San Juan 3

Jesús mu̶u̶d je̱'e̱ Nicodemo

1Jii ijty je̱'e̱ ja'ay tu'ug mu̶dyiibu̶ xu̶u̶'ajtpu̶ñ Nicodemo, fariseo ja'ay je̱'e̱ ijty, mu̶dyiibu̶ je̱'e̱ judío ja'ay nigu'ubajk'ajtpu̶ñ. 2Chi je̱'e̱ Nicodemo koodz ñu̶kxy ma je̱'e̱ Jesúsu̶ñ, y chi nu̶maay:

—Windzú̶n, u̶u̶ch nnejwu̶u̶ybyu̶ch ajku̶xy ko je̱'e̱ Dios tu̶ xykyexy ko u̶u̶ch xyaj'u̶xpú̶gu̶ch ajku̶xy, je̱' ko ni pu̶n je̱'e̱ mu̶jwinma'añ du'un ka'atúnu̶ch nej miich mduñu̶ñ, pu̶nu̶ ka'p naty je̱'e̱ Dios pyubedyii.

3Chi je̱'e̱ Jesús y'adzoowu̶:

—Janch tu̶y'ajtu̶ñ miich du'un nnu̶ma'ay, pu̶n ka'p myiindu̶gách ma je̱'e̱ Diosu̶ñ, ka'p je̱'e̱ mu̶baad tyu̶gu̶'u̶y ma je̱'e̱ Dios y'ane'emyu̶ñ.

4Chi je̱'e̱ Nicodemo yajtu̶u̶y:

—Peru̶, ¿neby je̱'e̱ ja'ay mu̶baad ja'adu'ook myiindu̶gách pu̶nu̶ tu̶ naty y'amu̶jja'ayu̶u̶yñu̶? ¿Neby mu̶baad je̱'e̱ da'a ja'adu'ook tyu̶gu̶'u̶y ma je̱'e̱ tyaj y'aa jyootu̶ñ, y myiindu̶gátzu̶ch?

5Chi je̱'e̱ Jesús y'adzoowu̶:

—Janch tu̶y'ajtu̶ñ miich du'un nnu̶ma'ay, pu̶n ka'p jyootwimbíty y ka'p ñu̶u̶béty, y pu̶nu̶ ka'p je̱'e̱ Dios y'Espíritu y'adu̶gu̶'u̶y jyoottu̶gu̶'u̶yii, ka'p je̱'e̱ mu̶baad tyu̶gu̶'u̶y ma je̱'e̱ Dios y'ane'emyu̶ñ. 6Je̱'e̱ ja'ay mu̶dyiibu̶ ma'axung'ajtp ma je̱'e̱ to'oxyu̶jku̶ñ, je̱'e̱ naaxwiiñjya'ay jyugy'ajtu̶ñ je̱'e̱ myu̶dajtu̶py; peru̶ je̱'e̱ mu̶dyiibu̶ je̱'e̱ Dios y'Espíritu adu̶gu̶u̶yu̶p joottu̶gu̶u̶yu̶p, je̱'e̱ Dios y'Espíritu je̱'e̱ myu̶dajtu̶py. 7Ka'p mmu̶dajy mmu̶may ko du'un nnu̶ma'ay: ‘Nigu̶xyu̶ je̱'e̱ ja'ay ñi'igu̶ miindu̶gajtzku̶xu̶ch.’ 8Je̱'e̱ poj oy ma'eemby je̱'e̱ myinu̶'u̶y, y oy mja'amu̶dóy ma y'a'u̶u̶chu̶ñ, peru̶ ka'p mnejwu̶'u̶y ma chooñ y ma ñu̶kxyu̶ñ. Nan timydyu'unu̶tz jyaty mu̶u̶d je̱'e̱ Dios y'Espíritu, ka'p je̱'e̱ yajnejwu̶'u̶y neby je̱'e̱ ja'ay adu̶gu̶'u̶y joottu̶gu̶'u̶yu̶ñ.

9Chi je̱'e̱ Nicodemo yajtu̶u̶wimbijty:

—¿Peru̶ neby mdijy je̱'e̱ du'un y'oktún y'okjadu̶u̶ju̶ch?

