Madiu 16

Parisi latuwodi aba kinana go, Yeisu ina katumátala adi isti manuna

(Madiu 12:38-41; Maki 8:11-21; Luke 12:54-56)

1maniyedi sima Yeisu sivakakone sidigo kadi,

‘Aba kinana tayamo kuvatulukōima#Luk 11:16. bei kayagoi kom moitamo Yaubada goi kuma.’

2E Yeisuyana idigo kana,

‘Lavilavi tutayana níyala isaliu neta yábana isabenínima, komi kami,

“Itomo bei kelavaboina.”

3Go nobuyana neta gaota isabenínima, e bou itaoya, komi kami,

“Ame bei kelavagoyo.”

E yábana ana kaigigita itoboinemi kodovatusidi bei ana yagoina koyagoi go, kaga kaga sisowóduwo tuta ame goi Yaubada iguuinuwedi adi kaigigita geya itoboinemita kodovatusidi bei adi yagoina koyagoidi! 4Tomota neta goyo sinadi be nakae Yaubada situgavile, e aba kinana siiyaledi. Ago Yaubada aba kinana tayamo toito bei ivinidi go, tuwaina geya. Aba kinanayana moe Iyona.’#Iyo 1:17; Luk 11:29.

Ibóbwara ikavava, itaoya ikalavedi.

5Yeisu kai ina kanuwoilave bego kakabi.

6E kina go Yeisuyana idigo kana,

‘Ami dodōkana kidi Parisi be Sadusi idi goi.’#Luk 12:1.

7Go ina livala katainasiye, e taumava kabobóbwara kama,

‘Nakona amo nakae ilatuwokoida unana kita beredi tanuwoilave.’

8E kina Yeisuyana bogina iyagoi manakaema kanuwonúwana, tuwo idigo kana,

‘Komi to moitamo, geya konumisedokoiguta! Kaga pasina amitava kobobóbwara bego geya ami beredimo? 9Nava geya koyagoiyeta ae? Manakae? Boi beredi ainima goi tomota ainima tausani (5,000) avakanidi, moe bogina konuwoilave ae? Nakae valala bayao goi kododoidi, bogina konuwoilave aivina sikesa ae?#Mad 14:17-21. 10Aiyuwoina boi beredi ainima aiyuwo goi tomota aivasi tausani (4,000) avakanidi, moe bogina konuwoilave ae? Nakae valala bayao gagaidi goi kododoidi, bogina konuwoilave aivina sikesa ae?#Mad 15:34-38. 11Komi manakae geya koyagoiyeta bego beredi manuna geya abobwareta, go sem kagu, “Ami dodōkana Parisi be Sadusi idi isti goi.”’

12Amoko goi bogina kayagoi geya beredi toina manuna Yeisu idigodigo geya, go sem latuwona Parisi be Sadusi idi vatulúkwana kavakilisidi.

Pita ina kamoitamo Yeisu manuna

(Maki 8:27-38; Luke 9:18-27)

13E Yeisu kai ina tovatotowanayao taiyao kana Sesariya Pilipai ana dadava. Amoko goi Yeisu ilumadadema idigo kana,

‘Tomota sibobóbwara koonovedi manakaedi sinuuwonúwana manuna?’

14‘Tomota maniyedi sidigodigo bego Tauyana tayamo’, kai kaema.#Mad 14:1-2; Mak 6:14-15; Luk 9:7-8.

15Go Yeisu idigo kana,

‘Go komi manakaemi konuwonúwana yau manugu?’

16E Saimoni idigo kana,

‘Kom , Yaubada maa yawoina Natuna!’#Iyo 6:68-69.

