San Mateo 16

Je̱'e̱ fariseotu̶jk y je̱'e̱ saduceotu̶jk yujkwaangu̶xy je̱'e̱ ijxpe̱jt mu̶jwinma'añbyu̶

(Mc 8.11-13; Lc 12.54-56)

1Chi je̱'e̱ fariseotu̶jk y je̱'e̱ saduceotu̶jk je̱'e̱ Jesús oy ijxku̶xy, y neby mu̶baad joot'ijxku̶xy winma'añ'ijxku̶xy, chi yujkwaanu̶ ajku̶xy ko je̱'e̱ ijxpe̱jt mu̶jwinma'añbyu̶ wan nije̱' yaj'ijxu̶gu̶xyu̶ pu̶nu̶ jaanch je̱'e̱ Dios najty tu̶ kyexyii.

2Peru̶ chi je̱'e̱ Jesús y'adzoowu̶ ajku̶xy: “Ko chu'uju̶'u̶y, miich du'un miich mmu̶naangu̶xy: ‘Waadzu̶'u̶gaamb jaboom, je̱' ko tzaptz yu̶'u̶ tzajp’; 3y ko jyobu̶'u̶y, du'un miich mmu̶maangu̶xy: ‘Cham ka'p cham wyadzu̶'u̶ga'añ, je̱' ko tzaptz yu̶'u̶ tzajp y wimbu̶ky.’ Miich ajku̶xy mjajtku̶xypy oy yajxón neby je̱'e̱ xu̶u̶ tiempo myajkápxku̶xu̶chu̶ñ mu̶dyiibu̶ m'ijxku̶xypyu̶ñ tzajpkú̶xy, ¿y tiiju̶tz ko mga'ajajtku̶xy neby je̱'e̱ ijxpe̱jt mu̶jwinma'añbyu̶ myajkápxku̶xu̶chu̶ñ mu̶dyiibu̶ u̶u̶ch jada'achámbu̶ xu̶u̶ tiempo nduumbyu̶ñ? 4Adayaaba ja'ay oy yu̶'u̶ jyanchju̶bu̶kja'ayu̶ch ajku̶xy y ka'p je̱'e̱ Dios y'ayuuk tyu̶y'ajt mu̶bu̶jku̶ ajku̶xy; yujkwaangu̶xypy ijxpe̱jt mu̶jwinma'añbyu̶ yu̶'u̶ ajku̶xy, peru̶ nimu̶naa wiingpu̶ ijxpe̱jt yu̶'u̶ kya'ayajmooygyu̶xu̶ch, je'eyu̶ je̱'e̱ Jonás ijxpe̱jt tu'kpajk yajmo'owu̶ch ajku̶xy.”

Y chi je̱'e̱ Jesús wyinyo'oydyuuttu̶ ajku̶xy y tyu'ubu̶jknu̶.

Fariseotu̶jk lyevaduru̶ ajku̶xy

(Mc 8.14-21)

5Ko je̱'e̱ discípulotu̶jk mejy'awiimb ñajxku̶xy, peru̶ tu̶ najty je̱'e̱ chajkaagy ja'aydyu̶gooygyu̶xy, ka'p najty je̱'e̱ tu̶ koongu̶xy. 6Mu̶'it je̱'e̱ Jesús ñu̶maayu̶ ajku̶xy:

—Ok'ijxku̶x, naygyweentu̶'ajtu̶gu̶x, ka'p je̱'e̱ fariseotu̶jk ni je̱'e̱ saduceotu̶jk lyevaduru̶ mgweentu̶tuunu̶ch ajku̶xy.

7Chi je̱'e̱ discípulotu̶jk ñayñu̶maaydyu̶gu̶u̶yu̶gu̶xy amíñ u̶xyu̶py:

—Paady je̱'e̱ du'un myu̶na'añ ko je̱'e̱ ndzajkaagy tu̶ nga'akoonu̶m ajku̶xy.

