San Mateo 23

Jesús ka'p je̱'e̱ fariseotu̶jk ni je̱'e̱ Dios y'ane̱'e̱mu̶ñ windzu̶ndu̶jk y'u̶xpu̶jku̶ñ ku'umaayu̶ ajku̶xy

(Mc 12.38-40; Lc 11.37-54; 20.45-47)

1Ko adaa du'un tyuundaay jyajttaayu̶, chi je̱'e̱ Jesús nu̶maay je̱'e̱ mayjya'ay y je̱'e̱ dyiscípulotu̶jk: 2“Je̱'e̱ Dios y'ane̱'e̱mu̶ñ windzu̶ndu̶jk y je̱'e̱ fariseotu̶jk ane'emy je̱'e̱ du'un ajku̶xy ko je̱'e̱ Moisés y'ane̱'e̱mu̶ñ kapxtu̶u̶wu̶ch ajku̶xy. 3Paadyu̶tz, mgapxymyu̶doogu̶xu̶py y mguydyuungu̶xu̶py ku̶xyu̶ nebyjyaty naty xyñu̶maaygyu̶xyu̶ñ, peru̶ ka'p mgatz'ijxku̶xu̶ch nebyjyaty jya'ay'ajtku̶xyu̶ñ, je̱' ko janch kápxku̶xp je̱' y ka'p naty du'un ni'ikuydyuungu̶xpu̶. 4Yu̶'u̶ je̱'e̱ kostumbre ka'anagnáx yajkojku̶xp janch tzipjatypyu̶ mu̶dyiibu̶ ka'p myu̶madaaknu̶chu̶ñ, y yaj'u̶xpu̶jkku̶xy je̱'e̱ ja'ay ko wan kuydyuungu̶xy, y ni je̱' naty ku̶'u̶m nidu'uñdyu̶ ka'akuydyuungu̶xpu̶, du'un neby je̱'e̱ tzu̶my jemxypyu̶ tu̶ mooygyu̶xyu̶ñ mu̶dyiibu̶ ka'p myu̶madaaknu̶chu̶ñ, y chi je̱'e̱ ja'ay nu̶maaygyu̶xy ko wan mu̶du'uyo'oygyu̶xy, y je̱' ajku̶xy ni kyu̶'u̶wa'axktu̶'ajty je̱'e̱ ku̶'u̶m ka'ayajpadaangu̶xpu̶. 5Ku̶xyu̶ nebyjyaty y'adu̶u̶tzku̶xyu̶ñ, paady je̱'e̱ du'un y'adu̶u̶tzku̶xy wan je̱'e̱ ja'ay du'un y'ixu̶u̶ tyu̶kxu̶u̶ju̶ch ajku̶xy. Ñayyajwimbokxodzu̶u̶yu̶gu̶xy y ñayyajkejykyopxodzu̶u̶yu̶gu̶xy je̱'e̱ naky ma je̱'e̱ Dios y'ayuuk tyu̶y'ajt kuja'ay myiiñu̶ñ, y yoñjyaty je̱'e̱ wyit tyukxy ajku̶xy pa'axu̶nanjáty wan je̱'e̱ ja'ay du'un y'ixu̶u̶ju̶ch ajku̶xy ko oy Dyiosmu̶duungu̶xy. 6Je̱'e̱ u̶ñaaybye̱jt je̱'e̱ jyanch'adzojkku̶xypy ma je̱'e̱ windzu̶ndu̶jk y'u̶ñaaygyu̶xyu̶ñ ma je̱'e̱ ja'ay xyu̶u̶duungu̶xyu̶ñ y je̱'e̱ ku'uduumbu̶ u̶ñaaybye̱jt ma je̱'e̱ naymyujktaaktu̶ñ, 7y janch adzojkku̶xy ko je̱'e̱ ja'ay y'u̶u̶bókx kyapxpókxu̶gu̶xu̶ch windzu̶gu̶'u̶ñ'eemby nu̶u̶gujk tu'ugujk y ko ñu̶maayu̶gu̶xu̶ch windzú̶n.