10Chi je̱'e̱ Jesús y'adzoowu̶:

—Miich it ja'awindzu̶n'ajtp ma je̱'e̱ judío ja'ay ajku̶xyu̶ñ, ¿y ka'p adayaaba tu̶y'ajt mwinju̶wu̶'u̶yu̶? 11Janch tu̶y'ajtu̶ñ miich du'un nnu̶ma'ay, ko u̶u̶ch y mu̶u̶d u̶u̶ch je̱'e̱ nDeedy je̱' u̶u̶ch ngápxku̶xypy nmu̶dyaakku̶xypy je̱'e̱ mu̶dyiibu̶ u̶u̶ch nnejwu̶u̶ygyu̶xypyu̶ñ, y u̶u̶ch nidu̶y'ajt'ajtypy ajku̶xy du'un neby u̶u̶ch tu̶ n'ijxku̶xyu̶ñ, peru̶ miich ajku̶xy ka'p u̶u̶ch je̱'e̱ n'ayuuk xymyu̶bu̶jku̶ ajku̶xy du'un neby nja'anu̶maaygyu̶xyu̶ñ. 12Pu̶nu̶ ka'p miich adayaaba ayuuk mmu̶bu̶jkku̶xy mu̶dyiibu̶ yam nyajmu̶dmu̶dyaakku̶xypyu̶ñ mu̶dyiibu̶ ya naaxwiiñ yajpaatpu̶ñ, ¿je̱'e̱ ayuuktu̶n m'okjakni'imu̶bu̶jkku̶xu̶py ko nyajmu̶dmu̶dyaakku̶xu̶ch je̱'e̱ mu̶dyiibu̶ jiiby tzajpjooty yajpaatpu̶ñ?

13“Ka'p ni pu̶n tzajpjooty y'oyñu̶, je̱'e̱du̶'ajty je̱'e̱ mu̶dyiibu̶ jiiby tzajpjooty tzonu̶ñ, u̶u̶ch je̱' je̱'e̱ ja'ay mu̶dyiibu̶ tzajpjooty tzon#3.13 Nije̱' jaaybyu̶du̶jk myu̶naangu̶xy: je̱'e̱ mu̶dyiibu̶ jiiby tzajpjooty yajpaatpu̶ñ. 14Y du'un neby je̱'e̱ Moisés pujxktza'añ mu̶jwojppejtyu̶ñ kepykyu̶xp jim adu'ugtuum, nandu'un u̶u̶ch je̱' je̱'e̱ ja'ay mu̶dyiibu̶ tzon tzajpjooty nyajmu̶jwojppe̱da'añu̶ch kepykyu̶xp. 15Wan je̱'e̱ ja'ay du'un ku̶xyu̶ mu̶dyiibu̶ u̶u̶ch naty xymyu̶bu̶jkku̶xpu̶ñ je̱'e̱ jyugy'ajtu̶ñ wiinu̶u̶xu̶u̶bu̶ paatku̶xu̶ch.

Dios mu̶jku̶je̱e̱ je̱'e̱ naaxwiiñjya'ay tzoky ju̶wu̶'u̶y

16“Dios mu̶jku̶je̱e̱ je̱'e̱ naaxwiiñjya'ay tzojky ju̶wu̶u̶y ko je̱'e̱ tu'kpajkpu̶ y'Ung yejky mu̶u̶d je̱'e̱ ja'ay pyoky kyu̶xpu̶ ajku̶xy. Paady ku̶xyu̶ pu̶njaty je̱'e̱ Dios y'Ung mu̶bu̶jku̶gu̶xpu̶ñ ka'p je̱'e̱ jyugy'ajtu̶ñ tu'kku̶'u̶yu̶ kyú̶xu̶ch tyu̶góyu̶ch, pyaadu̶py je̱'e̱ jyugy'ajtu̶ñ wiinu̶u̶xu̶u̶bu̶. 17Je̱' ko ka'p je̱'e̱ Dios y'Ung yaa naaxwiiñ paady kejxy ko je̱'e̱ naaxwiiñjya'ay je̱'e̱ ñu̶u̶ pyoky wan yajkumu̶dóy, paady je̱'e̱ y'ung yaa naaxwiiñ kejxy, neby je̱'e̱ naaxwiiñjya'ay mu̶baad pokywyinmekxyu̶ñ.

