Iyoni 2

Yeisu ina kaba kinana goi toinina ikaiwoduwe bego Tauyana Yaubada Natuna

(Iyoni 2:1—12:50)

Yeisu ina kaba kinana vakuumgoina: Bwae ikaigavile imalaoine

1Maliyalina aiyuwo sikavava Nataniela be Pilipo adi duduwo mlina, nai aikanina Galili asaina Kena goi tomota siguuinuwe. Ago aikayana goi sinana ikaaiyaka. 2E Yeisu be kai ina nakae siduduwema kana aikaniyana manuna. 3Kakakáika go, bogina ikavava, tuwo Yeisu sinana ima ilatuwoko idigo kana,

‘Natugu, kidi oine geya. Kuvaitēdi.’

4Go iya Yeisu kana,

‘Namoya, yau guna polava moe geya kom im polava. Taabu kuvatuwoowonēgu! Yau guna tuta nava.’

5Tuwo sinanayana tovaita ilatuwokoidi idigo kana,

‘Nakonakae ilatuwokoimi, nakae koguinūwe.’

6Ego kontena ainima tayamo sikaaiyaka bwae manuna. Kontenayadi gurewa goi siwodugudi#2:6 Gurewa goi siwodugudi: Diyuu idi lovina kimavada manuna ame nakae: Neta kontena gurewa goi siwodugudi, e kontenayadi geya itoboinedita sikabáila. Go kontena vaega goi siwoodugudi itoboinedi sikabáila Yaubada matana goi. Tauna kontena vaega bei sikauvisidi neta sikabáila. nakae kai ima lovina kimavada manuna. Kontenayadi tamo tamo itoboinedi bwae lita ana badabada eiti (80) ina tayamo andedi tuwenti (120) nakae sisaligogoidi. 7Tuwo tovaitayadi Yeisu ilatuwokoidi idigo kana,

‘Amo kontenayadi bwae goi kovakayaodēidi.’

Tuwo moitamo sina sivakayaodeidi. 8Ikavava, Tauyana idigo kana,

‘Ame tuta bwae kotēge kōna áika ina tolovina kovīni.’

E tuwo sitege, sina sivini. 9E tutayana sivini inimkone, geya iyagoiyeta bwae adi totega nako goi sikabi go, kidi tovaitayadi aditava siyagoi. Tuwo bwaeyana bogina imalaoine ikabi inimkone, e tonai koroto iduduwe ima 10ilatuwoko idigo kana,

‘Ida sinapu goi mainao oine dedevina toyoko tavinidi. Niga tutayana oineyana gagaina bogina sinim ginagina siyaluwo, geya siyagoiyeta kaga sinimnim, e oine besobeso tavinidi. Go kom oine dedevina kuvagagale ana kadókana oine besobeso ikavava.’

11Moe aba kinanayana vakuumgoina Galili asaina Kena goi Yeisu iwodugu. Aba kinanayana goi Yaubada ina togaga ana yaina goi ikaaiyaka ivagitakoe, tuwo kai ina tovatotowanayao kanumise.

Yeisu tokaigimona Vada Kimaasabaina goi ivataapiyedi tetelina

(Madiu 21:12-13; Maki 11:15-17; Luke 19:45-46)

12Moe mlina, Yeisu ma sinana be senao be kai ina tovatotowanayao taiyao kasou kana Kapaneumi goi.#Mad 4:13. Amoko goi maliyalina maniyena kakaaiyaka.

13Diyuu ima Basitáwana Aikanina bogina ana kebukebu,#Tat 12:1-27. tuwo Yeisu kai taiyao katuko kana Yerusalema goi kasiu. 14Kasiu go, kana Vada Kimaasabaina ina kali goi kasiu, e Yeisu bulumakau be be bunabuna adi tokaigimonayao be nakae mani ana totalamapuyao igitedi sipaaisewa. 15Tuwo búyala ikabidi, aba dábina tayamo iwodugu. Ikavava, ina tokaigimonayaoyadi madabokidi idi sipi be idi bulumakau taiyao ivatapiyedi Vadayana goi sisowóduwo sisiya. Ago mani ana totalamapuyaoyadi idi mani ikaliulagidi nakae idi teboro ikausepaledi. 16Ago bunabuna adi tokaigimonayaoyadi ilatuwokoidi idigo kana,

‘Imi mánuwo moe kokabīdi konavēdi! Yau Tamagu ina vada taabu kooyatāko imi kaba maketi!’

17Kai Yeisu ina tovatotowanayao ina livala tayamo kanuwokavate; livalayana kana,

‘Im Vada amatakoiye gagaina go,

guna matakoiyana pasina ámasa bei ikanigu.’

Same 69:9

18E kidi Diyuu adi tolovinayao sidigo kadi,

‘Ava kaba kinana bei kuvatulukoima bego kayagoi mam lovina itoboinem moe guinuwayadi kuguinuwedi?’

19Go iya Yeisu idigo kana,

‘Vada Kimaasabaina ame kotaūwe go, maliyalina aito goi bei avataoemnei.’#Mad 26:61; 27:40; Mak 14:58; 15:29.

20E tauna kidi tolovinayadi sidigo kadi,

‘Iyaa, tala poti sikisi (46) goi ame Vada Kimasabainayana sivataoe go, kom bego maliyalina aito goi kuvataoemnei ae?’

21Ego amo Tauyana Vada Kimaasabaina toina geya manuna ibobóbwara, go sem toinina wowona idigedige. 22E tauna tutayana Yaubada Yeisu tokámasa yaidi goi ikaitáoe, kai ina tovatotowanayao kanuwokavate Tauyana boi ina livala. Tuwo Gínina Kimaasabaina be Yeisu ina livala kanumisedi.

23E tutayana Yerusalema goi Yeisu ikaaiyaka moe Basitáwana Aikanina ana tuta. Amo tutayana tomota badabadaidi Tauyana sinumise unana ina kaba kinana iguuinuwedi sigitedi. 24E iya go Yeisu tomota geya inumisedita unana tomota madabokidi idi sinapu bogina iyaagoidi. 25Nakae tomota idi talavaita toinidi idi nuwonúwana manuna moe tuwo; nuwodi bogina iyaagoidi.

Currently Selected:

Iyoni 2: GVS

Highlight

Copy