8“Peru̶ miich ajku̶xy ka'p du'un mgu'ubu̶jkku̶xu̶ch ko je̱'e̱ ja'ay xyñu̶maaygyu̶xu̶ch windzú̶n, je̱' ko tu'kjuugy tu'kmu̶gu'ug miich nigu̶xyu̶ ajku̶xy y tu'kpajk je̱'e̱ mWindzú̶n je'eyu̶ ajku̶xy#23.8 Nije̱' wiingpu̶ versión myu̶na'añ: je̱'e̱ Cristo 9Y ka'p miich ni pu̶n mnu̶maaygyu̶xu̶ch teedy ma adayaaba naaxwiiñu̶ñ je̱' ko tu'kpajk miich je̱'e̱ mDeedy je'eyu̶ ajku̶xy: je̱'e̱ mu̶dyiibu̶ jiiby tzajpjootyu̶ñ. 10Nan ka'p mgu'ubu̶jkku̶xu̶ch ko je̱'e̱ ja'ay xyñu̶maaygyu̶xu̶ch mu̶jwindzú̶n, je̱' ko je̱'e̱ Cristo miich tu'kpajk mmu̶jWindzu̶n'ajtypy ajku̶xy. 11Je̱'e̱ mu̶jtuungmu̶u̶dpu̶ ma miich ajku̶xyu̶ñ, wan je̱'e̱ myu̶gu'ugtu̶jk mu̶dúñ. 12Je̱' ko je̱'e̱ mu̶dyiibu̶ ku̶'u̶m naygyu'umaayu̶p, tzo'oydyu'unbaadu̶p je̱', y je̱'e̱ mu̶dyiibu̶ yuung naaxypy naybyu̶daaku̶p, je̱' ku'umáy ídu̶p.

13“¡Miich y'yoobu̶ ajku̶xy Dios y'ane̱'e̱mu̶ñ windzu̶ndu̶jk y fariseotu̶jk ayo'onduum myajpaatku̶xy, miich tzo'oydyu'untúk miich ajku̶xy!, miich m'agapxtujkku̶xypy je̱'e̱ ja'ay ka'pu̶ tyu̶gu̶u̶ygyu̶xu̶ch ma je̱'e̱ Dios y'ane'emyu̶ñ. Ni miich ku̶'u̶m mga'atu̶gu̶'u̶waangu̶xy y nan ka'p mdzojkku̶xy ko je̱'e̱ wiingpu̶ tyu̶gu̶u̶ygyu̶xu̶ch mu̶dyiibu̶ du'un ja'amu̶naangu̶xpu̶ñ. 14[¡Miich y'yoobu̶ ajku̶xy Dios y'ane̱'e̱mu̶ñ windzu̶ndu̶jk y fariseotu̶jk, ayo'onduum myajpaatku̶xy, miich tzo'oydyu'untúk miich ajku̶xy!, je̱' ko miich je̱'e̱ ku'o'ogytyo'oxyu̶jktu̶jk je̱'e̱ tyu̶jk y je̱'e̱ kyojy pyu̶da'agy mbu̶jktaayu̶ ajku̶xy, y mDiosmu̶bu̶jktzoogu̶xy janch jekyjyaty neby je̱'e̱ ja'ay xykyu'umáyu̶chu̶ñ ajku̶xy ko m'oyjya'ay mdu'uda'agyjya'ayu̶ch ajku̶xy. Y paady je̱'e̱ Dios miich ni'igyu̶ xychaachtyúnu̶ch ajku̶xy.]#23.14 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy.

15“¡Miich y'yoobu̶ ajku̶xy Dios y'ane̱'e̱mu̶ñ windzu̶ndu̶jk y fariseotu̶jk, ayo'onduum myajpaatku̶xy, miich tzo'oydyu'untúk miich ajku̶xy!, m'ayo'oydyaaby miich je̱'e̱ naaxwiimbu̶ ajku̶xy, m'u̶xtaaygyu̶xy je̱'e̱ ja'ay tu'ug mu̶dyiibu̶ mwin'u̶u̶naangu̶xypyu̶ñ mu̶u̶d je̱'e̱ m'u̶xpu̶jku̶ñ ajku̶xy, y ko naty tu̶ m'okwin'ú̶ngu̶xy, me̱jtzdu'uñdyu̶ je̱'e̱ du'un myajpokychu̶mu̶'kku̶xnu̶ ni'igu̶ ka'p miich ajku̶xyñu̶ba.

