San Mateo 25

Je̱'e̱ majkpu̶ to'oxy'ana'k ijxpe̱jt

1“Du'un jyadu̶ch mu̶u̶d je̱'e̱ Dios y'ane̱'e̱mu̶ñ neby je̱'e̱ majkpu̶ to'oxy'ana'k mu̶dyiibu̶ nú̶kxku̶xu̶ñ ma je̱'e̱ ja'ay najty pyu̶kyu̶ñ, chi je̱'e̱ candil y petróleo mu̶nu̶kxy ajku̶xy ma je̱'e̱ kudo'oxy'úngu̶ñ, ja'ay'e̱xaangu̶xy je̱'e̱ pu̶jkpu̶ ya'aydyu̶jk jim. 2Mu̶gooxk najty ka'p kyuwinma'añdyu̶ch ajku̶xy, y mu̶gooxk najty kyuwinma'añdyu̶ch ajku̶xy. 3Je̱'e̱ ka'pu̶ kyuwinma'añdyu̶ch ajku̶xy myu̶nú̶kxku̶x je̱'e̱ candil, peru̶ ka'p je̱'e̱ petróleo tu̶gu̶'u̶bu̶ mu̶nu̶kxy ajku̶xy mu̶dyiibu̶ je̱'e̱ kyandil mu̶baad mu̶u̶d yaj'ujtztu̶gajtzku̶xyu̶ñ. 4Peru̶ je̱'e̱ kuwinma'añbyu̶ ajku̶xy myu̶nú̶kxku̶x je̱'e̱ petróleo tu̶gu̶'u̶bu̶, abu̶ky mu̶dyiibu̶ najty candiljooty ajku̶xyu̶ñ. 5Peru̶ ka'p je̱'e̱ pu̶jkpu̶ ya'aydyu̶jk chojkja'ty, chi nigu̶xyu̶ mya'aybyaattu̶gu̶xnu̶, y chi myu̶'o'ky ajku̶xy. 6Jii najty da'a mu̶jkuwa'kxychuum ko je̱'e̱ ayuuk tu'ug mu̶k yajmu̶dooy: ‘¡Chi je̱'e̱ pu̶jkpu̶ ya'aydyu̶jk myiñ! ¡Pu̶dzu̶u̶mgu̶x; nu̶kx ju̶jpkubadu̶u̶ygyu̶x!’ 7Chi je̱'e̱ to'oxy'ana'k nigu̶xyu̶ pyu̶du̶'ky ajku̶xy y ni'ixu̶ydyu̶gu̶u̶y je̱'e̱ candil ajku̶xy. 8Mu̶'it je̱'e̱ mu̶gooxkpu̶ ka'pu̶ kyuwinma'añdyu̶ch ajku̶xy je̱'e̱ myu̶gu'ug nu̶maay ajku̶xy, je̱'e̱ mu̶gooxkpu̶ kuwinma'añbyu̶ ajku̶xy: ‘U̶u̶ch yu̶'u̶ mbetróleo we̱e̱nu̶ moogy ajku̶xy, je̱' ko pi'idzaanu̶byu̶ch je̱'e̱ ngandil ajku̶xy.’ 9Chi je̱'e̱ to'oxy'ana'k kuwinma'añbyu̶ y'adzooy ajku̶xy: ‘Ka'p, je̱' ko ka'p u̶u̶ch je̱'e̱ nje̱' du'un xymyu̶du̶y'ajtu̶ch ajku̶xy y ni miich je̱'e̱ du'un xykya'amu̶du̶y'ajtu̶ch ajku̶xy. Ni'igu̶ nú̶kxku̶x ma tyoogyiiju̶ñ y mjuugyu̶xu̶ch je̱'e̱ mje̱' ku̶'u̶m ajku̶xy.’ 10Tu̶ najty je̱'e̱ mu̶gooxkpu̶ ka'pu̶ kyuwinma'añdyu̶ch ajku̶xy petróleo juuybyu̶ ñú̶kxku̶xy, ko je̱'e̱ pu̶jkpu̶ ya'aydyu̶jk oy jya'ady, y je̱'e̱ mu̶gooxkpu̶ kuwinma'añbyu̶ ajku̶xy myu̶dtu̶gu̶u̶ygyu̶x je̱'e̱ pu̶jkpu̶ ya'aydyu̶jk tu̶gooty y chi je̱'e̱ tu̶jk y'adujknu̶. 11Kujeky je̱'e̱ mu̶gooxkpu̶ ka'pu̶ kyuwinma'añdyu̶ch ajku̶xy oy jya'tku̶xy, cham myu̶naangu̶xy: ‘¡Windzú̶n, Windzú̶n, ok'yaj'awa'adz yu̶'u̶ mdu̶jk!’ 12Peru̶ chi je̱' y'adzoowu̶ ajku̶xy: ‘Janch tu̶y'ajtu̶ñ du'un nnu̶maaygyu̶xy ko ka'p miich n'ixy'ajtku̶xy.’

