Aba Vatowo 44

Iyosepa tuwowonao ikatuubaudi tetelina

1Tuwo sikáika ikavava, e Iyosepa ina vada ana tovakumgo ilatuwoko idigo kana,

‘Ame tauyadi idi baiki itoboinedi sikavaledi. Ikavava, koroto tamo tamo idi mani nakae idi baiki tobudi goi kuvadodoimnēidi. 2Moe ikavava, guna vedi kukābi. Vediyana moe kukābi go, bogomane ina baiki goi kudodōi ina mani taiyao.’

Tuwo iguinuwe nakae Iyosepa idige.

3Simasisi vanuwo itomo, konadi idi ase goi sikailagasidi, e sivaduduwedi sina. 4E kidi asa goi sisowóduwo siiketoiya ivatabaledi go, kina Iyosepa itaoya ina vada ana tovakumgo ilatuwoko kana,

‘Woilīm kutāoya, kūna amo korotoyadi kosabokuliyēdi. Tutayana kusakavatedi, kulatuwokōidi kam,

“Manakae? Bego ima guinuwa dedevina goyo goi kokatumapu? 5Kaga unana guna tomoya ina vedi kovainao? Vediyana moe aba kinana, tauna moe vediyana goi itoboine iyagoi kaga bei isowóduwo. Moe imi guinuwayana, guinuwa goyogoyoina toina.”’

6E tuwo tovakumgoyana itaoya, woilina ina. Tutayana isakavatedi, e ilatuwokoidi nakae ina tomoya idige. 7Go kidi silawoiwoi sidigo kadi,

‘Ima tomoya, kaga unana nakae kudige? Iyagoida! Kai im nakae geya kaguinuweyeta. 8Kunōve! Boi Kenani goi maniyadi kagitebaabanedi ima baiki sinaedi goi bogina kakaluvilemneidi. Tauna manakae? Bego im tomoya ina o ina siriba kavainaoidi? Geya! 9Ava koroto yaima goi neta im tomoya ina vedi ivainao, e itoboine ikámasa go, madabokima im pakonayao nakae.’

10Go kina tovakumgoyana kana,

‘Kobóbwara moitamo. Tovaináwana itoboine ina liuna ibabane go, ina liunayana ame nakae: Avatau vediyana ivainao, tauyana anetava bei yau guna pákwana go, madabokimi tutubeso, e itoboinemi kona.’

11Tuwo koroto tamo tamo idi baiki sikaisobuyedi, sikatupaevedi. 12E tovakumgoyana baiki tamo tamo goi ilusala go, ina lusalayana adi bíbina goi ame nakae: Botomoya ina baiki goi ivatowo go, bonauyayana tamo tamo idi baiki goi ilusala. Ame ikavava, bogomane ina baiki goi ilusala. Ilusala, moitamo vediyana Beniyamina ina baiki goi ibabane. 13Tuwo vediyana sigite, nuwodi imou gagaina, tuwo adi kwama giyaina sikiisedi. Sikiisedi ikavava, madabokidi konadi sikatubayasidi, idi ase yatana goi sikailagasidi, e sikaluvilamna sina Iyosepa ina kasa goi.

14E tutayana Yuda ma senao sima Iyosepa ina vada, tauyana nava ikaaiyaka vada sinaena. Tuwo sisiu Iyosepayana matana goi aedi sivatugúyala. 15E tauyana idigo kana,

‘Ame kaga koguinuwe yaigu! Manakae? Geya koyagoiyeta bego yau koroto toogagaigu, tauna itoboinegu aba kinana goi akinane vediyana nako ina?’

16E kina Yuda idigo kana,

‘Ima tomoya, manakaema kabóbwara? Manakaema kavatulukoim bego kai geya tayaamo goyo kaguinuwe? Geya ae? Ima goyo Yaubada bogina ikaiwoduwe. Ame tutayana kai im pakonayao nakae, madabokima nakae korotoyana im vedi ivainao.’

17Go kina Iyosepayana idigo kana,

‘Moe nakae geya! Tovaináwana anetava bei guna pákwana. Komi madabokimi sem mami dedevina kokaluvīla kōna tamami yaina.’

18Go kina Yuda idigo kana,

‘Guna tomoya, yau im pákwana kutagonēgu giyaina abóbwara. Kom kovavasa nakae go, tuwo taabu kuegamogamooguyēgu. 19Guna tomoya, boi kai im pakonayao kulumadadema kam,

“Komi ma tamami be nakae mami gómana?”

20Tuwo kai kama,

“U, tamama ikaaiyaka, bogina ikaitomoya go, ama gómana tayamo amoni tamama taiyao sikaaiyaka. Ago gomanayana tuwowona toina bogina ikámasa, tauna sinana natuna tayamo toito ikaaiyaka go, gomanayana tamama ina kakaya.”

21E kom kam,

“Kotūko kōna gomanayana kokābi kosōuye kōme agite.”

22Go kai kama,

“Gomanayana geya itoboineyeta tamama ikalave, govila bei tamama mana nuwomou ikámasa.”

23Go kom kudigo kam,

“Neta gomanayana geya kosouye komeyeta, e geya tuwaina bei kogitegu bego ami witi kogimona.”

24Tuwo kai kakaluvila kana tamama goi kaga liliuna kulatuuwokoima tamama kalatuwoko. 25E niga tamama idigo kana,

“Natugowo, kokaluvīla kōna ada witi tuwaina kogimōna, e kōma.”

26Go kai kadigo kama,

“Geya itoboinemeta kasou kana, go sem neta kutagona bego ama gómana taiyao kana, bei kasou kana. Neta gomanayana taiyao geya, korotoyana bei geya igitemeta bego ada witi kagimona.”

27E tuwo tamagu im pákwana idigo kana,

“Komi bogina koyagoi bego monegu natugowo adi taiyuwo ivenatunidi. 28Tayamo bogina ikalavegu, kagu, ‘Moitamo nakona woiwoi sikani.’ Tuwo geya tuwaina bei maisina agite. 29Tauna neta natugu konavenave kenao goi ivailai, e komi guna nuwomou koyato, tauna magu nuwomou ana kadókana akámasa.”

30-31E tauna neta gomanayana ameko kakalave go, ametava kakaluvila kana tamama yaina, e tutayana igite natuna geya kai taiyao geya, bei ikámasa. Bogina kuyagoi. Gomanayana moe ana kakaya. Moeko goi ina nuwomou bogina kayato, tauna bei mana nuwomou ana kadókana ikámasa. 32Moe moitamo. Boi tamagu yaina akatótula bei gomanayana arugwausi. Tauyana alatuwoko kagu,

“Neta ama gomanayana geya akaluvileyeta, moe bei yau guna puwoya yawoigu ana madabokina goi.”

33E tauna guna tomoya, kutagōna bego yau akaaiyaka im pákwana nakae go, guna gomanayana ikaluvilamna tuwowonao taiyao. 34Moitamo. Manakaegu bei akaluvila ana tamagu yaina neta gomanayana geya taiyao? Geya. Yau geya anoita, govila bei tamagu ina kategeda agite.’

Currently Selected:

Aba Vatowo 44: GVS

Highlight

Copy