18“Pu̶n je̱'e̱ Dios y'Ung mu̶bu̶jku̶byu̶ñ, ka'p je̱'e̱ ñu̶u̶ pyoky yajkumu̶dowa'añyii; peru̶ pu̶n je̱'e̱ Dios y'Ung ka'p mu̶bu̶jku̶, je̱'e̱ju̶tz tu̶y yajkumu̶dowe̱e̱mby ñu̶u̶ pyoky je̱', je̱' ko naty tu̶ ka'amu̶bu̶jku̶ je̱'e̱ tu'kpajkpu̶ Dios y'Ung. 19Je̱'e̱ mu̶dyiibu̶ ka'p mu̶bu̶jkku̶xyu̶ñ, je̱'e̱ju̶tz tu̶y yajkumu̶dowaanu̶p je̱'e̱ Dios ñu̶u̶ pyoky ajku̶xy, je̱' ko ka'p je̱'e̱ Dios y'Ung mu̶bu̶jku̶yu̶ ajku̶xy ko ya naaxwiiñ y'ooy, je̱'e̱ mu̶dyiibu̶ du'un neby je̱'e̱ ju̶u̶nu̶ñ, je̱' ko je̱'e̱ ju̶bu̶kpu̶ najty tuungu̶xy, jootkujk najty je̱'e̱ ni'igyu̶ agoodztuum ñayjyu̶wu̶u̶yu̶gu̶xy, y ni'igu̶ ka'p ko je̱'e̱ Dios y'Ung mu̶bu̶jku̶yu̶ch ajku̶xy, je̱'e̱ mu̶dyiibu̶ du'un neby je̱'e̱ ju̶u̶nu̶ñ. 20Ku̶xyu̶ pu̶njaty je̱'e̱ ju̶bu̶kpu̶ tuungu̶xpu̶ñ ka'p je̱'e̱ Dios y'Ung tzojku̶yu̶ ajku̶xy je̱'e̱ mu̶dyiibu̶ du'un neby je̱'e̱ ju̶u̶nu̶ñ, y ka'p je̱'e̱ ku'ubu̶jkku̶xy; ka'pu̶ je̱'e̱ ju̶bu̶kpu̶ ñi'igu̶xu̶'u̶gu̶ch mu̶dyiibu̶ naty tyuungu̶xypyu̶ñ. 21Peru̶ je̱'e̱ mu̶dyiibu̶ je̱'e̱ tu̶y'ajt kuydyuungu̶xpu̶ñ kyu'ubu̶jkku̶xypy je̱'e̱ Dios y'Ung je̱'e̱ mu̶dyiibu̶ du'un neby je̱'e̱ ju̶u̶nu̶ñ, wan du'un ku̶xyu̶ ñi'igu̶xu̶'u̶gu̶ch ko naty je̱'e̱ Dios mu̶duungu̶xy du'un neby je̱'e̱ Dios tzokyu̶ñ.

Juan Bautista je̱'e̱ Jesús ja'adu'ook nigapxy

22Tu̶ najty adaa du'un tyuuñyii jyadyii, chi je̱'e̱ Jesús ñu̶kxy jim Judea naaxjooty mu̶u̶d je̱'e̱ dyiscípulotu̶jk ajku̶xy. Jim tu'ktiempo wya'kxu̶jpku̶xy mu̶u̶d je̱'e̱ dyiscípulotu̶jk ajku̶xy; jya'ayyajnu̶u̶bejty jim ajku̶xy. 23Nan jim najty je̱'e̱ Juan nandu'un jya'ay yajnu̶u̶be̱jtpu̶ ma tu'ug it lugaar mu̶dyiibu̶ xu̶u̶'ajtpu̶ñ Enón, mu̶wingón je̱'e̱ it lugaar mu̶dyiibu̶ xu̶u̶'ajtpu̶ñ Salim, paady najty je̱'e̱ jim jya'ayyajnu̶u̶béty je̱' ko je̱'e̱ nu̶u̶ najty jim kyómu̶ch; y nu̶kxp najty je̱'e̱ ja'ay jim ajku̶xy y ñu̶u̶be̱jtku̶xy jim. 24Adaa mu̶'it adaa du'un tyuunu̶ jyajtu̶ ka'anu̶ najty je̱'e̱ Juan yajtzúmyñu̶.

25Chi je̱'e̱ Juan y'u̶xpu̶jkpu̶du̶jk nije̱' ñay'amayu̶ydyu̶gu̶u̶yu̶ ajku̶xy mu̶u̶d je̱'e̱ judío ja'ay tu'ug neby je̱'e̱ ja'ay mu̶baad ñayyajpokyñi'iwa'achyiiju̶ñ ajku̶xy. 26Mu̶'it je̱'e̱ Juan nidzóñ ajku̶xy, oy nu̶maaygyu̶xy:

—Windzú̶n, je̱'e̱ ja'ay mu̶dyiibu̶ najty jim miich mu̶u̶d Jordán mu̶jnu̶u̶'awiimb, je̱'e̱ mu̶dyiibu̶ u̶u̶ch miich xyajmu̶dmu̶dyaaku̶ñ ajku̶xy ko je̱' je̱'e̱ Cristo. Janch ja'ay yajnu̶u̶be̱jtp je̱'e̱ jim cham y janch may je̱'e̱ ja'ay pyanú̶kxu̶gu̶xy.

