Luke 18

Livalakaibala awanoi makimaki ana sinapu manuna

1E livalakaibala ilatuwokoidi go, ivatulukoidi awanoi goi taabu nukotodi sitopatōpa, go sem tuta liliuna sikaawanoi. 2Idigo kana,

‘Kotu ana totakínona tayamo asa tayamo goi ikaaiyaka. Tauyana Yaubada geya imaatoite nakae omayamaya geya iilotowo. 3E kóbuya tayamo amo asayana goi ikaaiyaka. Tuta liliuna inonoina kotu goi totakinonayana yaina ikaawanoi idigo kana,

“Guna kaleya ivaaobugu, tauna yaima kutakinodokōigu bego yau mooitamoigu.”

4Ina go, totakinonayana geya latuwona igiepalu. E niga go toinina inuwonúwana kana,

“Yaubada geya amaatoite nakae omayamaya geya aalotowo 5go, tuwo tauyana iyobosegu, tauna bei atakinodoko bego tauyana mooitamoina, govila bei ivavilavila ina kawanoi goi ogu ibukaidoko.”’

6E Tomoya idigo kana,

‘Totakínona goyogoyoina ina livala konōve! Tauyana geya totakinona dókana geya go, tuwo vavinayana ivaite. 7E kina go Yaubada ina kinavayao maliyalina be sabamgo situmadádana Tauyana yaina go, manakae? Bei itakinodokoidi bego kidi mooitamoidi gea geya? Tauyadi yaidi ina egamogamogu bei itoto 8go, ame alatuuwokoimi konōve: Bei itakinodokoidi bego kidi mooitamoidi. Ago niga kina ima poyapoya goi tomota madi numisa bei ibabanedi gea geya?’

Livalakaibala Parisi be takisi ana togogo idi kawanoi manudi

9E tomota maniyedi toinidi sinumisedi bego kidi go, sediyao sikaolilivedi. E amo tauyadi nakae Yeisu livalakaibala ame ilatuwokoidi idigo kana,

10‘Koroto adi taiyuwo situko sina Vada Kimaasabaina bei sikawanoi Yaubada yaina. Tayamo moe . 11Kina Parisiyana iitaoya, toinina manuna ikawanoi ame nakae: Kana,

“Yaubada, yaim akauyagu bego yau geya tomota liliudi nakae geya. Nakae geya aaváobuna, goyo geya aguuinuwe, geya arooerata. Yau geya amo takisi ana togogo nakae geya. 12Wiki tamo tamo sivayuwo adiyakimwanako. Kaga liliuna akabidi, awotaidi adi badabada yawou go, tayamo avinim.”

13E kina go takisi ana togogoyana masigava goi iitaoya go, geya latuwona matana ikandolaga yábana goi, go sem mana nuwomou kasikasina itututu go, idigo kana,

“Yaubada, yau toogoyoigu kunuwokapisiyēgu!”#18:13 Kunuwokapisiyēgu: Da Giriki niyadi livala ame itoboineda takaigavile kada, ‘Kunuwokapisiyēgu.’ Go aiyuwoina itoboineda kada, ‘Guna goyo kunuwotaōidi.’

14Ame alatuuwokoimi konōve: Amo takisi ana togogoyana ikaluvilamna ina ina vada go, Yaubada bogina ivayoko kina tokibóbwata go, Parisi kina geya. Moitamo. Avatauwa neta toinidi sikilagalagasidi, Yaubada bei ikisobuyedi. Go avatauwa neta toinidi sikisobusobuyedi, Yaubada bei ikilagasidi.’#Mad 23:12; Luk 14:11; Yem 4:10; 1Pi 5:6.

Yeisu gogómana ikaipaakuyedi tetelina

(Madiu 19:13-15; Maki 10:13-16)

15E tomota maniyedi idi memeyayao siimemedi Yeisu yaina goi bego ibisikonedi . Go kidi ina tovatotowanayaoyadi sigitedi sibowoidi kadi,

‘Taabu kononōina Yeisu yaina.’

16E kina go Yeisuyana gogómana iduduwedi sima go, ina tovatotowanayao ilatuwokoidi idigo kana,

‘Gogomanayadi taabu kosanaabodēdi, go sem kotagonēdi sima yaigu. Tomota nuwotookaidi ame tauyadi nakae sinaena goi bei sisiu. 17Ame moitamo, tauna ame alatuuwokoimi konōve: Avatauwa komi neta Yaubada ina kalibúbuna kouyaone gogómana nakae, e itoboinemi alibubunayana sinaena goi kosiu.’#Mad 18:3.

Toesaesa ina lumadádana yawoina vata manuna tetelina

(Madiu 19:16-30; Maki 10:17-31)

18Niga tayamo tolovina ima Yeisu ilumadade idigo kana,

‘Tovatulúkwana, kom todedevim. Ava guinuwa aguuinuwe bei yawoigu vata ababane?’

19Go kina Yeisuyana idigo kana,

‘Kaga unana bego kuvayokoigu yau todedevigu? Tayamo anetava todedevina go, moe Yaubada! 20Yaubada ina lovina bogina kuyaagoidi ae? Idigo kana,

“Taabu korooerāta.

Taabu kokaaumāta.

Taabu kovaaināwana.

Taabu kotalavaita polapōla.