13Chi je̱'e̱ Jesús jyakmu̶naañ: “Juugy miich ijtku̶x—, je̱' ko ka'p je̱'e̱ xu̶u̶ ni je̱'e̱ hooru̶ mnejwu̶u̶ygyu̶xy mu̶naa u̶u̶ch nwinbida'añu̶ñ.

Je̱'e̱ meeñ ijxpe̱jt

(Lc 19.11-27)

14“Je̱'e̱ Dios y'ane̱'e̱mu̶ñ du'un je̱' neby je̱'e̱ ja'ay tu'ug mu̶dyiibu̶ najty tzonaamb ñu̶kxa'añ najty wiing naax wiing kajpt, chi je̱'e̱ tyuumbu̶du̶jk mu̶jwooy y yajku̶'u̶du̶gu̶u̶y je̱' myeeñ ko wan kweentu̶'ajtku̶xyu̶ ajku̶xy. 15Chi tu'ug yajku̶'u̶du̶gu̶u̶y mu̶gooxkmillón, y tu'ug me̱jtzmillón y ja'adu'ug tu'kmillón, du'un nidu'ug nidu'ug mooy ajku̶xy neby mu̶baad mu̶madaakku̶xyu̶ñ kweentu̶'ajtku̶xu̶chu̶ñ. Chi choñ viaje tuumbu̶. 16Je̱'e̱ tuumbu̶ mu̶dyiibu̶ mu̶gooxk millón yajmooyu̶ñ, yaj'ajuuy je̱'e̱ meeñ y yaj'ung'ajty mu̶gooxk du'uñdyu̶. 17Nandu'un je̱'e̱ mu̶dyiibu̶ me̱jtzmillón yajmooyu̶ñ, nan me̱jtz du'uñdyu̶ je̱'e̱ yaj'ung'ajty. 18Peru̶ je̱'e̱ mu̶dyiibu̶ tu'kmillón yajmooyu̶ñ, oy je̱'e̱ jut tu'ug tajy, yu'tzu̶ je̱'e̱ wyindzú̶n myeeñ jiiby.

19“Kujeky je̱'e̱ tuumbu̶du̶jk wyindzú̶n wyimbijty, chi kyweentu̶ yajpu̶dzu̶u̶mdu̶gu̶u̶y mu̶u̶d je̱' ajku̶xy. 20Chi jayu̶jp myiiñ je̱'e̱ mu̶dyiibu̶ je̱'e̱ meeñ najty mu̶gooxkmillón tu̶ yajmo'oyu̶ñ, y yajku̶'u̶du̶gu̶u̶y je̱'e̱ wyindzú̶n mu̶gooxk du'uñdyu̶, cham nu̶ma'ay: ‘Windzú̶n, miich mu̶gooxk millón u̶u̶ch miich je̱'e̱ meeñ xymyooy, y chaa mu̶gooxk du'uñdyu̶ mu̶dyiibu̶ u̶u̶ch tu̶ nyaj'ung'átyu̶ñ.’ 21Chi je̱' wyindzú̶n ñu̶maayu̶: ‘Oy, miich oydyuumbu̶ miich y tu'uda'agy miich; du'un neby tu̶ mgapxymyu̶doyu̶ñ mu̶u̶d je̱'e̱ mu̶dyiibu̶ we̱e̱nu̶, ni'igu̶ may je̱'e̱ meeñ cham ni'igyu̶ nyajku̶'u̶du̶gu̶'u̶waanu̶. Tu̶gu̶'u̶ tu̶gooty y xonda'ag mu̶u̶d u̶u̶ch.’ 22Kujeky je̱'e̱ tuumbu̶ myiiñ je̱'e̱ mu̶dyiibu̶ je̱'e̱ meeñ najty me̱jtzmillón tu̶ yajmo'oyu̶ñ, y chi myu̶naañ: ‘Windzú̶n, miich me̱jtzmillón u̶u̶ch miich je̱'e̱ meeñ xymyooy, y chaa me̱jtz du'uñdyu̶ mu̶dyiibu̶ u̶u̶ch tu̶ nyaj'ung'átyu̶ñ.’ 23Chi je̱' wyindzú̶n ñu̶maayu̶: ‘Oy, miich oydyuumbu̶ miich y tu'uda'agy miich; du'un neby tu̶ mgapxymyu̶doyu̶ñ mu̶u̶d je̱'e̱ mu̶dyiibu̶ we̱e̱nu̶, ni'igu̶ may je̱'e̱ meeñ cham ni'igyu̶ nyajku̶'u̶du̶gu̶'u̶waanu̶. Tu̶gu̶'u̶ tu̶gooty y xonda'ag mu̶u̶d u̶u̶ch.’