17E kina Yeisu idigo kana,

‘Saimoni, Iyona natuna, moe tomota geya sivatulukoimta, go sem Tamagu guma yábana ivatulukoim. Tauna am dedevina bogina kubabane. 18E ame yau alatuuwokoim kunōve: Kom Pita#16:18 Pita: Pita ana yagoina moe gurewa go, Pita be lasáuna da Giriki niyadi adi taiyakeka nakae. o kada, “Lasáuna.” Go moe lasaunayana yatana goi bei yau guna totugugunayao alamgogoidi ayatoidi nakae lasáuna neta yatana vada tayowo ikasa. Ago ámasa geya itoboineyeta guna totugugunayaoyadi itogagasavedi. 19Ame tuta lovina avadamane kom goi bego goi kom mam lovina. Tauna kaga poyapoya goi kusaanabode Yaubada yábana goi nakae isanabode. Aiyuwoina kaga poyapoya goi kuutagone Yaubada yábana goi nakae itagone.’#Ais 22:22; Mad 18:18; Iyo 20:23.

20E tuwo kai tovatotowanayama ikatumatalima idigo kana,

‘Geya vatau tayaamo kolaatuwōko bego yau .’

Yeisu ina tovatotowanayao ikatubaayasidi ina kámasa manuna tetelina

(Madiu 16:21—18:35)

Yeisu ana sabokuli manuna

(Maki 8:31—9:1; Luke 9:22-27)

21Tuta amo goi Yeisu ivatowo kai ina tovatotowanayao ivatulukoima ina kámasa manuna, idigo kana,

‘Itoboine ana Yerusalema goi tomoyamoya be Gagaidi be nakae Yaubada ina Katukeda ana tovatulukwanayao bei siyogedegedegu gagaina be nakae sikaumategu go, maliyalina aitonina goi Yaubada bei ikaitaoegu.’

22Ago Pita itaoya Yeisu ikabi, adi taiyuwo sibala sina masigava goi, e Pita ivatowo Yeisu ibove idigo kana,

‘Iyaa! Guna Tomoya, moe kwalāve! Moe nakae geya iisowóduwo yaim!’

23Go Yeisu itugavila, Pita matana goi idigo kana,

‘Kom im guinuwa Kaleya nakae! Kūna mligu goi kusabokuliyēgu!#16:23 Kūna mligu goi kusabokuliyēgu: Da Giriki niyadi goi ame ana yagoina aiyuwo itoboine. Tayamo mae nakae. Aiyuwoina itoboineda takaigavile kada, ‘Kwalavēgu!’ Kom geya kunuwonuwoneta Yaubada ina nuwonúwana manuna, go sem tomota idi nuwonúwana manuna kunuwonúwana. Tauna kom im nuwonúwana goi kupooikíkina kumatabodeebodegu!’

24Tuwo kai Yeisu ina tovatotowanayao yaima goi idigo kana,

‘Avatauwa komi neta latuwomi bego kosabokuuliyegu, toinimi yawoimi kokaasalēdi be nakae toinimi imi kerose kokaavalēdi#16:24 Imi kerose kokaavalēdi: Ame ana yagoina tomota itagona ikámasa Yeisu pasina. namlieta baige kōma kosabokuliyēgu.#Mad 10:38; Luk 14:27. 25Moitamo. Avatauwa bego yawoidi sivagagaledi, e nava yawoidi vau bei sitagau. Go avatauwa neta yau pasigu yawoidi sitagau, e nava yawoidi vata bei sibabane.#Mad 10:39; Luk 17:33; Iyo 12:25. 26Guna nuwonúwana ataligei. Yawoimi moe dogoi gagaina. Nakae neta poyapoya esaesaina gagaina madabokina kokabi go, yawoimi sitagau vata, e bei kaga ana dedevina? Geya. Neta yawoimi sitagau vata, geya tayaamo kaga ikaaiyaka itoboine bei yawoimiyadi kotalamapuyedi. 27Moitamo. Tomalatomota Tamana ana taiyao,#Mad 25:31. e bei tomota tamo tamo idi guinuwa goi ikatumapudi.#Sam 62:12; Rom 2:6.

28U, moe nakae bei isowóduwo go, ame alatuuwokoimi konōve: Tutayana Tomalatomota ima, bei ina bodao ikaliibubudi, e komi maniyemi ameko kootaoya nava bei maa yawoimi kogite.’

Currently Selected:

Madiu 16: GVS

Highlight

Copy