16“¡Miich y'yoobu̶ ajku̶xy, wiindzja'ay wijtzyo'oybyu̶du̶jk!, miich du'un miich mmu̶naangu̶xy: ‘Ko pu̶n je̱'e̱ waandaakt nukxtaakt pu̶daakku̶xpu̶ñ cham je̱'e̱ mu̶jtzajptu̶jk naty kapxpaatku̶xy, ko ka'p du'un ñejpyu̶ch ko ka'akuydyúnu̶ch ajku̶xy, peru̶ pu̶nu̶ kyapxpaatku̶xypymíñ je̱'e̱ ooru̶ mu̶dyiibu̶ jiiby mu̶jtzajptu̶gootyu̶ñ ko mu̶'itnu̶ je̱'e̱ tzipku̶xp kuydyuungu̶xu̶ch.’ 17¡Tzudu̶jk looku̶tu̶jk y wiindzja'aydyu̶jk! ¿Mu̶dyii ni'igyu̶ jaktzobaatp: je̱'e̱ ooru̶ o je̱'e̱ mu̶jtzajptu̶jk? je̱' ko je̱'e̱ mu̶jtzajptu̶jk kyu̶xpu̶ je̱'e̱ ooru̶ yajkunúkxy. 18Nandu'un miich mmu̶naangu̶xy: ‘Ko pu̶n je̱'e̱ waandaakt nukxtaakt pu̶daakku̶xpu̶ñ cham je̱'e̱ naaxpóch ma je̱'e̱ windzu̶gu̶'u̶ñ yaj'yékyu̶ñ naty kapxpaatku̶xy, ko ka'p du'un ñejpyu̶ch ko ka'akuydyúnu̶ch ajku̶xy peru̶ pu̶nu̶ kyapxpaatku̶xypymíñ je̱'e̱ yojxu̶ñ mu̶dyiibu̶ jim naaxpóch kyu̶xp ma je̱'e̱ windzu̶gu̶'u̶ñ yaj'yékyu̶ñ, ko mu̶'itnu̶ je̱'e̱ tzipku̶xp kuydyuungu̶xu̶ch.’ 19¡Wiindzja'aydyu̶jk!#23.19 Nije̱' wiingpu̶ versión myu̶na'añ: y ku'ujuuñjya'aydyu̶jk ¿Mu̶dyii ni'igyu̶ jaktzobaatp: je̱'e̱ yojxu̶ñ o je̱'e̱ naaxpóch ma je̱'e̱ windzu̶gu̶'u̶ñ yaj'yékyu̶ñ? Je̱' ko naaxpóch kyu̶xpu̶ je̱'e̱ yojxu̶ñ yajkunúkxy. 20Pu̶n je̱'e̱ naaxpóch kapxpaatpu̶ñ ma je̱'e̱ windzu̶gu̶'u̶ñ yaj'yékyu̶ñ, ka'p naty je̱'e̱ je̱'e̱du̶'ajty kyapxpaatypy je̱'e̱ naaxpóch ma windzu̶gu̶'u̶ñ yaj'yékyu̶ñ, nan y'agapxmujktaaby naty je̱'e̱ du'un ku̶xyu̶ mu̶dyiijáty jim naaxpóch kyu̶xpu̶ñ, 21y je̱'e̱ mu̶dyiibu̶ je̱'e̱ mu̶jtzajptu̶jk kapxpaatpu̶ñ, ka'p naty je̱'e̱ je̱'e̱du̶'ajty kyapxpaatypy je̱'e̱ mu̶jtzajptu̶jk, nan je̱'e̱ Dios naty je̱'e̱ du'un kyapxpaatypy je̱'e̱ mu̶dyiibu̶ jiiby tzu̶naaybyu̶ñ. 22Y pu̶n je̱'e̱ tzajp kapxpaatpu̶ñ, je̱'e̱ Dios naty y'u̶ñaaydyaakt je̱'e̱ du'un kyapxpaattu̶py y je̱'e̱ Dios je̱'e̱ mu̶dyiibu̶ jiiby u̶ñaaybyu̶ñ.

23“¡Miich y'yoobu̶ ajku̶xy Dios y'ane̱'e̱mu̶ñ windzu̶ndu̶jk y fariseotu̶jk, ayo'onduum miich myajpaatku̶xy, miich tzo'oydyu'untúk miich ajku̶xy!, ko mbu̶daakku̶xy abu̶kyjyaty je̱'e̱ majkpu̶ mu̶u̶d je̱'e̱ Dios kyu̶xpu̶, u̶xtu̶ je̱'e̱ ruda, je̱'e̱ anís y je̱'e̱ ju̶kxychooy, peru̶ ka'p miich je̱'e̱ u̶xpu̶jku̶ñ mgweentu̶tuungu̶xy je̱'e̱ mu̶dyiibu̶ ni'igyu̶ jaktzobaatp ma je̱'e̱ Dios y'ane̱'e̱mu̶ñ, adayaaba: je̱'e̱ tu̶y'ajtu̶ñ, je̱'e̱ pa'a''ayo'on, y ko je̱'e̱ Dios tu'ug'aa tu'ugjoot mmu̶bu̶jkku̶xu̶ch. Adaaju̶tz u̶xyu̶py mduungu̶xypy cham je̱'e̱ majkpu̶ naty abu̶kyjyaty mbu̶daakku̶xpu̶ mu̶u̶d je̱'e̱ Dios kyu̶xpu̶. 24¡Miich ajku̶xy, wiindzja'ay wijtzyo'oybyu̶du̶jk, m'anajxku̶xypy je̱'e̱ nu̶u̶ ka'pu̶ je̱'e̱ pi'k'uuxk ñáxu̶ch, peru̶ mju̶u̶ngu̶xypy je̱'e̱ camello, je̱'e̱ mu̶jju̶yujk!