Tamamiyao be sinamiyao kowowooinēdi.”’#Mad 15:4; Mak 7:10; Epe 6:2.

Tateta 20:12-16; Atukeda 5:16-20

21‘Moe lovinayadi madabokiidi lavayana yau boi gómana go, ima ame tuta, bogina akabikaaonedi’, tolovinayana kaena.

22E livalayana kina Yeisu inove, idigo kana,

‘Go tayamo guinuwa nava kukiseeyeseye. Kūna konam liliudi kwaigimonēdi go, maisadi kwabīdi, kūna tookaidi yaidi goi kwaiguyauyēdi, e yábana goi bei kom mam esaesa. Kwaiguyauyedi ikavava, kūma kusabokuuliyēgu.’

23E kina go tolovinayana Yeisu ina livala inove, nuwona imou. Tauyana mana esaesa gagaina toina go, nukotona iyoi. 24E ina nuwomouyana#18:24 Ina nuwomouyana: Kopi maniyedi da Giriki niyadi goi ame livalayadi geya sikaiyaketa. Go ana yagoina tuwo nakae. Yeisu igite, tuwo idigo kana,

‘Kidi madi esaesa idi siu Yaubada ina kalibúbuna goi moumou isaki. 25Moitamo. yoguyogu gagaina, tauna geya itoboineyeta siláluma taporaina goi isiu ae? Ago toesaesa nakae. Bego Yaubada ina kalibúbuna sinaena goi toinidi sisiu go, geya itoboinedita, geya toina.’

26E totaiyakeka sidigo kadi,

‘Iyaa! Neta toesaesa geya itoboinedita yábana goi sisiu, avatau itoboine ana yava ibabane?’#18:26 Kidi Diyuu sinuwonúwana esaesa moe aba kinana bego Yaubada toesaesa iuyaone. Tauna esaesayana moe Yaubada ina yabobona tauyana yaina. Tuwo avatauwa neta Yaubada iyabobonedi, e nakae bei iyavedi. Neta toesaesa geya itoboinedita sisiu, geya vatau tayaamo nakona itoboine isiu. Moe pasina Yeisu ina tovatotowanayao nuwodi siwówana.

27‘Kaga tomota geya itoboinedita siguuinuwe Yaubada itoboine’, Yeisu kaena.

28Go kina idigo kana,

‘Go kai bei manakaema? Kai toinima ima kaba lovina be konama bogina kakalavedi go, kama kasabokuuliyem.’

29‘Moitamo konami bogina kokalavedi go, ame alatuuwokoimi konōve: Avatau neta ina vada o monena o senao o sinana o tamana o natunao ikalavedi Yaubada ina kalibúbuna pasina, 30e ame tuta goi ana katumapu ivakaigaga toina bei ibabane be tuta imamaima yawoina vata bei ibabane’, Yeisu kaena.

Yeisu ina kámasa ana talavaita aitonina

(Madiu 20:17-19; Maki 10:32-34)

31E ina tovatotowanayaoyadi yawou aiyuwo ikabidi, aditava ilatuwokoidi idigo kana,

‘Konovēgu. Ame tuta tatukotuko Yerusalema manuna go, maeko goi kaga liliuna Yaubada ina boi Tomalatomota manuna siiginidi bei simalatomota. 32Ame moitamo. Tauyana bei siyoisi nimadi goi siyato, namlieta bei sivaponuponuye, sigieomaemae be nakae sigiwoli. 33Niga sidabi ikavava, bei sikaumate go, maliyalina aitonina ámasa goi bei itaoyamna.’

34Ago kidi Yeisu ina livala iidigedi geya siyagoidita. Nakae ina livalayadi adi yagoina Yaubada ivamou yaidi goi, tauna geya itoboinedita siyagoi.

Yeisu tokebo tayamo ikideedevine tetelina

(Madiu 20:29-34; Maki 10:46-52)

35E Yeisu mana tovatotowanayao siiketoiya Yeriko bogina sivakakana go, tokebo tayamo enao kikina goi iitusobu ikaawanoi. 36E boda inovedi ivataabaledi go, tomota ilumadadedi idigo kana,

‘Moe kaga iisowóduwo?’

37E tomotayadi sidigo kadi,

‘Yeisu guma Nasareta ivaatabale.’

38Tuwo tokeboyana iiduduwo, idigo kana,

‘Yeisu, Devida tubuna, kunuwokapisiyēgu!’

39Kidi tomota siivakumgo tokeboyana siboove kadi,

‘Kom kumaigāu!’

Go kina tokeboyana tuwaina iiduduwo kana,

‘Devida tubuna, kunuwokapisiyēgu!’

40E Yeisu inove, tuwo itaoya go, tomota ilatuwokoidi tokeboyana sime. Tuwo moitamo sina sikabi sime. Tokeboyana ibala ima go, Yeisu ilumadade idigo kana,

41‘Kaga go bei avekoim?’

‘Tomoya, bego agita dókana’, tokeboyana kaena.

42Kina go Yeisuyana idigo kana,

‘Kugita dōkana! Im numisa pasina bogina matam sidedevina.’

43Tuwo mainao igita dókana, tauna ivatowo Yeisu isabokuliye, e Yaubada ina togaga ana ikamooitamoe. Ago boda sigite kaga iisowóduwo yaina, tuwo Yaubada siyapaliye.

Currently Selected:

Luke 18: GVS

Highlight

Copy