মথি 21
21
যিরুশালেংদুঃ ওয়ংচা
(মার্ক ১১:১-১১; লূক ১৯:২৮-৪০; যোহন ১২:১২-১৯)
1যীশুনা তিবিরোচা যিরুশালেন বাদুঃ রকলো জৈতুন তং আথাকমা বেৎফগী রুওয়াদুঃ লাঃখাগেতি। য়াংখা যীশুচা তিবি নৈয়ককো দিঃ চাঃগা প্রলো রুওয়েলৈতি, 2“নাংরোচা হ্রিইগা রুওয়াদুঃ লাঃলিইগে। য়াংদেমা লাঃগি গাধাশ্যি তগং খ্যুয়েং হিকরি অর য়াংসুউনা আশ্যি তগংলি হিকরি। য়াংচা নৈকংগো রুওয়েলো ঙাদুঃ য়ুউখা। 3খ্যাংসুউমুছু প্রগি, প্রলৈকে, ‘ফোরাস্যাং অলু হিকরি।’ য়াংচা প্রগি খ্যাং খ্যাং য়াংসুউরো লাঃফু পিইমিব্যা।”
4দিঃচা ফ্রইরিগা রিসিইগা নিংলো প্রচা চাঃগাচা আব্রিচুং ফ্রইরি: 5“নাংরোচা সিয়োন সিমিংগো প্রফুচাগা, নাক মাং নাকবাদুঃ লাঃরি। মাংচা কংগং সুউদগং। মাংচা গাধা আথাকমা, গাধামা আশ্যি আথাকমা তাক লাঃরি।”
6যীশু য়াং তিবিরোগো যাপুয়েং আনা পিইলিইরি, য়াংসুউরোচা য়াংপুয়েং লাঃলো লুককেলিইরি। 7তিবিরোচা য়াং গাধানা গাধাশ্যিগো য়ুউ লাঃলো, য়াং গাধা আথাকমা কুঃ রুনচা আওয়েকো খাং পিইব্রিইনক যীশুচা য়াং আথাকমা থৈংলিইরি। 8লুঃউম্যারোচা লেং আথাকমা কুঃ ওয়েচা আওয়েকো খাং পিইগেলিইরি। অর আখ্রা লুঃউরোচা সাপাং আখাককো খ্যুও য়ুউলো লেংমা খাং পিইগেলিইরি। 9যাসুউরো যীশু নক্কানা হ্রিইগা লাঃগেতি য়াংসুউরোচা অলো প্রগেলিইরি,
“হোশান্না, দায়ুদ আচৈং!
ফোরাস্যাং নাঃমিনা যাসুউ লাঃরি, য়াংসুউ খিইম্যুয়েংবাজি।
গংখাং ফুমালি হোশান্না!”
10যীশুচা যিরুশালেনদুঃ ওয়ংব্রিইনক যিরুশালেনমা রুরুউছা ফ্রইকেলিইরি। আলুংসুউ মিংগেলিইরি, “দিঃলুউ যাসুউলিঃ?” 11লুঃউরোচা প্রগেলিইরি, “দিঃ লুঃউচা গালীল ম্রুমা নাসরত রুওয়াগা যীশু রিসিই।”
ওয়িইপাসা ক্যংমা আস্যাং যীশু
(মার্ক ১১:১৫-১৯; লূক ১৯:৪৫-৪৮)
12নক্কা যীশুচা ওয়িইপাসানা ক্যংদুঃ ওয়ংলিইরি অর য়াংদেমা যাসুউরো আরং-অাখ্যা প্যাংগেতি য়াংসুউরো আলুংসুউগো লঃ রুওয়েলৈতি। যীশুচা টেংগা ফাআসা লুঃউরো খুংগো অর যাসুউরো খঃ রংগেতি য়াংসুউরো থৈংচা খুংগো প্রেং বৈলিইরি। 13“সেংস্যাংস কেইংমা থাওরা ফোরা প্রলিইরি, ‘ঙা ইংগো ছুউক তংচা ক্যং প্রফু,’ ছুগি য়াং ক্যংগো নাংরোচা ডাম্রা নিংচা-চাচা প্যাংগেরি।”
14য়াংনক আকেইংনা আকিই লুঃউরোচা ওয়িইপাসা ক্যংমা যীশুবাদুঃ লাঃগেলিইরি অর য়াংখা যীশু য়াংসুউরোগো কেইংমাজিলিইরি। 15যীশু যা এংঅফুয়ি অলুকরোগো লুকলিইরি, য়াংচাগো ফুংগ্রিই আগ্রিইরোনা কেইং ছারারোচা ম্রাংগেলিইরি। য়াংসুউরোচা ওয়িইপাসানা ক্যংমা আশ্যিরো অ প্রচাগো ক্রাগেলিইচাগা, “হোশান্না, দায়ুদমা আচৈং!” 16দিঃচারোগো ম্রাংলো য়াংসুউরোচা চিই মকং রকলো যীশুগো প্রগেলিইরি, “য়াংসুউরো যা প্ররিলি-য়াংচাগো নাং ক্রারি মুহুক লঃ?”