24“Peru̶ Ko je̱'e̱ tuumbu̶ myiiñ je̱'e̱ mu̶dyiibu̶ je̱'e̱ meeñ najty tu'kmillón tu̶ yajmo'oyu̶ñ, chi je̱'e̱ wyindzú̶n nu̶maay: ‘Windzú̶n, u̶u̶ch nejwu̶u̶ybyu̶ch du'un ko miich awa'an mja'ay'áty, ko mdzijkypy mu̶dyiibu̶ ka'p tu̶ mni'ibyu̶ñ y myajpu̶du̶'kypy mu̶dyiibu̶ ka'p tu̶ mwu̶jyu̶ñ. 25Paady u̶u̶ch ndzu̶gu̶u̶y y oy u̶u̶ch je̱'e̱ mmeeñ nyu'uch naaxjutjooty. Y chaaju̶tz je̱'e̱ mmeeñ je̱'e̱ mu̶dyiibu̶ u̶u̶ch xymyooyu̶ñ.’ 26Chi je̱'e̱ wyindzú̶n y'adzoowu̶: ‘Miich ju̶bu̶ktuumbu̶ miich y mjanchnuux miich, pu̶nu̶ mnejwu̶u̶by ijty ko u̶u̶ch ndziky mu̶dyiibu̶ u̶u̶ch ka'p tu̶ ni'ibyu̶ñ y nyajpu̶du̶'u̶gyu̶ch mu̶dyiibu̶ u̶u̶ch ka'p tu̶ nwu̶jyu̶ñ, 27tu̶ u̶u̶ch u̶xyu̶py je̱'e̱ nmeeñ banco xypyu̶daaku̶ y ko u̶u̶ch u̶xyu̶py naty nwimbity, mu̶'it u̶u̶ch u̶xyu̶py je̱'e̱ nmeeñ xyajku̶'u̶du̶gu̶u̶yñu̶ mu̶u̶d je̱'e̱ meeñ'úng.’ 28Y chi nu̶maay je̱'e̱ mu̶dyiibu̶ najty jim ajku̶xy: ‘Pu̶jku̶ adaa ja'ay ajku̶xy je̱'e̱ tu'kmillóngpu̶ meeñ, y mooygyu̶x je̱'e̱ mu̶dyiibu̶ majkmillón mu̶u̶du̶ñ. 29Je̱' ko je̱'e̱ mu̶dyiibu̶ mu̶u̶du̶ñ, jak'yajmo'owu̶p je̱'e̱ ni'igyu̶, y myu̶d'ádu̶py naxypyu̶ je̱'; peru̶ je̱'e̱ mu̶dyiibu̶ ka'p mu̶u̶du̶chu̶ñ, oy u̶xyu̶py je̱'e̱ we̱e̱nu̶ ja'amu̶d'ajtpu̶, jak'yajpu̶jkta'awu̶p je̱'e̱ ni'igyu̶. 30Y adaa tuumbu̶ mu̶dyiibu̶ u̶u̶ch ka'p xykyapxymyu̶doyu̶ñ, pu̶daakku̶x tu̶be̱'py jiiby agoodztuum, y jiiby jyu̶'u̶wu̶ch ya'axu̶ch y tyu̶u̶tzke̱e̱du̶ch.’