25“¡Miich y'yoobu̶ ajku̶xy Dios y'ane̱'e̱mu̶ñ windzu̶ndu̶jk y fariseotu̶jk, miich tzo'oydyu'untúk miich ajku̶xy!, oy mjanchñaybyu̶daaku̶gu̶xy tu'uda'agyjya'ay ma je̱'e̱ ja'ay winduuy ajku̶xyu̶ñ y ka'p naty ñi'ijaanchu̶chpyu̶, y ma je̱'e̱ mjoot mwinma'añ ajku̶xyu̶ñ jiiby je̱'e̱ me̱e̱dzu̶u̶ winma'añ y je̱'e̱ adzojku̶ñ winma'añ ku̶xyu̶ mmu̶dajtku̶xy. Myajwaatzku̶xypy miich je̱'e̱ vasu̶ni'kx y je̱'e̱ texyñi'kx, y chi je̱'e̱ ju̶bu̶kpu̶ myajwu̶'u̶mgu̶xy vasu̶jooty y texyjyooty. 26¡Fariseotu̶jk wiindzja'aydyu̶jk, yajwaatzku̶x je̱'e̱ vasu̶joot y je̱'e̱ texyjyoot jayu̶jp, y du'un nandu'un wyu̶'u̶mu̶ch wa'adz je̱'e̱ vasu̶ni'kx y je̱'e̱ texyñi'kx!

27“¡Miich y'yoobu̶ ajku̶xy Dios y'ane̱'e̱mu̶ñ windzu̶ndu̶jk y fariseotu̶jk, miich tzo'oydyu'untúk miich ajku̶xy! Du'un miich ajku̶xy neby je̱'e̱ o'kpu̶ jut, janch'oy ni'igú̶xp ku'uduuy y'oydyúñu̶chu̶ñ, peru̶ jiiby jutjooty ujtz je̱'e̱ jiiby mu̶u̶d je̱'e̱ o'kpu̶ pajk y mu̶u̶d je̱'e̱ ju̶bu̶kpu̶ ku̶xyu̶. 28Du'un miich ajku̶xy: du'un miich ni'igú̶xp ku'uduuy mgu̶xu̶'kku̶xy ma je̱'e̱ mayjya'ay winduuy ajku̶xyu̶ñ neby je̱'e̱ ja'ay oyjya'aybyu̶ ajku̶xyu̶ñ, peru̶ ma je̱'e̱ mjoot mwinma'añ ajku̶xyu̶ñ jiiby je̱'e̱ tzo'oydyu'untúk winma'añ y je̱'e̱ ju̶bu̶kwinma'añ ku̶xyu̶ mmu̶dajtku̶xy.

29“¡Miich y'yoobu̶ ajku̶xy Dios y'ane̱'e̱mu̶ñ windzu̶ndu̶jk y fariseotu̶jk, miich tzo'oydyu'untúk miich ajku̶xy!, miich je̱'e̱ o'kpu̶ jut mgu'ubodzu̶u̶ygyu̶xypy ma je̱'e̱ Dios y'ayuuknajtzkapxu̶u̶ybyu̶du̶jk ñaaxtu̶gu̶u̶y ajku̶xyu̶ñ, y mxojxku̶xy oy yajxón ma je̱'e̱ tu'uda'agyjya'aydyu̶jk ñaaxtu̶gu̶u̶y ajku̶xyu̶ñ, 30y chi mmu̶naangu̶xy: ‘Ko u̶xyu̶py u̶u̶ch jékyu̶p ku̶ndzu̶naay ku̶njugy'ajty ajtu̶m ajku̶xy mu̶naa je̱'e̱ nmu̶j'áp nmu̶jteedy chu̶naay jyugy'ajty ajku̶xyu̶ñ, ka'p je̱'e̱ ku̶nbubejty ajtu̶m ajku̶xy ko je̱'e̱ Dios y'ayuuknajtzkapxu̶u̶ybyu̶du̶jk yaj'o'ky ajku̶xy.’ 31Adaa gyú̶xpu̶tz du'un mu̶u̶d ñi'igu̶xu̶'u̶gy ma miich ajku̶xyu̶ñ, ko miich xy'ok'ung xy'ok'ana'k'ajtku̶xy je̱'e̱ mu̶dyiibu̶ je̱'e̱ Dios y'ayuuknajtzkapxu̶u̶ybyu̶du̶jk yaj'o'kku̶xu̶ñ. 32¡Tuun'abe̱jtku̶x je̱'e̱ mu̶dyiibu̶ je̱'e̱ mmu̶j'áp mmu̶jteedy tu̶ yajtzondaakku̶xyu̶ñ!