যীশু য়াংসুউরোগো প্রলিইরি, ক্রারি। কেইংমা নাংরো তাখালি মেফেসিই লঃ:
আশ্যি সাঃ-সিমিং অর আমৈশ্যিরো চাঃগামা
নাংচা কুঃগো খিম্যুয়েংফু আতুওয়ক অলুক লুকলিইরি?
17য়াংনক যীশুচা য়াংসুউরোগো বৈরো ম্রু প্রাংগা বৈথানিয়া রুওয়াদুঃ লাঃখারি অর য়াংদেমা ওয়িইলিইরি।
সাঃবুয়েসিই আপাং
(মার্ক ১১:১২-১৪,২০-২৪)
18অর তারাক ঞিগাঞ্যংখা ম্রুদুঃ প্রেং লাঃখা যীশুচা ওয়েং ম্যুওয়েলিইরি। 19লেংনামা সাঃবুয়েসিই তাবাং ম্রাংলো যীশুচা আপাং আরাংদুঃ লাঃখারি, ছুগি আপাং আরুওয়ক আপি তুখুলি মাম্রাংলিই। য়াংখা আপাংগো যীশুচা প্রলিইরি, “অর তাখালি নাকমা আসিই মিসিইগিফিই।” য়াংখা প্ররি খ্যাং খ্যাং সাঃবুয়েসিই আপাং সিই লাঃখারি।
20তিবিরো য়াংচাগো ম্রাংলো এংঅলো প্রগেলিইরি, “সাঃবুয়েসিই আপাং দক আয়াং যা ফ্রইলো সিই লাঃখালি?”
21আফ্রিমা যীশু তিবিরোগো প্রলিইরি, “ঙা নাংরোগো অামেইং প্ররি, নাংরো চিইমা মকং মেম্হেপ্রি, আক্যুং থাঃগি য়াংখা সাঃবুয়েসিই আপাংগো ঙা যা প্যাংলিইরি, নাংরোলি য়াংচা প্যাংনৈংফু। য়াংচারা সাসাক প্যাংনৈংফুব্যা মুহুক, ছুগি দিঃ তংগোলি প্রগি, ‘তংচা থাঃলো ম্রঃমা ক্যালিই,’ য়াংখা য়াংচা ফ্রইমি। 22নাংরোরা চিইমা আক্যুং থাঃলো ছুউক তংগি, য়াংখা যা লুঃরিলি য়াংচা রাঃমি।”
আস্যাং যীশুনা কেইং ছারারো
(মার্ক ১১:২৭-৩৩; লূক ২০:১-৮)
23নক্কা যীশু প্রেংলো ওয়িইপাসা ক্যংদুঃ লাঃখারি। যাখা যীশুচা য়াংদে সুয়েংসাং পিইলিইরি য়াংখা ফুংগ্রিইরোনা যিহুদী গংখ্যুক ওয়াগ্রিইরোচা যীশুবাদুঃ লাঃলো প্রগেলিইরি, “নাকমা যা তাওয়েং হিকলো দিঃ অলুকরোগো লুকতিলিঃ? দিঃ তাওয়েংচা নাককো যাসুউ পিইরিলিঃ?”
24যীশু য়াংসুউরোগু প্রলিইরি, “ঙালি নাংরোগো চাঃগা তুখুওয়েং মিংফু। কুবাংরোরা ঙাগো য়াংচা আফ্রি পিইনৈংগি য়াংখা ঙালি কুবাংরোগো প্রফু ঙা যা তাওয়েংনা দিঃ অলুকরোগো লুকতিলিঃ। 25প্রনা ক্রিমি, রিঃঙুক মাঙ্গালা পিইফু তাওয়েংচা যোহন যাগা রাঃরিলি? থাওরা ফোরাগা মুহুককি লুঃরোগা লঃ?”