Ko je̱'e̱ naaxwiiñjya'ay yajtu̶ydyuungu̶xu̶ch

31“Ko u̶u̶ch naty nmiñ ja'adu'ook ya naaxwiiñ u̶u̶ch je̱' je̱'e̱ ja'ay mu̶dyiibu̶ tzon tzajpjooty, du'un u̶u̶ch nmínu̶ch mu̶u̶d u̶u̶ch je̱'e̱ n'oy'ajt y nmu̶k'ajtu̶ñ y mu̶u̶d u̶u̶ch je̱'e̱ n'ángelestu̶jk nigu̶xyu̶, y chi u̶u̶ch naaxwe̱e̱dzu̶ch ma u̶u̶ch je̱'e̱ n'ane̱'e̱mdaakt ku'umáybyu̶ju̶ñ. 32Chi je̱'e̱ ja'ay ku̶xyu̶ tyu'ugmujkta'awa'añ ma u̶u̶chu̶ñ je̱'e̱ mu̶dyiibu̶ wiing naax wiing kajpt tzu̶naaygyu̶xpu̶ñ, y chi u̶u̶ch nwin'ix nwimbíwu̶ch, du'un neby je̱'e̱ borreegu̶ kweentu̶'ajtpu̶ je̱'e̱ borreegu̶ win'ixy ma je̱'e̱ chiivu̶ju̶ñ. 33A'oy'eemby u̶u̶ch je̱'e̱ borreegu̶ nbu̶da'agu̶ch y anajty'eemby je̱'e̱ chiivu̶. 34Y mu̶'it u̶u̶ch nu̶ma'awu̶ch je̱'e̱ mu̶dyiibu̶ u̶u̶ch naty n'a'oy'eemby yajpaatku̶xpu̶ñ: ‘Miingu̶x miich ajku̶xy, je̱'e̱ mu̶dyiibu̶ u̶u̶ch je̱'e̱ nDeedy tu̶ kunukxyu̶ñ; windumbu̶jkku̶x je̱'e̱ ane̱'e̱mu̶ñ je̱'e̱ mu̶dyiibu̶ yajni'ixu̶u̶yu̶ñ mu̶u̶d miich kyu̶xpu̶ ajku̶xy maabu̶ je̱'e̱ Dios naaxwiimbu̶ yajkojyu̶ñ. 35Ma u̶u̶ch najty nyu'o'ogyiiju̶ñ, xyajkaayu̶ch miich ajku̶xy; ma u̶u̶ch najty ndu̶dzu̶'u̶yiiju̶ñ, xyajnu̶u̶'uuku̶ch miich ajku̶xy; ma u̶u̶ch najty nwu̶dity neby je̱'e̱ jaybyokxyu̶ñ, xyajja'ttaaku̶ch miich ajku̶xy. 36Ma u̶u̶ch najty je̱'e̱ nwit kya'a'ítyu̶ñ, xyñi'ixojxu̶ch miich ajku̶xy; ma u̶u̶ch najty nbu̶gyiiju̶ñ, xykyu'ijxu̶ch miich ajku̶xy; ma u̶u̶ch najty nbujxtu̶jk'u̶ña'ayu̶ñ, xykyu'ijxu̶ch miich ajku̶xy.’ 37Mu̶'it je̱'e̱ mu̶dyiibu̶ naty a'oy'eemby yajpaatku̶xpu̶ñ yajtu̶u̶gu̶xu̶ch: ‘Windzú̶n, ¿mu̶naa miich n'ijxy ajku̶xy ko najty myu'o'ogyii y nyajkaay ajku̶xy? ¿O mu̶naa miich n'ijxy ajku̶xy ko najty mdu̶dzu̶'u̶yii y nyajnu̶u̶'uuky ajku̶xy? 38¿O mu̶naa miich n'ijxy ajku̶xy ko najty mwu̶dity neby je̱'e̱ jaybyokxyu̶ñ y nyajja'ttaaky ajku̶xy, o mu̶naa miich je̱'e̱ mwit najty kya'a'íty y ni'ixojxy ajku̶xy? 39¿O mu̶naa miich n'ijxy ajku̶xy ko najty mbu̶gyii o ko najty mbujxtu̶jk'u̶ña'ay y ngu'ijxy ajku̶xy?’ 40Chi u̶u̶ch miich n'adzówu̶ch ajku̶xy: ‘Janch tu̶y'ajtu̶ñ du'un nnu̶maaygyu̶xy ko ku̶xyu̶ je̱'e̱ pube̱jtu̶ñ mu̶dyiibu̶ miich tu̶ mye̱jkku̶xy ma u̶u̶ch je̱'e̱ nja'ay nidu'ugtu̶ mu̶dyiibu̶ yuung naaxypyu̶ñ ajku̶xy, u̶u̶ch miich du'un tu̶ xypyube̱jtku̶xy.’