8Jesús ñejwu̶u̶y je̱' neby najty ñayñu̶maayu̶gu̶xyu̶ñ, y chi ñu̶maayu̶ ajku̶xy:

—¿Ti ko du'un mmu̶naangu̶xy ko je̱'e̱ tzajkaagy ka'p mmu̶u̶du̶ch ajku̶xy? ¡Janch we̱e̱nu̶ je̱'e̱ mu̶bu̶jku̶ñ miich mmu̶u̶du̶ch ajku̶xy! 9¿Nej ka'anu̶ mwinju̶wu̶u̶ygyu̶xyñu̶, ni ka'p mja'aymye̱jtzku̶xy je̱'e̱ mu̶gooxkpu̶ tzajkaagy mu̶dyiibu̶ u̶u̶ch nyajwa'kxu̶ñ ma je̱'e̱ mu̶gooxk milpu̶ja'ayu̶ñ, y naag kach je̱'e̱ myajpu̶du̶'kku̶xy je̱'e̱ mu̶dyiibu̶ nadu̶gu̶u̶yu̶ñ? 10¿Nej nan ka'p mja'aymye̱jtzku̶xy je̱'e̱ juxtujkpu̶ tzajkaagy mu̶dyiibu̶ u̶u̶ch nyajwa'kxu̶ñ ma je̱'e̱ mu̶daaxk milpu̶ja'ayu̶ñ, y naag kach je̱'e̱ myajpu̶du̶'kku̶xy je̱'e̱ mu̶dyiibu̶ nadu̶gu̶u̶yu̶ñ? 11¿Ti ko mga'awinju̶wu̶u̶ygyu̶xy ko ka'p u̶u̶ch je̱'e̱ tzajkaagy yam du'un ndijpy mu̶dyiibu̶ miich mnigápxku̶xypyu̶ñ? ko du'un tu̶ nnu̶maaygyu̶xy ko mnaygyweentu̶'ajtu̶gu̶xu̶ch, ka'p je̱'e̱ fariseotu̶jk ni je̱'e̱ saduceotu̶jk lyevaduru̶ mgweentu̶tuunu̶ch ajku̶xy.

12Mu̶'itnu̶ oy winju̶wu̶u̶ygyu̶xy ko ka'p je̱'e̱ Jesús najty du'un tu̶ ñu̶maayu̶gu̶xyu̶ ko ñaygyueentu̶'ajtu̶gu̶xu̶ch mu̶u̶d je̱'e̱ levaduru̶ mu̶dyiibu̶ je̱'e̱ ja'ay tzajkaagy mu̶u̶d yajkojyu̶ñ. Je̱' najty je̱'e̱ du'un tyijpy ko ñaygyweentu̶'ajtu̶gu̶xu̶ch, ka'p je̱'e̱ fariseotu̶jk ni je̱'e̱ saduceotu̶jk y'u̶xpu̶jku̶ñ kweentu̶tuunu̶ch ajku̶xy.

Pedro nigapxy ko je̱'e̱ Jesús je̱' je̱'e̱ Cristo

(Mc 8.27-30; Lc 9.18-21)

13Ko je̱'e̱ Jesús jya'ty jim Cesarea, Filipo naaxjooty, chi je̱'e̱ dyiscípulotu̶jk yajtu̶u̶y ajku̶xy:

—¿Neby je̱'e̱ ja'ay myu̶naangu̶xy ko pu̶n u̶u̶ch, u̶u̶ch je̱' je̱'e̱ ja'ay mu̶dyiibu̶ tzon tzajpjooty?

14Chi je̱' y'adzoogu̶xy:

—Nije̱'e̱játy je̱'e̱ ja'ay myu̶naangu̶xy ko miich je̱' je̱'e̱ Juan Bautista, y naagu̶ñ myu̶naangu̶xy ko miich je̱' je̱'e̱ Elías, y jaknaagu̶ñ myu̶naangu̶xy ko miich je̱' je̱'e̱ Jeremías o wiingpu̶ Dios y'ayuuknajtzkapxu̶u̶ybyu̶.

