa itoboine, bei avinimi.”
E moitamo sitagona, tuwo sina ina tánuwo goi sipaisewa.
5E dine goi be nakae lavilavi goi nakae. Korotoyana itaoya ina asa goi nakae iguinuwe.
6E lavilavi toina goi tauyana itaoya, ina asa goi topaisewa tuwaina ilusala. Ilusala, maniyedi ibabanedi sikaiyako beso. Tuwo ilatuwokoidi kana,
“Kaga unana maliyalina ana madabokina komi ameko goi kokaiyako beso?”
7Tauyadi sidigo kadi,
“Geya, unana geya vatau tayaamo ilatuwokoima kapaisewa.”
Korotoyana idigo kana,
“Komi nakae kotāoya kōna guna tánuwo goi kopaisēwa.”
Tuwo moitamo sina sipaisewa.
8E níyala giyakainava isaliu, toni tánuwo ina paisewa ana tovakumgo iduduwe ima ilatuwoko idigo kana,
“Topaisewa kududuwēdi sima kuemaisīdi go,#Vin 19:13; Atu 24:15. im emaisa továmliya goi kuvatōwo ina tovakumgo goi kulukavāve.”
9Tuwo moitamo topaisewayadi iduduwedi sima go, tovamliyayadi iemaisidi, mani tayamo. 10Ago tutayana tovakumgoyadi sima, sinuwonúwana bego tuwaina bei sikabi go, geya; adi maisa tauna nakae. Tamo tamo mani tayamo sikabi. 11Go tutayana adi maisa sikabi, e sikaukulukúluwo toni poyapoyayana yaina 12sidigo kadi,
“Kai maliyalina ana madabokina goi paisewa gagaina kaguuinuwe be nakae níyala gagaina goi kapaaisewa go, kidi továmliya awa tayamo toito goi sipaisewa. Ago kom im guinuwa yaima goi madabokima kavavasa.”
13E kina toni poyapoyayana tokaukulukúluwo tayamo ilatuwoko kana,
“Siyagu, geya abagalimta geya. Kom toinim kutagona mani tayamo manuna kupaisewa ae? 14Im mani moe kwābi, kūna. Go yau latuwogu bego továmliya tamo tamo adi mani avinidi nakae bogina avinimi. 15Manakae? Itoboinegu toinigu konagu manuna alovina, gea geya? O nakona yau tokaiguyau, tauna kuvakipikipi unana kom topiki?”
16Tauna nakae kidi ame tuta toosobudi, e nava bei toolagaidi go, kidi ame tuta toolagaidi, e nava bei toosobudi.’#Mad 19:30; Mak 10:31; Luk 13:30.
Yeisu ina kámasa ana talavaita aitonina
(Maki 10:32-34; Luke 18:31-34)
17Yeisu kai ina yawou aiyuwo ikabima, katuko kanonoina Yerusalema manuna go, enao goi ametava ilatuwokoima, idigo kana,
18‘Konovēgu. Ame tuta tatukotuko Yerusalema manuna go, maeko goi tomota tayamo bei itaoya Gagaidi be nakae Yaubada ina Katukeda ana tovatulukwanayao nimadi goi, gobe Tauyana sitakino ámasa goi. 19Sitakino ikavava, bei sikabi, nimadi goi siyato. Ago kidi Totuyoyowoyadi bei sivaponuponuye, sidabi be nakae kerose goi situpatuko ikámasa. Ikámasa go, maliyalina aitonina goi Yaubada ikaitáoe.’
Yemesa be Iyoni sinadi ina kawanoi
(Maki 10:35-45)
20E tuwo Sebedi monena ma natunao sima Yeisu yaina go, vavinayana aena ivatugúyala; latuwona ikawanoi tayamo dogoi manuna.
21‘Kaga latuwom?’ Yeisu kaena.
Vavinayana idigo kana,
‘Tutayana im tuta alibúbuna, kom kulovīna bego yau natugowo adi taiyuwo situsobu kébana dedevidi kikim, tayamo kakataim go, tayamo kekelim.’
22Go natunao adi taiyuwo kina Yeisu ilatuwokoidi idigo kana,
‘Imi kawanoi ana yagoina komi geya koyagoiyeta. Gedageda keigaina goi bei anim go, manakae? Komi nakae itoboinemi konim gea geya?’
Kidi sidigo kadi,
‘Itoboinema kanim.’
23Yeisu idigo kana,
‘Moitamo, yau guna keiga goi bei konim. Go yau geya agu lovinamo alovina bego avatau kakataigu o kekeligu goi itusobu, go sem aba tusobuyadi Tamagu bogina ikatubayasidi tauyadi kiinavaidi manudi.’
24Ago tutayana kai tovatotówana yawou kanove kaga semao sikawaanoiye, e kaegamogamoguyedi. 25E kina go Yeisuyana itaoya, kai yawou aiyuwo iduduwema kama, idigo kana,
‘Bogina koyagoi bego Totuyoyowo adi tolovinayao siilovina makimaki Totuyoyowoyadi yaidi goi. Nakae toolagaidi idi lovina toogagaina siguuinuwe makimaki tomota yaidi.#Luk 22:25. 26Ago komi yaimi moe nakae geya, go sem avatauwa yaimi goi bego toolagaidi, tauyadi itoboinedi komi ami tovaitayao nakae silovina.#Mad 23:11; Mak 9:35; Luk 22:26. 27Nakae avatauwa yaimi goi bego toosakidi, tauyadi itoboinedi idi lovina goi komi yaimi imi nakae. 28Tomalatomota nakae, tauna komi nakae itoboinemi. Tauyana ima geya kada bego tomota sivaite geya, go sem ima bego tomota ivaitedi. Yawoina moe tomota adi kaba tateta go, yawoinayana toinina ikasale ámasa goi, tomota liliudi adi katumapu.’#Tai 2:14; 1Ti 2:6.
Yeisu tokebo adi taiyuwo ikidedeevinedi tetelina
(Maki 10:46-52; Luke 18:35-43)
29Niga Yeisu kai ina tovatotowanayao taiyao kataoya, Yeriko kakalave kanonoina go, boda gagaina Yeisu sisabookuliye. 30Ago tokebo adi taiyuwo enao kikina goi siitusobu go, vala sinove bego Yeisu iketoiya ivaatabale. Tuwo siiduduwo sidigo kadi,
‘Tomoya Devida tubuna, kunuwokapisiyēma!’
31Go kidi bodayadi siibowoidi kadi,
‘Komi komaigāu!’
Go kidi tokeboyadi tuwaina siiduduwo kadi,
‘Tomoya Devida tubuna, kunuwokapisiyēma!’
32Tuwo Yeisu itaoya, adi taiyuwokova iduduwedi sima idigo kana,
‘Kaga go bei avekoimi?’
33Tuwo tauyadi sidigo kadi,
‘Tomoya, bego matama sidedevina.’
34E tuwo Yeisu mana nuwokapisi ibisibala adi taiyuwokova matadi ibisikonedi go, mainao sigita dókana, e sitaoya sivatowo Yeisu sisabokuliye.
Currently Selected:
Madiu 20: GVS
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