33“¡Miich du'un miich ajku̶xy neby je̱'e̱ mayxooxu̶ñ! ¡Tza'añ miich m'ajuugy m'amu̶gu'ug'ajtypy ajku̶xy! ¿Neby da'a m'okni'idzookku̶xu̶ch ma je̱'e̱ tzaachpyu̶ jiiby ayoodaaktuuybyu̶ñ? 34Paady nyajnigue̱xaangu̶xy je̱'e̱ Dios y'ayuuknajtzkapxu̶u̶ybyu̶du̶jk, je̱'e̱ u̶xpu̶kytyu̶jk y je̱'e̱ yaj'u̶xpu̶jkpu̶du̶jk ajku̶xy. Peru̶ miich myaj'o'kku̶xu̶py je̱' y nije̱' myajcruutzpe̱jtku̶xu̶ch, y naagu̶ñ mgojxku̶xu̶ch mne̱jpku̶xu̶ch ma je̱'e̱ naymyujktaaktu̶ñ y m'u̶xwu̶dijt mbawu̶dijtku̶xu̶ch kajpt kajpt. 35Y miich je̱'e̱ tzaachpyu̶ xyñiga'awaangu̶xp ko je̱'e̱ tu'uda'agyjya'aydyu̶jk ku̶xyu̶ yaj'o'kku̶xy chonda'agy ma je̱'e̱ Abel je̱'e̱ tu'uda'agyjya'ay, u̶xtu̶ Zacarías, je̱'e̱ Berequías y'ung je̱'e̱ mu̶dyiibu̶ miich myaj'o'kku̶xu̶ñ mu̶jtzajptu̶jk'aguuy y naaxpóchpya'a'aay ma je̱'e̱ windzu̶gu̶'u̶ñ yaj'yékyu̶ñ. 36Janch tu̶y'ajtu̶ñ du'un nnu̶maaygyu̶xy ko je̱'e̱ tzaachpyu̶ mu̶u̶d adayaaba ku̶xyu̶, adachambu̶ tiempo ja'ay je̱'e̱ niga'ada'awaanu̶p ajku̶xy.

Jesús jyu̶'u̶y ya'axy mu̶u̶d je̱'e̱ Jerusalén kajpt kyu̶xpu̶

(Lc 13.34-35)

37“¡Jerusalenja'ay, Jerusalenja'ay, mu̶dyiibu̶ yaj'o'kku̶xpu̶ñ je̱'e̱ Dios y'ayuuknajtzkapxu̶u̶ybyu̶du̶jk ajku̶xy y mgu'uga'tzku̶xy je̱'e̱ ja'ay mu̶dyiibu̶ je̱'e̱ Dios xyajnigue̱jxku̶xpu̶ñ! ¡Janch ka'anaag'ook u̶u̶ch je̱'e̱ m'ung m'ana'k tu̶ nja'awijtzmuga'añ du'un neby je̱'e̱ tzeydyaj y'ung yajmúkyu̶ñ kye̱e̱ktpa'tku̶'u̶by, peru̶ nan ka'p du'un tu̶ m'a'ixu̶u̶ygyu̶xy mgu'ubu̶jkku̶xy! 38Chiiju̶tz ijxku̶x, najtz'ixu̶'u̶ je̱'e̱ mgajpt wyu̶'u̶mnu̶ ajku̶xy; 39y u̶u̶ch miich nnu̶maaygyu̶xypy, ko cham du'un'ajtpu̶, ka'p u̶u̶ch miich xy'ok'ijxku̶xnu̶ch, u̶xtu̶ koonu̶ naty je̱'e̱ tiempo paady mu̶naa mmu̶naangu̶xu̶ch: ‘¡Kapxpaady je̱'e̱ mu̶dyiibu̶ miimb mu̶u̶d je̱'e̱ Windzú̶n Dios kyu̶xpu̶ xyu̶u̶!’ ”

Currently Selected:

San Mateo 23: MIXE

Highlight

Copy