য়াংখা য়াংসুউরোচা কুঃরো আতুওয়ংমা ছুয়িনিগেলিইরি, “ঙুরো জং প্রগিনা, ‘থাওরা ফোরাগা রাঃচা,’ য়াংখা য়াংসুউ ঙুরোগো প্রফুব্যা, ‘য়জংছুগি কুবাংরো যাফু যোহনগো মুক্যুংগেলিই?’ 26অর দিঃপুয়েং প্রগিনা, ‘লুঃউগা রাঃরি,’ য়াংখা ঙুরো লুঃউগো ক্রকতি ক্যাফুব্যা, আক্রংগা যোহনগো খ্যাংসুফ্র রিসিই ম্হেকেতি।”
27য়াং আতুওয়ক আফ্রিমা যীশুগো য়াংসুউরো প্রগেলিইরি, “ঙুরো মিসিক।” য়াংখা যীশু য়াংসুউরোগু প্রলিইরি, “য়িগি ঙালি নাংরোগো মপ্র ঙা যা তাওয়েংনা দিঃ অলুকরোগো লুকতিলিঃ।”
য়ক্ক্যাশ্যি নৈয়ক ওয়েথুউ
28য়াংনক যীশু প্রলিইরি, “ছুগি, কুবাংরো যা চিইমা ম্হেকেতিলিঃ? প্রফুছুগি, লুঃউ তয়কমা সাঃ নৈয়ক হিকলিইরি। য়াং লুঃউচা সাঃ অাগ্রিইগো লাঃলো প্রলিইরি, ‘গিনি নাংচা চব্যসিই অাখাংমা লাঃলো অলুক লুক।’ 29আফ্রিমা সাঃচা প্রলিইরি, ‘ঙা মাঃলা।’ য়িগিলি নক্কা সাঃচা চিই সায়্যালো লাঃখারি। 30য়াং লুঃউচা নক্কা অর তয়ক সাঃগো লাঃলো তেজেতৈং চাঃগা প্রলিইরি। য়াং সাঃচা আফ্রিমা প্রলিইরি, ‘ঙা লাঃমি,’ য়িগিলি নক্কা মাঃলালিই। 31দিঃ নৈয়ক সাঃমা যাসুউ ফাখাং চাঃগাগো কৈগেলিঃ?”
য়াংখা কেইং ছারারো আফ্রি পিইগেলিইরি, “পাথামা সাঃচা।”
যীশু য়াংসুউরোগো প্রলিইরি, “ঙা নাংরোগো অামেইং প্ররি, ফেইংদা ককসারোনা জগ্রখে চাঃসারোচা ঙুরো হ্রিইগা গংখাং ফুংদুঃ তাককেতি, 32আক্রংগা যোহনচা থাওরা ফোরা ছেন্দা লেংগো প্রাফু অাতুওয়ক কুবাংরোবাদুঃ লাঃলিইচা, য়িগিলি কুবাংরোচা য়াংসুউগো মুক্যুংগেলিই। য়িগিলি ফেইংদা ককসারোনা জগ্রখে চাঃসারোচা যোহনগো ক্যুংগেলিইরি। য়াংচাগো ম্রাংরোলি কুবাংরোচা প্রেংলো চিইমা মুক্যুংগেলিই।
চব্যসিই অাখাংমা লুকসারো ওয়েথুউ
(মার্ক ১২:১-১২; লূক ২০:৯-১৯)
33“অর তুখুক উপমা তাং প্রামি নাথংগে। লুকরো চাঃসা তয়কচা চব্যসিই তাখাং লুকলো য়াংচাগো লিফাকলাকচিই রেংলিইরি। য়াংনক য়াংদেমা চব্যসিই চৈফু আতুওয়ক তুওয়ং তুউলিইরি অর আম্রাং ইং তছং লুকলিইরি। য়াংনক লৈগায়ক লুক চাঃসাগো য়াং চব্যসিই আখাংগো লাগাইয়া পিইরো নেংঙেংখ্রাদুঃ লাঃখারি। 34আসিই মিইফু আখিং লাঃরিখা ইংস্যাংচা য়াং অাসিই আঃফু য়ুলাঃফু আতুওয়ক কুঃ ক্যুওয়েংগো য়াং লুক চাঃসারোদুঃ রুওয়েলৈতি। 