San Mateo 7
7
Ka'p je̱'e̱ mmu̶gu'ug ni tii myaj'u̶x'íx myajpa'íxu̶ch
(Lc 6.37-38, 41-42)
1“Ka'p je̱'e̱ mmu̶gu'ug ni tii myaj'u̶x'ijx myajpa'ijxku̶xy, ka'pu̶ je̱'e̱ Dios miich xy'u̶x'ijx xypya'ijxku̶xu̶ch. 2Je̱'e̱ Dios miich xytyu̶ydyúnu̶p ajku̶xy du'un neby naty je̱'e̱ mmu̶gu'ug miich m'u̶x'ijx mba'ijxku̶xyu̶ñ, y mu̶u̶d je̱'e̱ mgu̶'u̶mguipxu̶'u̶ñ ajku̶xy mu̶dyiibu̶ mu̶u̶d mguípxku̶xyu̶ñ, je̱' je̱'e̱ Dios mu̶u̶d xykyípxku̶xu̶ch. 3¿Ti je̱'e̱ mmu̶gu'ug ko mu̶k'eemby mboky'ixy ko we̱e̱nu̶ tyuundu̶góy y jakmu̶j miich ni'igyu̶ mduundu̶góy, y ka'p mnayjyu̶wu̶'u̶yii? Du'un neby nu̶wu̶'u̶y pi'kpu'uxk tu̶ m'ixy ma je̱'e̱ mmu̶gu'ug wyiinu̶ñ, y ma je̱'e̱ mgu̶'u̶mwiinu̶ñ jakmu̶j je̱'e̱ mu̶jkepykyópt jiiby ni'igyu̶, y ka'p je̱'e̱ mu̶jkepykyópt m'ixy ma je̱'e̱ mgu̶'u̶mwiinu̶ñ. 4Y pu̶nu̶ ka'p je̱'e̱ mu̶jkepykyópt m'ixy ma je̱'e̱ mgu̶'u̶mwiinu̶ñ, ¿ti je̱'e̱ mmu̶gu'ug ko du'un mnu̶ma'ay: ‘Nayye̱gu̶u̶, míñu̶ch je̱'e̱ pi'kpu'uxk n'okyajpu̶dzú̶my ma yu̶'u̶ mwiinu̶ñ?’ 5¡Tzo'oydyu'untúk miich!, jayu̶jp je̱'e̱ mjoot mwinma'añ m'ok'yajwa'adzu̶ch mu̶'íttu̶tz je̱'e̱ mmu̶gu'ug mu̶baad m'u̶u̶wij mgapxwijnu̶, du'un neby naty nu̶wu̶'u̶y tu̶ myajpu̶dzú̶myu̶ñ je̱'e̱ mu̶jkepypykyópt ma je̱'e̱ mgu̶'u̶mwiinu̶ñ y du'unu̶tz wa'adz m'ijxnu̶ch, y chiiju̶tz je̱'e̱ pi'kpu'uxk mu̶baad myajpu̶dzu̶u̶mnu̶ ma je̱'e̱ mmu̶gu'ug wyiinu̶ñ.
6“Ka'p je̱'e̱ uk mmooygyu̶xy mu̶dyiibu̶ je̱'e̱ Dios jye̱'e̱'ajtypyu̶ñ, ka'p jyékyu̶ch ko xyñibu̶du̶'kku̶xu̶ch, y xy'awoon xy'aku̶u̶dzu̶u̶ygyu̶xu̶ch. Y ka'p je̱'e̱ mnaandzú̶m tzoowu̶'ajtypyu̶ mbu̶daakku̶xy ma je̱'e̱ kuch ñajxku̶xy tyu̶gu̶u̶ygyu̶xyu̶ñ, ka'p jyékyu̶ch ko jaamdé̱n naaxté̱ngu̶xu̶ch.
Yujkwaangu̶x, u̶xtaaygyu̶x y kugapxu̶u̶ygyu̶x ma je̱'e̱ tu̶jk'aaju̶ñ
(Lc 11.9-13; 6.31)
7“Yujkwaangu̶x, y xymyooygyu̶xu̶p je̱'e̱ Dios; u̶xtaaygyu̶x, y mbaadu̶py ajku̶xy; kugapxu̶u̶ygyu̶x, y awa'adzu̶p je̱'e̱ mdu̶jk'aa ajku̶xy. 8Je̱' ko pu̶n tijaty yujkwaamb ma je̱'e̱ Diosu̶ñ, ku̶'u̶du̶gu̶'u̶wu̶u̶ju̶p je̱'; y pu̶n u̶xtaaybyu̶ñ pyaadu̶py je̱'; y pu̶n kugapxu̶u̶ybyu̶ñ awa'adzu̶p je̱'e̱ tyu̶jk'aa.