41“Mu̶'it u̶u̶ch nmu̶na'anu̶ch; nu̶ma'awu̶chu̶ch je̱'e̱ mu̶dyiibu̶ u̶u̶ch naty n'anajty'eemby yajpaatku̶xpu̶ñ: ‘Winwa'ktuutku̶ch miich ajku̶xy mu̶dyiibu̶ ju̶bu̶ktuumb yajpaatku̶xpu̶ñ; nú̶kxku̶x miich jiiby mu̶jju̶u̶njooty mu̶dyiibu̶ ka'p nimu̶naaxu̶u̶ pyi'ichu̶ñ, mu̶dyiibu̶ ni'ixu̶'u̶ ijtp ma je̱'e̱ mu̶jku'u ñú̶kxku̶xu̶chu̶ñ mu̶u̶d je̱'e̱ y'ángelestu̶jk ajku̶xy. 42Ma u̶u̶ch najty nyu'o'ogyiiju̶ñ, y ka'p u̶u̶ch miich xyajkaay ajku̶xy; ma u̶u̶ch najty ndu̶dzu̶'u̶yiiju̶ñ, y ka'p u̶u̶ch miich xyajnu̶u̶'uuky ajku̶xy; 43ma u̶u̶ch najty nwu̶dity neby je̱'e̱ jaybyokxyu̶ñ, y ka'p u̶u̶ch miich xyajja'ttaaky ajku̶xy. Ma u̶u̶ch najty je̱'e̱ nwit kya'a'ítyu̶ñ, y ka'p u̶u̶ch miich xyñi'ixojxy ajku̶xy; ma u̶u̶ch najty nbu̶gyiiju̶ñ y ma u̶u̶ch najty nbujxtu̶jk'u̶ña'ayu̶ñ, y ka'p u̶u̶ch miich xykyu'ijxy ajku̶xy.’ 44Mu̶'it je̱' yajtú̶wu̶ch ajku̶xy: ‘Windzú̶n, ¿mu̶naa u̶u̶ch miich tu̶ n'ijxku̶xy ko najty myu̶'o'ogyii o ko najty mdu̶dzu̶'u̶yii, o ko najty mwu̶dity neby je̱'e̱ jaybyokxyu̶ñ, o ko najty je̱'e̱ mwit kya'a'íty, o ko najty mbu̶gyii, o ko najty mbujxtu̶jk'u̶ña'ay, y ka'p nbubejty ajku̶xy?’ 45Chi u̶u̶ch je̱' n'adzówu̶ch ajku̶xy: ‘Janch tu̶y'ajtu̶ñ du'un nnu̶maaygyu̶xy ko je̱'e̱ pube̱jtu̶ñ mu̶dyiibu̶ miich ka'p tu̶ mye̱jkku̶xy ma u̶u̶ch je̱'e̱ nja'ay nidu'ugtu̶ mu̶dyiibu̶ yuung naaxypyu̶ñ ajku̶xy, nan ni u̶u̶ch miich du'un tu̶ xykya'apube̱jtku̶xy.’ 46Je̱'e̱ju̶tz jiiby nu̶kxaangu̶xp ma je̱'e̱ ayoodaakt wiinu̶u̶xu̶u̶bu̶ju̶ñ, y je̱'e̱ wa'adzja'ay ajku̶xy ma je̱'e̱ jugy'ajtu̶ñ wiinu̶u̶xu̶u̶bu̶ju̶ñ.”

Currently Selected:

San Mateo 25: MIXE

Highlight

Copy