MATIYUW 21

Jisas Jiruwsalimaar wuladik duw taakw samasam dim vikuw, rakarak tidiy.

(Mak 11:1-11; Luk 19:28-40; Jon 12:12-19)

1-2Day Jiruwsalimaar yitaay tidaak, mala Aliv nibwukim ril tip, Bitpas, ata walibab tal. Tilik, dikidiy kalivadidiy duw vitiy wayakikuw, wadibir, “Bir yikuw, walibab rina kwasa tipaar maay. Yikuw, tipaar wulakuw, dagiy alim sitakira-kibiraal. Yaav tuwtakada miyaam tina likidi badiy dagiy wa. Bir raliykuw, kiril akaray. 3“Li duw taakw birak bas sikidiy, ‘Agwa javik kwurbiraad?’ bir dayak aw, ‘Nyanadi sapakwa nyan di yawiy kwurdikik birakiwa. Yawiy kwusilik, yabiyib sibinin wayaki-kidabir.’” 4Jisas atawa kwurdil tayir God diki maaj wasapwiydi duw God diki lapa nyigaam sukwudil maaj ata mwiya mwiyaba maaj tal. 5Kitawa wana:

“Gwur Jiruwsalim tipa kidiy duw takwak aw,

‘Gwuradi yitaypika duw gwurak yanaad.

Di viyakita mawul tinaad.

Aw di apiy dagiy bwunim rikuw, yanaad.’”

6Abir vitiya duw yikuw, Jisas wadil majib kwurbiril. 7Bir abir amaay dagiywa likidi nyinwa kwurin kariyabirik. Kariyakuw, dayadiy wapwiy abir dagiy biraki bwunim takakuw, Jisas ata adi badiy dagiy bwunim warkuw, daan rad. Jiruwsalimaar ata bas yad. 8Duw taakw samasam dayadiy wapwiy yabim yapir takadadiy gilabadiy kaytik. Nuwukadiy duw taakw gagawa ba miy samasam kwurkuw, yabim takadadiy. 9Adiy taay Jisasak adiy kwukir abab rakarak tikuw, gaam sidiy, “Wayapiy as nyanadiy warag dayadi yitaypika duw Davit dikidi waraga duwak! God di mwiya viyakit-ad!”

10-11Jisas Jiruwsalimaar wuladik, alim kwadiy ababa duw taakw pitaan warkuw, day daya wadiy, “Kidi duw sikanadaad?” Nuwukadiy duw taakw ata wadiy, “Kad God diki maaj wasapwiynadi duw Jisas-ad. Di Galiliy tamiyaam rina tip Nasarit tipa kid-ad.”

Jisas yapiydiy duw taakw watipisakwu-didiy day God dikidi wiyaam kwadaak.

(Mak 11:15-19; Luk 19:45-48; Jon 2:13-22)

12Day Jiruwsalimaar wuladaak, Jisas God dikidi wiyaar ata wulaad. Adiy ababa yapiydiy duw takwak Jisas watipisakwu-didiy. Ababa Rom dayadiy sanawa God dikid wiya saan waripiydiy duw abab kaybalaki-didiy. Adiy vaal kwuryi-dadiy midakim wapiy yapiydiy duw dayadiy jaab dayadiy tikir wapayakidik, vakirdiy. 13Di dayak ata wadidiy, “God diki lapa nyigaam kitawa wanaad, ‘Ababa tipa kidiy duw taakw valakwadiy wunadi wiyaar wunak wayapiy sikir.’ Aw gwur gwura mwugiygwuril luwkuw kwurnadiy duw daya tamiya!”

14Adiy duw taakw dayadiy mil kwakidiy, adiy duw taakw dayadiy maan kupwarap-adiy, day abab Jisasak yakuw God dikidi wiyaam, di sipwutiy-didiy abab. 15Adiy sapakwa nyanugw pris awa God diki lo kalivadiy duw day Jisas dikidiy kwurdidiy viyakita yawiy vikuw, adiy nyanugw God dikidi wiyaam nimadib gaam sidaak, “God viyakit kwurkwaad Davit dikidi gwalugwa nyinik,” day alik tikuw, yaal giradiy. 16Aw day Jisasak ata wadaad, “Aw min wukiminadiy adiy wadanadiy maaj?” Jisas dayak ata wadidiy, “Ayiy, wun bwu wukituwa. Aw gwur ki God diki lapa nyigaam rina maaj gwur maa vi? Aal kitawa wana:

‘Kwasadiy nyanugwawa adiy mwuny kan kwakinadiy, God mwugiy-dadiy day mwiyir wayapiy sidakikik.’”