9“¿Nej m'ok'adu̶'u̶dzu̶p da'a du'un miich nije̱' ajku̶xy, pu̶nu̶ yujkwaanu̶xu̶p je̱'e̱ y'ung tzajkaagy, nej myo'owu̶py tu'ug tzaaju̶? 10¿O pu̶nu̶ yujkwaanu̶xu̶p akx, nej myo'owu̶py tu'ug tza'añdyu̶? 11Y miich it ja'aju̶bu̶kja'ay ajku̶xy, mnejwu̶u̶ygyu̶xypy neby je̱'e̱ m'ung oybyu̶ mooygyu̶xu̶ch, ¡pues ni'igyu̶ je̱'e̱ mDios Teedy tzajpjootypyu̶ ajku̶xy xymyooygyu̶xu̶p je̱'e̱ oybyu̶ ku̶xyu̶ pu̶njaty naty yujkwaangu̶xpu̶ñ!
12“Y du'unu̶tz, neby miich mdzojkku̶xyu̶ñ túnu̶ch je̱'e̱ ja'ay mu̶u̶d miich ajku̶xy, nandu'un miich mduungu̶xu̶ch mu̶u̶d je̱' ajku̶xy; je̱' ko du'un je̱'e̱ Moisés y'ane̱'e̱mu̶ñ y'ane'emy y je̱'e̱ Dios y'ayuuknajtzkapxu̶u̶ybyu̶du̶jk ñaky ajku̶xy.
Je̱'e̱ xu'utzpu̶ tu̶jk'aa
(Lc 13.24)
13“Tu̶gu̶yu̶u̶ygyu̶x ma je̱'e̱ xu'utzpu̶ tu̶jk'aaju̶ñ. Je̱' ko je̱'e̱ tu̶jk'aa y je̱' tu'u mu̶dyiibu̶ ka'a'oydyaaktuuby nu̶kxp, mu̶jwiin je̱', y janch may je̱'e̱ ja'ay jiiby tyu̶gu̶yu̶u̶ygyu̶xy. 14Peru̶ je̱'e̱ tu̶jk'aa y je̱'e̱ tu'u mu̶dyiibu̶ nu̶kxp ma je̱'e̱ jugy'ajttaakt wiinu̶xu̶u̶bu̶ju̶ñ, xu'utz je̱' y janch tzip tu̶gu̶u̶y, y niwe̱e̱nu̶ je̱'e̱ ajku̶xy je̱'e̱ mu̶dyiibu̶ jiiby tu̶gu̶yu̶u̶ygyu̶xpu̶ñ.
Je̱'e̱ kepy je̱'e̱ tyu̶u̶m je̱'e̱ mu̶u̶d yaj'u̶xkápy
(Lc 6.43-44)
15“Naygyweentu̶'ajtu̶gu̶x ma je̱'e̱ ja'ay anu̶u̶játypyu̶ ajku̶xyu̶ñ, mu̶dyiibu̶ naydyiju̶gu̶xpu̶ñ Dios y'ayuuk najtzkapxu̶u̶ybyu̶du̶jk ajku̶xy. Du'un je̱'e̱ xyñiminaangu̶xy yuung naaxypy neby je̱'e̱ borreegu̶ju̶ñ, peru̶ ma je̱'e̱ jyoot wyinma'añ ajku̶xy du'un je̱'e̱ ajku̶xy neby je̱'e̱ pa'uku̶ñ. 16Miich ajku̶xy mu̶baad je̱'e̱ m'u̶xkajpku̶xy neby naty y'adu̶u̶tz jya'ay'ajtku̶xyu̶ñ, je̱' ko ka'p je̱'e̱ uva tza'am pu̶n piy ma je̱'e̱ eptykyepyu̶ñ, nan ka'p je̱'e̱ higueeru̶ tu̶u̶m pu̶n tuky ma je̱'e̱ aadz epty myu̶u̶dpu̶ju̶ñ. 17Y du'unu̶tz, ku̶xyu̶ je̱'e̱ oygyepy oyjyaty je̱'e̱ tyu̶u̶m'áty, peru̶ je̱'e̱ ju̶bu̶kkepy nan ju̶bu̶kjaty je̱'e̱ tyu̶u̶m'áty. 18Je̱'e̱ oygyepy ka'p je̱'e̱ mu̶baad ju̶bu̶kjaty tyu̶u̶m'áty, nan ka'p je̱'e̱ ju̶bu̶kkepy mu̶baad oyjyaty tyu̶u̶m'áty. 19Ku̶xyu̶ je̱'e̱ kepy mu̶dyiibu̶ ka'p oy tyu̶u̶m'átyu̶ñ yajpujxu̶'kp je̱', y chi yajno'ogy. 20Y du'unu̶tz miich je̱'e̱ du'umbu̶ ja'ay m'u̶xkajpku̶xu̶ch neby naty y'adu̶u̶tz jya'ay'ajtku̶xyu̶ñ.
