Guinuwa 6

Stiveni tetelina

(Guinuwa 6:1—7:60)

Diyuu tokanagiriki nuumisaidi idi kaukulukúluwo

1E amo tutayana goi nuumisaidi mani o awoinu sikaiguyauyedi kobuyayao yaidi goi. Go kidi tokanagiriki#6:1 Tokanagiriki: Diyuu maniyedi asa ituli goi sibíbina, tauna kidi da Giriki niyadi sibóbwara. Go ava Isileli tubunao Yudiya goi sibíbina, sikanaiberiu. Kidi niyadi yoina Iberiu. sikaukulukúluwo tauyadi tokanaiberiu yaidi kadi,

‘Tutayana komi tokanaiberiu mani be awoinu kokaiguyauyedi, tokanagiriki idi kobuyayao geya kovinidita!’

2E idi kaukulukuluwoyana kidi yawou aiyuwo sinove, tuwo Yeisu ina tovatotowanayao liliudi siduduwedi sima silatuwokoidi sidigo kadi,

‘Yaubada ivayokoima kai ana totalavaitayao. Tauna geya itoboineyeta Yaubada ina livala ana talavaita kakalave go, bego mani ana kaiguyau kamatakavatedi. 3E tuwo segowo, koroto yaimi goi kodovatusīdi. Neta valedi dedevidi, ivakayaodeidi be nakae madi nanamsa gagaina, e kokinavēdi bei kai kavayokoidi kidi mani ana kaiguyau adi tomatakavata. 4E kai go bei kakasalema awanoi be Yeisu Valena Dedevina ana vatulúkwana yaidi goi.’

5Tuwo boda liliuuna sinove, e yawou aiyuwoyadi idi livala sikaodedevine. Tuwo koroto ainima aiyuwo sikinavedi. Tauyadi moe Stiveni, tauyana numisa gagaina be nakae Baloma Kimaasabaina ivakayaodei, Pilipo, Pirokori, Nikanori, Timoni, Paramena be nakae Nikolasi, tauyana guma Antiyoki . 6Sikinavedi ikavava, simedi vamoleyanayaoyadi matadi goi sivagitakoidi go, vamoleyanayaoyadi madi kawanoi nimadi sikailagasidi korotoyadi ainima aiyuwo dabadi siyoisidi, e mani ana kaiguyau manuna sikawoidi.

7Tuwo Yaubada ina livala tuwaina inunúnuwo, e Yeisu ina tovatotowanayao Yerusalema goi tuwaina sibaadabada gagaina. nakae; badabadaaidi Yeisu valena sinovenove, siinumise.

Stiveni ana yóita ina talavaita pasina

8E kina go Stiveniyana yaina goi Yaubada ina kanuwóiya be ina togaga sikaaiyaka gagaina. Tuwo aba kinana kainaaopaidi gagaidi tomota nauyayanaidi goi iguuinuwedi. 9E nakae iguuinuwe go, maniyedi sitaoya, Stiveni taiyao sikaumakimaki. Tauyadi idi kaba tugúguna yoina Taaligeima#6:9 Aba tugúguna yoina Taaligeima: Ame kidi Diyuu idi vada tugúguna manuna be nakae tapwaroro manuna. Ame vadayana yoina Taaligeima unana kidi sisakululu amoko goi go, boi deri goi sikaaiyaka go, da Roma sitaligeidi. goi sisaakululu. Kidi maniyedi da Sairini, maniyedi da Alekisandira, da Silisiya be nakae da Esiya. 10Sikaumaakimaki Stiveni taiyao go, tauyana mana nanamsa ibobóbwara be nakae nukotona Baloma Kimaasabaina isanayato, tauna ikausagugudi.

11Tuwo Diyuuyadi sediyao maniyedi siemaisigaudi bego sina Stiveniyana siwowoko. Sediyaoyadi sitagona sina tomota yaidi goi siwowoko sidigo kadi,

‘Tauyana Stiveni kanove Mosese be Yaubada itagiiwoidi.’

12Tuwaina sina tomota, tomoyamoyayao be nakae Yaubada ina Katukeda ana tovatulukwanayao gamodi sisowolidi, e sitaoya sina Stiveniyana siyoisi sibiu sinave goi. 13Kotu goi totalavaita polapola maniyedi siduduwedi sima Stiveniyana siwowoko sipola kadi,

‘Ame tauyana kanove tuta liliuna Vada Kimaasabaina ame be nakae itagiiwoidi. 14Moitamo. Tauyana kanove idigodigo bego amo Yeisuyana guma Nasareta vada ame bei itauwe go, ida sinapu Mosese ivinida bei ikaigaviledi.’

15Tauyana sidumaakavate go, madabokidi kotu goi sikaaiyaka maisina sigite maisiyana.

Currently Selected:

Guinuwa 6: GVS

Highlight

Copy