17Wakuw, dayab wapakuw, Jiruwsalim tip wapakuw, Bitaniy tipaar ata yad a gaan alim si kwakir.

Jisas mwugiyid miy nak rik yilikikik.

(Mak 11:12-14,20-24)

18Sira pik ganbab, Jisas Jiruwsalimaar sibinin yitaay tikuw, di ata kaam yisad. 19Di miy, si vik, vidid mala yabim tidik. Vikuw, adi miyak yikuw, dikidiy mwiy sitakirakuw kikir, di vidil adi miy mwiy samab maa ri. Gagadika rad. Vikuw, adi miyak ata wadid, “Min ginyir samab mwiy ri maa.” Jayib nak ata wadik, adi miy ata rik yad. 20Jisas dikidiy kalivadidiy duw a jaav vikuw, pitaan warkuw, day dikik ata bas sidaad, “Ata ata kidi miy jayib nak rik yinaad?” 21Jisas dayak ata wadidiy, “Ki maaj awuk! Aw li gwur gwuradiy mawul Godak wukijibir tikigwura, mawul vitiy ti maarkigwura, kidi miyak watuwik rik yida pik atampik gwurabab wagwur, rik yikinaad. Aw ki javadika maa, nuwukadiy jaav ab kwurkigwuradiy. Aw li gwur kidi nibwukik wakigwura, ‘Min rapikuw, yin guwaam avakir!’ atawa wakigwura majib wukikuw, gwakuw, yikinaad. 22“Aw li gwur Godak wukijibir tikuw, dikik bas sikigwuradiy ababa jaav ata kwur-kigwuradiy.”

Day Jisasak bas sidaad, “Minak ap kwiyid kidiy jaav kwurminkik sikadadaad?”

(Mak 11:27-33; Luk 20:1-8)

23Jisas God dikidi wiyaar sibinin yakuw, adiy duw takwak kalivadik, adiy sapakwa nyanugw pris awa Juw dayadiy sapakwa nyanugw dikik yakuw, ata bas sidaad, “Agwa apa tikuw, kidiy jaav kwurminadiy? Minak ap kwiyid, sikadadaad?” 24-26Jisas dayak ata wadidiy, “Wun jaav naka bas sikir gwurak. Aw wunak wakigwura wunak ap kwiydi duw ad wakituwaad gwurak. Sikadadaad Jonaam wayakid baptais kwiydikik? God-ad? Ay duw-adiy? Wunak aw!” Day awarwa awarwa maaj bwulabagwudiy. Day daya ata wadiy, “Nyan ata ata wakinadiyan? Aw li nyan, ‘God-ad’, waan wakibana, di nyanak, ‘Agwa javik gwur diki majib wukimar-gwuril?’ wakinaad. Aw li nyan, ‘Duw-adiy’, wakibana...” Day duw takwak yagadiy. Agwak, abab wukidiy Jon God diki maaj wasapwiydi duw-ad. 27Alik day Jisasak ata wadaad, “Nyan maa laakw.” Jisas dayak ata wadidiy, “Wunabab gwurak wu maa agwa apaar kidiy jaav kwurtuwadiy.”

Duw dikibir duwa nyidiy maaj.

28Jisas ki waya maaj kitika maaj wadil dayak. “Aw gwur wukigwur ata ata ki majik? Duw nak di nyidiy vitiy tad. Di taay nyinik yikuw, wadid, ‘Wunadi nyan, wun min wuna mayim yin yawiy kwurminkik nibwul.’ 29“Adi nyan dikidi asayik wadid, ‘Wun kwasik yinadiwun.’ Atawa wakuw, ginyir diki mawul warapiykuw, di ata dikidi asaay mayim yawiy kwurid. 30“Adi duw dikidi vitiya nyinik yikuw, taay nyinik wadil maja pik wadid. Wadik, adi nyan di, ‘Ayiy’ waad. Wakuw, di mayir maa yi. 31“Abir nyidiy, sikadadaad birakidi asaay majib wukid?” Day ata wadiy, “Adi taay nyanad.” Jisas dayak ata wadidiy, “Wun watuwadiygwurik adiy kupwarapa takis kwurkwanadiy duwawa adiy yabim kwurkwur tikwanadiy taakw, day taak God dikidi gwalugwur wulakinadiy. Aw gwur daya kwukir wulakigwura, ay gwur wul maa. 32“Aw Jon Baptais kwiydi duw gwurak yakuw, ‘Gwuradiy mawul warapiykuw, God diki majib awuk!’ Wakuw wadik, gwur diki majib maa wak. Aw adiy kupwarapa takis kwurdiy duwawa adiy yabim kwurkwur tidiy taakw day Jon diki majib wukidiy. Aw gwur a jaav bwu vigwuril. Vikuw, gwur gwuradiy mawul warapiy maarkuw, diki majib wukimar-gwuril.”