15—Chi je̱'e̱ Jesús yajtu̶u̶wu̶ ajku̶xy, —y miich ajku̶xy, ¿neby m'okmu̶naangu̶xpu̶ ko pu̶n u̶u̶ch?

16Chi je̱'e̱ Simón Pedro y'adzooy:

—Miich je̱' je̱'e̱ Cristo, je̱'e̱ Dios tzajpjootypyu̶ Y'ung, je̱'e̱ mu̶dyiibu̶ je̱'e̱ Dios wyin'ijxu̶ñ y kejxy ya naaxwiiñ.

17Mu̶'it je̱'e̱ Jesús y'adzooy:

—Jootkujk miich Simón, je̱'e̱ Jonás y'ung, je̱' ko ka'p miich adaa du'un ni pu̶nja'ay tu̶ xyajnejwu̶'u̶y, je̱'e̱ nDeedyu̶ch adaa du'un tu̶ xyajnejwu̶'u̶y je̱'e̱ mu̶dyiibu̶ jiiby tzajpjooty yajpaatpu̶ñ. 18Y u̶u̶ch miich nnu̶maaby ko miich mxu̶u̶'ádu̶ch Pedro, mu̶dyiibu̶ wimbu̶dzu̶u̶mbu̶ñ tzaa, y ma adaa tzaaju̶ñ jii u̶u̶ch je̱'e̱ ndzajptu̶jk ngoja'añ, y oy jya'a'o'kku̶xu̶ch peru̶ ka'p je̱'e̱ o'ku̶ñ myu̶k'ajt myu̶madaaku̶gu̶xu̶ch. 19U̶u̶ch miich je̱'e̱ ku'utujku̶ñ nmo'owe̱e̱mby ma je̱'e̱ Dios y'ane̱'e̱mu̶ñ, y je̱'e̱ mu̶dyiibu̶ miich ya naaxwiiñ m'agapx'tujkypyu̶ñ, nan y'agapxtúgu̶py je̱'e̱ Dios jiiby tzajpjooty nandu'un, y je̱'e̱ mu̶dyiibu̶ miich ya naaxwiiñ ka'p m'agapxtukyu̶ñ, nan ka'p je̱'e̱ Dios jiiby tzajpjooty agapxtúku̶ch.

20Chi je̱'e̱ Jesús nu̶maay je̱'e̱ dyiscípulotu̶jk ko ka'p du'un ni pu̶n nu̶maaygyu̶xu̶ch ko je̱' najty je̱'e̱ cristo.

Jesús nigapxy ko y'o'oga'añ

(Mc 8.31—9.1; Lc 9.22-27)

21Je̱'e̱ mu̶'it xu̶u̶ je̱'e̱ Jesús je̱'e̱ dyiscípulotu̶jk awaandu̶gu̶u̶yu̶ ajku̶xy ko najty jim Jerusalén jyatytyimyñu̶kxa'añ, y ko jim je̱'e̱ amu̶jja'aydyu̶jk, je̱'e̱ teedy windzu̶ndu̶jk ajku̶xy, y je̱'e̱ Dios y'ane̱'e̱mu̶ñ windzu̶ndu̶jk najty mu̶k chaachtyunaanu̶gu̶xyu̶. Chi ñu̶maayu̶ ajku̶xy ko najty jim yaj'o'oga'añyii ajku̶xy, peru̶ ko najty kudu̶gu̶u̶g xu̶u̶ ja'adu'ook jyuugypyu̶ga'añ. 22Mu̶'it je̱'e̱ Pedro je̱'e̱ Jesús woobu̶dzu̶u̶my, mu̶dnu̶kxy abu̶kytyuum, y oy jim ojy, cham nu̶ma'ay:

—¡Ka'p je̱'e̱ Dios du'un xyñidúgu̶ch, Windzú̶n! ¡Ka'p du'un mjádu̶ch m'abé̱du̶ch!