35লুক চাঃসারোচা য়াং ক্যুওয়েং তয়ককো ফেং বুককেরি, তয়ককো সেবলৈকেতি অর তয়ককো ক্যকখিয়ি বৈকেরি। 36য়াংনক ইংস্যাংচা হ্রিইগা রুওয়েলৈচা থাক অর আম্যা ক্যুয়েংগো রুওয়েলৈতি য়িগিলি আঙাসারোচা য়াং ক্যুয়েংরোনা হ্রিইগা লুকতি পুয়েং লুকলিইরি। 37চব্যসিই ইংস্যাংচা আছুংমা কুঃ সাঃগো-য়াংসুউরোবাদুঃ রুওয়েলৈতি। ইংস্যাং ম্হেলিইচাগা, য়াংসুউরো তুখু মুহুককিলি কুঃ সাঃগো ম্যাকন্হা পিইগেমি। 38ছুগি য়াং আঙাসারোচা ইংস্যাং সাঃগো ম্রাংলো কুঃরো অাতুওয়ংমা প্রগেলিইচাগা, ‘আফা সিইগে দিঃ সাঃচা ইংস্যাং ফ্রইফুব্যা। লাঃ ঙুরো য়াংসুউগো সেঃবলৈকেফু। 39য়াংখা ঙুরোচা ইংস্যাং ফ্রইফুব্যা।’ দিঃ চাঃগা প্রগেলো য়াংসুউরোচা সাঃ ফেংলো চব্যসিই আখাং প্রাংগা য়ুউলো সেঃবৈকেরি। 40ছুগি প্রনা ক্রিমি, চব্যসিই ইংস্যাং লাঃগি য়াং আঙাসারোগো যা প্যাংফুলিঃ?”
41য়াং কেইং ছারারোচা যীশুগো প্রগেলিইরি, “ইংস্যাংচা য়াং মকংরি আঙাসারোগো সেঃবলৈফু অর যা আঙাসারো ইংস্যাংগো আখিং অাতৈং অাসিই আঃফু পিইফু, য়াংসুউরোবামা য়াং চব্যসিই অাখাংগো লাগাইয়া পিইফু।”
42য়াংখা যীশু য়াংসুউরোগো প্রলিইরি, কুবাংরো সেংস্যাংস কেইং চাউমা তাখালি মেফেসিই লঃ,
উক ইং লুকসারো যা ক্যককো মুসুংছুলো বলৈকেতি,
য়াংচারা অালুংচা থাক আফুদেং ক্যক ফ্রইলিইরি;
ফোরাস্যাংচা য়াংচাগো লুকলিইরি,
অর য়াংচারো ঙুরো ম্যাকচিইমা কংগং এংঅফুয়ি ম্রাংরিলঃ’?
43য়াংচা আতুওয়ক ঙা নাংরোগো প্ররি, থাওরা ফোরা নেংঙেংদগো নাংরো মাঃরা, য়াংচাগো দিঃ পুয়েং লুঃউ রাঃফু যাসুউরো বাওয়ামা য়াং নেংঙেংদ আতুওয়ক আকং অলুক লুককি।
44খ্যাংসুউমুছু য়াং ক্যক অাথাকমা ক্যামি, য়াংসুউচা ক্যুব-পিব লাঃফু অর য়াং ক্যকচা যাসুউ অাথাকমা ক্যাফু য়াংসুউচা ছুংবৈং-লাংবৈং ফ্রইফু।
45ফুংগ্রিইরোনা কেইং ছারারোচা যীশু তাঃরা হচাগো ক্রালো, নালিগেচাগা যীশুচা কুঃরো চাঃগাগো প্ররি। 46য়াংখা য়াংসুউরোচা যীশুগো ফেংফু ক্রিগেলিইরি য়িগিলি লুঃউরোগো ক্রকলো য়াংসুউরো মাপ্যাংগেলিই আক্রংগা লুঃউরোচা যীশুগো রিসিই ম্হেকেতি।
Currently Selected:
মথি 21: BBSRMZ
Highlight
Share
Copy
Want to have your highlights saved across all your devices? Sign up or sign in