Mayik van tidiy duw maaj.

(Mak 12:1-12; Luk 20:9-19)

33Jisas dayak ata wadidiy, “Gwur niki waya maaj kitika maaj awuk. Duw nak bajigay si girap, diki mayim sididiy. Sikuw, kabaka yarip kaypwusidid. Di kaw ata vadid. Ginyir girap dayadiy mwiy alim manir vasi-kidanadiy dayadiy guw kwurkuw, kidakikik. Alawul pik tina wiy ata kwurdil apiy yaripaam van tidiy duwak. Yawiy kwurdiy duw daya tabaam ata takadid adi maay. Takakuw, sikaam ril jaka tipaar ata yad. 34“Girap lawdaal nyi yawiy duw wayakididiy dayak diki am kwurdakik. 35“Aw day adiy yawiy duwaam kalakwukuw, nak day viyadaad, nak day viyasipadaad, nak kabakir viyadaad. 36“Ginyir maa adi maay asaay duw kwasa samasam nuwukadiy yawiy duw wayaki-didiy adi mayik van tidiy duwak. Aw day adiy yawiy duwaam tayir yidiy yawiy duwaam kwurdaal pik kwurdadiy. 37“Atawa dayak kwurdaak, di dikidi nyan wayakidid adi mayik van tidiy duwak. Diki mawulaam waad, ‘Day wukikinadiy wunadi nyinik.’ 38“Aw adiy duw adi nyinim vikuw, day daya wadiy, ‘Kidi duw maay asaay dikidi nyan-ad. Dim viyasipanaak. Dim viyasipakuw, kidi maay nyanadi maay tikinaad.’ 39“Alik dim kayakitikuw, kawaar yakisakwukuw, viyasipa-daad.”

40Jisas dayak ata bas sididiy, “Adi maay asaay yakuw, agwa jaav kwurkinaad adiy mayik van tinadiy duwaam?” 41Day dikik ata wadaad, “Di yakuw, adiy kupwarapa duwaam viyasipakuw, adi maay nuwukadiy yawiy duwak ata kwiykinaad. Aw day diki am sikuw, yabiyib dikik kwiy-kidanaal.”

A maaj liki maaw maaj: Jisas adi maay asaay dikidi dowa nyan kaytik, aw adiy sapakwa nyanugw pris awa Parasiy adiy maay van tidiy duw kaytik-adiy.

42Jisas dayak ata wadidiy, “Gwur ki God diki lapa nyigaam rina maaj maa vi? Kitawa wana:

‘Adi kabaak, tayir wiy kwurdiy duw maa wadiy dikik,

kita nimadi kabaak abwa tibawa rinaad.

Nimadi Yitaypika Duw a jaav kwurdil.

Nyan vikuw, ata paynadiyan.’

43“Alik wun watuwadiygwurik, tayir gwur Juw duw God diki yawiyik van tigwuril. Aw gwur diki yawiy jawjaay kwurgwuril. Alik tikuw, God di maa wakuw gwura yawiyik, a yawiy nuwukadiy jaka tipa kidiy duwak kwiykida. Aw adiy duw day dikik viyakita yawiy kwurkidiy. 44“[Adiy duw taakw day adi apiy kabakim vakir-kinadiy dayadiy ap bwan tukwiya-kidiy. Aw li adi kabaak dayadiy apiyim vakir-kidadiy, mwiya kwayupw kitik viyamwunyir-kidadiy. Aw wun adi kabaak-adiwun. Aw wun adi kabaak-adiwun.]”

45-46Adiy sapakwa nyanugw pris awa Parasiy Jisas wadil waya maaj wukikuw, day lakwudiy, “Jisas wadidiy waya maaj kitika maaj dayadiy maw nyan kwurbanadiy yawiyik maa wanaad.” Alik day Jisasaam kalakwuk. Aw day lakwudiy ababa duw taakw wadiy, “Jisasad God diki maaj wasapwiynadi duw-ad.” Day yagadiy adiy duw takwak. Alik day Jisasaam kalakwuk wukidaal maa rav.

Currently Selected:

MATIYUW 21: MLE

Highlight

Copy