23Chi je̱'e̱ Jesús y'ijxwimbijty y nu̶maay je̱'e̱ Pedro:

—¡Winwa'ktuutku̶ch yaa, miich mu̶jku'u, nigoo u̶u̶ch miich xyñi'iyajwinma'añdyu̶goya'añ! Miich ka'p miich je̱'e̱ mwinma'añ du'un mbu̶da'agy neby je̱'e̱ Dios tzokyu̶ñ, du'un miich je̱'e̱ mwinma'añ mbu̶da'agy neby je̱'e̱ ja'ay tzokyu̶ñ ajku̶xy.

24Mu̶'it je̱'e̱ Jesús dyiscípulotu̶jk nu̶maay:

—Pu̶nu̶ jii u̶u̶ch pu̶n xypyanu̶kxa'añ, wan je̱'e̱ kyu̶'u̶mdzojku̶ñ ja'aydyu̶gooydya'ay y wan u̶u̶ch xypyanu̶kxy, oy nej jyat y'abé̱du̶ch, du'un neby je̱'e̱ mgruutz nu̶wu̶'u̶y mgabu̶'kku̶xyu̶ñ y xypyanú̶kxku̶xu̶chu̶ch. 25Wan pu̶nja'ayu̶ch mu̶dyiibu̶ je̱'e̱ jyugy'ajtu̶ñ ka'p ye̱ga'añ ma je̱'e̱ o'ku̶ñ ke̱e̱ku̶ñ, yajtu̶goye̱e̱mby jyugy'ajtu̶ñ je̱'; peru̶ je̱'e̱ mu̶dyiibu̶ je̱'e̱ jyugy'ajtu̶ñ ye̱jkpu̶ñ ma je̱'e̱ o'ku̶ñ ke̱e̱ku̶ñ mu̶u̶d u̶u̶ch kyu̶xpu̶, pyade̱e̱mby jyugy'ajtu̶ñ je̱'. 26¿Ti oy'ajtu̶ñ je̱'e̱ ja'ay du'un y'okpaatypy, pu̶nu̶ tu̶ ku̶xyu̶ paady je̱'e̱ kuwit'ajt kumeeñ'ajtu̶ñ ya naaxwiiñ y ka'p je̱'e̱ y'aanu̶mu̶ yajni'idzo'ogy? ¿O du'uñdyu̶ je̱'e̱ ja'ay y'aanu̶mu̶ jyugy'ajtu̶ñ da'a mu̶baad okkujuy? 27Je̱' ko u̶u̶ch je̱' je̱'e̱ ja'ay mu̶dyiibu̶ tzon tzajpjooty minaamb u̶u̶ch ya naaxwiiñ ja'adu'ook mu̶u̶d u̶u̶ch je̱'e̱ nDeedy y'oy'ajt y myu̶k'ajtu̶ñ y mu̶u̶d u̶u̶ch je̱'e̱ n'ángelestu̶jk, y mu̶'it u̶u̶ch je̱'e̱ ja'ay ku̶xyu̶ nmu̶gube̱jtta'awa'añ nidu'ug nidu'ug neby naty tu̶ chu̶naay tu̶ jyugy'ajtku̶xyu̶ñ, pu̶nu̶'oy o ka'a'óy. 28Janch tu̶y'ajtu̶ñ du'un nnu̶maaygyu̶xy ko nije̱'e̱játy je̱'e̱ ja'ay mu̶dyiibu̶ ya cham yajpaatku̶xpu̶ñ, ka'p je̱'e̱ y'o'kku̶xu̶ch, u̶xtu̶ koonu̶ u̶u̶ch xy'ijxku̶xu̶ch ko u̶u̶ch naty ane̱'e̱mbu̶ nmiñ ya naaxwiiñ, u̶u̶ch je̱' je̱'e̱ ja'ay mu̶dyiibu̶ tzon tzajpjooty.

Currently Selected:

San Mateo 16: MIXE

Highlight

Copy