27Chi je̱'e̱ Juan ñu̶maayu̶ ajku̶xy:

—Ni pu̶n ni tii mu̶k'ajt mu̶baad ka'amu̶u̶dáty pu̶nu̶ ka'p naty je̱'e̱ Dios myo'oyii. 28Mmu̶doogu̶x miich ku̶'u̶m ko u̶u̶ch oy yajxón nnigapxy ko u̶u̶ch ka'p nje̱'e̱ju̶ch je̱'e̱ Cristo, u̶u̶ch je̱'e̱ju̶ch mu̶dyiibu̶ je̱'e̱ Dios jayu̶jp kye̱jx ma je̱'e̱ Crístoju̶ñ. 29Ma je̱'e̱ ja'ay pyu̶kyu̶ñ, je̱'e̱ pu̶jkpu̶ ya'aydyu̶jk je̱' je̱'e̱ pu̶jkpu̶ to'oxyu̶jk ku̶'u̶'aam'ajtp, y je̱'e̱ pu̶jkpu̶ ya'aydyu̶jk myu̶gu'ug ka'p je̱'e̱ je̱' ku̶'u̶'aam'adaamb je̱'e̱ to'oxyu̶jk pu̶jkpu̶; je'eyu̶ je̱'e̱ jim amdo'ijtu̶ je̱'e̱ pu̶jkpu̶ ya'aydyu̶jk myu̶dya'agy, y xyonda'agy ko je̱'e̱ myu̶dya'agy amdo'ijtu̶. Y nandu'un u̶u̶ch cham; nan xondaakpu̶ch ni'igyu̶ anaxy ko je̱'e̱ Cristo tu̶ myiñ y ko je̱'e̱ mayjya'ay pyanu̶kxyii. 30Je̱' ni'igyu̶ je̱'e̱ myu̶jtu̶gu̶'u̶wu̶ch y ka'p u̶u̶chu̶ñu̶ba.

Je̱'e̱ mu̶dyiibu̶ jiiby tzajpjooty tzombu̶ñ

31Je̱'e̱ mu̶dyiibu̶ jiiby tzajpjooty tzombu̶ñ jakni'igyu̶ mu̶k'ajtu̶ñ je̱'e̱ mu̶u̶du̶ch ka'p je̱'e̱ naaxwiiñjya'ayu̶ñu̶ba; y je̱'e̱ ja'ay mu̶dyiibu̶ ya naaxwiiñ ijtp, je̱'e̱ myu̶naaxwiiñjya'ay kyapxy myu̶dya'agy je̱'e̱ kyápxu̶py myu̶dyaaku̶py, y je̱' je̱'e̱ kyapxypy myu̶dyaakypy mu̶dyiibu̶ ya naaxwiiñ y'ijxypy tyu̶kxypyu̶ñ; peru̶ je̱'e̱ mu̶dyiibu̶ jiiby tzajpjooty tzoombu̶ñ jakni'igyu̶ mu̶k'ajtu̶ñ je̱'e̱ mu̶u̶du̶ch ka'p je̱'e̱ naaxwiiñjya'ayu̶ñu̶ba, 32y je̱' je̱'e̱ kyapxypy myu̶dyaakypy mu̶dyiibu̶ jiiby tzajpjooty tu̶ ixy tu̶ mu̶doyu̶ñ. Peru̶ ka'p je̱'e̱ ja'ay y'ayuuk tyu̶y'ajt myu̶bu̶jkku̶xu̶ neby je̱' jya'amu̶na'añu̶ñ. 33Peru̶ pu̶n je̱'e̱ Dios y'Ung y'ayuuk tyu̶y'ajt mu̶bu̶jku̶py, je̱' je̱'e̱ ni'igapxpe̱jtp ko je̱'e̱ Dios tyu̶y'ajt jyaanchu̶ch du'un neby myu̶na'añu̶ñ. 34Je̱'e̱ mu̶dyiibu̶ je̱'e̱ Dios tu̶ kyexyiiju̶ñ, je̱'e̱ Dios y'ayuuk tyu̶y'ajt je̱'e̱ kyapxypy myu̶dyaakypy, je̱' ko je̱'e̱ Dios y'Espíritu je̱'e̱ mu̶jku̶je̱e̱ tu̶ myo'oyii. 35Je̱'e̱ Dios Teedy chojkypy je̱'e̱ y'Ung, y tu̶ je̱'e̱ mu̶k'ajt yajku̶'u̶du̶gu̶'u̶y ma ku̶xyu̶ tijaty mu̶dyiibu̶ ya yajpaatpu̶ñ. 36Pu̶n je̱'e̱ Dios y'Ung y'ayuuk tyu̶y'ajt mu̶bu̶jku̶byu̶ñ, pyaadu̶py jyugy'ajtu̶ñ je̱' je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ; peru̶ pu̶n je̱'e̱ Dios y'Ung y'ayuuk tyu̶y'ajt ka'p mu̶bu̶gaanu̶, ka'p jyugy'ajtu̶ñ je̱'e̱ paadu̶ch je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ, y mu̶jtzaachpyu̶ je̱'e̱ Dios ni'igyu̶ mo'owu̶u̶ju̶p, je̱' gyu̶xpu̶ ko naty je̱'e̱ Dios y'Ung y'ayuuk tyu̶y'ajt tu̶ ka'amu̶bu̶jku̶.

Currently Selected:

San Juan 3: MIXE

Highlight

Copy