Ka'p je̱'e̱ ja'ay ku̶xyu̶ tyu̶gu̶'u̶waangu̶xy ma je̱'e̱ Dios y'ane'emyu̶ñ
(Lc 13.25-27)
21“Ka'p je̱'e̱ ja'ay ku̶xyu̶ tyu̶gu̶'u̶waangu̶xy ma je̱'e̱ Dios y'ane'emyu̶ñ je̱'e̱ mu̶dyiibu̶ u̶u̶ch du'un xyjya'anu̶maaygyu̶xpu̶ñ: ‘Windzú̶n, Windzú̶n’, je̱'e̱du̶'ajty je'eyu̶ tu̶gu̶'u̶waangu̶xp je̱'e̱ mu̶dyiibu̶ u̶u̶ch je̱'e̱ nDeedy chojku̶ñ kuydyuunu̶u̶ygyu̶xpu̶ñ, je̱'e̱ mu̶dyiibu̶ jiiby tzajpjooty yajpaatpu̶ñ. 22Je̱'e̱ mu̶'it xu̶u̶ je̱'e̱ mu̶'it tiempo may u̶u̶ch je̱'e̱ ja'ay xyjya'anu̶ma'awaangu̶xy: ‘Windzú̶n, Windzú̶n, u̶u̶ch tu̶ u̶u̶ch je̱'e̱ m'ayuuk mdu̶y'ajt ngapxwa'kxku̶xy; cham u̶u̶ch je̱'e̱ mxu̶u̶ ngapxpaatku̶xy y tu̶ u̶u̶ch je̱'e̱ ka'a'óybyu̶ nyajpu̶dzu̶u̶mgu̶xy ma je̱'e̱ ja'ay ajku̶xyu̶ñ, cham u̶u̶ch je̱'e̱ mxu̶u̶ ngapxpaatku̶xy y nan tu̶ u̶u̶ch je̱'e̱ mu̶jwinma'añ may nduungu̶xy; cham u̶u̶ch je̱'e̱ mxu̶u̶ ngapxpaatku̶xy’. 23Peru̶ mu̶'it u̶u̶ch je̱'e̱ n'adzoogu̶xu̶ch: ‘Ka'p u̶u̶ch miich nimu̶naa tu̶ n'ixy'ajttu̶'kku̶xy; ¡winwa'ktuutku̶ch ajku̶xy ma u̶u̶ch je̱'e̱ nwinduuyu̶ñ, miich pokytyuumbu̶ ajku̶xy!’
Je̱'e̱ me̱jtznáxpu̶ poch y'u̶jx
(Mc 1.22; Lc 6.47-49)
24“Pu̶n u̶u̶ch je̱'e̱ n'ayuuk ndu̶y'ajt xymyu̶doowu̶byu̶ñ y kuydyúñ neby u̶u̶ch nmu̶na'añu̶ñ, du'un je̱' neby je̱'e̱ wijyjya'ay mu̶dyiibu̶ je̱'e̱ tyu̶jk tu'ug koju̶ñ tzaada'agykyú̶xp. 25Y chi je̱'e̱ tuu myiiñ, y kyoomy je̱'e̱ mu̶jnu̶u̶, y myiiñ je̱'e̱ poj; ja'ayajpu̶du̶'u̶gaañ je̱'e̱ tu̶jk, peru̶ ka'p yajpu̶du̶'ky, je̱' ko tzaada'agykyú̶xp najty je̱'e̱ poch y'u̶jx tu̶ yajtzonda'agy. 26Peru̶ pu̶n u̶u̶ch je̱'e̱ n'ayuuk ndu̶y'ajt xymyu̶doowu̶byu̶ñ y ka'p kuydyúñ neby u̶u̶ch nmu̶na'añu̶ñ, du'un je̱' neby je̱'e̱ tzuuja'ay mu̶dyiibu̶ je̱'e̱ tyu̶jk tu'ug koju̶ñ pu'ujooty. 27Y chi je̱'e̱ tuu myiiñ, y kyoomy je̱'e̱ mu̶jnu̶u̶ y myiiñ je̱'e̱ poj y chi je̱'e̱ tu̶jk yajpu̶du̶'ky. ¡Wa'adzu̶ yajwindu̶gooydyaay!”
28Ko je̱'e̱ Jesús kyapxtaay myu̶dyaaktaay, ku̶xyu̶ je̱'e̱ ja'ay je̱'e̱ ayuuk mu̶k yajnú̶kxy yajju̶wu̶u̶y ajku̶xy mu̶dyiibu̶ je̱'e̱ Jesús najty yaj'u̶xpu̶jku̶gu̶xpu̶ñ, 29je̱' ko najty yaj'u̶xpú̶ky mu̶u̶d ku̶xyu̶ je̱'e̱ y'ane̱'e̱mu̶ñ, y ka'p dyu'unu̶ch neby je̱'e̱ Dios y'ane̱'e̱mu̶ñ windzu̶ndu̶jk yaj'u̶xpu̶jkku̶xyu̶ñ.
Currently Selected:
San Mateo 7: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
